1MAKABE 16
16
A Simo kamb tõoga a Kendebe
1A Zã kẽnga Gezɛr n wilg a Simo a Kendebe sẽn sɩng n maand bũmb ninga. 2A Simo boola a kom-kẽems a yiibã, a Zɩɩda ne a Zã n yeel-ba: «Ade, maam ne m kẽem-dãmb la m buuda zãnga, tõnd zaba ne Israyɛl bɛɛbã tɩ d paooda n tãag rũnna. Woto d fãaga a Israyɛl naoor wʋsgo. 3Marsã mam kʋʋlame, la ne Yĩngr-Soab pãngã, yãmb ket n yaa pẽba. M buuda yĩnga, deeg-y maam ne m kẽema zĩiga n tɩ tak zabre la Wẽnd na yɩ y sõangda!» 4B bao neb tus pisi tẽnga pʋga n paas wed-dʋʋdba tɩ b na n tak zabr ne a Kendebe. B tɩ gãanda Modin. 5Beoog sẽn vẽege b le rɩka sore, neb ka tɛk la b seg yã: nao rãmba la wed-dʋʋdba. Kʋɩlg n yaool n da be sʋka. 6A Zã yik n teeg n yalsa ne a nebã. La a sẽn mik tɩ kʋɩlga rʋʋgr rabeem tar-b lame a lʋɩɩ taoore. A neba sẽn yã rẽ b fãa pʋga a poore. 7A welga tãb-biisa sags a yiibu n yals wed-dʋʋdba sʋka. Bɛɛba me ra tara wed-dʋʋdb wʋsgo. 8B sẽn peeb tõntõogo la a Kendebe sẽn ning tĩiga la yẽ ne a tãb-biis ka tɛk lʋɩ-la b kũum lʋɩɩse. Sẽn põs-ba zoe n kẽe zabr kõn-ling-m doog a ye pʋga. 9A Zã kẽem a Zɩɩda paama sãmpogre. A zã n dig a Kendebe n ta Kedrõ, tẽng ninga a sẽn da maneg n me wã. 10Sẽn zoe-ba tɩ kẽe Azot tɩ b yõog-b bugum n kʋ tus a yi. A Zã lɛɛg n dɩka Zɩɩda sor ne laafi.
A Simo paamda sãmpogre
11A Abubas biig a Ptoleme n waa n lebg Zeriko kombere. A ra tara wanzurf la sãnem wʋsgo 12t'a ra yaa maan-kʋʋd kãsenga rɛɛmba. 13Dẽ la wilg-m-meng kẽe a sũurẽ t'a tʋlg n lebg tẽnga soaala n baood n na n kʋ a Simo ne a kamba. 14A Simo ra yiime n na n gilg n ges a neba zãab yaa wãn wãna, tẽnga pʋgẽ. Yẽnda ne a Matatiyas la a Zɩɩda waa Zeriko. Yɩɩ kiuug piig la a ye soaba, Sobat kiuugu, yʋʋmd koabg la pisopoe la a yope soaba. 15A Abubas biig reeg-b-la ne zãmbo, Dok roog pʋga a sẽn da me a menga toore. Neb la a reng n solg rooga pʋga n yaool n zĩndg a Simo ne a nebã n kõ-b rɩɩbo. 16A Simo ne a kamba sẽn dɩ la b yũ n tɩge, a Ptoleme yika ne a nebã. B bʋʋga a Simo rɩɩba zĩigẽ, dẽ tɩ ned kam zãada a sʋʋga. B kʋ-la a Simo ne a kamb a yiibã la a rakõap kẽere. 17Yɩɩ woto la a Ptoleme maan zãmbo n lebs beedo a sõm soaba. 18A Ptoleme toola dĩma sebre n wilg-a t'a bõsda sõngre n paam n deeg tẽnsã n kõ-a. 19A tʋma neb kẽer Gezɛr tɩ b tɩ kʋ a Zã. A toola a tãnsoaben-dãmba sebre tɩ b waa a nengẽ t'a kõ-b wanzurf, sãnem la kũun a taaba. 20A tʋma kẽer tɩ b kẽ Zerizalɛɛm n soog a wẽnd doogã la a tãngã. 21Ned n maan neere n deng taoore n wilg a Zã tɩ b kʋ-la a ba la a ba-biisi. A soaba tol n paasame tɩ neb a taab n wat a kʋʋbo. 22A wʋma rẽ t'a neng sobge. A yõka sẽn da wat-b na n kʋ-a wã n koode a sẽn bãng tɩ b ra wata a meng kʋʋb yĩnga. 23A Zã tʋʋm a taabã, a zabã, raoodã a sẽn maana, a sẽn le maneg Zerizalɛɛm lalsã n yiki, n paas yɛl a taaba, 24fãa gʋlsa sebr a ye zugu, n wilg a maan-kʋʋra tʋʋmd sẽn yɩ a soaba, a sẽn deeg a ba zĩiga.
Currently Selected:
1MAKABE 16: SSDC98
Highlight
Copy
Compare
Share
Want to have your highlights saved across all your devices? Sign up or sign in
SEBR SÕNGO © Alliance Biblique du Burkina Faso, 1998.