Alawii 19
19
Mawatho makoniĩ ũtheru na kĩhooto
1Ningĩ MWATHANI akĩĩra Musa atĩrĩ, 2#Alaw 11.44-45; 1Pet 1.16 “Arĩria mũingĩ wothe wa Isiraeli ũwĩre atĩrĩ: No nginya mũtuĩke atheru, tondũ niĩ, MWATHANI Ngai wanyu, ndĩ mũtheru. 3#Tha 20.8,12; Gũco 5.12,16 O mũndũ no nginya atĩĩage nyina na ithe, na amenyagĩrĩre Thabatũ yakwa. Niĩ nĩ niĩ MWATHANI Ngai wanyu.
4 #
Alaw 26.1; Tha 20.23; 34.17; Gũco 27.15 “Mũtikaanathaathaiye mĩhianano, kana mwĩthondekere ngai cia cuuma. Niĩ nĩ niĩ MWATHANI Ngai wanyu.
5“Atĩrĩĩrĩ, hĩndĩ ĩrĩa mũrĩkoragwo mũkĩruta nyamũ ya igongoona rĩa thaayũ-rĩ, rũmagĩrĩraai mawatho marĩa ndĩmũheete, na niĩ nĩndĩrĩamũkagĩra igongoona rĩu. 6Nyama cia igongoona rĩu no nginya irĩrĩagwo mũthenya o ro ũcio rĩarutwo, kana ũrĩa ũrũmĩrĩire. No rĩĩrĩ, nyama iria irĩkoragwo itigarĩĩte o nginya mũthenya wa gatatũ no mũhaka icinagwo na mwaki, 7tondũ irĩ na thaahu. Ndirĩamũkagĩra igongoona rĩu mũndũ o wothe angĩrĩa nyama icio mũthenya ũcio. 8Na rĩĩrĩ, mũndũ o wothe ũrĩa ũrĩcirĩaga no nginya acookagĩrĩrwo nĩ ũũru wake, tondũ wa gũthaahia kĩndũ kĩrĩa nyamũrĩirwo. Mũndũ ũcio-rĩ, nĩarĩingatagwo kuuma harĩ andũ aakwa.
9 #
Alaw 23.22; Gũco 24.19-22 “Hĩndĩ ĩrĩa mũkũgetha irio mĩgũndainĩ yanyu-rĩ, mũtikaagethage o nginya ndeereinĩ ciayo, kana mũcookage na thuutha kũhaara irio iria mũtigĩĩtie mũkĩgetha. 10O na ningĩ mũtigaatuage thabibũ ciothe kuuma mĩgũndainĩ yanyu ya mĩthabibũ, kana mũngaanagie thabibũ iria igwĩte thĩ, citigageei nĩ ũndũ wa athĩĩni na ageni. Niĩ nĩ niĩ MWATHANI Ngai wanyu.
11 #
Tha 20.15,16; Gũco 5.19,20 “Mũtikaanaiye, kana mwĩke maũndũ na njĩra ya maheeni, kana mũheenanie mũndũ na ũrĩa ũngĩ. 12#Tha 20.7; Gũco 5.11; Mat 5.33 Mũtikaanehĩte na maheeni mũkĩgwetaga rĩĩtwa rĩakwa, ũguo nĩgũcambithia rĩĩtwa rĩakwa. Niĩ nĩ niĩ MWATHANI Ngai wanyu.
13 #
Gũco 24.14-15
“Ndũkaanathioranie mũndũ ũrĩa ũngĩ, kana ũiye indo ciake. Ndũkaanaraarie mũcaara wa mũndũ wandĩkĩĩte wĩra wa kĩmũthenya. 14#Gũco 27.18 Ndũkaanarume gĩtaigua kana ũige kĩndũ mbere ya gĩtumuumu nĩguo kĩhĩngwo. No nginya ũũhe gĩtĩĩo. Niĩ nĩ niĩ MWATHANI Ngai wanyu.
15 #
Tha 23.6-8; Gũco 16.19 “Ndũgaatuanagĩre na njĩra ĩtarĩ ya kĩhooto; ndũkaanacaaĩre mũndũ nĩ ũrĩa e mũthĩĩni, kana wĩtigĩre mũndũ nĩ ũrĩa e mũtongu. Tuagĩra mũndũ ũrĩa ũngĩ na kĩhooto. 16Ndũkaanoorũũre ũgĩcuukaga andũ arĩa angĩ. Ndũkaanage kũruta ũira hĩndĩ ĩrĩa mũndũ ũrĩa ũngĩ araciirithio angĩkorwo ũira ũcio waku no ũmũteithĩrĩrie. Niĩ nĩ niĩ MWATHANI.
17 #
Mat 18.15
“Ndũgaikarage ũrĩ na rũthũũro ngoroinĩ yaku nĩ ũndũ wa mũndũ ũrĩa ũngĩ; iguithanagia naake nĩguo ndũkaae kwĩhia nĩ ũndũ wake. 18#Mat 5.43; 19.19; 22.39; Mar 12.31; Luk 10.27; Aro 13.9; Agal 5.14; Jak 2.8 Ndũkeerĩhagĩrie harĩ mũndũ o wothe kana ũmũiguagĩre ũũru; eendaga mũndũ ũrĩa ũngĩ o ta ũrĩa wĩyendeete wee mwene. Niĩ nĩ niĩ MWATHANI.
19 #
Gũco 22.9-11
“Atĩrĩĩrĩ, no nginya mwathĩkagĩre maathani maakwa. Mũtigaaciarithanagie mahiũ maanyu. Mũtikaahandage mĩgũnda yanyu mbeũ mĩthemba ĩĩrĩ, kana mwĩhumbage nguo ithondekeetwo na ndigi cia mĩthemba ĩĩrĩ.
