Nhiara 146
146
Itmatromlawanni Makdenrer die Ntulla-nsayn nan rimormiori ita
1Haleluya! Ya'uli-yawedi la Itmatromlawanni Makdenrer die!
Agiwra gala a ralmu tetema pa u'uli-uwedia E'a.
2Agiwra u'uli-uwedia Itmatromlawanni la' a mormio'ru tetema la' nohkeran di,
de la' lera-lera nekpa wuatunu-wuahniar la Uplerlawna mak kdella tutullu-lolo'oni.
3Yana mhia'ar ralammi la riy maka rodi plolli re,
yoma ir nek de rimormior miaka edonna kodia mori-lewan tiy miy.
4Yoma hota irmati de hota rawali owa'an la tani,
ne hota la ler de nekpa maka ha rwaror taru re honona, ha rmolga re.
5Mere unut lawan la riy maka kha'ar aranni la Yakop Uplerlawanni, de Itmatromlawanni Makdenrer die, mak nhi'inde Ntulla-nsayni rira.
Riy mak kola tieru-kawur nehla la Uplerlawna de plola pa hota nlernana unut lawna.
6E' ed mak khi' nana lyanti nora nohkeran di,
me tah'i lawna nora mniotni re honona.
Orgahi-Orha'a de Nhi' nan hya' ed maka Enakot targa oleka, ne hota Nhi' emkade pa nodi liarni.
7E' ed maka kodniana riy mak riy ratowar reria,
me Nala riy mak kakleha-kaplara re pa rlernana apun pepehera.
Orgahi-Orha'a ed maka kalgota riy makden la roma nhio'la ralamni.
8Me Nhi'a riy maka matni kyata re pa rkalwiedwa.
La'pa mak ktuin olekwa mana Nala pa rapriri,
me Ntulla-nsaynia riy maka kaploi-kaple'era.
9Nruwun reri-na'ahla reria riy mak kado'ona-kadakna la riy nohoni-raini.
E' ed maka ktulan la pat makapalu, me a'na riyi patyata,
mere Nwayotlia riy yatyatni re nnia'ohma-nniakatni.
10 Orgahi-Orha'a de ed maka kla' Ray pia nodi liarni.
Hei makden Sion ee! Uplerlawnami ed maka ktorna-krautu pa nodia la tuwu-tuwu.
Haleluya! Ya'uli-yawedi la Itmatromlawanni Makdenrer die!
Currently Selected:
Nhiara 146: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
