Nhiara 119
119
He' ed mak klernohor reria Itmatromlawanni Makdenrer die deullu-tatarni lirni-tunnu de hota ramuki-rahepur reri
Talan mak kaplola pa tahepuepur reri
1Riy mak edonna kler tar lia do'a-hala mere nlernohor reria Itmatromlawanni deullu-tatarni,
de hota ramuki-rahepur reri!
2De riy maka ka'unni-kamta'ata la'a hya' maka Itmatromlawanni ha Nakot oleka re wa,
pa rala ir ralma ploi-ple'erni pa rat niohor memn E'a,
de hota ralamni rahepuepru.
3Nhiolli-lietni rlernohora Itmatromlawanni ralma-riorni
pa edonna rler la yatni-halli.
4 Matroma, Omuala oleka O deulu-tatarmu pa am matga,
Matroma, totpena amlernohor reria.
5 Matroma, awuak de la'a hya' maka Mukota re,
de agala a ralmu tetema pa liernohor reria.
6La'pa aliernohora hya' maka Omukota re honona,
hota riy edonna rhi' amola-ma'a a'u.
7La'pa agat niohor oleka O lirmu-tunmu mak kaplola-kamneha, maka Omueti oleka re honnona,
de a'u'uli-uwedi re'ru, agodia ih'ru ploi-ralma ple'era.
8A'g e wuahak pa ghu'ru-ghelam la hya' maka Mdieul taru-mtiatar taru re honona.
Yan Muolin limmu-mpue'er rormu la a'u.
Tala it ralamni tetema pa tlernohor reria Itmatromlawanni deullu-tatarni
9La' talan emkameni pede riy makden ma'ta la tuwari-laweru lewatni hota ratiaka inonni pa yana rler la do'a-hala ralamni?
Hota rlernohor reria O lirmu-tunmu de, Matroma totpena yana rler la do'a-hala ralamni.
10Hota agala a ralmu tetema pa gat niohor memn O'a, Matroma.
Yana Muolin doinia a lia pa wuaho'a-wuahai sala O loimu-talanmu.
11O wniatutu-wniaye'emu honona de awuatierun targa la a ih'ru-ralmu,
totpena yana aghi'a do'a-hal la' O'a.
12U'uli-uwedi reria O'a Matroma,
ne awuak pa Mpuatutu-mpuaye' reri a lia'a hya' maka ha Mue'er taru-mtiatar taru oleka re wa.
13Aghar li'ru pa ukot nohora
deulu-tatar maka ha Mue'era-mtiatar taru oleka re wa.
14O nie'ermu-tniatarmu emeknekama re'a-tniar lalawna
mak khi' a ralmu pa nahepuepur reri yoma aliernohor reria.
15Agiwra wuatutu-wuaye'ela hya' maka ha Muetli oleka re wa.
De maka ha Mtiut tiaru re atia'wa reria a nhiortu la' honona.
16La'a hya' maka ha Mukot taru re, de rhi' a' pua a ralmu nahepuepru,
ne hota a'g edonna ghoratdoinia la.
La' emkameni ho'mana riy rler la kropna-krieutu de Itmatromlawanni Makdenrer die deullu-tatarni lirni-tunnu nodi yahe'i-yahepru
17 Matroma! Awuak de Muala ralam kalwiedmu pa nden rer lia a' di makhima-kre' O'a,
totpena amuormiori plalahwa pa utlina-utailla wniatutmu-wniaye'emu re honona.
18Mhuaria a kirkira-ralma rio'ru totpena ania'erit nana
O wniatutmu-wniaye'emu maka mak ksamomuou memna la'a nie'ermu-tniatarmu ralamni.
19Hota a'g edonna muori plalahwa wal lia noh di wawannu
pa awuak de yana Matro'mu Nade'a nie'erni-tniatarni re la' mai a'u.
20A ralma-rio'ru ndawar rer miamainia O deulu-tatarmu,
yoma lera-ler nekpa agiwra plet pa a gat niohora O lirmu-tunmu.
21Ompuolliohora riy maka kpo'ona-kraka
me Mukmua riy maka edonna klernohora O lirmu-tunmu.
22 Matroma, Mual a' pua yana riy rapolu-raliella me rahe'i-ramali a'u,
yoma a'g e ghi'a hadom de aliernohora hya' maka ha Mukota.
23La'pa o'ta-mata maka kodi plolli rawoka-rale'u pua rakot nohora aliolola totpena ral a lia yaw ho'mana
a' di mak khima-kre' O'a de, a'g edonna wo'la nohora re, yoma a'g e wuarora-wualai niohora la'a hya' maka ha Mue'ertaru-mtiatartarg oleka re wa.
