Lom 5

Kɛa na ń Luao

1Lá Lua tò yã bɔ̀wanɔ na a naai pɔ wálɛ kɛ yãi, wá naaanɔ sa ń wá Dii Yesu Kilisi gbãao. 2Aà naaikɛa guu wa zɛ'è aà sabai, wa gɛ̃ Lua gbɛ̃kɛ pɔ wá kuòpiu, ɔ̃ wálɛ pɔnakɛ ń Lua gawi pɔ wá wɛ́ dɔio. 3I kɛ bee ado no, wálɛ pɔnakɛ ń wá taasikɛao lɔ, kɛ́ wá dɔ̃ taasikɛa ì mɔ ń mɛnao, 4mɛna ì mɔ ń dàa maao, dàa maa ì mɔ ń wɛdɔa Luazio, 5mɛ́ wɛdɔa Luazipi lí kɛ famao, asa Lua a Nisĩna pìsi wá nɔ̀sɛuɛ, ɔ̃ a tò wá dɔ̃̀ a yewázi.

6Wá gbãasai guu Kilisi gà wá vãikɛnaɔ wá gbɛu gɔɔ pɔ Lua dìlɛwa. 7Baa gbɛ̃maa, gaa aà gbɛu àao. Tó gbɛ̃́ a we ga gbɛ̃maa gbɛu, wá dɔ̃o, 8ɔ̃ Lua ɔlɔ̀wɛ̃ɛ lá á yewázi, asa wá duundekɛ guu ɔ̃ Kilisi gà wá gbɛu. 9Lá wa bɔ maa sa Kilisi au yãi, Kilisipi wá sia Lua pɔkũmawa sea vĩ lɔe? 10Yãa wá ĩi ń Luaoɛ, ɔ̃ wa kɛaanɔ na aà Nɛ gaa yãi. Lá wa kɛaanɔ na sa, wá suabaa aà kua wɛ̃ni guu yãi sea vĩ lɔe? 11I kɛ beeɛ adoo, wálɛ pɔnakɛ ń Luao lɔ ń wá Dii Yesu Kilisi pɔ tò wa kɛaanɔ na gbãaoɛ.

Kilisi yãlɛɛũa ń Adamuo

12Gbɛ̃́ mɛndo mɛ́ tò duuna gɛ̃̀ dũniau,#Daa 3.6 ɔ̃ duuna mɔ̀ ń gao.#Daa 2.17 Beewa ga lì gbɛ̃piia, kɛ́ gbɛ̃pii duunakɛ̀ yãi. 13Duuna ku dũniau e Lua ikoyã àɔ gɛ́ mɔiɛ. Gɔɔ pɔ ikoyã kuo, Lua i duuna yãdao, 14ãma sɛa Adamuwa e à gɛ̀ pɛ̀ Mɔiziwa ga ikokɛ̀ gbɛ̃piiwaɛ, baa gbɛ̃́ pɔ aai duunakɛ lan Adamu zãayãwawaoɔ. Adamupiá gbɛ̃́ pɔ a mɔ taaɛ.

15Ãma Lua gba muaa ń Adamu taaeoo, asa lá wà gàga dasi Adamu ado zãayãwa yãi, Lua gbɛ̃kɛ ń a gba pɔ lì dasila Yesu Kilisi ado gbɛ̃kɛ yãio dɛ beea. 16Lua gba muaa ń gbɛ̃́ mɛndo duunapioo. Taae gɛ̃ndopi mɛ́ mɔ̀ ń yãkpalɛkɛao, ɔ̃ yã zɔ̃̀lɛ gbɛ̃nazĩnaɔwa. Taaeɔ mɔ̀ ń Lua gbɛ̃kɛkɛanɛ́o, ɔ̃ yã bɔ̀ ń gbɛ̃́ɔ na. 17Lá Adamu ado tàae mɛ́ tò ga ikokɛ̀, Yesu Kilisi ado yã pɔ à mɔ̀ò zɔ̃ɔ dɛ beea. Aà yãi gbɛ̃́ pɔ Lua gbɛ̃kɛkɛ̀nɛ́ a tò yã bɔ̀ńnɔ na gba ũɔ gɔ̃ kiaɔ ũ aizãna guu. 18Beewa lá tàae gɛ̃ndopi tò yã zɔ̃̀lɛ bui piiwa, màa lɔ maakɛa gɛ̃ndopi ì to bui pii bɔ maa, aai aizãnable. 19Lá gbɛ̃́ mɛndo swãgbãa mɛ́ tò dasi gɔ̃̀ duunde ũ, màa lɔ gbɛ̃́ mɛndo yãmaa mɛ́ a to dasi bɔ maa. 20Ikoyã mɔ̀ kɛ́ taae'e àɔ kãfĩ yãiɛ. Lá duuna lɛ́ kãfĩ, màa Lua gbɛ̃kɛ ìɔ diadi. 21Lá duuna ikokɛa mɔ̀ ń gao, màa lɔ Lua gbɛ̃kɛ ikokɛa ì to wà bɔ maa, wí aizãnable ń wá Dii Yesu Kilisi gbãao.

Currently Selected:

Lom 5: Boo2024

Highlight

Copy

Compare