मत्ती 5
5
येशूसे म्हिगदेदा लोप्बा
लूका ६:२०-२३
1ल्हानान म्हिगदे खबा म्राङ्सी येशू गङ्री फेप्सी धन्छ्याजी। जमाहेन्से चेलागदेएनोन येशूला क्युर्सीन चिजी। 2ओच्छे येशूसे थेनीगदेदा चुह्रङ् भिसी लोप्बारी छ्याइजी,
3 “परमेश्वरथोरी जे आश लबागदे#५:३ “परमेश्वरथोरी जे आश लबागदे” भिबा तामदा ग्रीक बाइबलरी आत्मारी प्राङ्बोगदे भिसी भ्रिबा मुला।से परमेश्वरग्याम मोलम याङ्ला,
तिग्दा भिसम स्वर्गला य्हुल्सा थेनीगदेलान हिन्ना।
4 सेम क्राबागदेसे परमेश्वरग्याम मोलम याङ्ला
तिग्दा भिसम थेनीगदेदा परमेश्वरसे ताङ्ना लला। #
यशै ६१:२-३
5 सोझो म्हिगदेसे परमेश्वरग्याम मोलम याङ्ला,
तिग्दा भिसम थेनीगदेसे जम्बुलिङला अधिकार याङ्ला। #
व्हाइ ३७:११
6 परमेश्वरसे म्हन्बा अन्छार भ्रबारी म्हाइबागदेसे परमेश्वरग्याम मोलम याङ्ला,
तिग्दा भिसम परमेश्वरसे थेनीगदेदा भङ् पिन्ना। #
यशै ५५:१-२
7 स्य्हान्दोदा दया लबागदेसे परमेश्वरग्याम मोलम याङ्ला,
तिग्दा भिसम थेनीगदेसे दया याङ्ला।
8 ज्यबा सेम थोबागदेसे परमेश्वरग्याम मोलम याङ्ला,
तिग्दा भिसम थेनीगदेसे परमेश्वरदा म्राङ्ला। #
व्हाइ २४:३-४
9 स्य्हान्दोदा ढिक्ना लबागदेसे परमेश्वरग्याम मोलम याङ्ला,
तिग्दा भिसम थेनीगदे परमेश्वरला झा दोला।
10 म्हिगदेसे दुख पिन्सैनोन परमेश्वरसे म्हन्बा अन्छार भ्रबागदेसे परमेश्वरग्याम मोलम याङ्ला,
तिग्दा भिसम स्वर्गला य्हुल्सा थेनीगदेलान हिन्ना। #
१ पत्रु ३:१४
11 “ङादा विश्वास लबासेलमा म्हिगदेसे एनीगदेदा खिसी लला, दुख पिन्ना, ओच्छे लुसीला ताम पाङ्सी एनीगदेला बिरोधरी जम्मान नाइबा ताम लमाएनोन एनीगदेसे परमेश्वरग्याम मोलम याङ्ला। #
१ पत्रु ४:१४
12थेतबासेलमा एनीगदे ल्हानान ताङ्गो, तिग्दा भिसम स्वर्गरी एनीगदेसे घ्रेन इनाम याङ्ला। एनीगदे भन्दा ङाच्छाला अगमवक्तागदेदाएनोन थेनीगदेसे चुह्रङ् लसीन दुख पिन्बा मुबा।#२ काइ ३६:१६; मूल ७:५२
चजादेन नाङ्सल
मर्कू ९:५०; लूका १४:३४-३५
13 “एनीगदे जम्बुलिङला चजा ह्रङ्बान हिन्ना, तर चजाला ङम्बा स्हे म्हाजी भिसम दोःसी तिग्से ङम्ना लबा? गेआखेल्बासेलमा म्हिसे थेदा भ्याङ्ला, जमाहेन्से म्हिसे नाङ्सी भ्रला।
14 “एनीगदे जम्बुलिङला नाङ्सल हिन्ना। थेतबासेलमा एनीगदेदा जम्मानसेन म्राङ्ला। गङ्री मुबा सहरदा तिगैसेन आघप। #
यूह ८:१२; ९:५ 15म्हिगदेसे नाङ्सल म्रासी फामसे आघप, तर दिमरी मुबा जम्मान म्हिगदेसे म्राङ्गै भिसी नोबा ग्लारी थान्ना।#मर्कू ४:२१; लूका ८:१६; ११:३३ 16चुह्रङ् लसी नाङ्सलसे य्हाल तना लबा ह्रङ् लसी एनीगदेसे ज्यबा गे लसी उन्गो। एनीगदेला गे म्राङ्सी थेनीगदेसे स्वर्गरी धन्छ्याबा एनीगदेला परमेश्वर आबाला जयजयकार लगै।#१ पत्रु २:१२
परमेश्वरसे मोशादा पिन्बा ठिम अन्छार भ्रबा