24Mak ha Mue'er taru-mtiatar taru re emeknekama nnio'a-niatu maka klohni-kpalmua a ralmu
nhi'nande a ralmu nahepru.
Ralamni-riorni totpena nlernohor reria Itmatromlawanni Makdenrer die lirni-tunnu deullu-tatarni
25A'ukpo'pa targa a lia'a koda-awu ralamni yoma nhi' pa amuat wia! Matrome!
Mual a pua alier owa'an la mormiori-dardiari kalwieda-paitiota wa, yoma Mhuoratreria O nnio'omu de meee!
26La'a hya' maka aghi'a-yapi niana re de hota ukot nohora la O'a Matroma, ne Matro'mu Nwahla nan a'u!
Awuak de Mpuatut tio' a lia'a hya' maka ha Mukot taru re.
27Mtiulan la mai a'u de Muala a ralma-rio'ru pa nna'eritnana deulu-tatarmu re honona.
Emkade hota a'g e wuarora-walai niohora O wniatutu-wniaye'emu mak ksamomuou memna.#119:27 O wniatutu-wniaye'emu mak ksamomuou memna. Riy dom de rwarora lira ri nnia'eratni emkadi: “hihi'imu-yapyapmu mak kamehi-kayona.”
28A nhi'wu-nhio'nu namkoha-namnanin tar lia'a a sniu'su ralamni,
mere Matromlawnu ne, Mhi' aruri-alai nian a'u emekto'ama hya' ed maka Mukot targa oleka de.
29Muod olietlet targ a lia'a loi-talan maka kodia kliert a'u.
Yoma la'a O kalwiedmu pede Mpuatut nieka a lia'a O deulu-tatarmu re.
30La' maka awualiri, de uhak totpena agatu ghu'ru-ghelam rer lia O lirmu-tunmu.
Deulu-tatarmu re er maka awuahniorat reria.
31La'pa la'a hya' maka ha Mukota re de a'g e liernohor reri
pa awuak la Matro'mu de yana Mhi' a' pua liernana molmola-mama'a.
32Hota agala a ralma ploi-ple'era pa aliernohor reria hya' maka ha Mukot taru.
Yoma O' e Mual a' pua a nhiortu yeher to'ama naphyari.
Tsumbain pa twaka Itmatromlawanni Makdenrer die Nala kirkira-ralma riora la'a E lirni-tunnu deullu-tatarni
33 Matroma, Mpuatutg a'u totpena agat niohora la'a hya' maka ha Mue'er taru-mtiatar taru re.
Totpena aliernohora pa nodi liarni pa la nhoru.
34Mhi' a' pua a nhiortu yeher to'ama naphyari lia O deulu-tatarmu re,
totpena agala a ralmu tetema pa aliernohor reria.
35Awuak de Mtiutga loimu-talanmu mai a'u totpa aliernohora O lirmu-tunmu re
yoma hade ed mak khi' a ralmu pa nahepru.
36Mtiulan mai a'u totpena a ralma-rio'ru ndawar rer miamain la O deulmu-tatarmu.
Yana awuaror nohor reria kupna-kai re'a-tniaru.
37 Matroma, Mutiak reri a'u totpena yana a ralma-rio'ru nodi rer lia hya' maka edonna nwal lia hadomdoma.
Mtiut nieka kalwiedmu-paitiotmu mai a'u emekwalima hya' ed maka Mukottarg olekwa.#119:37 Mtiut nieka kalwiedmu-paitiotmu mai a'u emekwalima hya' ed maka Mukottarg olekwa. Riy dom de rwarora ayat di nnia'eratni de emkadi: “Mual a' pua amuori-diari die awuehwa-liakat la hya' maka kla' nana O ralma-riormu.”
38Mhi' nan memna hya' ed maka Mukottarg oleka Matroma la hopopanmu a' di,
yoma Mukottarg olek hadewa la riy maka katu ka'unni-kamta'at O'a.
39 Matroma, yana Muollia pa rhi' amolu-ama' a'u, yoma hade ed maka umta'ata rer lia.
Mtiulan nan a'u yoma plola la O nie'ermu-tniatarmu de samoga.
40 Matroma, a yahe'ru de ndawar rer miamaini la'a hya' maka ha Mukot olek re wa.
Matroma, onnila O' ed mak kden rer lia plol wawannu de Mual a pua lier la mormiori-dardiari warwuaru.
Tsa'ar it mormiorni la Itmatromlawanni deullu-tatarni
41 Matromlawnu neee! Mtiut tieka O sniayanmu mak kodi liarni la' a'u.
Mumori-mulewn a'u yoma O nnio'omu olek hade wa.
