Lev 16
16
Mgham mghama fitika slərɓa zughu
1Tahula rwuta zwana Haruna his ma fitika lagha taŋ ta kəma Yawe nda vu kul raku#Lev 10:1-2., ka gwaɗganatá Yawe ta Musa. 2Ka Yawe nda Musa mantsa: « Mnana mna ta zwaŋama gha Haruna, yaha da lami nda hamaya fitik da vli ta ghuɓuta, ta hula zlala ta kəma paɗuwi ta wa akwata dzratá wi ya. Tsaya tama, mtuta a ta zlagaptá yu ma kusay ta ghəŋa tsa paɗuwi ya wa.
3Wya ká Haruna dzaʼa lam da vli nda ghuɓa: Dzaʼa klaf kla ta lghəŋ dɓakwa ŋa pla ghəŋ ŋa ɗawa pla dmaku, nda maŋazak ŋa pla ghəŋ ŋa dray tsuh tsuh. 4Ka suɗavata tsi ta sɗakw nda ghuɓa ka liŋ, suɗivha ta gedzerha ka liŋ, hbafha ta huɗi nda biwir ka liŋ, wamha ta gwambar ka liŋ ma ghəŋ. Tsaha ya lgutha nda ghuɓa. Ka mbazaghuta tsi ta mbaza karaku kada pghavata. 5Dzaʼa vlaŋ vla guyatá ghəŋa la Israʼila ta dugzumha his ŋa pla ghəŋ ŋa ɗawa pla dmaku, nda maŋazak turtuk ŋa pla ghəŋ ŋa dray tsuh tsuh.
6Dzaʼa vla vla Haruna ta tsa lghəŋ ya ŋa pla ghəŋ ŋa ɗawa pla dmakwa vərɗa tsatsi, slərɓapha ta zughu ŋa vərɗa tsatsi nda ya nda ŋa la ga taŋ. 7Dzaʼa hlaf hla ta tsa dugzumha his ya, ka pghata ta kəma Yawe ta wa tumpula guyaku. 8Dzaʼa vzaf vza Haruna ta vindima ta tsa dugzumha his ya. Vindima turtuk ŋa Yawe, sani ya guli ŋa Azazel#16:8 Azazel na: Laviŋ lava ta nzakway ka hga sana ghwaɗaka sulkum ta nzakw ma mtak.. 9Tsa dugzum dɗaf vindima tida ŋa Yawe ya, dzaʼa kladaghata Haruna ŋa vlata ni ŋa pla ghəŋ ŋa ɗawa pla dmaku. 10Tsa dugzum dɗaf vindima tida ŋa Azazel ya, dzaʼa fa fa lu ta ndiri ta ndiri ta kəma Yawe ŋa slərɓanaptá zughu, ŋa zliŋta da mtak ŋa Azazel.
11Ma kladaghata dzaʼa kladaghata Haruna ta tsa lghəŋ ŋa pla ghəŋ ŋa ɗawa pla dmakwa ni, ka slərɓaptá zughu ŋa vərɗa tsatsi nda ya ŋa la ga taŋ ya, dzaʼa ghwanaf ghwa ta tsa lghəŋ ŋa pla ghəŋ ŋa ɗawa pla dmakwa vərɗa tsatsi ya. 12Dzaʼa klaf kla ta gədzeha dra urdi ndəghata ni nda lanzəŋa vu ta gwir ta kəma Yawe, tsəɗaʼaha ɗəŋ ɗəŋ his ma dzvu ta urdi ka hpu ŋa dray nda dra, ka kladamta ta hula zlala. 13Dzaʼa pghanagha pgha ta tsa urdi ya ta ghəŋa tsa lanzəŋa vu ta kəma Yawe ya, ŋa bukwamta ɗiŋa tsa urdi ya ta tsa paɗuwi ta ghəŋa akwata dzratá wi ya. Ka mantsa tsi, haɗ mtaku dzaʼa ksaŋta wa. 14Dzaʼa ɗaʼa ɗa ta usa tsa lghəŋ ya, ka wutsikafta nda ndəfiŋ ta paɗuwi nda təv safa fitik. Ndəfáŋ səla dzaʼa wutsikafta tsi ta tsa us ya nda ndəfiŋa ni nda təv kəma ya paɗuwi ya.
15Tahula tsa, ŋa saba ni ghwanaftá dugzum ŋa pla ghəŋ ŋa ɗawa pla dmakwa mnduha. Dzaʼa kladam kla ta usa ni ta hula zlala. Dzaʼa maga maga nda tsa us ya manda tsa maga tsi nda usa lghəŋ ya. Dzaʼa wutsikaf wutsika ta paɗuwi, nda ya təv kəma paɗuwi. 16Mantsa ya dzaʼa slərɓanapta Haruna ta zughu ta vli ta ghuɓuta, dabga skwi ta tsaɗ lu ta magata la Israʼila, da sida taŋ, da dmakuha taŋ. Manda tsaya dzaʼa magata tsi nda tumpula guyaku da həŋ wam nzakwa taŋ ka gwal ta tsaɗ lu. 17Yaha mndu lami da tumpula guyaku ta lam Haruna da slərɓaptá zughu ma vli ta ghuɓuta wu, ha ka saba ni. Dzaʼa slərɓap slərɓa ta zughu ŋa vərɗa tsatsi, nda ŋa la ga taŋ, nda ya ŋa inda guyatá ghəŋa la Israʼila. 18Dzaʼa sab sa nda təv gwir ta kəma Yawe, ŋa slərɓanaptá zughu ta gwir, ŋa klafta ni ta usa lghəŋ, nda usa dugzum, ka magafta ta duliha tsa gwir ya. 19Dzaʼa wutsikaf wutsika nda ndəfiŋa ni ndəfáŋ səla ta us ta gwir ŋa nzakwa ni kul haɗ skwa tsaɗa tida, dabga nzakwa la Israʼila nda skwi ta tsaɗ lu ta həŋ, ka fəglata nda ghuɓa ka ŋa Yawe.