17 “परमेश्वरसे मोशादा पिन्बा ठिमदेन अगमवक्तागदेसे पाङ्बा ताम भ्याङ्बारी ङा खबा आहिन, तर थे पूरा लबारी खबा हिन्ना। 18एनीगदेसे ङाला ताम ङ्यन्गो, तिग्दा भिसम मुदेन जम्बुलिङ नाश आतदेधोना परमेश्वरसे मोशादा पिन्बा ठिमरी मुबा हिगी गिकएनोन आम्हा।#लूका १६:१७ 19थेतबासेलमा जुन म्हिसे ठिमरी मुबा तामगदे न्हङ्ला जम्मान भन्दा जजा तामदा आङ्यन्ना म्हिगदेदाएनोन थेह्रङ्नोन लपुङ्जी भिसम थे म्हि स्वर्गला य्हुल्सारी जम्मान भन्दा जजा तला। तर जुन म्हिसे ठिमरी मुबा तामगदे ङ्यन्सी म्हिगदेदा थेह्रङ्नोन लपुङ्ला, थे म्हि स्वर्गला य्हुल्सारी जम्मान भन्दा घ्रेन म्हि तला। 20एनीगदेसे ङाला ताम ङ्यन्गो, तिग्दा भिसम एनीगदेसे यहूदी धर्मगुरुगदेदेन फरिसीगदेसे भन्दा ज्यना लसी परमेश्वरसे म्हन्बा अन्छार आलनी भिसम तिगै लसीन एनीगदे स्वर्गला य्हुल्सारी वाङ्आम्याङ्।
बोमो लबारी आत भिसी लोप्बा
21 “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे म्हि आसाइगो, जुन म्हिसे म्हि साइला थेसे सजाय याङ्ला।’ #
थोन्बा २०:१३; ठिम ५:१७ 22तर एनीगदेसे ङाला ताम ङ्यन्गो, जुन म्हिसे खालैदा बोमो लला, थे म्हिसे सजाय याङ्ला, ओच्छे खालैसे स्य्हान्दोदा हेला लजी भिसम थेदा अदालतरी भोर्ला। तर जुन म्हिसे स्य्हान्दोदा ‘ए गेआखेल्बा मूर्ख’ भिसी पाङ्ला, थेदा नर्गला लोङ्बा खबा मेरी युला।
23 “थेतबासेलमा परमेश्वरदा भेटी फुल्बा धुइरी एदेन छ्याम खालै म्हि बोमो खबा मुला भिबा ताम एसे ढन्जी भिसम 24एला भेटी परमेश्वरला मन्दिररी भेटी फुल्बा ग्लाला ङाच्छापट्टि ख्लासी ङाच्छा थे म्हिदेन छ्याम ढिक्गो, ओच्छे एसे ह्राङला भेटी फुल्गो।
25 “एदा मुद्दा युबा म्हिदेन छ्याम अदालतरी निबान लबा धुइरी ग्यामरीन ढिक्गो। आहिन्सम थेसे एदा न्यायाधीशला यारी जिम्मा पिन्ना, ओच्छे न्यायाधीशसे सिपाहीगदेला यारी जिम्मा पिन्ना। जमाहेन्से ए झ्याल्खानरी परब तला। 26एसे ङाला सत्य ताम ङ्यन्गो, एसे जम्मान टाङ्गा आफादेधोना थेग्याम थोन्बारी आम्याङ्।
सेमरी म्हन्बा नाइबा ताम
27 “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘ए स्य्हान्दोला म्रिङ्देन छ्याम ब्रेल्सी आभ्रउ।’ #
थोन्बा २०:१४; ठिम ५:१८ 28तर एनीगदेसे ङाला ताम ङ्यन्गो, जुन म्हिसे खालै म्रिङ्म्हेमेदा नाइबा सेमसे च्याला, थेसे सेमरी थे म्रिङ्म्हेमेदेन छ्याम ब्रेल्सी जिन्बा तला। 29चुदे एला दाहिने मीसे पाप लपुङ्जी भिसम थे मी तेःसी भ्याङ्गो। तिग्दा भिसम एला पूरन ल्हुइ नर्गरी निबा भन्दा मी गिक तेःसी भ्याङ्बान एला लागिरी ज्यबा तला।#मत्ती १८:९; मर्कू ९:४७ 30थेह्रङ् लसीन एदा दाहिने यासे पाप लपुङ्जी भिसम थे या थासी भ्याङ्गो। तिग्दा भिसम एला पूरन ल्हुइ नर्गरी निबा भन्दा एला या गिक थासी भ्याङ्बान एला लागिरी ज्यबा तला।#मत्ती १८:८; मर्कू ९:४३
छोडपत्र
मर्कू १०:११-१२; लूका १६:१८
31 “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘जुन म्हिसे म्रिङ् ख्लाला, थे म्हिसे छोडपत्रला कागज भ्रिसी पिन्गै।’ #
ठिम २४:१-४; मत्ती १९:७; मर्कू १०:४ 32तर एनीगदेसे ङाला ताम ङ्यन्गो, जुन म्हिसे ह्राङला म्रिङ्दा स्य्हान्दोदेन छ्याम ब्रेल्सी आभ्रसैनोन ख्लाला, थेसे ह्राङला म्रिङ्दा स्य्हान्दोदेन छ्याम ब्रेल्सी भ्रबा म्रिङ्म्हेमे स्होला। ओच्छे थे म्रिङ्म्हेमेदेन छ्याम जुन म्हिसे ब्याह लला, थेएनोन ब्रेल्सी भ्रबा तला।#मत्ती १९:९; १ कोरि ७:१०-११