42Totpena hota awuahla riy maka kapolu-kaliella a'u re lirni-tunnu mai a'u,
yoma agha'ar a arnu la hya' ed maka Mukottarg oleka re.
43Mtiulan la mai a'u Matroma, totpena ukot hadom de adiella plola wawannu,
yoma aghapar rer lia' O lirmu-tunmu makaplola-kamneha maka Omueti olek la de.
44Agiwra ghi' hadom de ga' rer lia O deulu-tatarmu
pa nodia pa nodi liarni.
45Pede la a mormiori-dardia'ru di de alier la mtiertierannu,
yoma a'utlina-utailla O wniatutmu-wniaye'emu.
46La'a hya' maka ha Mue'er taru-mtiatar taru re honona, de hota ukota-ulde'eta hare la'a ray-ray re honona
de hota edonna muola-mua'a.
47A su'ku matmiat lia O lirmu-tunmu
yoma a ralmu e nod rer lia.
48A ralmu nal nana hya' maka ha Mukota pa aghu'ru-ghelam rer lia.
Maka ha Mtiut tiaru re atia'wa reria a nhiortu la' honona.
Tsa'ar it aranni la Itmatromlawanni Makdenrer die lirni-tunnu deullu-tatarni.
49 Matroma, Mhuoratreria O nnio'omu la a'u, mak khima-kre' O' di.
Agha'ara a arnu la O nnio'omu de.
50La' ler maka alier la kropna-krieutu de nnio'omu de ed mak kodia a lia'a ralam mtiertierannu.
Aliernana mormiori-dardiari onnila hya' ed maka Mukottarg oleka wa.
51Lera-ler nekpa riy maka kpo'ona-kraka re raniha-ramalia a'u.
Mere emkade ho'mana atioran rer pitpitga la'a O deulu-tatarmu re honona pa aliernohor rer nieka la.
52Awuarora-wualai niohora O deulu-tatarmu maka ha Mue'er taru-mtiatar taru la'a ulul genni, de nnia'eratni.
La' hade pede a ralmu di namtiertiernu olekwa.
53A'uwenan la riy maka ralamni nkoili-nkaili,
yoma ir ralma-riorni edonna nko'i nan etia O deulu-tatarmu.
54La'a a mormio'ru mak edonna kaplahwa la noh di wawannu,#119:54 Riy dom de rwarora ayat di nnia'eratni de emkadi: “La' gen di maka a'uhulti-uhamar la emeka do'ona-dakna.”
de la'a hya' maka ha Mukottaru re de agodia la wniatunu-wniahniara pa u'uli-uwedi reria O'a.
55La'pa lera nmel wa dewade a'g e ghoratreria O'a Matroma!
O deulu-tatarmu de atioran reri apitga.
56Yoma agatu ghu'ru-ghelam la' O nie'ermu-tniatarmu
de nhi'nande a ralmu nahepuepru.
Nakottarga hota natlina-natail rer lia Uplerlawna lirni-tunnu deullu-tatarni.
57 Matroma, la' O' nanpena ed maka a ralmu ha nala.
Pede a'ukottarga de hota aliernohora O wniatutmu-wniaye'emu.
58Agal tetema a ralmu pa awuak la O' pa Mtiulla-msiayn nan a'u,
de emeknekama O nnio'omu-niatmu maka ha Mukottarg' oleka re wa.
59A' orgah'u wuaror nohora a nhio'lu-lie'tu maka aghi' nana re honona,
pede orgah'u ukottarga de hota awualdioin targho' pa aliernohora O lirmu-tunmu re honona.
60Amuahrur pua liernohor reria O lirmu-tunmu.
A'g edonna palo'ona-patau a lia a ge'nu, mere wuo'la pa uplet nohora pa utlina-utailla
hya' ed maka ha Mukot oleka de.
61Riy yatyata-halala re re'er targa darni pa ra rtot a'u,
mere a'g edonna ghoratdoinia O nie'ermu-tniatarmu.
62La'awa mela letgara, demade a'umat pa u'uli-uwedi O'a Matroma,
yoma aghoratnana hya' maka Omueti oleka re maka kaplola-kamneh momuou.
63Agora riy maka ka'unni-kamta'at O'a re mla' ihyida-ralmida,
de la'a riy honona mak klernohor reri O lirmu-tunmu de rla' a mutwua'lu.
64Mai noha wawannu re honona rpenpuen momuou lia O sniayanmu mak kodi liarni, Matroma!
Mpuatutu-mpuaye' a lia'a hya' maka Mue'er taru-mtiatar taru re honona.
La' sniusa ralamni de nwatutu it totpa tatlina-tatailia Uplerlawna lirni-tunnu deullu-tatarni
65 Matroma, Omliernohor oleka la'a hya' maka ha Muno'taru re
pa Mhi' nan samomuoga la a' di, mak khima-kre'a O'a.
