Zĩn 16

Timɔte gɛa ń Pɔluo ń Silivɛ̃o

1Pɔlu kà Dɛɛbɛ ń Lisitao. Wekĩi Yesudee ku wì mɛɛ̀ Timɔte. Aà daá Yuda Yesudeɛ, mɛ́ aà maeá Gɛlɛkiɛ. 2Yesude pɔ aa ku Lisita ń Ikɔniuoɔ aaì aà tɔnasi. 3Pɔlu ye aà gɛ́anɔ, ɔ̃ à tɔ̃zɔ̃̀ɛ̀ Yuda pɔ ku wɛ̃lɛpiɔ guuɔ yãi, asa ampii aa dɔ̃ kɛ́ aà maeá Gɛlɛkiɛ. 4Wɛ̃lɛ pɔ aa gɛ̀u pii, aaì yã pɔ zĩnaɔ ń gbɛ̃zɔ̃ɔɔ dìlɛ Yelusalɛũ o Yesudeɔnɛ aaɔ kũa. 5Ɔ̃ an Yesu naaikɛa lɛ́ kasaakũ mɛ́ aalɛ dasikũ lagulɛdɔ.

Pɔlu gɛa Masedoni busuu

6Lua Nisĩna gìnɛ́ aa gɛ́ Lua yã'oinɛ́ Azi busuu, ɔ̃ aa pã̀ Filizi busu ń Galati busuola. 7Kɛ́ aa kà Misi busu zɔ̃lɛu, aa yɔ̃̀wà wà gɛ̃ Bitini busuu, ɔ̃ Yesu Nisĩna i weinɛ́o. 8Kɛ́ aa Misi busu baavĩ̀, ɔ̃ aa pìla Toloasi. 9Gwãasĩna Pɔlu Masedoni busu gbɛ̃e è zɛaala iu, àlɛ awakpaɛ̀ à mɛ̀: Buawá Masedoni, dɔwálɛ. 10Kɛ́ a è iu màa, ɔ̃ wa Masedoni sɔukɛ̀ gɔ̃̀ɔ, asa wá dɔ̃̀ sa, kɛ́ Lua mɛ́ lɛ́ wá sisi wà gɛ́ baonakpainɛ́ we.

11Ɔ̃ wa gɛ̃ go'ilɛnau Toloasi, wa mipɛ̀ Samɔtasiwa. Kɛ́ a gu dɔ̀, wa ka Nɛapɔli. 12Bɔa we wa gɛ Filipi, Masedonipi busu saalo mɛɛwia pɔ dɛ Lomadeɔ pɔ ũ, ɔ̃ wa gɔɔplakɛ̀ wɛ̃lɛpiu. 13Kãmabogɔɔ wa bɔ wɛ̃nkpɛ, wa gɛ swa saɛ, gu pɔ wálɛ e wì wabikɛu. Ɔ̃ wa zɔ̃lɛ wa yã'ò nɔɛ pɔ kãaaa weɔnɛ. 14Nɔɛe ku we, wì mɛɛ̀ Lidia. Tiatii nɔɛ zwãa tɛ̃a yianaɛ, mɛ́ luasisinaɛ. Àlɛ yã pɔ Pɔlu lɛ́ o ma, ɔ̃ Dii aà sɔ̃ wɛ̃̀ɛ̀, à yãpi sì. 15À da'ilɛkɛ̀ ń a bɛdeɔ, ɔ̃ à wabikɛ̀wá à mɛ̀: Tó a ma Dii naaikɛa sìɛ, à mɔ pila ma bɛ. Ɔ̃ wa aà yãzɛ'èɛ.

Pɔlu ń Silivɛ̃o daa kpɛ́u Filipi

16Zĩewa kɛ́ wálɛ gɛ́ wabikɛkĩi, wa kpaaũ ń zɔnɔɛ pɔ tãa mlɛ vĩo. Aà diiɔ ì ɔ̃a e maamaa aà asi'oanɛ́ yãmusu. 17Ɔ̃ à bɔ̀ tɛwázi, wapiɔ ń Pɔluo, àlɛ wiilɛ àlɛ mɛ: Gbɛ̃́ beeɔá Lua Musude zɔblenaɔnɛ, aalɛ suabazɛ kpawakɛɛ́ɛ. 18Màa ìɔ kɛ lagulɛdɔ, ɔ̃ yãpi Pɔlu wã̀. À lìli a ò tãapiɛ: Má ònɛ ń Yesu Kilisi tɔ́o, go nɔɛpiwa. Ɔ̃ à gòwà gɔ̃̀ɔ.