20Tahula kɗiŋta Haruna ta slərɓaptá zughu ŋa tsa vli ta ghuɓuta ya, nda ŋa pɗakwa tumpula guyaku, nda ŋa gwir, ŋa kladaghata ni ta tsa dugzum ta ndiri ya. 21Dzaʼa pghaf pgha Haruna ta dzvuha ni his his ta ghəŋa tsa dugzum ta ndiri ya, ka mnay tida ta inda krughuviha la Israʼila, nda inda ká həŋ kwalaghuta snatá gwaɗa, nda inda dmakuha taŋ, ŋa pghafta ni ta ghəŋa tsa dugzum ya, ŋa zliŋta ni da mtak, nda ma dzva mndu hgaf lu ŋa ghuniŋta. 22Dzaʼa klagha kla tsa dugzum ya ta inda krughuviha taŋ ta haɗik tuhwayaŋ, ŋa zlidiŋta da hada.
23Dzaʼa vradam vra Haruna da tumpula guyaku, ŋa suɗata ni ta lgutha ka liŋ si suɗava tsi ma lama ni da vli ta ghuɓuta ya, ŋa pghata ni hada ma tumpula guyaku. 24Dzaʼa mbazaghu mbaza ta mbaza ma sana vli nda ghuɓa, ka suɗglavata ni ta lgutha ni. Tahula tsa, ŋa saba ni, ŋa vlata ni ta skwa pla ghəŋ ŋa dray tsuh tsuh ŋa vərɗa tsatsi, nda skwa pla ghəŋ ŋa dray tsuh tsuh ŋa mnduha. Dzaʼa slərɓap slərɓa ta zughu ŋa vərɗa tsatsi, nda ya ŋa mnduha. 25Dzaʼa draf dra ta gwir ta ghwaviɗa tsa skwa pla ghəŋ ŋa ɗawa pla dmaku ya.
26Tsa mndu ta laghwi da zlidiŋtá dugzum ŋa Azazel ya, dzaʼa ghwaɓiŋ ghwaɓa ta lgutha ni, mbazaghuha ta mbaza. Tahula tsa, laviŋ lava ta vradamta da ghuɓu. 27Tsa lghəŋ ŋa pla ghəŋ ŋa ɗawa pla dmaku, nda dugzum ŋa ɗawa pla dmaku kladam lu ta usa ni da vli ta ghuɓuta ŋa slərɓaptá zughu ya, dzaʼa klagha kla lu ta hula ghuɓu, ka driŋtá huta taŋ, nda sluʼa taŋ, nda swiɗ nda swiɗ. 28Tsa mndu ta driŋta ya, ghwaɓiŋta ni ta lgutha ni, mbazaghuha ta mbaza. Tahula tsa, laviŋ lava ta vradamta da ghuɓu.
29Wya tva skwi ŋa magay ghuni ŋa ɗekɗeka ghuni: Baɗ maghwaŋ ma tila mandəfáŋ#16:29 Tila mandəfáŋ ná, tsaya Tisri nda gwaɗa Hebru. Tsaya fitik mbwats ma tila matəmbay mbwats ma tila maghwaŋ ta na fitika amu na. , ka hanaganata kuni ta ghəŋa ghuni, magta a kuni ta dər wati ma slna wu, dər zwaŋa haɗik, dər mayəm ta nzakw mataba ghuni a tsi, 30kabga baɗ tsa fitik ya ná, dzaʼa slərɓaghunap slərɓa lu ta zughu, ŋa klighunistá skwi ta tsaɗ lu. Ta kəma Yawe ná, dzaʼa nda nza kuni ka gwal kul tsaɗ lu ta həŋ ma inda dmakwa ghuni. 31Dzaʼa nzakway ka Sabat da kaghuni, ka fitika mbiʼa vgha dar dar, ka hanaganata kuni ta ghəŋ. Tsaya tva skwi ŋa magay ŋa ɗekɗek.
32Tsa slərɓaptá zughu ya ná, mnda dra skwi ŋa Lazglafta pghanagha lu ta rɗi, ka famta ma slna ka mnda dra skwi ŋa Lazglafta ma vla da ni ya, dzaʼa magay. Dzaʼa pghava pgha ta lgutha ka liŋ nda ghuɓa. 33Dzaʼa slərɓap slərɓa ta zughu ŋa vli ta ghuɓuta. Dzaʼa slərɓap slərɓa ta zughu ŋa tumpula guyaku nda ŋa gwir. Dzaʼa slərɓanap slərɓa ta zughu ŋa gwal ta dra skwi ŋa Lazglafta, nda ya ŋa inda guyatá ghəŋa mnduha.
34Tsaya zlahu ŋa ɗekɗeka ghuni ta nghanatá slərɓanaptá zughu ta la Israʼila dabga dmakuha taŋ turtuk səla ma vaku, » kaʼa. Mantsa tama, ka magatá lu ta inda skwi ya mnanaf Yawe ta Musa.
Currently Selected:
Lev 16: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