घ्रान आचउ
33 “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे लुसीला ताम लसी घ्रान आचउ, ओच्छे परमेश्वरदेन छ्याम लबा कबुल पूरा लउ।’ #
लेवी १९:१२; झ्याबा ३०:२; ठिम २३:२१ 34-35तर एनीगदेसे ङाला ताम ङ्यन्गो, एनीगदेसे घ्रान चनोन आचउ, स्वर्गला मिनरी तसै, जम्बुलिङला मिनरी तसै एनीगदेसे घ्रान आचउ। तिग्दा भिसम स्वर्ग परमेश्वर धन्छ्याबा ग्ला हिन्ना, ओच्छे जम्बुलिङ परमेश्वरला स्य्हाब न्हेबा ग्ला हिन्ना, ओच्छे यरूशलेम सहर चा जम्मालान ग्ले परमेश्वरला सहर हिन्ना।#याकू ५:१२; यशै ६६:१; मत्ती २३:२२; व्हाइ ४८:२ 36ओच्छे ह्राङला थोबोरी या थान्सी घ्रान आचउ। तिग्दा भिसम एसे क्रा गिकदाएनोन म्लाङ् अथवा तार तना लबारी आखम। 37थेतबासेलमा एनीगदेसे पाङ्बा ताम चा ‘हिन्ना’ भिसम ‘हिन्ना,’ ‘आहिन’ भिसम ‘आहिन’ जे तगै। थे भन्दा ल्हाना ताम चा शैतानग्याम खबा हिन्ना।
नाङ् आफागो
लूका ६:२७-३६
38 “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘मीला साटोरी मी, ओच्छे स्वाला साटोरी स्वा किन्गो।’ #
थोन्बा २१:२४; लेवी २४:२०; ठिम १९:२१ 39तर एनीगदेसे ङाला ताम ङ्यन्गो, एनीगदेदा बिरोध लबागदेदा एनीगदेसे नाङ् आफागो। बरू खालैसे एला दाहिने ग्रम्बारी तोजी भिसम अर्गुपट्टिला ग्रम्बाएनोन तासी पिन्गो। 40खालै म्हिसे एदा बिरोध लसी मुद्दा लमा अदालतसे थेदा एला लबिदा पिन्गो भिजी भिसम थेदा एसे गएनोन पिन्गो। 41चुदे खालै म्हिसे एदा कोस गिकधोना भ्रउ भिसी कर लजी भिसम थेदेन छ्याम कोस न्हीधोना निउ। 42खालैसे एदेन छ्याम ह्रीजी भिसम पिन्गो ओच्छे एदेन छ्याम छे ह्रीबा म्हिदाएनोन छे पिन्गो।
शत्रुदाएनोन माया लतोःबा
लूका ६:२७-२८,३२-३६
43 “परमेश्वरसे मोशादा पिन्बा ठिमरी चुह्रङ् भिसी भ्रिबा तामएनोन एनीगदेसे थेःबा मुला, ‘एसे ह्राङला खिम्जेमदा माया लउ, ओच्छे शत्रुदा हेला लउ।’ #
लेवी १९:१८
44तर एनीगदेसे ङाला ताम ङ्यन्गो, एनीगदेसे ह्राङला शत्रुगदेदा माया लउ, ओच्छे एनीगदेदा दुख पिन्बागदेला लागिरी प्रार्थना लउ। 45चुह्रङ् लजी भिसम एनीगदे स्वर्गरी धन्छ्याबा परमेश्वर आबाला कोलागदे दोला। परमेश्वरसे ज्यबा सेम थोबादेन नाइबा सेम थोबा न्हीलान लागिरी धिनी फेना लबा मुला। ओच्छे परमेश्वरला ङाच्छापट्टि ज्यबा गे लबा म्हिदेन आज्यबा गे लबा म्हि न्हीलान लागिरी नाम ताइना लबा मुला। 46चुदे एनीगदेदा माया लबादा जे एनीगदेसे माया लजी भिसम एनीगदेसे खाह्रङ् लसी इनाम याङ्ला? थेह्रङ् मि तिरो दुइबा म्हिगदेसेनोन आलमुला? लमुला। 47एनीगदेसे ह्राङला ज्योज्यो आलेगदेदा जे मान लजी भिसम स्य्हान्दोगदेसे भन्दा ज्यबा तिग लजी? थेह्रङ् मि अर्गु य्हुल्ला म्हिगदेसेनोन आलमुला? लमुला। 48थेतबासेलमा एनीगदेला स्वर्गरी धन्छ्याबा परमेश्वर आबा खाह्रङ्बा मुला, एनीगदेएनोन थेह्रङ्बान दोगो।”#लेवी १९:२; ठिम १८:१३
© 2026 Eastern Tamang Language Team and Wycliffe Bible Translators, Inc.