Rano'a 23
23
1La'pa omuora o'ta-mat lawna ida mimtatan wut lia ya'ana, de nhiorta ndella temmu!
Omuora he' mimtatan wutu pa mi'ina?!#23:1 Omuora he' mimtatan wutu pa mi'ina Riy dom de rwarora ayat di nnia'eratni emkadina: “Nhiorta ndella temmu la'a hya' ed maka la gaimu ralamni.”
2La'pa omuiwra mu'un lalawna,
de mutatahan ralammu la ya'an de!
3Yan memmemna muya'ante'ela la'a ya'ana-yemun mikmikri-lamliamni maka ha rhoi tiaru re.
Yoma yanhi' pa hade entot o'a.
4Yan memmemna mpuadieh pa mpual lia riy mak kre'a-ktaru.
Yoma riy mak katu kwarora-kwalai samomuou de edon rhi' emkade.
5Yoma hota edon nalo'on wali ne re'emu-tniarmu re ha molga,
de emeknekama ma'nu lawna ida e nnem olek pa nmol wua.
6Yan memmemna mu'un la riy tawtawra meini wawannu.
La'pa nhoiya ya'ana-yemun mikmikri-lamliamni la o gaimu ralamni mana yana muya'ante'ela.
7La'pa niwra: “Muprir pia ma ta'ana.”
Me la'pa miy mi'in ma'ta de niwra: “Mu'itar la! Mu'itar la!” Mere yana mpuesiaya de!
Ha ralamni ematia'a de! Mere nur mi'na to'a de.
8Muora pa mi'in wutu de edon nodi untu hadomdoma yoma hota la'a yamanan maka ha mtiel oleka de hota omumot dioinia owa'ana,
me lir maka omukota la e'a, de samoga mere edon nreiniana.
9Yana muno'a-mu'atga riy podku
yoma hota edonna natlina-natailla mak ha mukotkota re honona.
10Yan memmemna mpuareiya rira tiemni-lyannu
onde mua'ala a'na riy patyata nohananni-taniaratni.
11Yoma Orgahi-Orha'a Naruri-nalai toto' memna
me hota E' ed maka kodniana ir la watghudi lokarni.
12Mutlina-mutail samomuou lia wniatutu-wniaye'a,
me muala ralammu tetema pa mliernohora lira nnio'a-wawa niatu re.
13Yana ralammu nwerta-nwerat la wniatutu-wniaye'ela upmu-a'namu.
La'pa omuala liwliwra ma mliwra, de hota hade edonna nmati
14mere hota ha nler la mormiori-lewlewna.
15A'nu nee! La'pa muatu mpuarora-mpualai samomuou
de a ralmu nahepru.
16La'pa utlina o lirmu-tunmu maka ha mukotkota re a'uhepuepur memna yoma rlol memna genni.
17Yan memmemna ralammu nal nana hya' ed maka riy dodo'a-halala gahani.
La' samomuounu de mu'unni-mumta'ata Orgahi-Orha'a la lelera-melmela,
18totpena mlier la mormiori-dardiari samomuou
me mliernana hya' ed maka mhua'ar aranmu la.
19A'nu nee! Mpuarora-mpualai samomuou
totpena mumkek samomuou lia mormiormu-dardiarmu.
20Yan memmemna mpualoi wiut lia mak kemun pa kma'wu,
rora riy maka kaya'ante'a.
21Yoma hota riy mak emkare hota rler la kleha-lara,
me la' walia omunin lawna de hota edon nalo'on wali ne mupola-murainia pritni-phiaratni.
22Mutlina-mutailla ammu, yoma e' to' mana o' edonna mdiella noha wawannu.
La'pa o' inmu nhape'ewa, de mtiutga ya'unmu-yamta'atmu la.
23Mpuatut lia kirkira-ralma rior samomuou die totpa muat niohor memna hya' ed mak kaplola.
Mtiorrer pitpit lia hare honona, yana mhuoitio'or doinia la.
24Ama ida ralamni sukni meman la upni-a'nani nhiolli-lietni samoga.
Hota ralamni nahepru yoma upni-a'nani ratu rwarora-rwalai samomuou.
25Pede mhi' nana inmu nora ammu ralamni pa rahepru la'a hihi'imu-yapyapmu re.
Emkade hota inmu mak kayori-kadar niana o'a de niniha-mamialia.
26Ama! Mumkek samomuoga a wniehwa-liaktu pa mliernohor reria!
27Patke' yatyata mak kahaka yalirni-yaliaini de hare emeknekama dedesu
maka tlernan tutga de tahniokla.
28Patke' yatyata re emeknekama mak kwuri-kgalmu mak kwuw rer lia talan letgara.
Rtaw nan it de rwatorna pa nhi'nande muanke'a harahu ralira-raliai pa edon rdenrer lia Uplerlawna.
29-30Omuat niohor oleka la'a hya' ed maka mak kemun lawna arka liawanni re rlernana.
La riy mak emkare de nhi'inde rler nek la yatlorni-yatra'ani.
La' mormiorni de nhi'inde rawunu-rawenna, me polpuolu-wakwaka.
Tamkek la matni re rmera-rlairi, me inonni mermera-rarara
mere rpehera-rma'wu pede rhoratdoin oleka la'a hya' nariei pa ramno'a-ramrara.
31Yana mhur dioinia inonmu pa arka nareh'nia'nu.
La'pa mumkek la klasi ralamni de arak de yamkekni de nwakwaka,
ne yamkekni nmermer mikmikir la klasi ralamni
me mlie'etla de nmikmikir la teltelanmu.
32Mere la'pa repar wa dewade mu'eram nana inonmu tetema
emeknekama niy miaka namni khena e nho'w ole'ku wa.
33Ne o matmu mana roro'a de ramkek nana hadomdoma mak edon kaplola,
me nhioratmu edon namtemna, pa nurmu mamainia.
34O mu'eram la inonmu de emeknekama o' etla puou rerni tutnu la'a hletan lawna letgarni,
ne o'tamu namehra nande litlitri purpurnu.
35Hota omuatniekama riy rpahara o'a pa mukota: “Riy e rpahara waklili-wakdiori a'u. Mere a'g edon u'eram nana. La'pa arka ngai dioinia la' a ga'yu de agiwra umat pa a gemn owa'ana!”
Currently Selected:
Rano'a 23: LEX
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
