2KORẼNT RÃMBA 6

1Tõnd sẽn ya Wẽnd tʋʋm-tʋmdba, tõnd wɩngda ne yãmba tɩ y da sãam Wẽnnaam kũuna b sẽn kõ yãmba ye. 2#Iz 49,8. Yaa bãmb meng n yete: «Barka daare mam deega f kosgo, fãagra raare, mam sõnga foom.» Barka raar la rũnna, fãagra raar la rũnna. 3Woto tõnd ka rata tɩ d manesem rɩgl kugr tɩ ned lak n lʋɩ tɩ b wa sãbs tõnd tʋʋmda ye. 4D sẽn pa rat tɩ b sãbs-dã, d modgda d manesem fãa pʋgẽ, n wilg tɩ d yaa Soaala tʋʋm-tʋmdba. D modgdame n sak lengr daar fãa, n sak sũ-beedo la yɩɩre, 5#Tv 16,23. n sak pãbre, n sak roog kõom, n nams zab-kaoodb nusẽ, n sak yaamse, n bas gõeem, n bas rɩɩbo; 6d modgda ne pʋ-peelem, ne bãngr baoobo, ne sũ-tõogo, ne taab sʋk ningri, ne yam sõng baoobo, ne taab nonglem akɩka, 7ne sɩd togsgo, ne Wẽnd pãng bõsgo; d modgda ne sõmblem zab-teed baoobo, zab-teed sẽn zãad n digd bɛɛba, zab-teed sẽn zãad n ligind bɛɛba. 8D sakda waoor wala paoore, yʋ-sõng wala yʋ-beedo. B rõt-d la zirẽ-beedo tɩ d yaool n togsd sɩda, 9b get-d la wa neb sẽn ka yʋʋre, tɩ d yʋʋr yaool n sãt zĩig zãnga, wa neb kũum sẽn yãk raare tɩ d vɩɩma wɩɩd ne pãnga; wa neb sẽn tog ne kaase la d yaool n ka kiid ye; 10wa neb sẽn zĩ ne sũ-sãamse, tɩ d noor yõgemd daar fãa; wa naong rãmba tɩ wʋsg yaool n tũud tõnd n lebgd arzɛk rãmba; wa nug sẽn ka zãad rãmba, tɩ d yaool n tar fãa.

D tog n maana gũusgu

11D ka gom-y ne zoe-nif ye, Korẽnt dãmba, d laka d sũur zãng n wilg yã. 12D sũurẽ wã weer be y yĩnga, ya y meng sũurẽ la weer paoogda. 13Lebs-y tõnd d yel-sõmde; m gomda ne yãmb wala m kamba, m kot-y lame tɩ y pak y sũura yalengo.

14Da lagem-y ne bu-zẽmbã n dɩk so-yɛng ye. Bõe n be sẽn baood-a sõmblem la sẽn baooda wẽng sʋka, vẽenem ne lik sʋka? 15Sɛdg bʋg buud n tõe n sede Krista ne a Beliar sʋka? Sẽn tẽed-a la sẽn ka tẽed-a lagemda taab bõe yĩnga? 16#Man 26,12; Ez 37,27; 1Ko 3,16; 6,19. Wẽnd dooga maanda a wãn n wa lebg wẽn-naandsa rẽnna? Tõnd yẽne la Wẽnd vɩɩga roogo tɩ b meng n yeele: «M na n ti-la m doog bãmb sʋka la m na n zĩnd n paka bãmba. M na yɩ b Wẽnd tɩ bãmb yɩ m neba.» 17#Iz 52,11. Dɩlla welg-y mens ne nin-bãmba, bas-y-b kɛɛnga. Da sɩɩs-y bõn-dẽgd buud ye tɩ m zaka noor na pak y yĩnga. 18#2S 7,14; 1Nar 17,13; Iz 43,6; Zr 31,9. M na yɩ Ba y yĩnga tɩ y me yɩ m kom-dibli la m kom-pugli — Pãng-Soaba-Wẽnd n yeele.

Currently Selected:

2KORẼNT RÃMBA 6: SSDC98

Highlight

Copy

Compare