Nhiara 118
118
Rsumbain pa ra'uli-rawedi Itmatromlawanni Makdenrer die yoma Nal arwalli re la' yawa
1Mmiai pia ta'uli-tawedi tsu'ru-tselma tlili-tmamuau Itmatromlawanni Makdenrer die
yoma kalwiedni-paitiotni ra'ani-pallu maka Enal oleka la mai ita.
Plola Ntulla-nsayn reri ita la' ler di pa nodi liarni.
2Riy Israel hononmi mriarin pa mikot nohora miwra:
“Itmatromlawanni sniayanni de hota nodi liarni pa nodi liarni.”
3La'pa Harun duratni-waitni, de imam-imam hononmi mana, mikot emkade wali, de miwra:
“Hota Itmatromlawanni sniayanni nodi liarni pa nodi liarni.”
4La'pa rimormiori mak ka'unni-kamta'ata Itmatromlawanni hononmi ho'mana mriarin pa mikot nohora miwra:
“Hota Itmatromlawanni sniayanni nodi liarni pa nodi liarni oo!”
5La'pa alier la kropanni-krieutnu de aghaun la Itmatromlawanni agiwra: “Matrome! Yana Muolin limmu mai a'g e!”
Dewade Itmatromlawanni Nwahla nan a li'ru pa Nanawar doinia a lia'a kropna-krieut de.
6Yoma Itmatromlawanni Makdenrer die etla a o'nu de a ih'ru edonna ntepul nan kuku' eti.
Hota hya' ed maka rimormiori nohkerna rhi' mai a'u?!
7 Itmatromni Nor a' tialan de totpena Ntulan la mai a'u.
Hota Enal a' pua umkek memna arwa'lu re honona rla' yawa.
8Samounu de it tsa'ar it inonni la Itmatromlawanni totpa e Nruwun reri ita.
Yana tsa'ar it aranni la rimormiori tutulanni-rere'eni.
9Samounu de it tler la Itmatromlawanni limni ralamni.
Yana tsa'ar it inonni la'a marna-wuhura mai noh di wawannu.
10La'pa arwa'lu mak kwatiawua lodna-hairi re rhapet reria a lia la' malwiru-malganna,
ho'mana hota Orgahi-Orha'a plolli-mneheni ed maka khi' a' pua agala arwa'lu rella' yawa.
11Honona re rlol etnu-liolli pa rmai die rle'lu rer a lia letgara,
mere onnila Orgahi-Orha'a plolli-mneheni, la' pede agala arwa'lu honona re la' yawa.
12Rler pa rmai die rruwun nan a' die emeknekama gani ruwun nan puonni,
mere emkade ho'mana a gala ir la yawa
pa emeknekama ai miaka klomar pa ka'an doinia ruwnu-ahla mak karuri-karkiartia.
Aghi' emkade onnila Orgahi-Orha'a plolli-mneheni.
13Rler temna a' die trema-trema a lia' yawa,
mere Itmatromlawanni Makdenrer die ed mak ktulan la mai a'u.
14La Orgahi-Orha'a de, aliernana yaruri-yalai.
E' ed mak khi' a pua wuatunu-wuahniar pia u'uli-uwedi E'a,
yoma la E' nanpena amuori-liewna.
15Mitlin to'ola'a Itmatromlawanni Makdenrer die mutnu-rahanu re, mak kden la'a ohwialli re,
honona riarni-riarni yoma rlernana unut lawna la' ar ralma.
E' ed mak kala ruri-lai liawna la ira.
16 Itmatromlawanni plolli-mnehenni ed mak kala unut lawan de.
E' orgahani ed mak khi'a-kyapia ruri-lai matmiat liawan de.
17Hota a'g edonna mati mia'ta, la hade pede la a mormio'ru di
de a'ukotkot reria Itmatromlawanni Makdenrer die hihi'ini-yapyapni.
18Mitlina! Orgahi-Orha'a ed mak Nukmua a'u,
mere edonna Nal a lia matmiati ralamni.
19Mhiari dioinia Itmatromlawanni roma kreini nhiarni
totpena a lia u'uli-uwedi E'a.
20 Itmatromlawanni romni nhiar liawanni inhatti.
Rimormiorni rlola pa rler meman la E gaini ralamni!
Nhiari die naphyar lia'a riy maka ihranu ralamni kaploi-kaple'era.
21A'g e u'uli-uwed rer O'a Matroma!
Yoma a polpuo'lu-wakwa'ku re de Ompuahla nan momuoga re.
Mual a' pua aliernan unut lawna la ar ralma.
22Wat muaka tukna edonna rnair nana pa rhi'a roma-lewu, mere rhopliala,
de Uplerlawna Nnairi oleka pa Nhi'a la watu liar pianulu.
23Hadi ed mak Itmatromlawanni Nhi'a.
Adoh ha samounu nee!
24Plola! La' ler di de Itmatromlawanni Makdenrer die, Nhi' nan yamori-yalewan lawna mai ita.#118:24 La' ler di de Itmatromlawanni Makdenrer die, Nhi' nan yamori-yalewan lawna mai ita La' yawala Ibrani riwra: “Ler di de Itmatromlawanni Makdenrer die Nhi' nan de.” Masmur di nakot nohora Itmatromlawanni Na'untu la' ara ralamni me nodia yamori-yalewna.
Hononmi mmiai pia tamuki-tahepur nohora.
25 Matroma! Am mpak de O' orgahamu ma Mumori-mulewan nan ami,
ne Matroma, Mual am pia mlernana unut lawna.
26Ampaka Uplerlawna pa Nara'a-napalga riy mak kmai pia kodia Orgahi-Orha'a nanni.
La'a Itmatromni romni ralamni de ampak pa Nala ra'ani-pallu tiy miy mak kmai ri.
27 Itmatromni de Uplerlawna inhatte. Entulla-nsayn reria ita.
Pede mlier pa mlia' de mtiorreria ortawi-autiawia motmota, nanpena mpiania la' heyanan pa mriarni-mriarin nohora,
ne hononmi mlie'lu reria Itmatromlawanni katri'anni.
28 Matroma! A' Uplerlawnu O'a, pede amuai pia a'uli-uwedi O'a Matroma!
A' Uplerlawnu O'a Matroma! Aghu'ru-ghelma lilili-muamuaga O nanmu la'a tutulmu-lolo'omu.
29Mmiai pia ta'uli-tawedi tsu'ru-tselma tlili-tmamuau Itmatromlawanni Makdenrer die
yoma kalwiedni-paitiotni maka Enal oleka la mai ita.
Plola Ntulla-nsayn reri ita la' ler di pa nodi liarni.
Currently Selected:
Nhiara 118: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