66 Matroma, Mual a' pua liernana kirkira-ralma rior samomuou,
yoma a'g e pesiaya la'a hya' maka ha Mukota re honona.
67La'pa a'g edonna liernan ma'ta niukum lawan de, awir olek la walli wa,
mere la' dodo'ondi de a'g e tioran reria la'a hya' maka ha Mukota.
68Yoma samou etla O'a, la' hade pede Omhi' neka samomuounu.
Pede Mpuatutg a'u totpena liernohora la'a hya' maka ha Mue'er taru-mtiatar taru re wa.
69La'a riy maka kpo'ona-kraka re honona rapupu-raheria a'u,
mere plola pa agala ih'ru ploi-ralma ple'er pa ga liernohora O lirmu-tunmu re honona.
70Riy id la' ir mana edonna rna'erit nana hya' mak kaplola,
mere deulu-tatarmu de nhi' a ralmu pa nahepuepru.
71Alier la sniusa ralamni onnila Omukmua a'u Matroma, mere ha nodia kalwieda-paitiota mai a'u
yoma la' talan emkade pede awuatut lia liernohora reria hya' ed maka ha Mukota re.
72La' a wniareknu de, O deulu-tatarmu re rarehi momuou
lia'a leli-maha werwerta welli la' noh di wawannu.
Itmatromlawanni Makdenrer die deullu-tatarni naplola-namneha
73 Matroma, O' ed maka kakoki-kayap nian a'u,
la' hade pede orgahamu Mual teka kirkira-ralma rior samomuou mai a'u
totpena agatu wuaror nan la'a hya' maka ha Mukota re honona.
74La'pa riy maka khu'ru-khelma O' lirmu-tunmu re ramkek a' die, ralamni re rahepur wenna.
Yoma a'g e gha'ara a' arnu la'a O nnio'omu re honona.
75A'g e gat niohora la'a hya' maka ha Muetlia re honona de rlol talla, Matroma.
O' e Mukmu olek a wua yoma lera-lera nekpa Msiayn reri a'u
me Mhi' rer niek la hya' ed maka Mukottarg olekwa.
76Awuak de O sniayanmu mak kodi liarni de nhi' a lia'a ralma yahepru owa'ana.
Totpena plol memna la'a hya' ed maka ha Muno'a mai a'u, mak khima-kre' O'a.
77 Matroma, Mtiulla-msiayn a'u, totpena a mormio'ru naplalahwa,
yoma a hepru ndella lirmu-tunmu de.
78Ndella pa riy maka kpo'ona-kraka re rmola-rma'a,
yoma nhi'inde rakot nohor a'u, de riwra hya' mak edon kaplola, mere rakleha nhiapargenni.
Mere a'g e wuarora-wualai nieka lira-tun muaka ha Mukota re honona.
79Awuak de riy maka kola tieru-kawur nehla la O'a re, rmai tieman la mai a'u
totpena rat niohora O deulu-tatarmu.
80Awuak totpena a ralmu mana edonna nkoil la'a hya'a maka ha Mukota,
totpena yana liernana molmola-mama'a.
Nsumbain pa nwaka Uplerlawna Namori-nalewan nan e' la'a arwalli mak kterna e'a
81Matrom ee! Awuewiei-niarnara O tultulanmu la la'pa ukleh oleka ruri-lai wia!
Aghoratreria pa uhnia'ar la O nnio'omu.
82Awueinia'nu la O nnio'omu de la mahneka memna.
A'g e giwra: “Matromee! Hota mowen nianpena Omhi' a' pua a ralmu nmi'no? Yana Muolin limmu mai a'g ee?!”
83A' di de emeknekama lokrahi genni (kantong anggur) maka ulatni namkioran wa pa rhopliala wa me edon rhoratreri owa'an wa,
mere la'a hya' maka ha Mukot oleka wa de a'g edonna ghoratdoinia la.
84 Matromee! A'g ed mak khima-kre' O'a! Hota awuei lera wo'ir owa'ana nampena Mumori-mulewan nan a'g e?!
Hota mowen nianpena O Mukmua riy maka nhi'inde khokar rer a'u re no?
85Riy mak kpo'ona-kraka, mak edonna klernohora deulu-tatarmu re,
e rahi oleka hu'ula totpena ra rtota-rwudi a'u!
86Mere lirmu-tunmu honona re de raplol momuou pede riy rpesiaya.
Mtiulan la mai a'u Matroma! Yoma ir e rhokr a'u mere rakleha nhiapargenni.
87Trema-trema rwenan nan a'u.
Mere a'g edonna ghoratdoinia O nnio'omu-niatmu.
