Mbs 10
10
Duliha his ka kfura tsedi
1Ka Yawe nda Musa mantsa: 2« Magaf maga ŋa gha ta duliha his nda kfura tsedi pslap lu, ŋa hga guyatá ghəŋa mnduha, nda ya ŋa sliʼanaftá həŋ ma ghuɓu. 3Ka vya vya lu ta tsa duliha ya his his, tskadaghata inda guyatá ghəŋ ta vgha ta vata kagha ta wa tgha tumpula guyaku. 4Ka duli turtuk vya lu ya, maliha ta ghəŋa dəmbuʼata la Israʼila dzaʼa tskadaghatá vgha da kagha.
5Ka vya vya kuni ta ŋizla sliʼi ya, sliʼa tsa gwal ta fatá ghuɓa taŋ nda təv safa fitik ya. 6Ka vya vya kuni ka mahis ta ŋizla sliʼi ya, sliʼa tsa gwal ta fatá ghuɓa taŋ nda təv maghura ya. Vyatá ghuni ŋizla sliʼi ya ná, ŋa sliʼi taŋ tsaya. 7Ama ŋa hagatá hgu ŋa tskavata ya, vyata ghuni ta duli, ama manda tsa ŋizla ya a wa. 8Zwana Haruna, gwal ta dra skwi ŋa Lazglafta dzaʼa vya tsa duliha ya. Dzaʼa nzakway tsaya ka zlahu ŋa ɗekɗek ŋa ghuni nda zivirha ghuni tani. 9Ka ta sliʼi kuni ma haɗika ghuni da vulu nda ghuma ghuni ta lighunista ya, ka vyata kuni ta ŋizla ni nda duli. Mantsa ya ná, dzaʼa havap hava Yawe ka kaghuni, Lazglafta ghuni, ŋa mbaghunafta ni ma dzva ghumaha ghuni. 10Ka vyata kuni ta duli baɗ mutsafta ghuni ta fitik ŋa rfay ghuni ta rfu, ma fitika sanlaha ma skaluha ghuni, ma ngha tili, ma vlay ghuni ta pla ghəŋha ŋa dray tsuh tsuh, nda pla ghəŋa zɗaku. Dzaʼa fam fa ta Lazglafta ghuni ŋa havapta ni ka kaghuni. Iʼi Yawe, Lazglafta ghuni, » kaʼa.
Tva na sliʼa la Israʼila ta mtaka Sinay
11Baɗ mahisambsaka fitik ma tila mahis, ta mahisa vaku manda saba taŋ ma Masar, ka sliʼaftá kusay ta ghəŋa tsa həga tumpula klamha dzratá wi ya. 12Ka sliʼaftá la Israʼila ta mtaka Sinay, ka dzaʼa nda sladavata ma ya vli, sladavata ma ya vli. Ka sladatá tsa kusay ya ma mtaka Paraŋ. 13Tsaya taŋtaŋa sliʼafta taŋ mnanaf Yawe ta həŋ nda ma wa Musa. 14Ka sliʼi drapwa ghuɓa la Yahuda taŋtaŋ ka bakwa gwal vulu ka bakwa gwal vulu. Nahsuŋ zwaŋa Ghaminadav ta kla həŋ. 15Ka klə Netaŋʼel zwaŋa Tsughwar ta mndəra la Yisakar ka bakwa gwal vulu ka bakwa gwal vulu. 16Ka klə Iliʼav zwaŋa Heluŋ ta mndəra la Zəvuluŋ ka bakwa gwal vulu ka bakwa gwal vulu.
17Tahula tsa, ka palatá lu ta həga tumpul, ka hlaftá mndəra la Gersuŋ nda la Mərari, ka sliʼi nda tsi. 18Ka sliʼi drapwa ghuɓa la Rubeŋ ka bakwa gwal vulu ka bakwa gwal vulu. Ilitsur zwaŋa Sədeʼur ta kla həŋ. 19Ka klə Səlumiʼel zwaŋa Tsurisadday ta mndəra la Simghuŋ ka bakwa gwal vulu ka bakwa gwal vulu. 20Ka klə Ilyasaf zwaŋa Dəʼuwel ta mndəra la Gat ka bakwa gwal vulu ka bakwa gwal vulu.
