Lom 7

Wá ku Mɔizi ikoyã ɔzĩo

1Ma gbɛ̃́ɔ, malɛ yã'oɛ́ lan gbɛ̃́ pɔ Mɔizi ikoyã dɔ̃ɔwa. Á dɔ̃ kɛ́ ikoyãpi iko vĩ adewa gɔɔ pɔ a ku noa? 2Màa ikoyãpi nɔzãe yè a zã́wa gɔɔ pɔ a zã́ ku. Tó gɔ̃ gà, ɔ̃ ikoyãpi ì polowà. 3Gɔɔ pɔ aà zã́ ku, tó à gɔ̃̀ gbɛ̃pãle nɔ ũ, wa oɛ̀ dɔɛ'ĩideɛ. Tó aà zã́ gàɛ sɔ̃, ikoyãpi pòlowàn we. Tó à gɔ̃̀ gbɛ̃pãle nɔ ũ sa, beeá dɔɛ'ĩi yãn lɔo. 4Màaɛ apiɔ sɔ̃ ma gbɛ̃́ɔ, a ga ikoyã musu Kilisi mɛ guu, ɔ̃ a gɔ̃ gbɛ̃́ pɔ bɔ̀ gaupi nɔ ũ, kɛ́ wà e wà kãfĩakɛ Luaɛ. 5Kɛ́ wá dàa dɔ̀aawɛ̃ɛ yãa, ikoyã mɛ́ tò duuna ni wá dɛ́ wá mɛ guu, ɔ̃ wa kãfĩakɛ̀ gaɛ. 6Tia sɔ̃ wa ga pɔ pɔ a wá kũa zɔ ũpi yãmusu, wa bɔ ikoyãu, ɔ̃ wálɛ zɔble Luaɛ wɛ̃ni dafu guu ń aà Nisĩna gbãao, i kɛ ń ikoyã pɔ zikũ̀o no.

7Wá o kpelewa ni? Lua ikoyã kɛ̀ fama yã? Aawo! Ikoyãpi mɛ́ tò ma duuna dɔ̃̀. Tó ikoyã i mɛ wasuli pɔ bĩikɛoo,#Bɔa 20.17 dɔ̃ mi dɔ̃ lá pɔ bĩikɛa dɛo. 8Duuna zɛkĩi è yã pɔ Lua dìlɛpiwa, ɔ̃ a tò pɔpii ni ma dɛ. Asa kɛ́ má ikoyã dɔ̃o, duuna dɛmɛɛ yãe ũo. 9Yãa kɛ́ má ikoyã dɔ̃o, má bɛ̃́ɛɛ. Kɛ́ ma yãdilɛapi mà, duuna vù iu, 10ɔ̃ ma ga. Yãdilɛa pɔ dɛ à wɛ̃nikpaapi mɔ̀mɛɛ ń gao. 11Duuna zɛkĩi è yãdilɛapiwa, ɔ̃ à ma sãsã à ma dɛ yãpi sabai. 12Beewa ikoyãpi kua adoa, mɛ́ yã pɔ Lua dìlɛpi kua adoa, a zɛ́ vĩ mɛ́ a maa. 13Yãmaa mɛ́ tò ma gaa? Aawo! Kɛ́ duuna e bɔ gupuau, ɔ̃ à yãmaa mɔaokɛ̀, a tò ma ga. Beewa wa duuna dɔ̃̀ duuna ũ yãdilɛapi sabai.

Zĩkaa ń duunao

14Wá dɔ̃ kɛ́ ikoyãpiá Lua yãɛ. Mapi sɔ̃, daaden ma ũ, má na duuna ɔzĩ. 15Miliɔ yã pɔ malɛ kɛ gbá dɔ̃o, asa mili yã pɔ má ye mà kɛ kɛo, yã pɔ má ye mà kɛo ɔ̃ mi kɛ.#Gal 5.17 16Tó yã pɔ má kɛ̀ i kpaaĩ ń ma pɔeãoo, ma we ikoyãpi maakɛi. 17I kɛ mamɛ malɛ kɛo, duuna pɔ ku ma guuɛ. 18Má dɔ̃ yãmaa ku ma guuo, ma dàa maao. Miɔ ye mà yãmaakɛ, ãma mili fɔ̃ má kɛ̀o. 19Yãmaa pɔ má ye mà kɛ, mili kɛo. Yãvãi pɔ má yeio ɔ̃ mi kɛ. 20Tó yã pɔ má yeio ɔ̃ malɛ kɛ, i kɛ mamɛ malɛ kɛo, duuna pɔ ku ma guuɛ. 21Má è tó má ye mà maakɛ, vãi mɛ́ ì dɔaamɛɛ. 22Lua ikoyã mɛ́ ì kɛmɛɛ na ma sɔ̃ guu, 23ãma má è iko pãle ku ma mɛ guu, ìɔ zĩka ń iko pɔ ku ma nɔ̀sɛ guuo, a tò má na duuna iko pɔ ku ma mɛ guu ɔzĩ. 24Ma wɛ̃nade ia, demɛ a ma si ma mɛ̀ gɛpiwai? 25Ma saaukɛ̀ ń Luao! Ń wá Dii Yesu Kilisi gbãao. Beewa ɔ̃ miɔ zɔble Lua ikoɛ ma nɔ̀sɛ guu, mɛ́ miɔ zɔble duuna ikoɛ ma dàa guu.

Currently Selected:

Lom 7: Boo2024

Highlight

Copy

Compare