88Mumori-mulewn a'u Matroma, yoma la'pa emkameni ho'mana Omsiayn rer a'u pa nodi liarni.
Totpena la a' muana ghu'ru-ghelma utlina-utail la'a hya' maka ha Mriora-mliai tiarga.
Tpesiay reria Itmatromlawanni Makdenrer die, lirni-tunnu
89 Matromlawnu ne! O lirmu nden la pa nodi liarni.
Deulu-tatarmu de Mriora-mliai tiarga la Ilyamou-Watyatoha pa edon rherun doin etia.
90Hya' ed maka Omukottarga de Omhi' nana nodia pa tuwu nla' tuwu.
O' ed maka karir niana noh di pede nden nek la genni.
91Mak kdena ri honona erla yoma la'a hya' maka Omukot taru.
Ir honona ri de rlernohor rer lia hya' ed maka ha Mhuopna.
92O nie'ermu-tniatarmu re rhi' nan a ralmu pa nahepru la' ler maka alier la sniusa ralamni.
La'pa edon emkade plol toto' pa amuati olekwa.
93La' lera-ler nekpa a'g edonna ghoratdoinia O lirmu-tunmu,
yoma la' lirmu-tunmu de pede Omumori-mulewn a'u.
94 Matrome! Mumori-mulewn a'g e! Yoma a' di de O' gahamu a'u.
Mumori-mulewn a'u yoma awuadu'du-wualeran pa liernohora O lirmu-tunmu maka Mueti oleka wa.
95La'a riy yatyata-halala re rwahak talan pa rwenn a'u.
Mere lera-lera nekpa awuarora-wualai niohora O nie'ermu-tniatarmu.
96A'g e umkeka de la'a ha samomuou nek de edonna naplol samomuou mua'ta,
mere enekneka O nie'ermu-tniatarmu nmemeh'a to'a maka naplol toto' meman la.
It ralamni nal nana Itmatromlawanni Makdenrer die, nie'erni-tniatarni
97 Matroma, a ralmu nal nana O nie'ermu-tniatarmu,
pede la' lera-lera nekpa a'g e wuarora-wualaiya re.
98Nhi'inde a'g e ghoratreri mamainia lir maka ha Mukota re
pede agat pua rehi tiargho'ola arwa'lu re.
99La'a a o'tu-kriahlu de e narehi tiargho'ola tungkuru mak kwatutg a'u re honona.
Yoma a'g e wuarora-wualai niohor mamainia lira-tun muaka ha Mukot oleka re wa.
100A'g e gat pua reh tiargho'a mak moratni rwahr olekwa,
yoma a'g e tioran reria lir maka ha Mukottaru re pa aliernohora.
101A' oliet a lia nhioli-lieta ilu-wniehwa yotyota-yatyata,
yoma agiwra utlina-utailla O wniatutmu-wniaye'emu.
102A ralmu mana edon nkoili la'a O wniatutmu-wniaye'emu re honona,
yoma O' ed maka kwatutu-kwaye' nana hare la mai a'u.
103La'a lira-tun muaka ha Mukota re
mi'nani narehi miemna gan tiuru mi'nani.
104La'a O nie'ermu-tniatarmu re pede a'g e gat niohora mak kyata-mak khala,
ne la' hade pede a oliet a lia nhioli-lieta ilu-wniehwa yotyota-yatyata.
Itmatromlawanni Makdenrer die, nie'erni-tniatarni nodia lelerni mai ita
105Lirmu de ed mak kodia wa'du la a la'ku.
Me nhi' lelerni la loi talan maka a'u la' lola.
106A'g e liokra olekwa, de hota aliernohora lirmu-tunmu maka kaplola-kamneha re,
ne hya' ed maka a'ukottarg oleka de, hota aghi' nana.
107A'g e lier la kropanni-krieutnu polpuol inni-wakwak amni, Matromee!
Mhuoratreria O nnio'omu pa Mutiak reri a'u totpa yana amuat wie!
108 Matroma! Mriei lilili-mua'mamaga a sniumbainu pa a'u'uli-uwedi O'a, Matroma.
Me Mpuatutu-mpuaye' a lia'a O lirmu-tunmu maka ha Mhi' oleka la deulu-tatra la noha wawannu.
109La' lera-ler de trema-trema amuati onnila arwa'lu re
mere a'g edonna ghoratdoin memna O nie'ermu-tniatarmu.
110Riy yatyata-halala re e re'er targa tniokla la mai a'u.
Mere a'g edonna ula'a sala la'a O nie'ermu-tniatarmu maka klergot lola O nurmu.
