मत्ती 7
7
स्य्हान्दोदा दोष आलउ
लूका ६:३७-३८,४१-४२
1 “स्य्हान्दोदा दोष लसी आभ्रउ ओच्छे परमेश्वरसेनोन एनीगदेदा दोष आल। 2तिग्दा भिसम एनीगदेसे खाह्रङ् लसी स्य्हान्दोदा दोष लला, थेह्रङ् लसीन एनीगदेदाएनोन दोष लला। ओच्छे एनीगदेसे जुन दप्बा स्हेसे दप्सी पिन्ना, परमेश्वरसेनोन एनीगदेदा थेनोन दप्बा स्हेसे दप्सी पिन्ना।#मर्कू ४:२४
3 “स्य्हान्दोला गोरी सेः भ्रबा म्राङ्बा म्हिसे ह्राङला गोरी मुइ भ्रबा तिग्दा आम्राङ्बा? # ७:३-५ “ह्राङला गोरी भ्रबा मुइ भिबादेन आलेला गोरी मुबा सेः” भिबा तामदा ग्रीक बाइबलरी “ह्राङला मीरी मुबा मूढादा वास्ता आलना ह्राङला आलेला मीरी मुबा धुलु तेःसी पिन्ना भिसी” भ्रिबा मुला। 4ह्राङला गोरी म्हुइ भ्रबा आम्राङ्बासे खाह्रङ् लसी आलेदा ‘खाइ एला गोला सेः तेःसी पिन्ना भिसी पाङ्खम्ला?’ 5कप्टी, ङाच्छा ह्राङला गोला मुइ तेःगो, ओच्छे जे एसे आलेला गोरी भ्रबा सेः तेःबारी खम्ला।
6 “परमेश्वरदा फुल्तोःबा स्हे नगीदा आपिन्गो, तिग्दा भिसम थेसे एदा ख्राप्बारी खला। ओच्छे ह्राङला मोती ढ्वाला ङाच्छापट्टि आभ्याङ्गो। तिग्दा भिसम थेसे मोती नाङ्सी भ्रला।
प्रार्थना लबारी आँट पिन्बा
लूका ११:९-१३
7 “एनीगदेसे ह्रीसम पिन्ना, म्हाइसम स्याप्ला ओच्छे म्रापरी ढ्वाक ढ्वाक लसम एनीगदेला लागिरी म्राप ठोङ्सी पिन्ना। 8तिग्दा भिसम जुन म्हिसे ह्रीला, थेदा पिन्ना ओच्छे जुन म्हिसे म्हाइला, थेसे स्याप्ला ओच्छे जुन म्हिसे म्रापरी ढ्वाक ढ्वाक लला, थेदा म्राप ठोङ्सी पिन्ना।
9 “एनीगदे न्हङ्ला खालैसे ह्राङला कोलासे गेङ ह्रीमा थेदा युङ्बा पिन्ना? 10खाइमै तार्ङा ह्रीमा थेदा पुख्री पिन्ना? 11एनीगदे पापी तसीनोन ह्राङला कोलागदेदा ज्यबा स्हे पिन्बारी सेमुला भिसम स्वर्गरी मुबा एनीगदेला परमेश्वर आबासे गादे ल्हाना ज्यबा स्हे पिन्ना। 12एनीगदेदा स्य्हान्दो म्हिगदेसे जस्तो व्यवहार लगै भिसी म्हन्बा मुला एनीगदेसेनोन थेनीगदेदा थेह्रङ्बान व्यवहार लउ। तिग्दा भिसम परमेश्वरसे मोशादा पिन्बा ठिमरी मुबादेन अगमवक्तासे लोप्बा मूल ताम चुनोन हिन्ना।#लूका ६:३१
साङ्रो म्रापदेन घ्रेन म्राप
लूका १३:२४
13 “एनीगदे साङ्रो म्रापग्याम वाङ्गो। तिग्दा भिसम घ्रेन म्रापदेन घ्रेन ग्यामसे चा नाश तबा ग्लारी दोना लमुला, चु म्रापग्याम वाङ्बा म्हिगदे चा ल्हानान मुला। 14तर साङ्रो म्रापदेन जजाबा ग्यामसे भ्रमा जुकजुकधोनाला जुनी याङ्मुला। तसैनोन चु ग्यामरी भ्रबा म्हिगदे ल्हाना आरे।
