रोमी 4
4
अब्राहामला विश्वास
1दाहेन्से ङन्ना म्हेमे अब्राहामसे तिग लोप्जी भिबा ताम खाह्रङ् लसी पाङ्से? 2चुदे अब्राहाम थेसे लबा गेग्याम परमेश्वरदा सेम निबा म्हि दोबा हिन्सम घमण्ड लम्याङ्सेला मुबा। तर परमेश्वरला ङाच्छा चा आहिन। 3तिग्दा भिसम परमेश्वरला बचनरी चुह्रङ् लसी भ्रिबा मुला, “अब्राहामसे परमेश्वरदा विश्वास लजी। थेतबासेलमा अब्राहामदा परमेश्वरसे ह्राङदा सेम निबा म्हि हिन्ना भिसी सुङ्जी।”#ठुङ् १५:६; गला ३:६ 4च्यागो, खालै म्हिसे गे लसी याङ्बा ज्याला चा दान आहिन, तर थे थेसे याङ्तोःबा ज्याला हिन्ना। 5जुन म्हिसे गेथोरी भर आलना पाप माफ लसी ह्राङदा सेम निबा म्हि स्होबा परमेश्वरदा विश्वास लला, थेह्रङ्बा म्हिदा विश्वासग्यामसेन परमेश्वरसे ह्राङदा सेम निबा म्हि हिन्ना भिसी सुङ्ला। 6गेग्याम आहिन, तर विश्वासग्याम परमेश्वरदा सेम निबा म्हि दोबा म्हिगदेदा दाऊद ग्लेसे परमेश्वरला बचनरी चुह्रङ् भिसी पाङ्बा मुला,
7“जुन म्हिला पाप माफ लबा मुला, ओच्छे नाइबा गेग्याम माफ याङ्बा मुला,
थे म्हिसे परमेश्वरग्याम मोलम याङ्ला,
8जुन म्हिला परमप्रभुला ङाच्छा तिगै दोष आत,
थे म्हिसे परमेश्वरग्याम ल्हानान मोलम याङ्ला।”#व्हाइ ३२:१-२
9दाऊदसे पाङ्बा चु मोलम खतना लबा यहूदीगदेला लागिरी जे हिन्ना? आहिन। तर खतना आलबा अर्गु य्हुल्ला म्हिगदेला लागिरीनोन हिन्ना। तिग्दा भिसम अब्राहामसे परमेश्वरदा विश्वास लबासेलमा थेदा परमेश्वरसे ह्राङदा सेम निबा म्हि हिन्ना भिसी सुङ्जी भिबा ताम य्हाङसे पाङ्मुला। 10अब्राहामदा परमेश्वरसे खाइमा ह्राङदा सेम निबा म्हि हिन्ना भिसी सुङ्जी? थेसे ठिम अन्छार खतना लबा भन्दा ङाच्छा कि लिच्छा? खतना लबा भन्दा ङाच्छान सुङ्बा हिन्ना। 11लिच्छा अब्राहामला खतना लजी, ओच्छे चु चा थेसे लबा विश्वाससे लमा खतना तबा भन्दा ङाच्छान परमेश्वरसे थेदा ह्राङदा सेम निबा म्हि भिसी सुङ्बाला चिनु हिन्ना। ओच्छे खतना आलसैनोन विश्वासग्याम परमेश्वरसे ह्राङदा सेम निबा म्हि भिसी सुङ्बा जम्मान म्हिगदेला थे आबा दोगै भिसी चुह्रङ् तबा हिन्ना।#ठुङ् १७:१० 12थेह्रङ् लसी यहूदीगदे खतना लबासेलमा आहिन, तर थेनीगदेसेनोन अब्राहामसे ह्रङ् लसीन खतना लबा भन्दा ङाच्छा विश्वास लसी भ्रबासेलमान अब्राहाम थेनीगदेलाएनोन आबा दोजी।
विश्वासग्यामसे जे कबुल लबा स्हे याङ्ला
