Mbs 9
9
Tva skwi ŋa magay ta ghəŋa skala Pak
1Ma taŋtaŋa tili#9:1 Taŋtaŋa tili da la Israʼila ná, tsaya sliʼafta ta rita tila mahkən ha ka labi ta rita tila mafwaɗ. ta mahisa vaku, tahula saba taŋ ta haɗika Masar, ka Yawe nda Musa ta mtaka Sinay mantsa: 2« Ka skala la Israʼila ta skala Pak ta fitik ya tsaf lu. 3Baɗ ghwaŋpəɗ fwaɗ ma na tili na, ga hawu, dzaʼa skala kuni. Ka skala kuni ta fitika ni manda va ya mna inda zlahuha, inda tva skwi ŋa magay ta nghanaghata, » kaʼa. 4Ka mnanatá Musa ta la Israʼila, ŋa skalay taŋ ta skala Pak. 5Ka skalatá həŋ ta skala Pak ga hawu baɗ maghwaŋpəɗ fwaɗ ma tila mataŋtaŋ ta mtaka Sinay. Ka magatá la Israʼila manda va ya mnanaf Yawe ta Musa.
6Tsaw mamu sanlaha ma mnduha ta tsaɗ lu ma vəl ksaŋta taŋ ta mbli, mutsaf a hahəŋ ta skalaŋtá Pak baɗ tsaya wa. Ka lagha həŋ ta kəma i Musa nda Haruna baɗ va tsaya. 7Ka həŋ nda həŋ mantsa: « Gwal ta tsaɗ lu a aŋni wu, kabga ksaŋ ksa ŋni ta mbli. Kabgawu kəl lu ka pyaftá aŋni ka hlaktá ŋa ŋni ma mbəhu ŋa Yawe baɗ fitik tsaf lu, kawadaga nda sanlaha ma la Israʼila na? » ka həŋ. 8Ka Musa nda həŋ mantsa: « Sladavawa slada karaku, ka snanata yu ta skwi dzaʼa mnafta Yawe ta ghəŋa kaghuni, » kaʼa.
9Ka Yawe nda Musa mantsa: 10« Mnana mna ta la Israʼila: Ka mamu mndu mataba ghuni dər ndanana tsi, ka ma zivira ghuni a tsi, ta tsaɗ lu dabga vəl ksaŋta ni ta mbli, ka ta dzaʼa da vli diʼiŋ a tsi, laviŋ lava tsa mndu ya ta skala Pak ŋa Yawe. 11Ga hawu baɗ maghwaŋpəɗ fwaɗ ma mahisa tili#9:11 Tila mahis da la Israʼila ná, tsaya rita tila mafwaɗ ha rita tila mahutaf. dzaʼa skala hahəŋ, ŋa zay taŋ nda buradi kul haɗ is mida, nda ya nda masuʼataha ɗahɗaha#Sab 12:8.. 12Haɗ həŋ dzaʼa pɗanata ŋa ga sərɗək wu, haɗ həŋ dzaʼa ɓlanaptá ghudzifa ni wu, dzaʼa skalay həŋ ta Pak manda ya mnaf tva skwiha ŋa magay ta ghəŋa ni. 13Ama ka mamu mndu kul haɗ skwa tsaɗa tida, laghu a diʼiŋ wu, ka kwalaghutá tsi ta skala Pak, dzaʼa klap kla lu mataba guyatá ghəŋa mnduha ni, kabga kladagha a ta mbəha ni ŋa Yawe baɗ fitik tsaf lu wa. Dguv ta ghəŋa ni dmakwa ni. 14Ka ta kumay mayəm ta nzaku ma səla ghuni ta skala paka Yawe, snata ni ta tva skwiha ya ŋa magay, nda zlahuha ta ghəŋa skala Pak. Ka skwa turtuk dzaʼa nzakwa tva skwiha ŋa magay, nda mayəm tani, nda zwaŋa haɗik tani, » kaʼa.
Kusay ta ghəŋa həga tumpul
15Baɗ dzugwatá həga tumpul ná, ka bukwamtá kusay ta həga tumpula dzratá wi ya, daga ga hawu ta ghəŋa həga tumpul manda vu, mantsa ya ha ga sərɗək. 16Mantsa ya kəʼa ta gɗata ta nzata. Gifitik ya, bukwamta tsa kusay ya ta tsa həga tumpul ya, girviɗik ya, nzata ni manda vu. 17Inda sliʼa tsa kusay ya ta ghəŋa tsa həga tumpul ya ná, sliʼa la Israʼila guli. Ma vli ya dzaʼa sladata tsi ya guli, fata la Israʼila ta ghuɓuha taŋ hada. 18Ta mnafta nda mna Yawe ta kəl la Israʼila ka sliʼi, ta mnafta nda mna Yawe guli ta kəl həŋ ka fatá ghuɓa taŋ. Inda fitika nzakwa tsa kusay ya ta tsa həga tumpul ya, nzakwa hahəŋ guli hada.
19Nzata tsa kusay ya ka nzəɗavata ta tsa həga tumpul ya ná, magay la Israʼila ta slna Yawe, haɗ həŋ ta sliʼavata wa. 20Baɗ ma sani, ka fitik kwitikw ta nzata tsa kusay ya ta tsa həga tumpul ya. Ta mnafta nda mna Yawe ta kəl həŋ ka fatá ghuɓa taŋ, ta mnafta nda mna Yawe guli ta kəl həŋ ka sliʼavata. 21Baɗ ma sani, ga hawu ha ga sərɗək yeya ta nzata tsa kusay ya. Sliʼa ni ga sərɗək ya, sliʼa hahəŋ. Guli ná, ta nza nza ka vaghu turtuk, nda rviɗik turtuk, sliʼa ni ya, sliʼa hahəŋ guli. 22Ka tata nzaku tsa kusay ya ta tsa həga tumpul ya, dər ŋa za fitik his tsi, dər ŋa za tili tsi, dər ŋa za fitik kidaghi a tsi, nzata la Israʼila ma ghuɓa taŋ, haɗ həŋ ta sliʼavata wa. Sliʼa ni ya, sliʼa hahəŋ. 23Ta mnafta nda mna Yawe ta kəl həŋ ka fatá ghuɓa taŋ, ta mnafta nda mna Yawe guli ta kəl həŋ ka sliʼavata. Ta magay həŋ ta slna Yawe manda va ya ta mnafta Yawe nda ma wa Musa.
Currently Selected:
Mbs 9: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
