Zĩn 17

Pɔlu kua Tɛsaloni

1Aa bɔ̀lɛ ń Amfipɔlio ń Apolonio, ɔ̃ aa kà Tɛsaloni, gu pɔ Yudaɔ luasisikpɛ kuu. 2Ɔ̃ Pɔlu gɛ̃̀ luasisikpɛu lá ìɔ kɛwa, à Lua yã pɔ wa kɛ̃̀ láu waasokɛ̀nɛ́ e kãmabogɔɔ là aaɔ̃. 3Àlɛ a bɔɔlɛkɛnɛ́ lá à kũ̀ Mɛsi taasikɛ, i bɔ gau à mɛ̀: Yesu pɔ malɛ aà yã'oɛ́ mɛ́ Mɛsipi ũ. 4An gbɛ̃eɔ yãpi zɛ'è, ɔ̃ aa nà Pɔlu ń Silivɛ̃owa. Màa Gɛlɛki pɔ aaì Lua sisiɔ nàmá dasi ń nɔɛ tɔdeɔ dasi lɔ.

5Ɔ̃ Yudaɔ ĩisɛ̀ńnɔ, aa bɛbɛmpãdeɔ kã̀aa aa dasikũ̀, ɔ̃ aa wɛ̃lɛ lòo. Aa gɛ̀ lìa Zasɔ̃ bɛi, aalɛ Pɔlu ń Silivɛ̃o wɛɛlɛ wà ń kṹ wà bɔńnɔ balu guu. 6Kɛ́ aai ń eo, aa Zasɔ̃ ń Yesude pãleɔ gàlɛ aa bɔ̀ńnɔ wɛ̃lɛ gbãadeɔ kĩi, aalɛ wiilɛ aalɛ mɛ: Gbɛ̃́piɔá dũniadɛnaɔnɛ. Aa mɔ̀ la, 7ɔ̃ Zasɔ̃ ń dilɛ a bɛ. Gbɛ̃́piɔ lɛ́ pã Sezaa ikoa mpii, aaì mɛ kia pãle ku wì mɛ Yesu. 8Yãpi zɔ̃̀ bila ń wɛ̃lɛ gbãadeɔ pɔwa. 9Ɔ̃ aa ɔ̃a sì Zasɔ̃ ń gbɛ̃kĩniɔwa aa ń gbaɛ.

Pɔlu kua Bele

10Gwãasĩna bee gɔ̃̀ɔ Yesudeɔ Pɔlu ń Silivɛ̃o gbàɛ Bele. Kɛ́ aa kà we, ɔ̃ aa gɛ̃̀ Yudaɔ luasisikpɛu. 11Gbɛ̃́piɔ nɔ̀sɛ maa dɛ Tɛsalonideɔla, aa Lua yãsì ɔplapla. Lagulɛdɔ aaìɔ wɛtɛ luayãtaalai, kɛ́ wà e wà dɔ̃ tó Pɔlu yãpiɔ sĩana vĩ. 12An gbɛ̃́ pɔ Dii naaikɛ̀ɔ dasi ń Gɛlɛki nɔɛ tɔdeɔ ń Gɛlɛki gɔ̃ɛɔ dasidasi lɔ. 13Kɛ́ Tɛsaloni Yudaɔ mà Pɔlu lɛ́ Lua yã waasokɛ Bele lɔ, ɔ̃ aa mɔ̀ we, aa yãkeledà, aa bila pɔ fɛ̀lɛ. 14Ɔ̃ Yesudeɔ Pɔlu gbàɛ gɔ̃̀ɔ isia oi, Silivɛ̃ ń Timɔteo mɛ́ gɔ̃̀ we. 15Gbɛ̃́ pɔ aalɛ gɛ́ zɛi Pɔluɛɔ gɛ̀aanɔ e Atɛni, ɔ̃ aa ɛ̀a tà Silivɛ̃ ń Timɔteowa ń Pɔlu lɛgbɛo, à mɛ̀ aa mɔ aa a le kpakpa.

