रोमी 3
3
1थेह्रङ् भिसम यहूदी तसी तिगै फाइदा आरे? ओच्छे खतना लसी तिगै याङ्बा आरे? 2जम्मान तामरी फाइदा मुला। तिग्दा भिसम परमेश्वरसे जम्मान भन्दा ङाच्छा यहूदीगदेदा ह्राङला बचन जिम्मा पिन्बा मुबा। 3चुदे थेनीगदे न्हङ्ला कोइ कोइसे परमेश्वरला बचनथोरी विश्वास लबारी आखम्नी भिदेमा तिग परमेश्वर विश्वास लबारी आखम्बा परमेश्वर हिन्ना? 4अँहँ, आहिन। म्हि फट्टा तसैनोन परमेश्वर चा सत्य मुला। बचनरीनोन चुह्रङ् भिसी भ्रिबा मुला,
“ह्राङसे सुङ्बा तामग्यामसेन
ह्राङ सत्य परमेश्वर हिन्ना भिसी
म्हिगदेसे था याङ्ला,
ओच्छे निसाफ लबा धुइरी ह्राङसेन ढाला।”#व्हाइ ५१:४
5तर चुदे य्हाङसे लबा आज्यबा गेग्याम परमेश्वर ज्यबा मुला भिसी पाङ्मुला भिसम य्हाङसे तिग पाङ्से? परमेश्वरसे य्हाङदा आज्यबा गेला सजाय पिन्मा तिग परमेश्वरसे अन्याय लबा तला? ङाइ म्हिसे म्हन्बा अन्छार पाङ्बा हिन्ना। 6चु ताम हिन्नोन आहिन, चुदे परमेश्वरदेन छ्याम निसाफ लबा अधिकार आरेबा हिन्सम खाह्रङ् लसी परमेश्वरसे जम्बुलिङला निसाफ लबारी खम्ला? 7चुदे ङाइ पाङ्बा लुसीला तामग्याम परमेश्वरदा ल्हानान मान तला, ओच्छे परमेश्वर सत्य हिन्ना भिसी उन्ना भिसम तिग्दा परमेश्वरसे ङादा झन पापी म्हिदा ह्रङ् लसी निसाफ लबा? 8ज्यबा तबारी पाप गे लसै तला भिबा ताम खाइमै ज्यबा तला? तसैनोन कोइ कोइ म्हिगदेसे य्हाङसे चुह्रङ् पाङ्जी भिसी खिसी लसी दोष लबा मुला। चुह्रङ् लसी दोष लबा म्हिगदेदा चा ठीक सजाय पिन्ना।
पाप आलबा म्हि खालै आरे
9दाहेन्से अर्गु य्हुल्ला म्हिगदे भन्दा य्हाङ यहूदीगदे चा परमेश्वरला ङाच्छा ज्यबा म्हि हिन्ना? आहिन। यहूदीगदेदेन अर्गु य्हुल्ला म्हिगदे जम्मान पापला तहरी मुला भिसी ङाइ ङाच्छान पाङ्सी जिन्बा मुला। 10बचनरीनोन चुह्रङ् भिसी भ्रिबा मुला
“परमेश्वरसे म्हन्बा अन्छार भ्रबा म्हि खालै आरे,
गिकनोन आरे।#व्हाइ १४:१-३; ५३:१-३
11घोबा म्हि खालै आरे,
ओच्छे परमेश्वरदा म्हाइबा म्हिएनोन खालै आरे।
12जम्मान म्हिसे परमेश्वरदा ख्लाबा मुला,
गे खेल्बा म्हि गिकनोन आरे,
ओच्छे ज्यबा गे लबा म्हिएनोन गिकनोन आरे।
13थेनीगदेला ओल्गोङ् आल्हुबा धुर्सा ह्रङ्बान मुला,
ओच्छे स्य्हान्दोदा फसब लबारी थेनीगदेला लेसे लुसीला ताम जे लमुला।
थेनीगदेला सुङ्री चा पुख्रीला ह्रङ्बान बिख मुला।#व्हाइ ५:९; १४०:३
14थेनीगदेला सुङ्से केःबादेन
आज्यबा ताम जे पाङ्मुला।#व्हाइ १०:७
15थेनीगदे म्हि साइबारी हतार तमुला।#यशै ५९:७-८
16थेनीगदे भ्रबा ग्यामरी
दुखदेन नाश जे तमुला।
17ओच्छे शान्तिला ग्यामदा
थेनीगदेसे ङोसेबान आरे।
18थेनीगदे परमेश्वर म्राङ्सी आलोङ्मुला।”#व्हाइ ३६:१
19परमेश्वरसे मोशादा पिन्बा ठिमरी भ्रिबा ताम चा थे ठिमला तहरी चिबा म्हिगदेदा पाङ्बा ताम हिन्ना भिसी य्हाङदा था मुला। थेतबासेलमा जम्बुलिङला जम्मान म्हिगदे परमेश्वरला ङाच्छा राप्तोःला। थे धुइरी खालैसेन तिगै पाङ्बारी आखम। 20तिग्दा भिसम थे ठिम अन्छार गे लसी खालैनोन परमेश्वरदा सेम निबा म्हि दोबारी आखम। ठिमसे चा म्हिसे लबा पाप उन्सी पिन्बा जे हिन्ना।#व्हाइ १४३:२; गला २:१६
