2KORẼNT RÃMBA 5

1Tõnd sẽn mi, yaa tɩ zãnd ning tõnd sẽn be a soab tẽngrã, tẽng zug ka, sã n wa sirgi, doog a to n be arzãna, Wẽnnaam sẽn segl d yĩnga; roog sẽn kõn sirg abada, sẽn ka ninsaalb nug tʋʋmde la sẽn zao yĩngri. 2D zĩi ne nintãm tẽng zug rooga pʋga n dat ne d sũur fãa tɩ yĩngr dooga me n dogl a zugu. 3La rẽ yaa d sã n dat tɩ b wa mik tɩ d ka zĩ d zaala, d yera fuugu. 4D zĩi d tẽng zug rooga pʋga n tar waasgo la yɩɩre; yaa rẽ me la d dat fuuga yeelgre n yɩɩd a yeegre; d datame n yeelg fuug a yiib soabã n bʋʋg pipi soabã, tɩ vɩɩma rɩ sẽn tõe n ki a soabã. 5Yaa Wẽnd meng n togl tõnd so-kãnga tɩ bãmb meng n lembd tõnd a Vʋʋsem Sõng kũuni.

6D sũur kegma, ba d sã n mi tɩ kaoos yɩnga ne yĩng ning d sẽn zĩ ne a soaba zãagda tõnd ne Soaalã. 7D kẽnda ne tẽebo, ka ne d nina vẽenem ye. 8Tõnd sũur kegmame tɩ d datẽ meng n bas d yĩn-kãnga n tɩ yegl Soaala. 9Dẽ n so tɩ d vɩ ne d yĩngã bɩ d yeeg-a lame n base, d sẽn baood la Wẽnd daab maaneg bala. 10#Rm 14,10. D sẽn ya a soab fãa, d na n yaasa d kãre bʋʋda raare tɩ ned kam fãa reeg a tʋʋm keoore, tʋʋmd ninga a sẽn tʋme, a sẽn da waa n ket ne a yĩnga, a tʋʋm sõng wala a tʋʋm wẽnga.

Zamaan paalg la d rata

11D sẽn zoet tɩ d Soaala waoogr na n wa pa sãoog yĩnga, d modgdame tɩ ninsaalba reegd d saglgo. Sã n ya ne Wẽnde, d miime tɩ d yɛsa d kãr bãmb taoore la d tẽedame tɩ d sũura me rɩga pɛɛlg fas bãmb taoore. 12Ka lʋɩɩs d meng taoorã la d rat n le sɩng ye, d wilgd-y lame bala bũmb ning sẽn be d nengẽ tɩ y zug tõe n zẽk ne tõndo la woto y na lub sẽn ka baood b meng pẽgre ne sẽn solg sũurẽ, n baood-a ne sẽn puk yɩnga. 13Sɩda d sã n gomame waa d yika gãeemdo, yaa Wẽnd yĩnga; d sã n gomd tɩ tũudẽ, yaa yãmb yĩnga. 14A Zezi Krista nonglem rɩdgd-d lame tɩ d tags tɩ nin-yend sã n ki neb fãa yĩngã, fãa n naag n ki. 15B sẽn ki fãa gill yĩngã, yaa sẽn na n yɩlẽ tɩ sẽn vɩ-ba da le vɩɩnd d mens yĩng ye, b vɩɩnd sẽn ki-a la sẽn vʋʋg-a b fãa yĩnga.

16Woto wã d ka le ne ned ba a ye ne ninsaal nif ye. Ba sã n da yaa ne d nin la d da bãng Krista, ka boto marsã la d le get-b ye. 17Ned sã n kẽ Krista a lebga nin-paalle, nin-kʋdga menemame tɩ paalla led a zĩiga. 18La fãa yita Wẽnd nengẽ, bãmb tũu Krista maasem n maneg tõnd yell ne bãmba la b kõ-d la maneg taab yell ne tʋʋmd ning d sẽn deeg b nengẽ wã. 19Yaa Wẽnd meng n da tũ Krista n wẽnemd dũniya neng n le tees b menga; b basa ninsaal beegr taale la b kõ tõnd zelemd sẽn na n gom n maneg d taab yelle. 20Tõnd tʋʋmd yaa d deeg Krista zĩiga. Yaa wa Wẽnd sagenda ne tõnd noore. Yaa rẽ la d kot-y, Krista yĩnga, tɩ y maneg y yell ne Wẽnde. 21Ned ning sẽn ka maana yel-wẽndã, yẽ soab basame tɩ b tʋk-a yel-wẽnd zɩɩb, sẽn na n yɩlẽ bala tɩ Wẽnd tũ a maasem n pids tõnd ne b sõmblem.

Currently Selected:

2KORẼNT RÃMBA 5: SSDC98

Highlight

Copy

Compare