13अब्राहामदेन थेला सन्तानगदेदा जम्बुलिङला हक पिन्ना भिसी लबा कबुल चा थेसे ठिम अन्छार गे लबासेलमा आहिन। तर थेसे लबा विश्वासग्याम परमेश्वरदा सेम निबा म्हि दोबासेलमा हिन्ना।#ठुङ् १७:४-६; २२:१७-१८; गला ३:२९ 14चुदे ठिम अन्छार भ्रबा म्हिगदेसे थे हक याङ्बा हिन्सम म्हिगदेसे लबा विश्वास गेआखेल्बा तसेला मुबा। ओच्छे परमेश्वरसे पिन्ना भिसी लबा कबुलएनोन गेआखेल्बा तसेला मुबा।#गला ३:१८ 15तिग्दा भिसम ठिम अन्छार आभ्रमा परमेश्वरसे म्हिगदेदा सजाय पिन्ना। तर ठिमनोन आरेमाहेन्से थेरी आज्यबा गेनोन आत।
16परमेश्वरसे लबा दयामायाथोरी भर लगै भिसी थेसे लबा कबुल विश्वासग्यामसे जे याङ्ला। चुनोन दयामायाग्यामसे अब्राहामला जम्मान सन्तानसे परमेश्वरसे लबा कबुल याङ्ला भिसी पक्का लबा मुला। चु कबुल ठिम मुबागदेला लागिरी जे आहिन, तर अब्राहामसे ह्रङ्बान विश्वास लबा म्हिगदेला लागिरीनोन हिन्ना। तिग्दा भिसम अब्राहाम य्हाङ जम्मालान आबा हिन्ना।#गला ३:७ 17परमेश्वरसे अब्राहामदा सुङ्बा ताम बचनरी चुह्रङ् लसी भ्रिबा मुला, “ङाइ एदा जम्मान य्हुल्ला म्हिगदेला आबा स्होबा मुला।” सिबागदेदा सोना लबादेन आरेबा स्हेदा बचनग्यामसेन स्होबा परमेश्वरदा अब्राहामसे विश्वास लजी, थेतबासेलमा परमेश्वरला ङाच्छा अब्राहाम य्हाङ जम्मालान आबा दोजी।#ठुङ् १७:५
18कोला तला भिसी आशनोन आरेबा धुइरी परमेश्वरसे “एला कोलागदे मुला सार ह्रङ्नोन झ्यासीन झ्याआखम्बाधोना तला” भिसी सुङ्बा तामरी अब्राहामसे आश लसी विश्वास लजी। चुह्रङ् लसी थे ल्हानान य्हुल्ला म्हिगदेला आबा दोजी।#ठुङ् १५:५ 19अब्राहाम ओस्पन ग्यार्जा गिक दिङ् तसी जिन्बा मुबा। ह्राङ खेप्बा दोसी सिइ लबा धुइ तजी भिबा तामदेन ह्राङला म्रिङ साराग्याम कोला आत भिबा ताम था याङ्सीनोन थेला विश्वास कमजोर आतनी।#ठुङ् १७:१७ 20परमेश्वरसे पिन्ना भिसी कबुल लबा तामरी थेसे तिगै शङ्का आलना विश्वासरी झन कोङ्सी चिजी, ओच्छे चुनोन विश्वासग्याम थेसे परमेश्वरदा मानदेन जयजयकार लजी। 21परमेश्वरसे लबा कबुल पूरा लखम्ला भिबा ताम अब्राहामदा पक्का था मुबा। 22चुह्रङ्बा विश्वाससे लमान परमेश्वरसे अब्राहामदा “ह्राङदा सेम निबा म्हि हिन्ना” भिसी सुङ्जी। 23“परमेश्वरदा सेम निबा म्हि हिन्ना” भिसी सुङ्बा ताम चा अब्राहामला लागिरी जे भ्रिबा आहिन, 24तर य्हाङला लागिरीनोन भ्रिबा हिन्ना। य्हाङ न्हङ्ला जुन म्हिसे य्हाङला प्रभु येशूदा सिबाग्याम सोना लबा परमेश्वरदा विश्वास लला, थेनीगदेदाएनोन परमेश्वरसे ह्राङदा सेम निबा म्हि हिन्ना भिसी सुङ्ला। 25य्हाङला पाप माफ लबाला लागिरी परमेश्वरसे येशूदा सिपुङ्जी, ओच्छे य्हाङदा परमेश्वरदा सेम निबा म्हि स्होबाला लागिरी थेदा सिबाग्याम सोना लजी।#यशै ५३:४-५
© 2026 Eastern Tamang Language Team and Wycliffe Bible Translators, Inc.