Bɔa 9

Pɔtuoɔ gagaa

1Dii ò Mɔiziɛ: Gɛ ǹ Falaɔ̃ le, ní oɛ̀ Dii á Hɛbɛluɔ Lua mɛ̀, aà ma gbɛ̃́ɔ gbaɛ aa gɛ́ ma sisii. 2Tó à gì ń gbaɛi mɛ́ a ń kũa e tia, 3má ɔtɔ̃ aà pɔtuoɔwa búa. Má gagyã pãsĩ ká aà sɔ̃́ɔgu ń aà zaa'ĩnaɔ ń aà yiongoɔ ń aà zuɔ ń aà sãɔ ń aà bleɔ. 4Má Isailiɔ pɔɔ dɔ̃kɔ̃ɛ ń Egipiɔ pɔɔ. Isailiɔ pɔɔ kee a gao. 5Ma Dii ma gɔɔ dìlɛ. Zia má bee kɛ busuu la.

6Kɛ́ gu dɔ̀, ɔ̃ Dii kɛ̀ màa. Egipiɔ pɔtuoɔ gàga pii, kási Isailiɔ pɔɔ kee i gao. 7Falaɔ̃ yã pɔ kɛ̀pi gbɛ̀a a mà Isailiɔ pɔɔ kee i gao, kási aà swã gi gbãaɛ, i gbɛ̃́piɔ gbaɛo.

Sã́nɛ kaa Egipiɔgu

8Dii ò Mɔiziɛ ń Aalonao: À mua túfu ɔũkpa, Mɔizi i fã musu Falaɔ̃ aɛ, 9i da Egipi busua pii lan luutɛ̃wa, sã́nɛ i ka gbɛ̃nazĩnaɔ ń nɔbɔɔgu gupiiu. 10Ɔ̃ aa mua túfu sɛ̀lɛ aa gɛ̀ò Falaɔ̃ kĩi. Kɛ́ Mɔizi túfupi fã̀ musu, ɔ̃ sã́nɛ kà gbɛ̃nazĩnaɔ ń nɔbɔɔgu.#Zia 16.2 11Ɛsɛdeɔ i fɔ̃ gɛ̀ Mɔizi kĩio sã́nɛpiɔ yãi, asa à ń lé ń Egipiɔ piiɛ. 12Ɔ̃ Dii Falaɔ̃ swãfɛ̃̀ lá a ò Mɔiziɛwa, ɔ̃ i ń yãmao.

Lougbɛ kwɛa

13Dii ò Mɔiziɛ: Fɛlɛ kɔɔkɔɔ ǹ gɛ ǹ Falaɔ̃ le, ní oɛ̀ ma Dii á Hɛbɛluɔ Lua ma mɛ̀, aà ma gbɛ̃́ɔ gbaɛ aa gɛ́ ma sisii. 14Kɛ́ bee sa má ĩa pii kpaaazi ń aà iwaɔ ń aà gbɛ̃́ɔ, i dɔ̃ kɛ́ gbɛ̃e muaamanɔ dũniauo. 15Asa tó ma ɔtɔ̃̀má ma gagyãkàńgu yãa, dɔ̃ aapi ń a gbɛ̃́ɔ aa làa dũniau. 16Má tò aà ku, kɛ́ aà ma gbãa e, ma tɔ́ i li dũniaa piiɛ.#Lom 9.17 17Lá àlɛ azĩa sɛ lɛsĩ dɛ ma gbɛ̃́ɔla e tia, àlɛ ń gbaɛo, 18zia maa'i má tó lougbɛ pãsĩ kwɛ́ maamaa, lougbɛ pɔ a taa i kɛ Egipi yãao zaa wa kàlɛ e ń a gbão. 19Oɛ̀ aà gbɛ̃́ɔ zĩ aa aà pɔtuoɔ ń pɔ pɔ a vĩ búaɔ sɛlɛ aa ń kaka kpɛ́u pii. Gbɛ̃nazĩnaɔ ń pɔ pɔ ku bàasiɔ, tó wi gɛ̃ńnɔ kpɛ́uo, lougbɛ a kwɛmá aa gagaɛ.

20Falaɔ̃ iwaeɔ vĩakɛ̀ Dii yãɛ, aa ń zĩkɛnaɔ ń ń pɔtuoɔ kàka kpɛ́u. 21Ãma gbɛ̃́ pɔ aai Dii yãdaoɔ, aa ń zĩkɛnaɔ ń ń pɔtuoɔ tò bàasi. 22Ɔ̃ Dii ò Mɔiziɛ: Ɔsɛ musu, lougbɛ i kwɛ gbɛ̃nazĩnaɔ ń pɔtuoɔ ń buapɔɔwa Egipi busuu pii. 23Kɛ́ Mɔizi a go dɔ̀ musu, Dii tò lou lɛ́ pũna, àlɛ ma ń gbɛo, àlɛ pilɛ, mɛ́ lua lɛ́ su tɔɔlɛwa. Dii lougbɛ kà Egipiɔgu.#Zia 8.7, 16.21 24Lougbɛ lɛ́ kwɛ́, lou lɛ́ pilɛpilɛ. Lougbɛpi pãsĩ. Zaa Egipi busu ku, lou bee taa i mau yãao. 25Lougbɛpi pɔ pɔ ku bàasi Egipi busuuɔ asookɛ̀ pii, gbɛ̃nazĩnaɔ ń pɔtuoɔ ń buapɔɔ pii. À sɛ̃a líɔ ɛ̀'ɛ pii. 26Gosɛ̃ busu gu pɔ Isailiɔ kuu ɔ̃ lougbɛpi i kauo ado.

27Falaɔ̃ Mɔizi ń Aalonao sìsi a ònɛ́: Kɛ́ bee sa ma duunakɛ̀. Dii dee yã naɛ, mapi ń ma gbɛ̃́ɔ taaedeɔn wá ũ. 28À awakpaɛ̀. Loupũnaa ń lougbɛɛ beeo kà. Má á gbaɛ saɛ, wa giɛ́ lɔo. 29Mɔizi òɛ̀: Tó ma bɔ wɛ̃nkpɛ, mɛ́ ma a ɔɔ dɔ̀ Dii kĩi oi, loupũnaa a zɛ, lougbɛ i laa, kɛ́ ǹ e ǹ dɔ̃ tɔɔlɛá Dii pɔɛ. 30Ãma má dɔ̃ kɛ́ mpi ń n iwaɔ, álɛ vĩakɛ Dii Luaɛo e tia.

31Naa ń maseo ɔ̃ɔkpà, kɛ́ naa pìa mɛ́ mase mɔe bɔ̀ yãi. 32Ese ń weao i ɔ̃ɔkpao, kɛ́ aaì ma gbɛzã yãi. 33Mɔizi bɔ̀ Falaɔ̃ kĩi à gɛ̀ wɛ̃nkpɛ, à a ɔɔ dɔ̀ Dii kĩi oi, ɔ̃ loupũnaa ń lougbɛo zɛ̀, lou i ma lɔo. 34Kɛ́ Falaɔ̃ è lou ń lougbɛo ń loupũnaao zɛ̀, à gì lɛ́ duunakɛ, aà swãgbãakũ̀, aapi ń a iwaɔ. 35Aà swã yìaa, à gì Isailiɔ gbaɛi lá Lua dà Mɔiziɛ a òɛ̀wa.

Currently Selected:

Bɔa 9: Boo2024

Highlight

Copy