Nhiara 10
10
Rsumbain pa rwaka Uplerlawna Nukmua riy mak khi' yatyat la' ira
1 Matrome! Emeknekama O' e Mude'u mai ami. Matrome!
Yan olietmu mai ami e! Mumkek rer nieka alier la susa ralamni!
2Riy yatyata-halala re rodi po'oni pa rteman la riy mak kakleha-kaplara re onni pa rwatei-rwahapra ira.
Rolin doinia la, totpena orgahi rmeh'a rler tar lia tototni re ralamni.
3Orgahi nekpa rpo'ona-rpei yoma rlernana hya' ed maka ha rahakhaka.
De riy mak ralamni rapal niana kupna-kai re ralernu-raha'ana Itmatromlawanni nanni me rwanikli-rwayotlia E'a.
4Riy yatyata-halala re edonna rha'wa nana Itmatromlawanni.
Yoma la po'oni re pede edonna rwaror nana Uplerlawna Enmormior lia'a lyanti lawna.
5Riy mak kyata-khala, de rler la ga'a la tniulanni-kniarni honona,
mere ta'enniana rna'erit nana Itmatromlawanni Makdenrer die, lirni-tunnu deullu-tatarni.
Riy yatyata re rahe'i-ramal lia he'-he' to' maka edonna ror ira rkalwiedweda.
6La'a ralma-riorni de riwra hota ir edonna rtut tiar lia'a talla pahakarni,
ne hota rala'a plele'era la'pa nodi liarni.
7Nurnu re rpenpuen lia nhiorghala-wniaghala, kdiorni-kdieheni, lir yata-tun yata.
Wawni re nalgot neka lira-tunu yatyata-halala onnila sukni tia'ala rira.
8-9Rholi wunwunmu la leta-leta totpena rtota rimormiori mak edonna rhala pa rwenna.
Yehwani re emekneka ohpora-ahdiawra la ruwnu-ahla ralamni mak kawuwu-kaweiya mak khakamkamu.
Rler temna mhuakria riy mak kakleha-kaplara nanpena rwasnunnia la dar miaka kanietra ralamni.
10Rru'u-rru' liol pa riwra rte'la la riy mak edonna kwo'la nan inonni,
pa rwakloli-rwaklali miemna la' genni.
11La'a ir wniarorni de Uplerlawna Nhortapling olek ir wa pa hota edonna Nhi' hadom la ira.
Hota edon Nlina-nmata ir nhiolli yatyatni re.
12Mere Matrome! O' de Makdenreri O'a! Mak kla' a Uplerlawnu O'a!
Mhuoratreria riy maka ha rutni-rdahla re, me Mukmua riy yatyata-halala re!
13Hya' ed mak katota-kariei lia riy yatyata-halala re pede edonna rtelan nana-raut nana Uplerlawna,
me edonna rwaror nana hota Uplerlawna Nwahla nan ir hihi'ini-yapyapni rena?!
14Mere Uplerlawnu ne! Nhi'inde Mlin wah'a-mtiakar wah'a re!
O' ed mak klin reri-kmat reria mak kler la susa ralamni pa Mtiulan la ira.
Riy mak edonna kwo'la nan inonni de rawniair to'ola O'a.
O' nanpena ed mak ktulla-ksaynia a'na riy patyata.
15Mtiewarwatia riy yatyata-halala re ror wutga plolli-mneheni.
Mukmua re totpena yana rhi' owa'ana yatyata-halala.
16 Itmatromlawanni Nodi plolli pa emeka Ray pa nodi liarni.
La' riy mak kwatiawu hairi-hairi mak edonna katg E'a,
de Orgahi-Orha'a Ndi'na-nlo'wa doinia ira totpa yana rden owa'an la E nohoni-raini.
17 Matroma! Nhi'inde Omhueri tlinmu la maka ha rutni-rdahla re maka ksumbain rer lia O'a,
ne Muala ruri-lai lia ira.
18A'na riyi patyata ror wut nieka maka ha rutni-rdahla dom to'a,
de O' ed maka kaprir lia lir halli-tun halli re totpena yana rira rhi' owa'an ir pa ramta'ata.
Currently Selected:
Nhiara 10: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
