मत्ती 6
6
एसे सुटुक्क पिन्गो
1 “एनीगदेसे लबा ज्यबा गेगदे म्हिगदेदा उन्बाला लागिरी भिसी आलउ। थेह्रङ् लजी भिसम स्वर्गरी धन्छ्याबा एनीगदेला परमेश्वर आबासे एनीगदेदा तिगै इनाम आपिन। थेतबासेलमा होशियार तसी चिउ। #
मत्ती २३:५
2 “एनीगदेसे प्राङ्बोगदेदा पिन्बा धुइरी कप्टीगदेसे ह्रङ् लसी म्हिगदेदा थेःना लसी आभ्रउ। तिग्दा भिसम थेनीगदे म्हिगदेसे मान लगै भिसी यहूदीगदे ह्रुप तबा दिमगदेदेन ग्यामरीक्यार निसी स्य्हान्दोदा थेःना लसी भ्रमुला। च्यागो, एनीगदेसे ङाला ताम ङ्यन्गो, थेनीगदेसे याङ्तोःबा इनाम याङ्सी जिन्बा मुला। 3तर एसे प्राङ्बोगदेदा पिन्बा धुइरी एला दाहिने यासे तिग लबान मुला थे ताम एला देब्रे यासेनोन था आयाङ्गै। 4थेतबासेलमा एसे प्राङ्बोगदेदा पिन्बा स्हे खालैदा था आतगै। थेह्रङ् लजी भिसम खालैसे था आयाङ्बा तामएनोन था याङ्बा परमेश्वर आबासे एदा इनाम पिन्ना।
येशूसे प्रार्थनाला बारेरी लोप्बा
लूका ११:२-४
5 “थेतबासेलमा एसे प्रार्थना लबा धुइरी कप्टीगदेसे ह्रङ् लसी प्रार्थना आलउ। तिग्दा भिसम थेह्रङ्बा म्हिगदेसे म्हिगदेदा उन्बाला लागिरी यहूदीगदे ह्रुप तबा दिमगदेदेन ग्यामला कुनीरीक्यार राप्सी प्रार्थना लबारी सेम लमुला। च्यागो, एनीगदेसे ङाला ताम ङ्यन्गो, थेह्रङ्बा म्हिगदेसे याङ्तोःबा इनाम याङ्सी जिन्बा मुला। #
लूका १८:१०-१४
6तर प्रार्थना लबा धुइरी ए कोठा न्हङ्री वाङ्सी म्राप ढुङ्गो, ओच्छे खालैसे आम्राङ्बा ग्लारी धन्छ्याबा परमेश्वर आबादेन छ्याम प्रार्थना लउ। जमाहेन्से खालैसे आम्राङ्बा तामएनोन म्राङ्बा परमेश्वर आबासे एदा इनाम पिन्ना। 7ओच्छे प्रार्थना लमा अर्गु य्हुल्ला म्हिगदेसे ह्रङ् लसी होह्रङ्नोन आक्रिङ्गो। तिग्दा भिसम ह्रेङ्बा ह्रेङ्बा प्रार्थना लजी भिसम परमेश्वरसे थेःमुला भिसी थेनीगदेसे म्हन्मुला। 8थेतबासेलमा एनीगदे थेनीगदे ह्रङ्बा आदोगो। तिग्दा भिसम एनीगदेसे ह्रीबा भन्दा ङाच्छान एनीगदेदा तिग तिग स्हे तोःबा मुला, थे एनीगदेला परमेश्वर आबादा था मुला।
9 “तर एनीगदेसे चा चुह्रङ् लसी प्रार्थना लउ,
‘स्वर्गरी धन्छ्याबा ङन्ना परमेश्वर आबा,
ह्राङदा#६:९ चु पदरी ग्रीक बाइबलरी “ह्राङला छानदा मान लगै” भिसी भ्रिबा मुला। तर मूल अर्थ चा परमेश्वरदा मान तगै भिबा हिन्ना। जम्मासेन मान लगै।
