Nhiara 9
9
Ra'uli-rawedi Orgahi-Orha'a yoma Nawerta-natailia rira do'oni-halli la plola wawannu
1Hadi de Daud nhiara ya'ulli-yawedni maka ha rala la mak khi' o'tani la mak kwatunu-kwahniara. Rwatunu-rwahniara rlernohora Mut Laben nhiarni:
2Agodia a ralmu tetema pa a'u'uli-uwedi O'a Matroma
me ukot nohora tulanmu-kniarmu hihi'imu-yapyapmu mak karehi-kalawna.
3Agiwra uhe'i-uhepru nohora O'a.
A'u'uli-uwedi reri O'a, yoma O' di de Uplerlawna-Mempulwatnu Makdella Tutullu-Lolo'oni!
4Arwa'lu rwaldioini pa rawlari yoma ra'eramna'nu, Matroma.
Rawlar die honona dudunti-wetwetria pa pala tuinia lol etnu-liolli, me pala matia.
5Yoma la' O lodanmu-hairmu de Muetlia rira plolli-halli la' plol wawannu
pede la'pa Muodnian a lia'a li'ru-tu'nu wawannu.
6Orgahamu maka kukmua lodna-hairi mak kaplin niohor O'a,
me Mpunu-mpuenna riy yatyata-halala pede hota riy rhoratdoin memn oleka ira.
7A arwa'lu ror wut nieka letlawanni honona re de Mpueyata-mpuaniaw momuoga re,
pa la riy id mana hota rhoratdoin oleka tuini-wedni wa.
8 Itmatromlawanni Makdenrer die, ed maka kodi plolli pa nodi liarni.
Nariria liwan genni-mtatan genni totpa hota Nhudi-npara rimormiori nohkeran di wawannu honona.
9Dewade Nawerta-nataili riy honona la noheri woru-lyanti nayanni Nodi rhi'ina-rella.
Yoma la' he-he' makdella hairi-hairi, de E Netlia ir plolli-halli re la' plol wawannu.
10La' Itmatromlawanni Makdenrer die, nanpena ed maka kruwun reri-ka'ahla reria
maka ha radunti-rawetria maka kpolu-kwak rer lia E'a.
11 Matroma! Riy mak katg oleka O' nanpena rha'ara mormiorni la O'a.
Yoma O' edonna Mhortaplinga riy mak kola tieru-kawur nehla la O'a.
12Ya'uli-yawedi rer lia' Itmatromlawanni makodi plolli la' Sion.
Mikot nohora E hihi'ini-yapyapni la'a luwu-a'na lodna-hairi mak kden la noheri woru-lyanti nayanni di.
13Yoma nhioratni nden rer lia' rimormiori mak kterna mak kpolpuolu-khawaun nohora koko'oni-hererni.
Pede riy mak kwunu-kwenna re, Nwahla memna ir hihi'ini-yapyapni de.
14 Matromlawnu ne! Arwa'lu rdeh'a rer a'u!
Dodo'ondi de awuak de matmu reprepar la tulu-lyanti me tlinmu mana Mhuer tiarga la a polpuo'lu.
Matrome! Mtiulla-msiayni a' pua Mulewna a lia' matmiati ralamni
15totpena u'uli-uwed re'ru la'a mak kden Yerusalema re gaini ralamni,
me hota a'g ed maka krarni-krarin nohora yamuki-yahepru,
yoma tniulanmu-sniayanmu mai a'u.
16La'pa hairi-hairi mak edonna katg O'a,
de hota rhokal du'urnu rodia onni la hu'ula-ka'ara maka orgahi ha rahi niana.
Dari miaka kanietra, me tniokal mak ha rwe'ela la' talla liola
hota orgahi nekpa rler targ owa'an la.
17Riy rat niohora de Orgahi-Orha'a Nawerta-nataili rira do'oni-halli la plola wawannu.
Riy maka kyata-khala de orgahi nekpa rhokal gaini, me rwag onni la orgahani hihi'ini-yapyapni owa'ana.
18Matmiati-molmuolu ed maka ktoran reria riy yatyata-halala aranni,
mai luwu-a'na lodna-hairi mak kden la lyanti nayanni mak edon kha'wa nana Uplerlawna.
19Yoma mak kakleha-kaplara re hota Uplerlawna edonna Nhoratdoin memna la,
me la' riy mak kpolu-kwaka mana hota edonna lului-nunuh'rga pa nreiniande nakleha nhia'argeni.
20 Matroma! Mupriri-mukdeda pa Muwerta-mutailla' luwu-a'na, lodna-hairi,
ne yana Mhur niohora rimormiori maka katulu-kapetna inonni la'a Matro'mu gaini.
21Mhi' ira totpena ramta'at nohora diwarni-da'alli Matroma
totpena rat niohora de rimormiori to' ira.
Currently Selected:
Nhiara 9: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
