Lom 6

Wá naa Kilisiwa

1Wá o kpelewa ni? Wá gi wàɔ tɛ duunawa kɛ́ Lua gbɛ̃kɛ e àɔ kãfĩ yã? 2O'o! Aawo! Wá gbɛ̃́ pɔ wá dɛ gɛɔ ũ duuna yãmusu, kpelewa wá gi wàɔ tɛ duunawa lɔi? 3Wá gbɛ̃́ pɔ wa da'ilɛkɛ̀ Kilisi Yesu pɔ ũɔ, á dɔ̃ kɛ́ wá sãnuaanɔ aà ga guuo le? 4Wa gaaanɔ, wà wá vĩ́aanɔ da'ilɛkɛa guu, kɛ́ lá Kilisi bɔ̀ gau ń a Mae gbãa gawideo, wapiɔ sɔ̃, wàɔ ku ń wɛ̃ni dafuo màa.#Kls 2.12 5Lá wa naawà lan sawakula ń gbalaowa aà ga guu, wá gɔ̃aanɔ màa aà vua guu lɔɛ. 6Wá dɔ̃ kɛ́ wà wá gbɛ̃nazĩnkɛ zi pà lipãakɔ̃awa ń Kilisio, kɛ́ wá mɛ̀ duunde e midɛ yãi, kɛ́ wásu wàɔ zɔble duunaɛ lɔo, 7asa gbɛ̃́ pɔ gà bɔ̀ duuna yãuɛ.

8Lá wa ga ń Kilisio, wá a naai vĩ kɛ́ wáɔ kuaanɔ lɔɛ. 9Wá dɔ̃ lá Kilisi bɔ̀ gau, a gaa vĩ lɔo, ga iko vĩwà lɔo. 10Asa kɛ́ à gà, à gà duuna yãmusu gɛ̃n doɛ, mɛ́ lá a ku tia, a ku Lua pɔ ũɛ. 11Màa apiɔ sɔ̃, à ázĩa dilɛ gɛɔ ũ duuna yãmusu, íɔ ku Lua pɔ ũ naa Kilisi Yesuwa guu. 12A yãi ásuli tó duuna ikokɛ á mɛ̀ gɛwa a dɔɛ'ĩi dɔaaɛ́ lɔo. 13Ásuli á mɛgue kpa duunawa vãikɛbɔ ũo. Àli ázĩa kpa Luawa gbɛ̃́ pɔ aa bɔ̀ gau aa gɛ̃̀ wɛ̃ni guuɔ ũ, í á mɛguɔ kpawà yãmaakɛbɔɔ ũ. 14Ásuli tó duuna àɔ iko vĩwá lɔo, asa ikoyãpi iko vĩwá lɔo, sema Lua gbɛ̃kɛ.

15Kpelewan wei? Lá ikoyãpi iko vĩwá lɔo, sema Lua gbɛ̃kɛ, wáɔ tɛ duunawa yã? O'o! Aawo! 16Á dɔ̃ tó a ázĩa kpà gbɛ̃́wa, álɛ zɔbleɛ̀, a gɔ̃ ade zɔ ũo le? Tó duuna a ázĩa kpàwà, á gaɛ. Tó a misìilɛ Luaɛ sɔ̃, á bɔ maaɛ. 17Wa saaukɛ̀ ń Luao, asa duuna zɔɔn á ũ yãa, ɔ̃ a misìilɛ yãzĩnda pɔ wa dàɛ́ɔnɛ ń nɔsɛmɛndoo. 18A bɔ duuna yãu, a gɔ̃ maakɛa zɔɔ ũ. 19Malɛ bee o gbɛ̃nazĩna yã'oawa á gbãasai yãiɛ. Lá a á mɛ kpà yãa gbãsĩ ń yãvãiɔwa zɔɔ ũ, a vãikɛ̀, màa tia lɔ à á mɛ kpa maakɛawa zɔɔ ũ, á kua iɔ adoa. 20Kɛ́ á dɛ duuna zɔɔ ũ yãa, á bàa ku ń yãmaakɛaoo. 21Yã pɔ á kɛ̀ yãa mɛ́ àlɛ kɛɛ́ wiyã ũ tiaɔ, ài kpele yãpiɔ lɛ́ kɛɛ́i? Yãpiɔ midɛaá gaɛ. 22Tiasa lá a bɔ duuna yãu, álɛ zɔble Luaɛ, ài pɔ á e mɛ́ kua adoa pɔ a midɛ ń wɛ̃ni laasaio ũ. 23Duuna aseaá gaɛ, ãma gba pɔ Lua ì dawɛ̃ɛ naa wá Dii Kilisi Yesuwa guu mɛ́ wɛ̃ni laasai ũ.

Currently Selected:

Lom 6: Boo2024

Highlight

Copy

Compare