20“Mũndũ mũrũme ũrĩa ũrĩkomaga na mũndũ wa nja ngombo ũigĩĩtwo nĩ mũndũ mũrũme ũngĩ, no mũndũ wa nja ũcio akorwo ndakũũrĩĩtwo kana akaheeo wĩyathi wake, no nginya ũhoro ũcio wao ũtuĩragio. O eerĩ-rĩ, matikooragagwo, tondũ mũndũ wa nja ũcio no ngombo. 21No rĩĩrĩ, mũndũ mũrũme ũcio no nginya atware ndũrũme mũromoinĩ wa Hema ya gũtũnganwo ĩrĩ ta igongoona rĩake rĩa kũrĩhĩra meehia. 22Naake mũthĩnjĩri Ngai akĩrute igongoona rĩa kũmũhoroheria na ndũrũme ĩyo nĩ ũndũ wa meehia maake, naake Ngai akĩmuohere wĩhia ũcio eekĩĩte.
23“Atĩrĩĩrĩ, rĩrĩa mũgaakinya bũrũri wa Kanaani na inyuĩ mũhande mĩtĩ o yothe ya matunda, mũtikaanarĩe matunda maayo mwaka wa mbere nginya wa gatatũ; mũkaamoonaga ta marĩ na thaahu. 24Mwakainĩ wa ĩna-rĩ, nĩmũkaamũra matunda maayo moothe, mũmaandutĩre niĩ MWATHANI, marĩ ta igongoona rĩa kũnjookeria ngaatho. 25Mwakainĩ wa ĩtaano no mũrĩe maciaro maayo. Mweka ũguo wothe-rĩ, mĩtĩ yanyu nĩgaaciaraga matunda maingĩ. Niĩ nĩ niĩ MWATHANI Ngai wanyu.
26 #
Kĩa 9.4; Alaw 7.26-27; 17.10-14; Gũco 12.16,23; 15.23; 18.10 “Mũtikaarĩage nyama o yothe ĩrĩ na thakame. Mũtigeekage ũndũ o wothe na njĩra ya kũragũria. 27#Alaw 21.5; Gũco 14.1 Mũtikaarengagĩrĩre njuĩrĩ thikĩrĩrioinĩ, o na kana mũrengagĩrĩre nderu. 28Mũtikeeharũrangage o na kana mwĩtemengage mĩĩrĩ rĩrĩa mũracakaĩra arĩa makuĩte. Niĩ nĩ niĩ MWATHANI.
29 #
Gũco 23.17
“Mũtikaanatũme airĩĩtu aanyu magwatwo nĩ thaahu na ũndũ wa kũmatua maraaya hekaarũinĩ. #19.29 Maraaya ma hekaarũ: Andũ a nja aya maakoragwo hekaarũinĩ cia Akanaani iria ciathaathayagĩrio ngai cia kuongererithia maciaro. Gwetĩkĩĩtio atĩ mũndũ angĩakomire na maraaya macio nĩangĩagĩire na maciaro maingĩ ma mũgũnda na ma mahiũ. Mũngĩgeeka ũguo-rĩ, nĩmũkaagarũrũkĩra ngai ingĩ, naguo bũrũri ũkĩiyũre waganu. 30#Alaw 26.2 No nginya mũmenyagĩrĩre Thabatũ, na mũheage gĩtĩĩo handũ haakwa harĩa haamũre. Niĩ nĩ niĩ MWATHANI.
31 #
Gũco 18.11; 1Sam 28.3; 2Atha 23.4; Isa 8.19 “Mũtikaahooyage kĩrĩra kũrĩ andũ arĩa maragũranagĩra na arĩa maroganaga. Mweka ũguo-rĩ, nĩmũrĩgwatagwo nĩ thaahu. Niĩ nĩ niĩ MWATHANI Ngai wanyu.
32“Heagaai andũ arĩa akũrũ gĩtĩĩo, na mũmenyiihagĩrie, na mũũheage o na niĩ gĩtĩĩo. Niĩ nĩ niĩ MWATHANI.
33 #
Tha 22.21; Gũco 24.17-18; 27.19 “Mũtikaahinyagĩrĩrie ageni arĩa maratũũrania na inyuĩ bũrũriinĩ wanyu. 34Meekageei o ta ũrĩa mwĩkaga Aisiraeli arĩa angĩ, na mũmeendage o ta ũrĩa inyuĩ eene mwĩyendeete. Inyuĩ-rĩ, ririkanagaai atĩ hĩndĩ ĩmwe mwarĩ ageni bũrũriinĩ wa Misiri. Niĩ nĩ niĩ MWATHANI Ngai wanyu.
35 #
Gũco 25.13-16; Thim 20.10; Eze 45.10 “Mũtikaaheenagie mũndũ o wothe na ũndũ wa kũhũthĩra ithimi cia maheeni cia gũthima ũraihu, ũritũ, kana ũingĩ. 36No mũhaka mũhũthagĩre ratiri cia ma, na mahiga ma gũthima ma ma, o na ithimi cia ma. Niĩ nĩ niĩ MWATHANI Ngai wanyu ũrĩa wamũrutire bũrũri wa Misiri. 37Atĩrĩĩrĩ, athĩkagĩraai mawatho na maathani maakwa moothe. Niĩ nĩ niĩ MWATHANI.”
Currently Selected:
Alawii 19: GKNDC
Highlight
Copy
Compare
Share
Want to have your highlights saved across all your devices? Sign up or sign in
Gikuyu Common Language Bible with DC © Bible Society of Kenya, 2014, 2018.
