Nhiara 12
12
Rsumbain pa rwaka tniulan la Itmatromlawanni Makdenrer die
1Hadi de Daud nhiar ya'ulli-yawedni maka ha rala la mak khi' o'tani la mak kwatunu-kwahniara. Rwahniar de rlernohora mak ha riwra mak kla' wo'awa:#12:1 La' yawala Ibrani de riwra: “seminit”. Mere makatu Puka mana raplin niohora plollola ha nnia'eratni.
2Niwra: Matromlawnu ne! Mtiulan la mai ami,
yoma riy mak klernohor reri O' ralma-riormu re hadamon olekwa,
ne hota it edon tamkek nan owa'ana ira.
3Riy honona idma na'ohpa-nalahar olek id wa,
ne honona re idma nhi' nur mi'na la' ida.
4 Matroma! Pen Orgahamu Mkaduw nur mi'nani re honona,
totpena la'pa rwer nur la yaltieri de yana rpo'on owa'ana.
5Yoma lirni re riwra: “Hya' to' maka amiwra makota de plolli nek la mai am pia.
Riy ida ta'enniana naplol nohor ami.”
6Noma Itmatromlawanni Niwra:
“Riy yatyata rhi' makakleha-kaplara pa ho'a-waka re,
pede hota A' nianpena ed maka kmai pia kamori-kalewna mak kler la kleha-lara
yoma rwaka tniulan la mai A'u.”
7 Itmatromlawanni Makdenrer die, nnio'oni de itpesiay memna yoma hota plola pa Enhi' nana.
Nnio'oni re Naplol memna, pa emeknekama pi'ra molla maka ha rhuria la'a leli-kdieli.
8-9Rimormiori mak kyata-khala de hota la' meni-meni to' pa etla,
ne nhi'inde riy rrana-rrana ir nhioli-liet yotyota-yatyata re la ltierni,
mere Matroma, O' de ed maka kruwun reria a mormiori mamni,
me Mutiak reri am lia riy yatyata-halala re pa nodi liarni.
Currently Selected:
Nhiara 12: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
