Lev 20
20
Dvu ta ghəŋa skwa mbiɗay
1Ka Yawe nda Musa mantsa: 2« Ka ka nda la Israʼila na: Dər wa tsi ma la Israʼila, ka mataba la mayəm ta nzakw ma Israʼila a tsi, ta vlaŋtá Mulek ŋa pla ghəŋ ta ya turtuk ma zwana ni katsi, dzata. Dzaʼa zlamba zlamba mnduha ma tsa haɗik ya, ka dzata. 3Iʼi guli, dzaʼa dzaŋ dza yu ta kuma nda tsa mndu ya, dzaʼa kliŋ kla yu mataba mnduha ni, kabga vlaŋta ni ta sani turtuk mataba zwana ni ta Mulek. Ma tsa magata ni mantsa ya, niŋ na ka skwi ta tsaɗ lu ta vla ɗa nda ghuɓa, ka kfariŋtá hga ɗa nda ghuɓa. 4Ka haf ha mnduha ma tsa haɗik ya ta iri ta ghəŋa tsa mndu ta vlaŋtá sani turtuk mataba zwana ni ta Mulek ya, dza a həŋ wu katsi, 5dzaʼa dzaŋ dza vərɗa iʼi ta kuma nda vərɗa tsa mndu ya, nda ya nda gwal ta uʼa taŋ. Dzaʼa kliŋ kla yu mataba mnduha ni ta tsatsi, nda inda gwal mista ni ta maga sliʼiŋsliʼiŋ nda Mulek ya.
6Ka mbəɗaghu mbəɗa mndu ta vgha təv gwal ta gwaɗa nda gwal ma haɗik, ka təv ɗəghaha a tsi, ka laghu da maga sliʼiŋsliʼiŋ nda həŋ, dzaʼa dzaŋ dza yu ta kuma nda tsi. Dzaʼa kliŋ kla yu guli mataba mnduha ni.
7Fawa fa ta ghəŋa ghuni nda ghuɓa, nzawa nza nda ghuɓa, kabga iʼi Yawe, Lazglafta ghuni. 8Ka ŋanata kuni ta zlahuha ɗa, ka maga kuni ta slna nda tsi, iʼi Yawe ta naghunafta nda ghuɓa.
9Dər wati ma mndu ta razatá da ni ka ma ni a tsi, dzaʼa dza dza lu. Dguv ta ghəŋa ni usa ni, kabga raza raza ta da ni ka ma ni a tsi.
10Ka gaga mndu ta hliri nda markwa mndu katsi, tsa zgun ta hliri ya, nda tsa marakw ya tani, pslatá həŋ his his.
11Ka hana hana mndu nda markwa da ni, kfariŋ kfara ta da ni. Pslatá həŋ his his, dguv ta ghəŋa taŋ usa taŋ.
12Ka hana hana mndu nda ghwaʼala ni, pslatá həŋ his his. Maga maga həŋ ta manzakɗaway, dguv ta ghəŋa taŋ usa taŋ.
13Ka hana hana zgun nda sana zgun manda ya ta han lu nda marakw, maga maga hahəŋ his his ta manzakɗaway. Pslatá həŋ his his, dguv ta ghəŋa taŋ usa taŋ.
14Ka klaf kla mndu ka marakw ta makwa nda ma ni tani, manzakɗaway tsaya. Driŋtá həŋ nda vu, tsa zgun ya nda tsa miʼaha ya, ŋa kwala manzakɗaway kul haɗ mataba ghuni.
15Ka hana hana mndu nda dər wati ma rini, dzata, dzaha lu ta dər wati ma tsa rini ya.
16Ka gavanava gava marakw ta dər wati ma rini ŋa hanata nda tsi, dzaʼa dza dza lu ta tsa marakw ya, nda dər wati ma tsa rini ya. Dzaʼa psla pla lu ta həŋ, dguv ta ghəŋa taŋ usa taŋ.
17Ka klaf kla mndu ta makuma ni makwa ya da ni, ka makwa ya ma ni a tsi, ka hanata nda tsi, skwa hula tsaya. Hliŋtá həŋ ta wa ira mnduha taŋ. Dguv ta ghəŋa ni usa ni, dabga kla kla tsa mndu ya ta mlaɗ ta makuma ni.
18Ka hana hana zgun nda marakw nda zuʼi tida, dzaʼa hliŋ hla lu ta həŋ his his mataba mnduha taŋ, kabga hana hana həŋ his his ma fitika sagha zuʼi ta tsa marakw ya.
19Yaha mndu da hanata nda makuma ni ma ma ni, ka nda makuma ni ma da ni a tsi, kabga klatá mlaɗ ta zba ni tsa. Dguv ta ghəŋa taŋ dmakwa taŋ.
20Ka hana hana mndu nda markwa dasliʼiŋa ni, kfariŋ kfara ta dasliʼiŋa ni. Dguv ta ghəŋa taŋ dmakwa taŋ. Dzaʼa rwu rwa həŋ kul mutsaftá zwaŋ.
21Ka klaf kla mndu ta markwa zwaŋama ni, skwi ta tsaɗ lu tsaya. Kfariŋ kfara ta zwaŋama ni, mutsafta a həŋ ta zwaŋ wa.
22Ka ŋanata kuni ta inda zlahuha ɗa nda inda skwiha mnaf yu. Ka maga kuni ta slna nda tsi, kada kwala tsa haɗik ta hlə yu ta kaghuni ŋa nzata mida ya vnihighunista. 23Yaha kuni da maga slna nda zlahuha tsa mnduha dzaʼa ghəzliŋta yu ta həŋ ta kəma ghuni ya. Vəl magata taŋ ta tsa skwiha ya kəl yu ka mbiɗatá həŋ. 24Ka yu mnaghunata na: “Dzaʼa nzakway haɗika taŋ ka ŋa ghuni, vərɗa iʼi dzaʼa vlaghunata ka ŋa ghuni. Haɗik ta mbəzaku uʼa nda zuɗum mida ya.#Sab 3:8.” Iʼi Yawe, Lazglafta ghuni ta tsaptá kaghuni mataba mndəra mnduha. 25Tsaya tama, ka dganata kuni ta rini ya kul tsaɗ lu, nda ya ta tsaɗ lu, nda ɗyakha ya kul tsaɗ lu, nda ya ta tsaɗ lu. Yaha kuni da niŋtá ghəŋa ghuni ka manzakɗaway nda rini, nda ya nda ɗyakha, nda zwana skwiha ta mbaɗa nda huɗi ta haɗik, skwiha mnaghuna yu ŋa tsaɗay ghuni ya. 26Ka nzata kuni nda ghuɓa ŋa ɗa, kabga iʼi Yawe ná, nda ghuɓa yu. Tsap tsa yu ta kaghuni mataba mndəra mnduha, ŋa nzakwa kaghuni ka ŋa ɗa.
27Mndu ta gwaɗa nda gwal ma haɗik, ka ta ga ɗəgha a tsi, dər zgun ka dər marakw a tsi, zlambata ghuni ta həŋ, ka pslatá həŋ. Dguv ta ghəŋa taŋ usa taŋ, » kaʼa.
Currently Selected:
Lev 20: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