10 ओच्छे जम्मानथोरी ह्राङला शासन खगै,
ओच्छे ह्राङसे म्हन्बा ताम स्वर्गरी पूरा तबा ह्रङ्नोन
चु जम्बुलिङरीनोन पूरा तगै।
11 ङन्से धिन धिननोन चतोःबा स्हे ङन्दा तिनी पिन्गो।
12 ङन्दा बिरोध लसी पाप लबागदेदा
ङन्से माफ लबा ह्रङ् लसी
ह्राङसेनोन ङन्ना पाप माफ लसी पिन्गो।
13 ओच्छे ङन्दा पापरी फसब तबा ग्यामरी भ्रआपुङ्गो,
तर शैतानग्याम फेसी थान्गो।
ह्राङला य्हुल्सादेन शक्ति ओच्छे ह्राङला मान
सदनना लागिरी ह्राङलान हिन्ना, आमेन।’ # ६:१३ “ह्राङला य्हुल्सादेन शक्ति ओच्छे ह्राङला मान सदनना लागिरी ह्राङलान हिन्ना, आमेन।” चु पदला ताम चा ल्हानान ह्रङ्बा ग्रीक बाइबलरी भ्रिबा आरे।
14 “एनीगदेदा बिरोध लसी पाप लबागदेदा एनीगदेसे माफ लजी भिसम स्वर्गरी धन्छ्याबा परमेश्वर आबासेनोन एनीगदेदा माफ लला। #
मर्कू ११:२५-२६
15तर एनीगदेसे म्हिगदेदा माफ आलनी भिसम परमेश्वर आबासेनोन एनीगदेदा माफ आल।
फोइथान चिसी प्रार्थना लबा
16 “एनीगदेसे फोइथान चिसी प्रार्थना लबा धुइरी कप्टी म्हिगदेसे ह्रङ् लसी ली धोपधोप लसी आभ्रउ। तिग्दा भिसम थेनीगदेसे फोइथान चिसी प्रार्थना लबा म्हिगदेसे म्राङ्गै भिसी ली धोपधोप लसी भ्रमुला। थेतबासेलमा एनीगदेसे ङाला ताम ङ्यन्गो, थेनीगदेसे याङ्तोःबा इनाम याङ्सी जिन्बा मुला। 17तर एनीगदेसे चा फोइथान चिसी प्रार्थना लबा धुइरी ली ख्रुसी थोबोरी छ्युगु फोर्गो। 18ओच्छे ए फोइथान चिसी प्रार्थना लबा म्हिगदेसे आहिन, तर खालैसे आम्राङ्बा ग्लारी धन्छ्याबा परमेश्वर आबासे म्राङ्गै। ओच्छे खालैसे आम्राङ्बा तामएनोन म्राङ्बा परमेश्वर आबासे एदा इनाम पिन्ना।
ह्राङला लागिरी स्वर्गरी धन सम्पत्ति सोसी थान्गो
लूका ११:३४-३६; १२:३३-३४; १६:१३
19 “ह्राङला लागिरी जम्बुलिङरी धन सम्पत्ति सोसी आथान्गो, तिग्दा भिसम जम्बुलिङला धन सम्पत्तिगदे बुलुङ्देन खियासे चला, ओच्छे दिम फोसी य्होगदेसे य्हो लसी भोर्ला। #
याकू ५:२-३
20बरू ह्राङला लागिरी स्वर्गरी धन सम्पत्ति सोसी थान्गो। तिग्दा भिसम थेरी बुलुङ्सेएनोन आच, खियासेएनोन आच, ओच्छे य्होएनोन वाङ्सी य्हो आल। 21तिग्दा भिसम जुन ग्लारी एनीगदेला धन सम्पत्ति मुला, एनीगदेला सेमएनोन थेरीन तला।
22 “मी ल्हुइला लागिरी नाङ्सल ह्रङ्बान हिन्ना। थेतबासेलमा एला मी ज्यबा मुसम एसे ज्यना लसी म्राङ्ला। 23तर एला मी न्होङ्जी भिसम एसे तिगै आम्राङ्। थेह्रङ् लसीन एला सेमला नाङ्सल सिजी भिसम एला लागिरी जम्मान धोपधोप तला।