111Lira nhiopanmu de ed maka khi'a re'a-tniaru la mai a'u pa nodia liarni
me hade ed mak kodia ralma pliorlora la mai a' ihru-a ralmu.
112Agetli oleka de hota O lirmu-tunmu maka ha Muet olek la re,
de a ghu'ru-ghelam la pa nodi la nhoru.
Itmatromlawanni Makdenrer die, nie'erni-tniatarni nodia ihru-ralma mtiertiernu
113La'a hya' maka ha Mue'er taru-mtiatar taru re honona de a su'ku matmiat lia re.
Mere a ralmu sukni tia'ala riy maka ralamni edonna tetema la O'a.
114Yoma la' O' nanpena ed maka kodnian a lia'a hya' to'a.
Me la'pa emkameni ho'mana O' ed mak kruwun reri a'u.
Uhnia'ar to'ola O'a, Matroma onnila hya' ed maka Omukottarg oleka wa.
115Riy yatyatmi re! Olietmi la mai o'nu,
yoma la' a' die agiwra utlina-utail la'a Uplerlawna maka a'ukola tieru-gawur nehla.
116Mhuoratreria nnio'omu, Matroma, pa Mual a' pua ururi-ulai totpena amuormiori plalahwa.
Agha'ara a arnu la O'a, Matrom e!
Mumori-mulewan nana a'g e!
Yanpa a nhia'arge'nu de nwalia la hamamuamua.
117Mhueli-mliakia a'u, totpena amuori-liewna
ne hota a'g edonna ghortaplinga lira-tun muaka ha Mukota re.
118Mpuayotlia riy maka kwir ghal la'a hya' maka ha Mukota re!
Yoma nhi'inde rnairi pudi-akla pa rna'ohma yatyatni mere hota nwalia la hamamuamua.
119 Matro'mu Nhi' riy yatyata mai nohkeran di pa emolmolan nekama haga'u-hamda'ara maka rhopliala la.
Yoma la' maka ha Mhi'a la ira pede yeher to'ama a su'ku liernohora la hya' maka ha Mue'ertaru re honona.
120A ino'nu ndiwra-nda'al la genni onnila O'a.
De la'pa a ralma-rio'ru nheik tar lia hya' maka Muetlia la'a rira wawannu re, de umta'ata.
Nhiu'ru-nhielma la Orgahi-Orha'a lirni-tunnu nie'erni-tniatarni
121 Matromlawnu ne! Nhi'inde a'ukot hadom de a'uplele'era me aghi' hadom de adien nek la plollolli wawannu.
Pa awuak de yan Mual a lia'a arwa'lu re limni ralamni pa hota rwatei-rwahapr a'u.
122 Matroma, a'g ed maka khima-kre' O'a.
Mukot memna la mai a'u, Matroma, hota O' ed mak ktulan la mai a'u.
Yan Mual a' pua rimormiori po'ona rtingkai re rtorn a' pua rodi plolli mai a'u.
123 Matrome! A'umatar nande a ma'tu klih-kliair nohora a wnie'yu la O'a.
Mowen nianpena Omtiulan la mai a'u totpa amuori-liewna?
Awuei miemn O'a totpena O' ed mak kolin doin memna a lia, yoma O' e mniel tiarga de.
124Mhi' a'u, mak khima-kre'a O'a, de nornor meman la O sniayanmu mak kodi liarni,
me Mpuatutga a lia'a hya' maka ha Mukot oleka re wa.
125 Matroma, mak khima-kre'a O'a, a' di, Mhi' a' pua a o'tu naphyar lia O wniatutmu-wniaye'emu.
Totpena la'a hya' maka ha Mukota re de agatga re.
126 Matromlawnu ne! Nte' olek la lerni-melli pa Mukmua riy maka edonna ra'unni-ramta'ata O'a.
O lirmu-tunmu maka ha Mue'er taru-mtiatar taru re edonna rhe'du nan memna.
127La' O nie'ermu-tniatarmu re honona de a su'ku matmiat lia de
narehi wiallia lel kgorkora-mah marmara.
128Yoma la' hade pede la a mormio'ru di aliernohora la'a hya' maka ha Mtiut tiaru.
A'uhmen memna liola loi-talla koili-kaili.
Wniarora-wnialaiya samomuou totpena rlernohora Itmatromlawanni Makdenrer die, lirni-tunnu deullu-tatarni
129La'a hya' maka ha Mue'er taru-mtiatar taru re honona de samomuou muemna,
pede aliernohora de agal tetema a ih'ru ralmu honona.
130La'pa rakot nohora O wniatutmu-wniaye'emu nnia'eratni,
de rodia lelerni la rimormiori.
De rwahauria la rimormior miaka mak kaplin niohora ma'ta de hota rat wual lia,
pa rta'u-rta'g o'tani, yoma rla' nana ir ralma-riorni.