ज्यबा दोङदेन आज्यबा दोङला रो
लूका ६:४३-४४; १३:२५-२७
15 “फट्टा अगमवक्तागदे म्राङ्सी होशियार तसी चिउ, थेनीगदे एनीगदे मुबा ग्लारी ग्यु ह्रङ् लसी खमुला, तर थेनीगदेला सेम चा लोङ्बा खबा फार्बाला ह्रङ्बान तमुला। 16एनीगदेसे रो च्यासी दोङ ङोसेबा ह्रङ् लसी थेनीगदे खाह्रङ्बा म्हि हिन्ना भिबा ताम थेनीगदेला गेग्यामसेन ङोसेला। पुजुला दोङग्याम अङ्गुर आथु ओच्छे देस्यला दोङग्यामएनोन अञ्जीर आथु। 17थेह्रङ् लसीन जम्मान ज्यबा दोङरी ज्यबान रो रोला। ओच्छे आज्यबा दोङरी आज्यबान रो रोला। 18ज्यबा दोङरी आज्यबा रो आरो ओच्छे आज्यबा दोङरीनोन ज्यबा रो आरो। 19आज्यबा रो रोबा जम्मान दोङ थासी मेरी भ्याङ्ला।#मत्ती ३:१०; लूका ३:९ 20चुह्रङ् लसीन थे अगमवक्तागदे खाह्रङ्बा म्हि हिन्ना भिबा ताम एनीगदेसे थेनीगदेला गेग्यामसेन ङोसेखम्ला।#मत्ती १२:३३
21 “ङादा ‘प्रभु, प्रभु’ जे भिबा म्हिगदे स्वर्गला य्हुल्सारी वाङ्बारी आम्याङ्। तर स्वर्गरी धन्छ्याबा ङाला आबासे कुल्बा ताम ङ्यन्बा म्हि जे वाङ्म्याङ्ला। 22‘प्रभु, ङन्से ह्राङला मिन किन्सी अगमवाणी पाङ्बा आहिन? ओच्छे ह्राङला मिन किन्सी ङन्से म्हाङ्गदे ताप्बा आहिन? थेह्रङ् लसीन ङन्से ह्राङला मिन किन्सी ल्हानान उदेकला गेगदे लबा आहिन?’ 23जमा धुइरी ङाइ थेनीगदेदा चुह्रङ् भिसी पाङ्ला, ‘एनीगदेदा ङाइ खाइमै ङोसेबा आरे। पाप गे लबा म्हिगदे, एनीगदे ङा मुबा ग्लाग्याम निउ।’#व्हाइ ६:८
बुद्धि मुबा म्हिदेन मूर्ख म्हिसे स्होबा दिम
लूका ६:४७-४९
24 “थेतबासेलमा जुन म्हिसे ङाइ पाङ्बा ताम ङ्यन्सी थे अन्छार भ्रला, थे म्हि चा कोङ्बा सरी दिम स्होबा बुद्धि मुबा म्हि ह्रङ्बान हिन्ना। 25नाम, भाल बाढीदेन लाबालुङ्सर खसी थे दिमरी टसैनोन थे दिम आफुप्नी। तिग्दा भिसम थेसे कोङ्बा सरी दिम स्होबा मुबा। 26तर जुन म्हिसे ङाइ पाङ्बा ताम थेःसी थे अन्छार गे आल, थे म्हि चा बालुवारी दिम स्होबा बुद्धि आरेबा मूर्ख म्हि ह्रङ्बान हिन्ना। 27नाम, भाल बाढीदेन लाबालुङ्सर खमा थे दिमरी टजी भिसम थे दिम फुप्सी ल्हानान नोक्सान तला।”
28येशूसे चु ताम सुङ्सी जिन्माहेन्से थेरी मुबा म्हिगदे येशूसे लोप्बा म्राङ्सी उदेक तजी। 29तिग्दा भिसम येशूसे थेनीगदेला यहूदी धर्मगुरुगदेसे लोप्बा ह्रङ् लसी आहिन, तर अधिकार मुबा म्हिसे ह्रङ् लसी लोप्बा मुबा।#मर्कू १:२२; लूका ४:३२
© 2026 Eastern Tamang Language Team and Wycliffe Bible Translators, Inc.