Bɔa 10

Kwaɔ kaa

1Dii ò Mɔiziɛ: Gɛ́ Falaɔ̃ kĩi, asa ma aà swãfɛ̃̀ ń aà iwaɔ, kɛ́ mà a dabudabuɛ beeɔ kɛ ń guu, 2kɛ́ ǹ e ǹ o n nɛɔnɛ ń n tɔũnaɔ lá ma Egipiɔ wɛtã̀ ń dabudabu pɔ má kɛ̀ ń guuo, í dɔ̃ kɛ́ mamɛ má Dii ũ. 3Ɔ̃ Mɔizi ń Aalonao gɛ̀ aa ò Falaɔ̃ɛ aa mɛ̀: Dii Hɛbɛluɔ Lua mɛ̀, ńyɔ̃ɔ gí misiilɛiɛ e bɔɛ ni? Ǹ a gbɛ̃́ɔ gbaɛ aa gɛ́ a sisii. 4Tó n gi ń gbaɛi, zia a kwaɔ ka n busuu, 5aai da tɔɔlɛa, wa gu'eo, aai lɛlɛ pɔ pɔ gɔ̃̀nɛ lougbɛ gbɛaɔwa ń líɔ pii, 6aai ka n kpɛ́ɔ pai ń n iwaɔ kpɛ́ɔ ń Egipiɔ kpɛ́ɔ pii. N maeɔ ń n deziɔ aai a taa e yãao, za gɔɔ pɔ aa zɔ̃̀lɛ busuu la e ń a gbão. Ɔ̃ Mɔizi ɛ̀a bɔ̀ Falaɔ̃ kĩi.

7Falaɔ̃ iwaɔ òɛ̀: Gbɛ̃́piɔ aaɔ musikpawázi màa e bɔɛ ni? Gbɛ̃́piɔ gbaɛ aa gɛ́ Dii ń Lua sisii. Ń dɔ̃ kɛ́ Egipi ɔ̃ɔkpào le? 8Ɔ̃ wà ɛ̀a sù ń Mɔizio ń Aalonao Falaɔ̃ kĩi, a ònɛ́: À gɛ́ Dii á Lua sisii. Á deɔ mɛ́ aa gɛi? 9Mɔizi wèwà à mɛ̀: Nɛfɛ̃nɛn gbɛ̃zɔ̃ɔ, wá gɛ́ wapiiɛ ń wá nɛgɔ̃ɛɔ ń wá nɛnɔɛɔ ń wá sãɔ ń wá bleɔ ń wá zuɔ, asa Dii dikpɛ ɔ̃ wálɛ gɛ́ kɛi. 10Ɔ̃ a ònɛ́: Tó ma á gbaɛ ń á nɔɛɔ ń á nɛɔ ápii, Dii á bɔ! À laaika! Á ye à fɛ̃manɔɛ. 11Aawo! Á gɔ̃ɛɔ mɛ́ aa gɛ́ Dii sisii, asa bee á gbɛ̀a. Ɔ̃ wà ń yá Falaɔ̃ kĩi.

12Dii ò Mɔiziɛ: Ɔdɔ Egipi busua, kwaɔ i ká, aai sɛ̃ ń lá pɔ bɔ̀ lougbɛ gbɛaɔ ble pii. 13Kɛ́ Mɔizi a go dɔ̀ Egipia, Dii bɔ̀ ń ĩanao gukpɛ oi, àlɛ pɛ́ busupiwa fãanɛ ń gwãasĩnao zɛsai. Kɛ́ gu dɔ̀, gukpɛ ĩanapi sù ń kwaɔ.#Zia 9.3 14Ɔ̃ kwapiɔ mɔ̀, aa lì Egipi busua pii. An dasi dɛ a yãa pɔɔla, mɛ́ a taa a kɛ bau lɔo. 15Aa kpàlɛ tɔɔlɛa gupiiu, ɔ̃ tɔɔlɛ sìsi. Aa sɛ̃ ń láɔ ń libɛ pɔ bɔ̀ lougbɛ gbɛaɔ blè pii. Sɛ̃ ge láe ku Egipi busuu lɔo.

16Wegɔ̃ɔ Falaɔ̃ Mɔizi ń Aalonao sìsi à mɛ̀: Ma duunakɛ̀ Dii á Luaɛ ń apiɔ. 17À suuu gɛ̃ndonaɛ bee kɛmanɔ ń ma duunao, í awakpamɛɛ Dii á Luaɛ aà kaalɛɛ bee kɛ̃a. 18Kɛ́ à bɔ̀ Falaɔ̃ kĩi, à awakpà Diiɛ. 19Ɔ̃ Dii bɔ̀ ń ĩan gbãao bɛ'aɛ oi, à mɔ̀ kwapiɔ sɛ̀lɛ a kà Isiatɛ̃au. Baa kwa mɛndo i gɔ̃ Egipi lɔo. 20Dii Falaɔ̃ swãfɛ̃̀, ɔ̃ i Isailiɔ gbaɛo.

Gusia kulɛa Egipia

21Dii ò Mɔiziɛ: Ɔsɛ musu, gusia pɔ wa e ɔkãwà i kulɛ Egipiwa. 22Kɛ́ Mɔizi ɔdɔ̀ musu, ɔ̃ gusia geele kùlɛ Egipiwa gupiiu e gɔɔ aaɔ̃.#Soũ 105.28; Zia 16.10 23Wìli kɔ̃'eo, mɛ́ gbɛ̃e i e gò a tíao e gɔɔ aaɔ̃pi. Kási gupua ku gu pɔ Isailiɔ kuu piiɛ.

24Ɔ̃ Falaɔ̃ Mɔizi sìsi à mɛ̀: À gɛ́ Dii sisii ń á nɔɛɔ ń á nɛɔ pii, í á sãɔ ń á bleɔ ń á zuɔ tó. 25Mɔizi mɛ̀: To wàɔ wá sa'obɔɔ ń sa pɔ wì a pɔ katɛu à tɛkũ obɔɔ kũa, kɛ́ wà e wà Dii wá Lua gbagbaò. 26Sema wà gɛ́ ń wá pɔtuoɔ, baa mɛndo a gɔ̃o, asa an guu ɔ̃ wá sa'obɔɔ sɛu wà Dii wá Lua gbagbaò. E wà gɛ wà kaò we, wá dɔ̃ pɔ pɔ wá sɛ́ wà sa'oòwà gĩ́ao. 27Dii Falaɔ̃ swãfɛ̃̀, ɔ̃ i we à ń gbaɛo. 28Falaɔ̃ ò Mɔiziɛ: Gomɛɛ we! Nsu to wá wɛ́ kɛ siiɔ̃ lɔo. Zĩ́ pɔ wa wɛsìkɔ̃lɛ, n gaɛ. 29Ɔ̃ Mɔizi mɛ̀: Lá ń ò, má wɛsinlɛ lɔo.

Currently Selected:

Bɔa 10: Boo2024

Highlight

Copy