131A' arnu hedu-wairia yoma uwlari pia mua uhaka O lirmu-tunmu, Matroma,
yoma hade ed maka a ralmu nod rer lia.
132 Matroma! Mkillia a' die totpa Mtiutga ralam kalwiedmu la mai a'u,
de emekwalima nhi'inde O' e Mtiulla-msiaynia la riy maka ralamni nal nan O'a.
133 Matroma! La' hya' maka ha Muno'taru re, de Mual a' pua ururi-ulai niohora a li'mu-la'ku totpena yana awuehwa sala.
Yanpa hota alier la do'a-hala ralamni pede do'a-hala nodi plolli mai a'u.
134Muolin doin a lia'a riy maka ktern apitg a'u re
totpena aghu'ru-ghelam la'a hya' maka ha Mue'er taru-mtiatar taru re honona.
135 Matroma! Mtiulla-msiayn nan a'u, mak khima-kre' O'a.
Me Mpuatutu-mpuaye' a lia'a hya' maka ha Mukottaru.
136A lu'yu ntur die emeknekama gera maka nwau,
yoma riy edonna rlernohora O nie'ermu-tniatarmu maka ha Mukot taru re.
Itmatromlawanni Makdenrer die, lirni-tunnu deullu-tatarni re raplola-ramneha
137 Matroma! Omdiella plola-mneha wawannu.
La'a hya' maka ha Mue'era-mtiatra re, de raplol momuou.
138La' lira-tun muaka ha Mukota re honona raplol momuou
pua riy rpesiay meman la.
139La' O nnio'omu-niatmu maka ha Mpuatutu-mpuaye'a re de a' arwa'lu edonna rhe'du nana,
la' hade pede a' ih'ru ralmu emeknekama e rhokal targa ai kwiari.
140Hya' maka ha Muno' taru honona re, de Omhi' nan memna.
La' hade pede a su'ku matmiat lia pa awuatut lia honona re totpena agat niohora.
141Riy rhoi a lia mak kakleh weli,
mere a'g edonna ghortaplinga O wniatutmu-wniaye'emu.
142Omdiella plola-mneha wawannu nodia pa nodi liarni,
me nie'ermu-tniatarmu mana rden mamain la plola wawannu.
143Kropna-krieutu rler la a wawnu pa apuolpuol i'nu-wuakwak a'mu
mere la'a hya' maka ha Mukota re honona rhi' a' pua a ralmu nahepur wenna.
144O nie'ermu-tniatarmu re ha raplol momuou, ne hota emkade pa nodi liarni,
la' hade pede Matro'mu Nal a' pua agat niohora re, totpena alier la mormiori-dardiari wawannu.
Tsumbain pa twak la Itmatromlawanni Makdenrer die, totpena Namori-nalewan nan ita.
145 Matroma! Agala a ralma ploi-ple'eru pa apuolu-wuak la O'a. Mpuahla nan a'u Matromee!
Ne hota utlina-utailla O'a!
146Aghaun la O' de giwra: “Matromee! Mumori-mulewn a'g ee!
Yoma a'g e giwra tiorrer pitpitga O nie'ermu-tniatarmu.”
147La'pa loka-lak ma'ta de umat pa puolu-wuak la O'a,
yoma a'g e gha'ar rer a arnu la O'a Matroma onnila hya' ed maka Mukottarg olekwa.
148A'umatar la mela plahwani
pa awuarora-wualai nieka O nnio'omu re honona.
149 Matroma! Mutlina-mutailla a polpuo'lu-wakwa'ku onnila sniayni onni O'a.
Ne onnila Muetlia plol toto'a la tatiaili pniarni me watghudi lokarni de Mutiak kalwiedweda a mormio'ru-dardia'ru di.
150La'a riy maka khokr a'u re riwra rdamti a wua.
Rrehgorgoru oleka pa riwra rhi' yatyatni-halalli mai a'u.
Yoma oliet ir la'a O nie'ermu-tniatarmu.
151Mere O' e Mriehgorgoru Matroma
me mak ha Mukota re de raplol momuou.
152La' ululu meman pa agat niohora de O nie'ermu-tniatarmu de nodia pa nodi liarni.
Agat niohora hota emkade onnila hya' ed maka Mukot targ oleka de.
Rsumbain pa rwaka tniulan la Itmatromlawanni Makdenrer die
153 Matroma! Mhueri tlinmu-mpual matmu mai a'u, yoma alier olek la kropanni-krietnu la'pa polpuol ina-wakwak ama.
Mumori-mulewn a'g ee!
Yoma a'g edonna ghortaplinga O lirmu-tunmu maka ha Mue'er taru-mtiatar taru re honona.
