URA TIN AYRA 43
43
Goryoŋ Yakobma hoŋ Egipte u Benjamin
1Mayra mbuɗ ci suuna coco sura jewra hu mbassa Kanaanda. 2Wa ma asi gusum ay Egiptena daɓ ki tira daɓmi. Yakob di goryom ana, «Hoŋogi tuɗ gusuygi wa maa ay nde.» 3Yuda hoŋom dira ana, «Sa namma gaɗami vunumi ay ki ana, Agi hoŋogi ay fokon tani bay wayagi ma goona ay ugi baɗi. 4Lini aŋ min a hinimi wayamina tuɗ umiya ni ami tuɗ gusuŋ wana aya. 5Lini aŋ ka hinimina umiɗi, ni ami ka tuɗɗi. Kay sa namma dami ay ana, Agi hoŋogi ay fokon tani bay wayagi ma goona ay ugi baɗi.»
6Israel dasi ana, «Agi a lan dla ndaɗta egen na ni amege? Agi dam ana wayagi maa ha vo olo ni kay mege?» 7Asi hoŋom dira ana, «Sa namma joɓomi kay tamira kay suu mamina lay, ana bugi ka iiri tu su? Wayagi ma hin ha olo su? Ami hoŋ dira ni kay joɓ mamba. Ami hin wi ana nam hin dami ana tuɗ tay wayagina aya na su?» 8Yuda di bum Israel ana, «Hinin gogoona tuɗ ay unu, ami tuɗumi gusumi wana laɓaygi taygi kiɗi. 9Aŋ hin joɓonna dlammi konu, lini an hoŋom ay mbaaŋa ka fokoŋgi ni an hinni saaŋ ma babalira a fafaɗta. 10Lini ami vi yamba ki ginni naɗi, ni ami li ka dok kiwa yami mba' ɗow.»
11Busi Israel dasi ana, «Hin na ni lagi ko ndaɗta na. Yowogi tlesuu jivi suu hu mbas mayrana ha kogi a ɦasi maŋ sa namma. Tlesuu li mbul ma hisna nde may, mbul yumma nde may, u daɓaŋga may, u kumuna, u vuɗ guna, u tlesuu ɗus huu ziginina nde may. 12Yowogi gursuna kogi ŋgolo, yow ma agi fam cuki fun mbumbu maginana kogi may, hum sa maa ay ni maari kalage? 13Tay wayagina hoŋogi eg sa namma. 14Ko Lona ma Saɓakŋa mbuɗugi jivi ii sa namma, ko nam hinigi wayagi ma hiŋŋa u Benjamin lay hoŋ ay u agiya. Lini an a hin ki bay goo lay ni hina.»
Yosef ɦal tina maŋ gorsemma
15Asi yow tlesuu ɦasi maŋ sa nammana kosi may, yow gursura may, tay Benjamin usi may, hoŋ ga Egipte, tuɗ eg Yosef. 16Hu li ma Yosef wi Benjamin dukusi na ni, nam di sa ma li sunda varamma ana, «Cuk suu asina ha voo, ŋgaɗ va dew li tina asi ti karam faali ni u anu.» 17Sa namma li ko Yosef damba na may. Nam cuk suu asina ha vo taraŋ vi Yosef.
18Hu li ma tuɗusi ha taraŋ vi Yosef na ni, asi mbuɗ ki ndaana. Asi di tasi ana, «Ni kay gursu ma hoŋ ha faɗta hu mbumbu mayginana kalage? Mbaɗaygi ni a yowoygi a mbuɗuygi mborɓii masisina u kor maygira halaŋ.» 19Asi tew vun grekŋa may ni, ɓak sa li sunda vi Yosefna ana, 20«Sa ŋgolna ami mba ha ki jew tani dew a gus wana. 21Ami tew hu li ma ami a buu huna may ni, ami buɗ vun mbumbu mamsina ki na ni gegelay fi gursu mamma cuki fun u tamba. 22Ami mbay u gursu ma daŋŋa komi a gus wana lay, ami ka wi sa ma hoŋomi gursu mamina ha komi hu mbumbunaɗi.» 23Sa ma li sunda vi Yosefna dasi ana, «Heɓegi hurugiya, lagi ndaaɗi. Lo ma agi u bugi cenemma cukugi gursura ha hu mbumbu magisina ni namu. Gursu magina an fam ki wa.» Nam hin gasi Simeon ay ki may.
24Sa namma cukusi ha vo vi Yosef ɦasi yona asi mbus sesi kiyo, ɦal haɗna maŋ kor masisina may. 25Asi gi ii tlegeyesi suu a ɦasi maŋ Yosefna kaki may, a juɓum nam a kal ay ki faalira. Kay asi hum ki ana asi hin ti karam faali ni varamu.
26Hu li ma Yosef kal ay vona may ni, asi ɦam tlesuu ay kosina, asi goɓ kaŋga fokomu. 27Yosef joɓosi ana, «Agi ka jivi su? Bugi ma maa ma agi danna dlam kana ka wan su? Nam ka iiri tu su?» 28Asi hoŋom dira ana, «Saaŋ ma sunda bumi ka jiviya, nam ka iiri tuwa.» Asi cok yasi kaŋga goɓ fokomu. 29Yosef tli irim kolo gol na ni wi Benjamin wayam summa. Nam joɓosi ana, «Ni wayagi ma toɓo ma agi dan kamma ɗaŋ su?» Nam hin di hu ana, «Lona paɗ vunum ki kaŋu, goonna.» 30Yosef wi wayamma na ni hurum haɗta irim hal a cuk simina. Nam kal ha ki kalafi zakŋi tiira.
31Ŋgoo dagan nam mbus irim ay ki mbusni, kal ay kiyo, nam so tam di ana, «Ҥal tina aya.» 32Asi ɦal ti ma vi Yosefna ki zeɗ may, ma vi gorsemmana ki zeɗ may, ɦal ma vi suu Egiptena suu nam yasi ay a ti u namma ki zeɗ may. Kay suu Egiptena ka ndak a ti u suu Hebrenaɗi, kay u gaɗ masira ni coo. 33Gorseŋ Yosefna laki fokommi u basaɗasiya, gijaŋŋa ha kay ma ŋgolna tuɗ faɗ ki u ma toɓona. Asi gol ii tasi na karɗa karɗa, lakira na jim. 34Yosef yowosi u fu ma ay komma aya, Benjamin mamma su masina halaŋ ɓorow ii masina goy vadl. Asi ti may ci may furi u namu.
Currently Selected:
URA TIN AYRA 43: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
