Lev 19
19
Tva nzakw ya ta kum Lazglafta
1Ka Yawe nda Musa mantsa: 2« Mnana mna ta inda guyatá ghəŋa la Israʼila, ka ka nda həŋ na: Nzawa nza nda ghuɓa, kabga iʼi Yawe, Lazglafta ghuni, nda ghuɓa yu.
3Ka vlaŋta dər wati ma kaghuni ta glaku ta i ma ni nda da ni. Ka ŋanata kuni guli ta sabatha ɗa. Iʼi Yawe, Lazglafta ghuni.
4Yaha kuni da mbəɗaghutá vgha təv skwa wuyayha kul haɗ hayhaya taŋ. Ma tsatsaf kuni ŋa ghəŋa ghuni ta lazglaftaha nda kfur nwap lu. Iʼi Yawe, Lazglafta ghuni.
5Ma fitika dzaʼa ghuni vlatá skwa pla ghəŋa zɗaku ŋa Yawe ya, ka magata kuni nda tva ni kada ŋwaghunafta tsi. 6Tsa skwa pla ghəŋ ya ná, baɗ va tsaya dzaʼa zuta lu, ka ga mahtsima ni a tsi. Ama ka hasla hasla tsi ŋa baɗ mahkən katsi, ka driŋta kuni nda vu. 7Ka zuza mndu baɗ mahkən, nda ɓadza tsa sluʼi ya nda tsa, ŋwafta a tsa pla ghəŋ ya wa. 8Tsa mndu dzaʼa zuta ya ná, dguv ta ghəŋa ni krughuva ni, kabga dmanaf dma ta skwi nda fa ka ŋa Yawe. Dzaʼa kliŋ kla lu ta tsa mndu ya mataba mnduha ni.
9Ma fitika tskay ghuni ta skwi ta vwah ma haɗika ghuni, haɗ kuni dzaʼa nekwaftá tskata ha kɗavakta mukuma vwaha ghuni wu, haɗ kuni dzaʼa tskaftá ya dzaʼa paɗata ŋa vanay wa. 10Manda tsaya, yaha kuni da ɗagata nekwnekw ta yakwa inabi ma vwaha inaba ghuni. Haɗ kuni dzaʼa ɗagaftá ya ta rkagata ta haɗik wa. Dzaʼa zlanaŋ zla kuni ta inda tsaha ya ta gwal ka pɗu, nda la mayəm ma səla ghuni. Iʼi ná, Yawe yu, Lazglafta ghuni.
11Ma ghal kuni ta ghali, ma tsakal kuni ta wi, ma nənɓəvus kuni ta vgha ghuni. 12Ma waɗ kuni ta vli ka bətbət nda hga ɗa, kabga dzaʼa nzakway tsaya ka kfariŋtá hga Lazglafta ghuni. Iʼi ná, Yawe yu.
13Ma tsaghu kuni ta mndu, ma ghala kuni. Ma ŋaghu kuni ta nisəla mndu ta magatá slna ha ka lab ta sərɗək ga mahtsima ni#Vzl 24:14-15.. 14Ma raz kuni ta matghəm, ma fa kuni ta tuthun ta tva mndu nda ghulpa. Ka zləŋa kuni ta Lazglafta ghuni. Iʼi ná, Yawe yu.
15Ma tsə kuni ta makɗiŋilŋila guma. Ma sisin kuni ta pɗu, ma ŋliŋ kuni ta mndu dagala. Guma tɗukwa dzaʼa tsə kuni ta ghəŋa mndu#Sab 23:2-3; Vzl 1:17, 16:19.. 16Ma yəg kuni ta ghwaɗaka gwaɗa ta ghəŋa mnduha ghuni. Ma gə kuni ta tsuwa nda hafa sləvda ghuni. Iʼi ná, Yawe yu.
17Ma nza kuni nda dgun nda zwaŋama ghuni. Ka maga maga mndu ta skwi kul raku, mnanaŋwa mna baz ta dmakwa ni. Ka mantsa a tsi wu, dguv ta ghəŋa ghuni dmaku ni. 18Ma zbə kuni ta planamtá mndu, ma nza kuni nda dgun ma ŋuɗuf nda kutumkuha ghuni, ama ɗvuta ghuni ta mnda səla manda ghəŋa ghuni. Iʼi ná, Yawe yu.
