Rano'a 22
22
1Nan samomuou de ha weli wierta narehia re'a-tniaru muaka tanin la honi-ta'an la honi.
Rira rsaynia it de ha samounu reh wialia rira rala leli-maha la ita.
2Mak ktaru onde mak kakleha rrora nekpa ramneneha la' ida, yoma Orgahi-Orha'a ed maka kakoki-kayap niana ir honona.
3Riy mak katu de natu na'ererma totpa la'pa namkek hadoma niwra nma ntai e'a dewade nrei lia walli.
Mere riy mak kaplin niohor ma'ta wniarora-wnialai la kirkira-ralma rior samomuou de nru' nian to'pa ple'er wa
pa hota hadom ntaiya de ntuwun du'urnu nwag'onni de polpuol ina-wakwak ama.
4Ne la'a riy maka khu'ru-khelma ka'unni-kamta'ata Orgahi-Orha'a de
hota nlernana mormiori plalahwa, re'a-tniaru nora yatota-yawawa.
5Totota-wudwiudi yapi'u-yaga'u de emeknekama au rururi-karkiarti me dedesu nora rapra'pa rhapet reria mak kwakdiori-kwakdieha liol genni.
La'a hare honona de olie'tu la hare yoma omuhaka o lewlewanmu.
6Mpiatutu-mpiaye'a upmu-a'namu re totpena rat niohora talan mak kaplollola.
Ne hota rhoratrer nieka pa nodia la mto'oni-pe'eni.
7La'a riy kleleha-larlara re, nhi'inde ha rahnia'ar to'ola riy mak ktaru pa nhi'nande mak ktaru rodi plolli la ira.
Me la' wali riy maka ka'otna-ka'ara mana ratlina-ratailla mak kal otan la ira.
8La'a riy maka rawuli-ratniamnia yatyatni de hota rreiki-rwo'or walia yatyatni pa rler la yatyatni-halalli yatlorni-yatra'ani.
Pa la'awa honi de edonna rhi' owa'ana matmera-wulkgaulu la rimormiori wialli.
9Riy nhioli samomuou de hota Itmatromlawanni Nara'a-napalga me Ntera-ndem reria,
yoma la'a hya' maka ha nlernana, de nora mak kakleha re rhakra.
10Mhuokar doinia riy mak katullu-kapetna, maka kahe'i-kamali lira-yatu
totpena yawunu-yawenna plet pa namdiaru lol walli-walli.
11La'a riy maka ralamni kaple'era,
me ltierni mnapnapla de ray sukni la nora rwaloi wiutu.
12 Itmatromlawanni Makdenrer die, Natiak reria riy mak kwarora-kwalai samomuou totpena lirni-yatnu re rden rerlia plola wawannu,
mere Nwaye'er nana mak ka'ohpa-kalahara putarni-palakni.
13Riy pamalmalsa nahmena nla nkari ne nlu'ut rer nieka la romni nayanni, niwra:
“Yanhi'pa alier la tio'or wa dewade ahu diawra muan liawna ida nakwera-nakwahi tiarga a lia leta ralamni,
pa hota amuat mieman wa!”
14La'a patke' yatyata nur mi'nani de emeknekama dedesu de.
La'a riy maka nlernana Orgahi-Orha'a yawenanni de nler tar lia dedesu de ralamni.
15Upa-a'na nhi'inde rhi'a-ryapia podpodku la inonni.
Mere liwliwra-kakaklu ed maka kwatutga re totpena rherun doinia nhiolli la.
16La'pa he' ed mak nutni-ndahla mak kakleha-kaplara
yoma niwra nwalia la riy mak kre'a-ktaru hota nmeh'a neka nwalia la riy mak kakleha-kaplara.
Emkade walia la riy mak kala hadom la mak kre'a-ktaru totpa na'ala ir ralamni.
Yano'a-ya'atu terampwotelu
17Mutlin reria me mtia'wa reria tlinmu la a wniatu'tu-wniaye'u ri pa mpuarora-mpualai niohora.
Yoma hare rwatiawua riy mak katu kwarora-kwalai samomuou.
18La'pa a wniatutu-wniaye'u ri de mhi'targa la ralammu
me mtiorrer lia totpena ompuahi' targa pa omniairia,
de hota ralammu nahepru.
19Awuatutu-wuaye' o' la' dodo'ondi
totpena pesiaymu narur lia Itmatromlawanni Makdenrer die.
20La'a yano'a-ya'atu terampwotelu de atiulis momuog oleka wa pa agala la o'a.
Yano'a-ya'atu re de e rpenpuen lia lira-yatu nora kirkira-ralma rior samomuou.
21Hya' maka awuatut tiy o'a re de hare raplola-ramneh memna,
totpa la'pa o'ta-matmu ratia'nu de ompuet la de kmemeheni.
22Yan memmemna mhi' arukia a'na riy patyata la'a watghudi lokarni
yoma nakleha riy mak hota kodnian e'a la lirni-tunnu.
Yana mniutni-mdiahla re.
23Yoma Orgahi-Orha'a hota Nodniana hare lirni-tunnu,
me hota Nlehga mak kutni-mak kdahla hare aranni la' temni.
24Yan memmemna muora riy mak katu kawenan lawna re mpiatamputu.
25Hota omtiolliohora ir yehwani ne la'pa omiwra muollia de takenniana.
26Yana mpuaran pia muno'targa hota ompuairia rira otanni-arni,
27yoma hota la'pa o takeni mpuair nana de hota o u'tamu-klunmu nekane riy rwarui-rwate'la nana yoma la'a otna-ar de.
28A'ukot targa de yan memmemna mpiareiya tiema-lianu la' tan miaka miy upmi-tgarmi ha rhi'targ oleka re wa,
yoma la'a lerni la ha rhi'a de miy edonna mior la.
29Mimkek la riy mak katu ntulla-nkari kniarni.
La'a riy de hota ra'ala pa nkar lia ray-ray istanni,
mere edon riwra hota rtulla-rkar lia'a lima-rora ida romni nayanni.
Currently Selected:
Rano'a 22: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
