Zĩn 15

Lɛkpaaĩa Yelusalɛũ

1Gbɛ̃eɔ bɔ̀ Yude aa mɔ̀ Antiɔsi, ɔ̃ aa yãdà Yesudeɔnɛ aa mɛ̀: Tó i tɔ̃zɔ̃ lá Mɔizi dìlɛwao,#Lev 12.3 á zia'eo. 2Pɔlu ń Baanabao zɔadɔ̀má aa lɛkpaakɛ̀ńnɔ maamaa yãpi musu. Ɔ̃ Yesudeɔ zɛ̀ò Pɔlu ń Baanabao ń ń gbɛ̃eɔ gɛ́ Yelusalɛũ yãpi gɔ̃gɔ̃i ń zĩnaɔ ń gbɛ̃zɔ̃ɔɔ. 3Aa gɛ̀ zɛ̀nɛ́, ɔ̃ aa pã̀ Fenisi busu ń Samali busuola. Aa buipãleɔ nɔsɛlilɛa yã dàu aa sìu ń gbɛ̃́ɔnɛ we, ɔ̃ an pɔ kɛ̀ na zɔ̃ɔ. 4Kɛ́ aa kà Yelusalɛũ, Yesudeɔ ń zĩnaɔ ń gbɛ̃zɔ̃ɔɔ gbãakpàńzi, ɔ̃ aa yã pɔ Lua kɛ̀nɛ́ baokpànɛ́ pii.

5Ɔ̃ Falisi Yesudeeɔ fɛ̀lɛ aa mɛ̀: Sema buipãleɔ tɔ̃zɔ̃, wi onɛ́ aaɔ Mɔizi ikoyã kũa. 6Ɔ̃ zĩnaɔ ń gbɛ̃zɔ̃ɔɔ kɔ̃kã̀aa, aalɛ yãpi gwa. 7Kɛ́ lɛkpaaĩa gbã̀akũ̀, Piɛɛ fɛ̀lɛ zɛ̀ a ònɛ́: Ma gbɛ̃́ɔ, á dɔ̃ kɛ́ Lua ma dilɛ á guu à gɛ̃̀gɛ̃, kɛ́ buipãleɔ Yesu baoma ma lɛ́u, aai aà naaikɛ. 8Lua dee gbɛ̃pii nɔ̀sɛ dɔ̃, ɔ̃ à ń gbá a Nisĩna a siańnɔ seela ũ,#Zĩn 11.15-18 lá à wá gbáwa. 9Lua i ń dilɛ dodoa ń wapiɔo. À ń nɔ̀sɛ pìpinɛ́, kɛ́ aa Yesu naaikɛ̀ yãi. 10Bɔyãi a Lua lɛ̀ álɛ gwai? Aso pɔ wá deziɔ ń wapiɔ wa fua sɛi ɔ̃ á ye à dinɛ́a? 11Màa no! Wá a naai vĩ kɛ́ wá bɔ Dii Yesu gbɛ̃kɛ yãi lá ampiɔwa sɔ̃ɛ.

12Gbɛ̃́ɔ kɛ̀ kílikili, ɔ̃ aa swãkpà Baanaba ń Pɔluozi, aalɛ seelaɔ ń dabudabu pɔ Lua kɛ̀nɛ́ buipãleɔ guuɔ o. 13Kɛ́ aa yã'ò wa làa, Zaki fɛ̀lɛ à yãsɛ̀ à mɛ̀: Ma gbɛ̃́ɔ, à ma yãma. 14Simɔ ò lá Lua dɔ̀aa à buipãleɔ wɛgwà, ɔ̃ à gbɛ̃́ɔ sɛ̀ ń guu a pɔ ũ. 15Ãnabiɔ yãɔ kɔ̃sɛ̀ ń beeo, asa aa mɛ̀:

16Bee gbɛa má ɛa mà mɔ

mà Davidi bɛzĩ vu,

mí a gufooɔ kɛkɛ mà tata lɔ,

17kɛ́ buipãleɔ ma wɛɛlɛ,

gbɛ̃́ pɔ ma ń sisì ma ń sɛ́piɔ pii.

18Dii pɔ lɛ́ yãpi kɛ mɛ́ ò.

A tò wà yãpi dɔ̃̀ za káau.#Amɔ 9.11-12

19Ayãmɛto má è a maa wà yã zĩ'ũ dilɛ bui pɔ aa zɛ̀ ń Luaoɔnɛo. 20Wà lakɛ̃nɛ́ aa mikɛ̃ tãa blɛwa ń gbãsĩkɛao ń nɔ̀ɔ kolokpasaio ń kpàao.#Bɔa 34.15-17; Lev 18.6-23, 17.10-16 21Asa à gɛ̃̀gɛ̃ wìɔ Mɔizi lá kyokɛ luasisikpɛɔ guu kãmabogɔɔzĩ piiɛ, wìɔ aà yã waasokɛ wɛ̃lɛ ń wɛ̃lɛo.