154 Matroma! Muodnian a lia'a makhudi-kpar yatyata re gaini ralamni, totpena Muolin doin a lia.
Mumori-mulewn a'u, Matroma! Yoma Omukot olek hadewa.
155La'a riy maka kler la yatyatni-halalli, de hota edonna rler la mormiori-lewlewna,
yoma ir edonna ra'unni-ramta'ata ratlina-ratailla hya' maka ha Muet tiar lia.
156Plola! O tniulla-sniayanmu inponni, Matroma.
Onnila Muetlia plol toto'a la tatiaili-pniarni me watghudi-lokarni (pengadilan) de Mutiak kalwiedweda a mormio'ru-dardia'ru di.
157Riy rahu rawok pa rhi' a lia arwalli pa rnahora-rnala' a'u.
Mere a'g edonna ula'a sala la'a O lirmu-tunmu mak kwali olek la nie'era-tniatra.
158A ralmu namehra la mak ralamni edonna ndenrer lia O'a!
Yoma ir edona ratlina-ratailla O wniatutmu-wniaye'emu.
159Mumkeka Matroma! A'g e su'ku matmiat lia lira-tun muaka ha Mukota re.
Mumori-mulewn a'u, Matroma, yoma O' de sniayni onni O'a!
160La'a hya' maka klergot la O nurmu, de ha raplola.
La'a nie'ermu-tniatarmu honona de rden la plola wawannu ne hota rnairia hare pa nodi liarni.
It sukni matmiat lia Itmatromlawanni Makdenrer die lirni-tunnu deullu-tatarni pa tlernohor reria
161La'a riy maka kodi plolli re rhokr a' die rakleha nhiapargeni.
Mere mak umta'ata de, O nie'ermu-tniatarmu to'a, pede aliernohor reria.
162O nnio'omu ed mak khi' a' pua a ralmu nahepur nohora.
Pa emeknekama mak klernana re'a-tniaru pripanni-fa'anni.
163La'pa kdiori-kdieha ohpa-lahara honona re de uhmena-upraiya re.
Mere la'pa O lirmu-tunmu mak kwali olek la deulu-tatra re, de a su'ku matmiat lia.
164A'g e u'uli-uwedi rer niek O'a Matroma!
Yoma aghoratnana O deulu-tatarmu raplola.
165Riy mak sukni matmiat lia O nie'ermu-tniatarmu de rden la mtiertierannu.
Hota edon rdunit taru pa rhokal gaini.
166A'g e wuei tio'a a mormiori-lewlewnu la O'a, Matroma!
Hya' ed maka Mukota re honona de aliernohora.
167Aghu'ru-ghelam la'a hya' maka ha Mue'era-mtiatar taru re honona, Matroma,
yoma a su'ku matmiat lia.
168Aliernohora hya' maka ha Mhuopan pa aghi'a re honona,
yoma orgahamu Mumkek memna a hihi'u-yapya'pu.
Rsumbain pa rwaka tniulan la
169 Matroma! Awuak de matmu reprepar la tulu-lyanti, me tlinmu mana Mhuer tiarga la a polpuo'lu.
Mual a' pua nia'erit nana la'a hya' maka ha Mukota re, yoma O nnio'omu olek hare wa.
170 Matroma! Mtiulan pa Mrieiniana-mua'nana a polpuo'lu-wakwa'ku di.
Matro'mu nnio'oni de hota aliernana mormiori-lewlewna.
171A giwra u'uli-uwed reria O'a, Matroma!
Yoma O' ed maka kwatutu-kwaye' a' pua gat niohora deulu-tatarmu.
172A ralmu sukni la pa giwra wuatunu-wuahniar nohora hya' maka ha Muno'a-munatu re honona.
Yoma la' hare honona de rden la plola wawannu.
173Yan Muolin limmu me, Mpue'er rormu la a'u!
Yoma a' orgah'u ed mak kwalir niana loi-talan maka ha Mue'era-mtiatar taru re honona pa aliernohora.
174A ralmu nwewiei-narnar neka Omumori-mulewn a'u.
A su'ku meman la nie'era-tniatarmu re honona.
175 Matroma! Muyoryori a'u, totpena u'uli-uwed rie'ru.
Awuaka pa la'a hya' maka ha Mukot taru re ed maka ktulan la mai a'u, Matroma!
176A'g emolmolan nekama pipi-dum mak khal talan pa kmolu ma.
La' hade pede Muplet pa Mmuai pia Muhaka a' di, makhima-kre' O'a.
Yoma a'g edonna ghoratdoin lira-tun muaka ha Mue'er taru-mtiatar taru re honona.
Currently Selected:
Nhiara 119: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
