Bɔa 8

1Dii ɛ̀a ò Mɔiziɛ: O Aalonaɛ aà a go sɛ à dɔ swaɔla ń swa'ɔnaɔ ń biaɔ, blɔɔɔ i ka Egipi busuu. 2Kɛ́ Aalona a go dɔ̀ Egipi íɔla, ɔ̃ blɔɔɔ bɔ̀lɛ, aa lì busupia. 3Ɔ̃ ɛsɛdepiɔ kɛ̀ màa sɔ̃ ń ɛsɛdekɛ guu, aa tò blɔɔɔ lì Egipia.

4Ɔ̃ Falaɔ̃ Mɔizi ń Aalonao sìsi à mɛ̀: À awakpa Diiɛ aà blɔɔɔ kɛ̃a ń ma gbɛ̃́ɔ, mí á gbɛ̃́ɔ gbaɛ aa gɛ́ sa'oiwà. 5Ɔ̃ Mɔizi ò Falaɔ̃ɛ: Gɔɔdilɛmɛɛ mà awakpanɛ Diiɛ ń n iwaɔ ń n gbɛ̃́ɔ, kɛ́ aà blɔɔɔ kɛ̃ma ń n uaɔ, aai gɔ̃ swai ado. 6Falaɔ̃ mɛ̀: Zia. Ɔ̃ Mɔizi mɛ̀: A kɛ lá ń òwa kɛ́ ǹ e ǹ dɔ̃ gbɛ̃e muaa ń Dii wá Luaoo. 7Blɔɔɔ kɛ̃ma ń n uaɔ ń n iwaɔ ń n gbɛ̃́ɔ, aai gɔ̃ swai ado.

8Kɛ́ Mɔizi ń Aalonao gò Falaɔ̃ kĩi, Mɔizi wabikɛ̀ Diiwa blɔɔ pɔ a kà Falaɔ̃guɔ yãmusu. 9Dii Mɔizi wabikɛa mà, ɔ̃ blɔɔpiɔ gàga kpɛ́ɔ guu ń uaɔ ń wɛ̃nkpɛɔ. 10Wa kã̀aakãaa, ɔ̃ busu gĩdɔ̀ pii. 11Kɛ́ Falaɔ̃ è daama kɛ̀, aà swã ɛ̀a gbãakũ̀, ɔ̃ i Mɔizi ń Aalonao yãmao lá Dii òwa.

Gãi kaa

12Dii ò Mɔiziɛ: O Aalonaɛ aà a go sɛ́, i tɔɔlɛ lɛ́ò, busuti i li gãiɔ ũ Egipi gupiiu. 13Ɔ̃ aa kɛ̀ màa. Aalona a go sɛ̀, à tɔɔlɛ lɛ̀ò, ɔ̃ busuti lì gãiɔ ũ, aa kà gbɛ̃nazĩnaɔgu ń pɔtuoɔ. Egipi busuti lì gãiɔ ũ pii. 14Ɛsɛdeɔ yɔ̃̀wà màa ń ɛsɛdekɛ guu sɔ̃, ɔ̃ aa fùa. Gãiɔ kà gbɛ̃nazĩnaɔgu ń pɔtuoɔ. 15Ɔ̃ ɛsɛdeɔ ò Falaɔ̃ɛ: Lua ɔgbɛɛ. Kási Falaɔ̃ swã gi yiaaɛ, i ń yãmao lá Dii òwa.

Ũsĩnaɔ kaa

16Dii ò Mɔiziɛ: Fɛlɛ kɔɔkɔɔ ǹ gɛ ǹ Falaɔ̃ le gɔɔ pɔ àlɛ gɛ́ swai, ní oɛ̀ ma Dii ma mɛ̀ aà ma gbɛ̃́ɔ gbaɛ aa gɛ́ ma sisii. 17Tó à gì ń gbaɛi, má ũsĩnaɔ kaaagu ń aà iwaɔ ń aà gbɛ̃́ɔ ń aà bɛ kpɛ́ɔɛ. Egipi kpɛ́ɔ i pa ń ũsĩnaɔ, aa da tɔɔlɛa se. 18Gɔɔ bee Gosɛ̃ busu gu pɔ ma gbɛ̃́ɔ kuu ɔ̃ má tó ado. We ũsĩnaɔ kauo, i dɔ̃ kɛ́ mamɛ má Dii ũ a busuu. 19Má a gbɛ̃́ɔ dɔ̃kɔ̃ɛ ń aà gbɛ̃́ɔ. Zia ɔ̃ seelapi a kɛ.

20Ɔ̃ Dii kɛ̀ màa. Ũsĩnaɔ kà Falaɔ̃ ua ń aà iwaɔ uaɔ. Egipi ɔ̃ɔkpà pii ũsĩnaɔ yãi. 21Ɔ̃ Falaɔ̃ Mɔizi ń Aalonao sìsi à mɛ̀: À gɛ́ sa'oi á Luawa busuu la. 22Ɔ̃ Mɔizi òɛ̀: A zɛ́ vĩ wà kɛ màao, asa pɔ pɔ wá sa'oò Dii wá Luawa dɛ Egipiɔnɛ tɛ̃ ũɛ. Tó wa sa'ò ń pɔ pɔ dɛnɛ́ tɛ̃ ũo ń wáa, aa wá papa ń gbɛo aa wá dɛdɛo le? 23Wá taa'o gbáau gɔɔ aaɔ̃ɛ, wí gbasa wà sa'o Dii wá Luawa lá a òwɛ̃ɛwa. 24Ɔ̃ Falaɔ̃ mɛ̀: Má á gbaɛ à gɛ́ sa'oi Dii á Luawa gbáau, ãma ásu gɛ́ zã̀o. À awakpaɛ̀mɛɛ sa. 25Mɔizi òɛ̀: Tó ma ta, má awakpaɛ̀, i ũsĩnaɔ kɛ̃ma zia ń n iwaɔ ń n gbɛ̃́ɔ. Ãma nsu mɔafilikɛ ǹ gi gbɛ̃́ɔnɛ aa gɛ́ sa'oi Diiwa lɔo. 26Kɛ́ Mɔizi bɔ̀ Falaɔ̃ kĩi, à awakpàɛ̀ Diiɛ. 27Dii aà wabikɛa mà, ɔ̃ ũsĩnaɔ kɛ̃̀ Falaɔ̃wa ń a iwaɔ ń a gbɛ̃́ɔ. I gɔ̃ gueio, baa mɛndo. 28Kási Falaɔ̃ swã gi gbãa e tiaɛ, i ń gbaɛo.

Currently Selected:

Bɔa 8: Boo2024

Highlight

Copy