24 “खालैसेनोन मालिक न्हीला गे लबारी आखम। तिग्दा भिसम थेसे गिकदा हेला लला, ओच्छे स्य्हान्दोदा माया लला। अथवा थेसे गिकसे भिबा ताम ङ्यन्ना, ओच्छे स्य्हान्दोदा वास्तान आल। थेह्रङ् लसीन एनीगदेसेनोन परमेश्वरदेन धन सम्पत्ति न्हीलान गे लबारी आखम।
धन्दा सुर्दा आलउ
लूका १२:२२-३१
25 “थेतबासेलमा एनीगदेसे ङाला ताम ङ्यन्गो, सोबाला लागिरी तिग चसे, तिग थुङ्से ओच्छे तिग क्वान्से भिसी धन्दा सुर्दा आलउ। तिग्दा भिसम चबा थुङ्बादेन क्वान्बा भन्दा एनीगदेला प्राणदेन ल्हुइ घ्रेन आहिन। 26मुरी चरागदेदा च्यागो, थेनीगदेसे न्ह ब्लु ढ्वला, न्ह बाली दुइसी पोप लला, तर स्वर्गरी धन्छ्याबा एनीगदेला परमेश्वर आबासेन थेनीगदेदा ख्वामुला। तिग चरागदे भन्दा मि एनीगदे घ्रेन आहिन? 27एनीगदे न्हङ्ला खालैसे धन्दा सुर्दा लसी छिन्नङ्ला लागिरी आयु काप्खम्ला?
28 “तिग्दा एनीगदेसे क्वान्ना लागिरी धन्दा सुर्दा लबा? ह्रिरी सार्बा म्हेन्दोदा च्यागो, थेसे गेएनोन आलमुला, क्वानएनोन आरामुला। तसैनोन थे खाह्रङ् लसी ल्हेमुला! 29एनीगदेसे ङाला ताम ङ्यन्गो, सोलोमन ग्लेदेन ल्हानान धन सम्पत्ति मुसैनोन थेसे क्वान्बा क्वान थे म्हेन्दोगदे न्हङ्ला गिक तेबै जेःबा आरेमुबा।#१ ग्ले १०:४-७; २ काइ ९:३-६ 30तिनी ल्हेबान निसी न्हङ्गर खर्माहेन्से मेरी फर्बा छेदा मि परमेश्वरसे चुह्रङ् लसी जेःना लमुला भिसम झन एनीगदेदा परमेश्वरसे जेःना आल? खाइ एनीगदेला विश्वास? 31थेतबासेलमा तिग चसे? तिग थुङ्से? ओच्छे तिग क्वान्से? भिसी धन्दा सुर्दा आलउ। 32तिग्दा भिसम परमेश्वरदा ङोआसेबा अर्गु य्हुल्ला म्हिगदेसे चा चु जम्मान स्हे म्हाइमुला। तर स्वर्गरी धन्छ्याबा परमेश्वर आबासे एनीगदेदा चु जम्मान स्हे तोःला भिसी था मुला। 33थेतबासेलमा ङाच्छा एनीगदेसे परमेश्वरला य्हुल्सा म्हाइगो ओच्छे थेसे म्हन्बा अन्छार गे लउ। जमाहेन्से परमेश्वरसे एनीगदेदा चु जम्मान स्हे पिन्ना। 34थेतबासेलमा न्हङ्गरला लागिरी धन्दा सुर्दा आलउ। तिग्दा भिसम न्हङ्गरदा तोःबा स्हे न्हङ्गरनोन याङ्ला। तिनीला लागिरी तिनीलान दुख मुला।
© 2026 Eastern Tamang Language Team and Wycliffe Bible Translators, Inc.