Pɔlu kua Atɛni

16Kɛ́ Pɔlu lɛ́ ń dã́ Atɛni, aà kã́ fɛ̀lɛ sĩ̀, kɛ́ a è tãa di wɛ̃lɛpiu yãi. 17Ɔ̃ à waasokɛ̀ Yudaɔnɛ ń buipãle pɔ aaì Lua sisiɔ luasisikpɛu ń gbɛ̃́ pɔ ìɔ ń lé ɛlɛu lagulɛdɔɔ. 18Pɔluɔ lɛ́ yãbɔbɔ kɔ̃ lɛ́u ń yãwaaipana pɔ wì mɛnɛ́ Ɛpikuliɔ ń Sitoisiɔ. Ɔ̃ an gbɛ̃eɔ mɛ̀: Bɔ́ yã daobãnapi lɛ́ bɔlɛi? Gbɛ̃eɔ mɛ̀: Wálɛ e tãa dafuɔ yã kpàwa ɔ̃ àlɛ kɛ. Aa ò màa kɛ àlɛ Yesu yã ń aà bɔa gau yão baokpanɛ́ yãiɛ. 19Ɔ̃ aa Pɔlu sɛ̀ gɛ̀ò gbɛ̃zɔ̃ɔɔ kĩi Aleopaga aa mɛ̀: Ńyɔ̃ yã dafu pɔ ni danɛ́ owɛ̃ɛo le? 20Wa yãbɔnsaɛ màma, wá ye wà a bɔɔlɛ dɔ̃. 21Atɛnideɔ pii ń nibɔ pɔ ku weɔ, aaliɔ ye yãpãleio, sema yã dafu maà ń a waaipaao baasio.

22Ɔ̃ Pɔlu fɛ̀lɛ zɛ̀ Aleopagadepiɔ guu à mɛ̀: Atɛnideɔ, má è á misiilɛa tãaɔnɛ ãia vĩ maamaa yãpii guu. 23Kɛ́ má bɛ á wɛ̃lɛu, malɛ pɔ pɔ i kulɛnɛ́ɔ taasika, ɔ̃ ma sa'okĩie è, wà lakɛ̃̀wà wà mɛ̀: Lua pɔ wá dɔ̃o pɔ. Lua pɔ á aà dɔ̃o mɛ́ álɛ misiilɛɛ̀pi, aà bao malɛ kpaɛ́.

24Lua dũnia kɛ̀ ń pɔ pɔ ku a guuɔ pii. A dɛ musu ń tɔɔlɛo Dii ũ, ìliɔ ku kpɛ́ pɔ gbɛ̃nazĩnaɔ dɔ̀ɛɔ guuo.#1 Kia 8.27 25Aà bàa ku ń gbɛ̃nazĩna dɔnlɛeoo. Aapi mɛ́ ì wɛ̃ni ń nisĩnao ń pɔpiio kpa gbɛ̃piiwa.#Isa 42.5 26À bui pii bɔ̀ gbɛ̃́ mɛndo kĩiɛ, ɔ̃ aa ku dũnia gola siiɔ̃u pii. À dɔ̀aa à gɔɔdìlɛdilɛ bui piiɛ ń gu pɔ aaɔ kuuɔ lɛ́o. 27À ń kɛ́, kɛ́ aaɔ a wɛɛlɛ, aaɔ ɔmalɛmalɛ e aa gɛ bɔwa. Baa ń beeo a zã̀ ń wá gbɛ̃eoo. 28Asa aapi mɛ́ ì to wàɔ wɛ̃ni vĩ, wiɔ ku, wi wá mɛ sɛ́. Lá á lakɛ̃naeɔ òwa aa mɛ̀: Wá dɛ aà buiɔ ũ sɔ̃ɛ. 29Lá Lua buiɔn wá ũ, wásu wàɔ e a dɛ lan tãa pɔ gbɛ̃nazĩna kɛ̀ ń vuao ń ãnusuo ń gbɛo à gɔ̃inakɛ̀wà lá a yeiwawao. 30Lua wɛkpà a vĩ̀ wá wɛsiagɔɔ yãla, ɔ̃ tia àlɛ lɛda gbɛ̃piiwa gupiiu aa nɔsɛlilɛ. 31Asa à gɔɔdìlɛ, kɛ́ gbɛ̃́ pɔ a sɛ̀ a yãkpalɛkɛ ń dũniao a zɛ́waɛ. Lua gbɛ̃́ pɔ a sɛ̀pi bɔ̀ gau, kɛ́ gbɛ̃pii e dɔ̃ kɛ́ aapiɛ.

32Kɛ́ aa bɔa gau yãpi mà, an gbɛ̃eɔ aà laanikɛ̀, ãma an gbɛ̃eɔ mɛ̀: Wá n yãpi ma zĩewa lɔ. 33Ɔ̃ Pɔlu bɔ̀ ń kĩi. 34Gbɛ̃eɔ nàwà, aa Yesu naaikɛ̀. Aleopaga gbɛ̃zɔ̃ɔɔ do pɔ wì mɛ Denisi ku ń guu ń nɔɛ pɔ wì mɛɛ̀ Damalio ń gbɛ̃eɔ lɔ.

Currently Selected:

Zĩn 17: Boo2024

Highlight

Copy