Nhiara 147
147
Mhia'ar aranmi la Orgahi-Orha'a mak kodi plolli ne E' nekpa ed mak ktutga ralam kalwiedni la rimormiori
1Haleluya! Ya'uli-yawedi la Itmatromlawanni! Makdenreri E'a!
La'pa it ta'uli-tawedia Uplerlawna de ya'uli-yawed die nodi it la ha samomuounu.
De la'pa twahniar pa ta'uli-tawedia it Uplerlawanni de, plola pa nlol talanni, me nhi' it pa tahepur reri.
2 Itmatromlawanni Nariria owa'ana Yerusalem la' genni.
La'a riy maka arwalli re rhoplia la noha-rai dom to'a re, de Nodia pa rawal wia.
3Nhi'a riy maka ralamni nmolu-nhelma re pa rler la yamuki-yahepru.
Me Nagapnia mak kamno'a-kamrara honona.
4Ne Nhi' wtiona harahu memna
na'nama Netlia wtiona re genni-tienni me nanni.
5Plola! Orgahi-Orha'a maka itsu'ru-tselma de inponni toto' memna!
E' ed mak kodi plolli-ktaryatu.
Wniarorni-wnialaini kirkira-ralma riorni edonna nla ntutu-nte'a.
6 Itmatromlawanni Na'ala riy maka riy ratowar reri re pa nariria la genni.
Mere la'pa Nlernana riy yatyata re de Nliwra la tan kierna wawannu.
7Mmiai pia twahniar nohora nhiar ya'uli-yawedi la Itmatromlawanni Makdenrer die,
de tala tiwla-prai hitara-fiola ta tamuki-tahepur nohora it Uplerlawanni.
8E ed maka kweran nana kakam makden la lyanti
na'nama Nhi' targa otna pa ntur lia noha wawannu
pa Nhi'a wewna pa nmor lia wo'ora-kawru.
9Nalla nhiurni-wnia'ana re pa ra'ana-remnu.
Me Nal walia la ma'nu akaka a'nani re la'pa polpuolu-hawaunia.
10 Itmatromlawanni ralamni edonna Nwahaka kud mak karuri,
me riy miak kparan lia la' ar ralma#147:10 Yawala Ibrani riwra: “Itmatromlawanni edonna Nwahaka rimormiori maka limni-lakni naruri-nalai.” ho'mana edonan wali.
11Mere ralamni sukni to'ola riy mak khu'ru-khelma ka'unni-kamta'at la' E'a,
de la'a riy mak kha'ar mormiorni la E sniayanni mak kden pa nodi liarni.
12Hei makden Yerusalema! Mi'uli-miwedia mrieililili-mia'mamuaga Itmatromlawanni Makdenrer die nanni.
Hei makden Sion! Mi'uli-miwedi mhiu'ru-mhielma it Uplerlawanni la'a tutullu-lolo'oni.
13Yoma E' ed maka karuri-ka'orat nana miy letmi puohra lawanni nhiarni,
me E' wal pia ed maka ktera-kdema rimormiori makden la hande.
14E' ed maka katiaka nohomi-raimi totpena yana arwalmi re rhi'a kokokna-rariarnia.
Me Nala metma wetra' lawna samomuou na Napehra miy.
15Nhar lirni la hya' maka ha Niwra Nhi'a la nohkerna
dewade honona rwo'ti-rhar wia.
16 Itmatromlawanni Nalernia tah'i muti, de emeknekama ahwa nhiawi,
me Nkuru-nkarga kgar maka kawatu de emeknekama awu li'ina.
17Otan tah'i muti maka ha Nalernia de emeknekama watgo'ola prowta,
pa nhi'nande riy edonna rtahan nana wokni pa rdiwra-rda'ala.
18Dewade Itmatromlawanni Nhar lirni pa ta'hi mut miaka kawat die nmadgerrauru.
Eneuga aranni noma ger ema rwau dioinia la!
19-20 Itmatromlawanni Nakot nohor E nnio'oni la'a Yakopa duratni-waitni.
Nal oleka deullu-tatarni riorni-liaini la makden Israel.
Edonna Nhi' emkade la noha-rai korni pede ir edonna rat mua'ta nie'era-tniatra re!
Mere Nakot nohora hare honona mai makden Israel ami.
Haleluya! Ya'uli-yawedi la Itmatromlawanni Makdenrer die!
Currently Selected:
Nhiara 147: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