विश्वासग्यामसे जे परमेश्वरदा सेम निबा म्हि दोमुला
21तर दन्दे परमेश्वरसे म्हिदा खाह्रङ् लसी ह्राङदा सेम निबा म्हि स्होमुला भिबा ताम य्हाङसे म्राङ्बा मुला। चु ताम ठिमदेन अगमवक्तागदेसेनोन पाङ्बा मुला। तर चु चा ठिम अन्छार गे लसी आहिन। 22चुह्रङ् लसीन येशू ख्रीष्टदा विश्वास लबा जम्मान म्हिगदे विश्वासग्यामनोन परमेश्वरदा सेम निबा म्हि दोबा मुला। तिग्दा भिसम परमेश्वरला ङाच्छा जम्मान म्हि गिकनोन हिन्ना।#गला २:१६ 23जम्मान म्हिगदेसे पाप लबा मुला, थेतबासेलमा परमेश्वरला घ्रेन य्हालग्याम थारेङ् तबा मुला। 24तर परमेश्वर चा दया लबा परमेश्वर हिन्ना, थेसे दयामाया लसी म्हिगदेदा तिगै आकिन्ना होह्रङ्नोन ह्राङदा सेम निबा म्हि स्होबा मुला। तिग्दा भिसम ख्रीष्ट येशूसे जम्मान म्हिला लागिरी ह्राङसेन सजाय नासी म्हिगदेदा पापला सजायग्याम फेबा मुला। 25परमेश्वरसे ख्रीष्टला काग्याम य्हाङदा ह्राङदेन छ्याम ढिक्ना लबाला लागिरी ख्रीष्टदा बलि स्होसी पुइखजी। ओच्छे ख्रीष्टसे बगब लबा का य्हाङला लागिरी हिन्ना भिसी विश्वास लबा म्हिला पाप माफ लबा मुला। चुह्रङ् लसी परमेश्वरसे ह्राङसे लबा निसाफ ठीक हिन्ना भिसी उन्बा मुला, ख्रीष्ट फेप्खबा भन्दा ङाच्छा परमेश्वरसे नासी म्हिगदेला पापगदेदा तिगै वास्ता आलनी। 26दन्दे चा ह्राङ तिगै दोष आरेबा परमेश्वर हिन्ना भिसी उन्बाला लागिरी परमेश्वरसे चुह्रङ् लजी। परमेश्वरसे ह्राङ ठीक निसाफ लबादेन येशूथोरी विश्वास लबा म्हिगदेग्याम स्य्हान्दो म्हिगदेदाएनोन ह्राङदा सेम निबा म्हि स्होबारी खम्बा परमेश्वर हिन्ना भिसी उन्बाला लागिरी थेह्रङ् लबा हिन्ना।
27थेह्रङ् भिसम य्हाङसे तिग तामला लागिरी घमण्ड लसे? घमण्ड लतोःबा तामनोन आरे। तिग्दा भिसम चु गे खजिबै ठिम अन्छार भ्रसी तबा आहिन। तर विश्वास लबासेलमान तबा हिन्ना। 28थेतबासेलमा ठिम अन्छार गे लसी आहिन। तर विश्वास लसी जे परमेश्वरदा सेम निबा म्हि दोबारी खम्ला भिबा ताम य्हाङदा था मुला। 29तिग परमेश्वर यहूदीगदेला जे परमेश्वर हिन्ना? तिग अर्गु य्हुल्ला म्हिगदेला चा परमेश्वर आहिन? थे अर्गु य्हुल्ला म्हिगदेलाएनोन परमेश्वर हिन्ना। 30जम्मालान परमेश्वर गिकनोन हिन्ना। खतना लबा म्हि मुसै, खतना आलबा म्हि मुसै#३:३० “खतना लबा म्हि” भिबा चा यहूदीगदे हिन्ना, ओच्छे “खतना आलबा म्हि” भिबा चा अर्गु य्हुल्ला म्हिगदे हिन्ना।, थेनीगदे जम्मादान थेनीगदेसे लबा विश्वासग्यामसेन परमेश्वरसे ह्राङदा सेम निबा म्हि स्होबा हिन्ना।#ठिम ६:४; गला ३:२० 31चुदे य्हाङसे विश्वासग्याम परमेश्वरदा सेम निबा म्हि दोखम्ला भिसी पाङ्मा तिग परमेश्वरसे मोशादा पिन्बा ठिमदा चा नाश लबा हिन्ना? पक्कान आहिन, बरू य्हाङसे थे ठिमदा पूरा लबा हिन्ना।
© 2026 Eastern Tamang Language Team and Wycliffe Bible Translators, Inc.