21Tahula tsa, ka fiŋtá mndəra la Kehat ta hla skwiha nda ghuɓa. Ma kɗaku hahəŋ ka ɓhadaghata ya, ta dzagway dzagway sanlaha#Mbs 10:17. ta həga tumpul. 22Ka sliʼi drapwa ghuɓa la Ifrayim ka bakwa gwal vulu ka bakwa gwal vulu, Ilisama zwaŋa Ghamihut həŋ ta kla həŋ, 23Ka klə Gamliʼel zwaŋa Pədatsur ta mndəra la Mənase ka bakwa gwal vulu ka bakwa gwal vulu. 24Ka klə Avidaŋ zwaŋa Gidʼuni ta mndəra la Biŋyamiŋ ka bakwa gwal vulu ka bakwa gwal vulu.
25Ka sliʼi drapwa ghuɓa la Daŋ ka bakwa gwal vulu ka bakwa gwal vulu, hahəŋ nuʼa hula inda ghuɓuha. Ahiʼezer zwaŋa Ammisadday ta kla həŋ, 26Ka klə Pagiʼel zwaŋ Uhraŋ ta mndəra la Aser ka bakwa gwal vulu ka bakwa gwal vulu. 27Ka klə Ahira zwaŋa Inaŋ ta mndəra la Naftali ka bakwa gwal vulu ka bakwa gwal vulu. 28Mantsa ya ka la Israʼila ta sliʼi ka bakwa vulu, ka bakwa vulu.
Sliʼafta ta mtaka Sinay
29Ka Musa nda Huvav zwaŋa dzidza ni Rəghuʼel#Sab 3:1, 18:27. mnda la Midyaŋ, mantsa: « Ta sliʼi da vli ya taŋnaf Yawe ta imi ta sləməŋ ŋni. Kaʼa na: “Dzaʼa vlaghuna vla yu,” kaʼa. Sawi mista ŋni. Dzaʼa maga gha maga ŋni ta zɗaku, kabga mamu zɗaku tanaf Yawe ta imi ta sləməŋ ta la Israʼila, » kaʼa. 30Ama ka Huvav nda tsi mantsa: « La a yu wu. Ta dzaʼa ta haɗika ɗa yu da taba la ini, » kaʼa. 31Ka Musa guli mantsa: « Kdəkkdək, ma zlaŋna ka, wya nda sna kagha ta vliha ŋa fa fay mu ta ghuɓa mu ma mtak, ta kagha dzaʼa fa ŋni tiri. 32Ka ta dzaʼa ka mista ŋni katsi, sagha tsa zɗaku dzaʼa vlaŋnata Yawe ya ná, dzaʼa mutsay kagha ta ŋa gha guli, » kaʼa.
33Ka sliʼaftá həŋ mista ghwá Yawe, ka magatá həŋ ta fitik hkən ta mbaɗa. Laghu la akwata dzratá wa Yawe ta kəma taŋ ma tsa mbaɗa taŋ ka fitik hkən ya, ŋa tsatsaftá vli ŋa fata taŋ ta ghuɓa taŋ. 34Ta bukwam bukwa kusaya#Sab 13:21-22. Yawe ta həŋ gifitik, ma fitik ta sliʼafta həŋ ma ghuɓu. 35Ma fitik ta sliʼafta tsa akwata dzratá wi ya ná, ka Musa mantsa: « Sliʼaf sliʼa gha Yawe! Ka wutsu wutsa ghumaha gha, ka hwayaghu hwaya gwal husaŋ ka ta həŋ diʼiŋ ta kəma gha! » kaʼa. 36Ma fitik ta sladata tsi, kaʼa mantsa: « Vrak vra gha Yawe! Ka nzata ka mataba dəmbuʼata la Israʼila! » kaʼa.
Currently Selected:
Mbs 10: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