Zĩnaɔ gbɛ̃́ɔ zĩa buipãleɔ Yesudeɔwa

22Ɔ̃ zĩnaɔ ń gbɛ̃zɔ̃ɔɔ zɛ̀ò ń Yesudeɔ pii wà gbɛ̃́ɔ sɛ́ ń guu, wà ń zĩ Antiɔsi ń Pɔluo ń Baanabao. Ɔ̃ aa ń dɔaanaeɔ sɛ̀, Yuda pɔ wì mɛɛ̀ Baasaba ń Silivɛ̃o. 23Wà taalapi kpàmá, yã pɔ wa kɛ̃̀ a guun kɛ: Wá zĩnaɔ ń gbɛ̃zɔ̃ɔɔ, wa fɔkpà wá gbɛ̃́ pɔ aa dɛ buipãleɔ ũ Antiɔsi ń Sili busuo ń Silisi busuoɔwa. 24Wá mà wá gbɛ̃eɔ gɛ̀ á kĩi aa á nɔ̀sɛ ɔ̃ɔkpàɛ́, aa á dá biliu ń yã'oa guu. Wá lɛ́ ku a guuo, 25ɔ̃ wa lɛdoũkɛ̀ wa zɛò kɛ́ wà gbɛ̃́ɔ sɛ wà ń zĩwá ń wá gbɛ̃́ yenzideɔ Baanaba ń Pɔlu 26pɔ aa gabòbo wá Dii Yesu Kilisi tɔbɔa yãio. 27Ayãmɛto wálɛ Yuda ń Silivɛ̃o zĩwá, aa yã pɔ wá kɛ̃̀ láu oɛ́ ń lɛ́o. 28Asa Lua Nisĩna ń wapiɔ wa zɛò wá asoe diɛ́o, sema a zɛdeɛ beeɔ. 29À mikɛ̃ nɔ̀ɔ pɔ wà sa'òò tãawa soawa ń kpàao ń nɔ̀ɔ kolokpasaio ń gbãsĩkɛao. A maa à mikɛ̃ beeɔwaɛ. Wà kɔ̃'e aafia!

30Ɔ̃ wà ń gbaɛ, aa gɛ̀ Antiɔsi. Aa Yesudeɔ kã̀aa pii, ɔ̃ aa lápi kpàmá. 31Kɛ́ aa a kyokɛ̀, ɔ̃ an pɔ kɛ̀ na maamaa ń nɔsɛniniyãpio. 32Yuda ń Silivɛ̃oá ãnabiɔnɛ, ɔ̃ aa lɛdà ń gbɛ̃́piɔwa maamaa, aa ń gbá gbãa. 33Kɛ́ aa gɔɔplakɛ̀ we, Yesudeɔ lɛzàmá, ɔ̃ aa tà ń zĩnaɔ kĩi aafia. 34-35Pɔlu ń Baanabao gɔ̃̀ Antiɔsi. Ń gbɛ̃pãleɔ dasi aa Dii yãdàdanɛ́ aa baonakpànɛ́.

Pɔlu wɛ̃lɛgɛa gɛ̃n plaade

36Gɔɔpla gbɛa Pɔlu ò Baanabaɛ: Wà ɛa gɛ́ Yesudeɔ gwai wɛ̃lɛ pɔ wa Dii yã waasokɛ̀u yãaɔ guu, wíɔ dɔ̃ lá aa dɛ. 37Baanaba ye Zãa Maaku sɛ aà gɛńnɔ, 38ɔ̃ Pɔlu lɛ́ e a maa wà gbɛ̃́ pɔ kɛ̃̀má Pamfili, i tɛńzi ń zĩ guuo sɛ lɔo.#Zĩn 13.13 39Aai makɔ̃ɛo, ɔ̃ aa kɛ̃̀kɔ̃wa. Baanaba Maaku sɛ̀, aa gɛ̃̀ go'ilɛnau aa gɛ̀ Sipi. 40Ɔ̃ Pɔlu Silivɛ̃ sɛ̀. Yesudeɔ ń ná Diiɛ a ɔzĩ aà gbɛ̃kɛkɛnɛ́, ɔ̃ aa dà zɛ́u. 41Aa pã̀ Sili ń Silisiola, aa Yesudeɔ gbà gbãa.

Currently Selected:

Zĩn 15: Boo2024

Highlight

Copy