19Dzaʼa sna sna kuni ta zlahuha ɗa. Yaha kuni da gwaftá skwi nda səla kavghakavgha mndəra taŋ ŋa buhu ta braha ghuni. Yaha kuni da sləgaftá hulfa kavghakavgha ma vwaha turtuk. Yaha kuni da kla lgutha gagaf lu nda sləvdziha kavghakavgha.
20Ka hana hana mndu nda kurɗu ta kul dzaʼa lu varata, ka ta kul pliŋtá lu a tsi, ta nzakway ka makwamidza sana mndu, dzaʼa pla pla həŋ ta bika. Ama pslata a lu ta həŋ wu, kabga ta la a lu da pliŋta wa. 21Dzaʼa klədanagha kla tsa mndu ya ta Yawe ta maŋazak ŋa pla ghəŋ ŋa paya tvi ta wa tumpula guyaku. 22Dzaʼa slərɓanap slərɓa mnda dra skwi ŋa Lazglafta ta zughu ta kəma Yawe nda maŋazak ŋa pla ghəŋ ŋa paya tvi, dabga dmaku ga tsi. Dzaʼa plaku dmakwa ni.
23Baɗ dá lam kuni da tsa haɗika Kanʼana ya, ka ŋaɓata ghuni ta fwa yaku kavghakavgha, ka ngha kuni ka dzahay ta yakwa tsa fuha ya ha ka vaku hkən, haɗ lu dzaʼa zay wa. 24Ta mafwaɗa vaku, dzaʼa pgha pgha lu ta inda yakwa tsa fuha ya ka ŋa Yawe, baɗ fitika skala rfu. 25Ta mahutafa vaku, dzaʼa zay kuni ta yakwa tsa fuha ya. Tsaya dzaʼa kəl tsa fuha ya ka sganaghatá yaku ŋa ghuni. Iʼi Yawe, Lazglafta ghuni.
26Yaha kuni dá za sluʼi nda us nda us, yaha kuni dá vza mandaŋ, yaha kuni dá dzugwa zlazlra. 27Yaha kuni dá tsəɗata dlewer ta swida ghəŋa ghuni. Yaha kuni dá htsanaghutá slərpuha ghumaya ghuni. 28Yaha kuni dá kwaha vgha ghuni ŋa tawa mndu ta mtuta, yaha kuni dá tsatsaftá ɗaha ta vgha ghuni. Iʼi ná, Yawe yu.
29Yaha kuni dá klatá mlaɗ ta kwagha ghuni nda ma pghamta həŋ da sliʼiŋsliʼiŋ, dá dɗamta haɗika ghuni da maga sliʼiŋsliʼiŋ, dá yutá manzakɗawayha mida.
30Ka ŋanata kuni ta sabatha ɗa, ka vlaŋta kuni ta sgit ta vla nzakwa ɗa nda ghuɓa. Iʼi ná, Yawe yu.
31Yaha kuni dá mbəɗaghutá vgha təv gwal ta gwaɗa nda gwal ma haɗik, ka təv ɗəghaha a tsi, yaha kuni dzaʼa mista taŋ, dá nighunistá həŋ ka gwal ta tsaɗ lu. Iʼi Yawe, Lazglafta ghuni.
32Sliʼafwa sliʼa nda sliʼa vlaŋtá glaku ta mndu nda kwalala ma ghəŋa ni, nghawa ngha nda sgit ta halata mndu, kabga ta zləŋay kuni ta Lazglafta ghuni. Iʼi ná, Yawe yu.
33Ka lagha la mayəm da nzata ma səla ghuni ta haɗika ghuni, yaha kuni dá tsaghuta. 34Ka ngha kuni manda zwaŋa haɗik, ka ɗvuta kuni manda ghəŋa ghuni, kabga si la mayəm kaghuni guli ta haɗika Masar. Iʼi Yawe, Lazglafta ghuni.
35Yaha kuni nda makɗiŋilŋila graftá slrakwa skwi, dər má ɗukwata skwi, dər má kura skwi a tsi. 36Tɗukwa skwa gra skwi katsi da kaghuni, dər skwa gra ndəgakwa skwi, dər darama kura skwi tsi, dər skwa gra skwi ka imi a tsi. Iʼi Yawe, Lazglafta ghuni ta hlagaghunapta ma haɗika Masar. 37Ka ŋanata kuni ta inda zlahuha ɗa nda inda skwiha mnaf yu, ka maga kuni ta slna nda həŋ. Iʼi ná, Yawe yu, » kaʼa.
Currently Selected:
Lev 19: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
