रोमी 5
5
विश्वासग्याम याङ्बा शान्ति
1थेतबासेलमा य्हाङला विश्वासग्यामसेन य्हाङ परमेश्वरदा सेम निबा म्हि दोबा मुला। ओच्छे य्हाङला प्रभु येशू ख्रीष्टग्यामसेन य्हाङ परमेश्वरदेन छ्याम ढिक्बा मुला। 2ख्रीष्टसे य्हाङला विश्वासग्याम य्हाङदा परमेश्वरला दयामायारी भबा मुला। ओच्छे दन्दे य्हाङ थेनोन दयामायारी भ्रबा मुला। य्हाङदा परमेश्वरसे ह्राङला य्हालदेन शक्ति पिन्ना भिसी घ्रेन आश थोसी य्हाङ ताङ्बा मुला। 3चुदे जे आहिन, दुखरीनोन य्हाङ ताङ्बा मुला। तिग्दा भिसम य्हाङसे दुख नाजी भिसम अझन य्हाङ विश्वासरी पाको म्हि दोला। 4दुख नाखम्बा शक्तिसे य्हाङदा पाको म्हि स्होला। य्हाङ पाको म्हि तमाहेन्से य्हाङदा आश खमुला। 5य्हाङसे लबा चु आशसे य्हाङदा दुख ङ्हम्ना आल। तिग्दा भिसम य्हाङदा पवित्र आत्मा पिन्बा मुला, थेनोन पवित्र आत्मासे य्हाङला सेमरी परमेश्वरला माया थान्सी पिन्बा मुला।
6य्हाङसे थार्बा याङ्बाला लागिरी तिगैनोन लबारी आखम्बा धुइरी ख्रीष्ट य्हाङ पापीगदेला लागिरी परमेश्वरसे तोगब लबा धुइरी सिजी। 7परमेश्वरसे कुल्बा अन्छार भ्रबा म्हिला लागिरी खालै म्हि चुह्रङ् लसी आसि। ज्यबा गे लबा म्हिला लागिरी खालै म्हिसे सिबारी म्हाइला तला। 8तर य्हाङ पापी तसैनोन ख्रीष्ट य्हाङला लागिरी सिसी य्हाङदा परमेश्वरसे ह्राङला माया उन्जी।
9दाहेन्से ख्रीष्ट सिसी ह्राङलान काग्याम य्हाङदा परमेश्वरदा सेम निबा म्हि दोना लजी। चुदे जे आहिन, परमेश्वरग्याम य्हाङसे नातोःबा सजायग्यामसेनोन य्हाङदा जोगब लला। 10य्हाङ परमेश्वरला शत्रु मुबा धुइरीन थेला झा ख्रीष्ट सिसी य्हाङदा परमेश्वरदेन छ्याम ढिक्ना लजी। होते जे आहिन, प्रभु येशू ख्रीष्ट सिबाग्याम सोबासेलमा य्हाङदा थार्ना लला भिबा ताम झन पक्का तबा मुला। 11चुदे जे आहिन, तर दाहेन्से प्रभु येशू ख्रीष्टसे य्हाङदा परमेश्वरदेन छ्याम ढिक्ना लसी ह्राङला ह्रो स्होबासेलमा य्हाङ परमेश्वरदेन छ्याम गिक तसी ताङ्बा मुला।
आदमदेन ख्रीष्ट
12जम्मान भन्दा ङाच्छा आदम भिबा म्हि गिकग्याम जम्बुलिङरी पाप खजी, ओच्छे पापग्याम काल खजी। चुह्रङ् लसीन जम्मान म्हिगदेसे पाप लबासेलमा जम्मानथोरी काल खजी।#ठुङ् ३:६ 13परमेश्वरसे मोशादा ठिम पिन्बा भन्दा ङाच्छाहेन्सेन जम्बुलिङरी पाप मुबा। तर ठिम आरेबासेलमा पापला हिसाब आरेमुबा। 14तसैनोन आदमला धुइहेन्से मोशाला धुइधोनाला जम्मान म्हिगदेदा कालसे शासन लजी। थे म्हिगदेसे लबा पाप आदमसे लबा पाप ह्रङ्बा आतसै थेनीगदे सितोःजी। आदमसे लबा गेग्याम जम्मान म्हि सिजी, ओच्छे ख्रीष्टसे लबा गेग्याम चा जम्मान म्हि सोजी।