19Kɛ́ aà diiɔ è ń ai'ea aà yãmusu tãmaa ń nɛ́ɛ, ɔ̃ aa Pɔlu ń Silivɛ̃o kũ̀kũ aa ń galɛ wà gɛ̀ńnɔ gbãadeɔ kĩi gãaɛ. 20Aa gɛ̀ńnɔ yãkpalɛkɛnaɔ kĩi aa mɛ̀: Gbɛ̃́ɛ beeɔá Yudaɔnɛ, mɛ́ aalɛ wá wɛ̃lɛ ɔ̃ɔkpa. 21Fɛlɛkaayã pɔ wá Lomadeɔ ikoyã gì wà si ge wà kɛ ɔ̃ aalɛ danɛ́. 22Bila fɛ̀lɛńnɔ, ɔ̃ yãkpalɛkɛnapiɔ mɛ̀ wà ń ulaɔ wolomá wà ń gbɛ̃ ń goo. 23Kɛ́ wà gbɛ̃a gbãa kɛ̀nɛ́, ɔ̃ wà ń dá kpɛ́u, wa ò kpɛ́pi dɔ̃anaɛ aà ń dɔ̃́a maamaa. 24Kɛ́ wa òɛ̀ màa, ɔ̃ à ń dá kpɛ́pi guonau, à ń gbáɔ dà líu giũgiũ.

25Wɛɛdo taawa Pɔlu ń Silivɛ̃o lɛ́ wabikɛ Luawa, aalɛ aà taasilɛ, mɛ́ dakpɛunaɔ lɛ́ swãkpa ń yãi. 26Kãndo tɔɔlɛ lùalua gbãugbãu e kpɛ́pi gĩɔ dèe. Wegɔ̃ɔ a gbaɔ wɛ̃̀wɛ̃ pii, ɔ̃ dakpɛunaɔ mɔdaonaɔ pòlomá pii. 27Kɛ́ kpɛdɔ̃ana vù, à gbaɔ è wɛ̃wɛ̃a pii, ɔ̃ à a fɛ̃nda wò, a ye à azĩa dɛ, asa àlɛ e dakpɛunaɔ baasìɛ. 28Ɔ̃ Pɔlu pũ̀na gbãugbãu à mɛ̀: Nsu nzĩa kɛ'ĩao. Wá ku la wapii. 29Kpɛdɔ̃anapi mɛ̀ wà mɔ ń filiao, ɔ̃ à sìńzi ń bao à kùlɛ Pɔlu ń Silivɛ̃o aɛ, àlɛ lualua. 30À bɔ̀lɛńnɔ bàasi, ɔ̃ à mɛ̀: Maeɔ, kpelewa má kɛ mà zia'ei? 31Aa òɛ̀: Dii Yesu naaikɛ, ńyɔ̃ zia'e, mpi ń n bɛdeɔ pii. 32Ɔ̃ aa Dii yã'òɛ̀ ń aà bɛdeɔ pii. 33Wɛɛdo bee, kpɛdɔ̃anapi ń sɛ́, à gɛ̀ à ń gu'ĩaɔ pìpinɛ́, ɔ̃ à da'ilɛkɛ̀ gɔ̃̀ɔ ń a gbɛ̃́ɔ mpii. 34Ɔ̃ à gɛ̃̀ńnɔ a bɛ à blɛkɛ̀nɛ́. Aapi ń a bɛdeɔ an pɔ kɛ̀ na maamaa, kɛ́ aa Lua naaikɛ̀ yãi.

35Kɛ́ gu dɔ̀, yãkpalɛkɛnaɔ dɔaiɔ zĩ̀, aa gɛ o wà gbɛ̃́piɔ gbaɛ. 36Ɔ̃ kpɛdɔ̃anapi ò Pɔluɛ: Yãkpalɛkɛnaɔ gbɛ̃́ɔ zĩ̀a mà á gbaɛ. À bɔlɛ, í á taanankɛ. 37Ɔ̃ Pɔlu ò dɔaipiɔnɛ: Aa wá gbɛ̃́ bila wáa yãkpalɛkɛawanɔ sai, aa wá dá kpɛ́u, wá gbɛ̃́ pɔ Lomadeɔn wá ũ. Tiasa ɔ̃ aa ye wà wá bɔlɛ asii guua? O'o! A kɛ màao. Sema aa mɔ aa wá bɔlɛ ńzĩa. 38Dɔaipiɔ yãpi sɛ̀lɛ aa ò yãkpalɛkɛnaɔnɛ. Kɛ́ aa mà Lomadeɔn ń ũ, ɔ̃ vĩa ń kṹ. 39Ɔ̃ aa mɔ̀ awakpànɛ́ aa ń bɔlɛ kpɛ́u, ɔ̃ aa wabikɛ̀má aa bɔlɛnɛ́ ń wɛ̃lɛu. 40Kɛ́ aa bɔ̀lɛ kpɛ́u, aa gɛ̀ Lidi bɛ. Aa Yesudeɔ lè we, ɔ̃ aa ń nɔ̀sɛ nìninɛ́ aa gɛ̃̀zɛa.

Currently Selected:

Zĩn 16: Boo2024

Highlight

Copy