चुह्रङ् लसी च्यामा आदम लिच्छा फेप्खबा ख्रीष्ट ह्रङ्बान मुबा। 15तर पापला सय फाबारी परमेश्वरसे य्हाङदा पिन्बा मोलमदेन आदमसे लबा पाप ल्हानान फरक मुला। तिग्दा भिसम म्हि गिकसे लबा पापग्याम ल्हानान म्हिगदे सिजी। तर लिच्छा फेप्खबा येशू ख्रीष्टसे चा परमेश्वरला ल्हानान घ्रेन दयामायाग्याम म्हिसे फातोःबा पापला सय फासी ल्हानान म्हिगदेदा सोना लजी।
16थेह्रङ् लसीन परमेश्वरसे होह्रङ्नोन पिन्बा मोलम चा म्हि गिकसे लबा पाप भन्दा फरक मुला। म्हि गिकसे पाप लबासेलमा जम्मान म्हिगदेदा दोषी भिसी पाङ्जी, ओच्छे सजाय नातोःजी। तर ल्हानान पाप लमाहेन्से लिच्छा फेप्खबा होह्रङ्नोन याङ्बा मोलमग्याम परमेश्वरसे म्हिगदेला पाप माफ लसी तिगै दोष आरेबा म्हि स्होजी। 17म्हि गिकसे पाप लबासेलमा जम्मान म्हिगदेथोरी कालसे शासन लजी। तर परमेश्वरसे ल्हानान दयामाया लसी येशू ख्रीष्ट गिकग्याम होह्रङ्नोन पिन्बा मोलमग्याम य्हाङदा परमेश्वरदा सेम निबा म्हि हिन्ना भिसी सुङ्जी। थे मोलम याङ्बा म्हिगदे येशू ख्रीष्टग्याम सोला ओच्छे शासन लला।
18थेतबासेलमा म्हि गिकसे लबा पापग्यामसे जम्मान म्हिगदेसे सजाय नातोःजी, थेह्रङ् लसीन म्हि गिकसे लबा ज्यबा गेग्यामसेन जम्मान म्हिगदे परमेश्वरदा सेम निबा म्हि दोःसी जुकजुकधोनाला जुनी याङ्बारी खम्ला। 19म्हि गिकसे परमेश्वरसे कुल्बा ताम आङ्यन्बासेलमा ल्हानान म्हिगदे पापी दोजी। थेह्रङ् लसीन म्हि गिकसे परमेश्वरसे कुल्बा ताम ङ्यन्बासेलमा ल्हानान म्हि परमेश्वरदा सेम निबा म्हि दोजी। 20जम्मान म्हिगदेसे गादे पाप लबा चिम भिसी था याङ्गै भिसी परमेश्वरसे ठिम पिन्जी। तर जति पाप बढब तबान निजी परमेश्वरसे झन ल्हानान दयामाया लजी। 21थे धुइरी पापसे कालग्याम म्हिगदेदा शासन लबा ह्रङ् लसी दन्दे परमेश्वरला दयामायासे शासन लबान मुला। थे दयामायासे य्हाङदा परमेश्वरदा सेम निबा म्हि स्होसी य्हाङला प्रभु येशू ख्रीष्टग्याम जुकजुकधोनाला जुनी पिन्बान मुला।
© 2026 Eastern Tamang Language Team and Wycliffe Bible Translators, Inc.