URA TIN AYRA 42
42
Gorseŋ Yosefna tuɗ Egipte a gus tlesuu tira
1Yakob hum ana wana ka Egipte ni, nam di goryom ana, «Agi lakagi gologi ii tagi ɦawa na ni amege?» 2Nam di olo ana «An hum ana wana ka Egipte ni tuɗugi gusuygi ay may, laɓaygi taygi kiɗi.»#Sun. 7.12 3Gorseŋ Yosefna doogo tuɗ gaa Egipte a gus wana. 4Yakob hin Benjamin, wayaŋ Yosefna, tuɗ ka usiɗi. Nam li ndaana ana dlara co fam ay oloɗi. 5Goryoŋ Israelna mbay a gus wana ko suu daŋŋa mbay a gussa na may, kay mayra ci hu mbassa Kanaanda cocoo.
Yosef las gorsemma
6Yosef mbuɗni sa ŋgol ma hu Egiptena, nam gus wana ki maŋ suu mbayna halaŋŋi namu. Gorseŋ Yosefna mbay goɓ kaŋga fokomu. 7Yosef gol gorsemma cuk ay na ni nam wasiya, nam gi u tam kagi irisiɗi, ɓakasi u delemba yara ana, «Agi ni suurage? Agi col ay ni arage?» Asi ana, «Ami yow ay ni hu mbassa Kanaanda mbaami ni a gus tlesuu tira.»
8Yosef wi gorsemma may, asi tasira ka wambi. 9Yosef humum gam kay doyra dam kay gorsemmara. Nam dasi ana, «Agi ni suu cekeɗta, mba golni mbassa a wi li maŋina.»#Ura 37.5-10 10Asi hoŋom dira ana, «Ҥawaa, sa ŋgol mamina, suu sun maŋsina mbay ni a gus wana. 11Ami halaŋŋi goryoŋ sa dewna. Ami ka suu cekeɗɗi.» 12Nam dasi ana, «Ҥawa lay, agi mbaagi ni a wi lii maŋi ma hu mbassana.»
13Asi hoŋom dira ana, «Suu sun maŋsina ni goryoŋ sa dewna doogo yam mba' ha ni hu mbassa Kanaanda, ma toɓona ha vo eg bumiya, ma dew kaɗi may.» 14Yosef dasi ana, «An li dagi ana agi ni suu cekeɗta naɗ su? 15An min tukugi ko wanda na. An suu u iirira vi Faraw, bay wayagi ma goona mba bani, agi ka cuki tanɗi. 16Sunugi sa dukugi dew tuɗ halagi wayagi na aya, agi suu wanna hin ka hu daŋgayna, ni an hin mba wi ana agi dini gasira ɗowba kaboyna. Li ka naɗi ni u iirira vi Faraw, agi gasi ni suu cekeɗta.»
17Nam cukusi halaŋ hu daŋgayna buuna hindi. 18Hu buu ma hindina Yosef dasi ana, «Anni sa ma li ndaa Lona may, lini agi min kak iriya ni lagi ko an dagira na. 19Lini agi ni suu gasina, wayagi maa hin ka hu daŋgayna dew, agi suu hiŋŋa tuɗ wana vo maŋ suu magi suu mayra casina. 20Tayan ki wayagi ma goona aya, ni kay a wi u boy magina ki jiviya, va hin ka lagiɗi.» Asi vi boy namma ko nam dira na may.
21Asi di duk tasi ana, «Aygi laygi cora eg wayaygina, hu li ma nam tii tam fokoygina ni aygi ka min humumbi lay. Wi haw ndaɗta mba kaygi ni na may.»
22Ruben ɓakasi ana, «An dagi ana li va co eg goo nammaɗi naɗi su? Agi humun vunun kaɗi. Gola busuɗum joɓ dla tam wanna.»#Ura 37.21-22 23Asi ka wi ana Yosef humusi vun masinaraɗi, kay nam ɓakasi ni sana jokom vunum ki ni jokiya. 24Yosef kal ki zak kay irim hal a cuk simina. Nam hoŋ ay ɓakasi olo. Nam vi Simeon ɓalam kaŋga hu daŋgayna irisi ni na gaw.
Goryoŋ Yakobma hoŋ hu Kanaan
25Yosef ɦal voɗta ana oyosi wana hu mbumbu masisina, cukusi gursu masira fun may. Ҥasi tlesuu ti ha irisi voɗna may. Asi li ko ndaɗta na may.
26Asi yow waasina kay korra yow yowni, tuɗ gaw. 27Njeŋgera mba mba ni, asi lak kaŋga a buuna, maa dew mal vun mbumbuumma ki a ɦal tina maŋ korra fi gursu mamma ay cuki funu. 28Nam di gorsemma ana, «Gursu manna asi hoŋonna ay wa, cuki fun mbumbuna cani.» Asi mbuɗ ki ndaa cocoo, ɓak duk tasi ana, «Lona a laygi egeygi na ni dla mege?»
29Asi mbay vo eg busi Yakob hu mbassa Kanaanda cuɗum dlara lasi ayra ki halaŋ, asi di ana, 30«Sa a ŋgolla kay mbas ndaɗtana ɓakami eŋ cocoo nam ana ami ni suu cekeɗta. 31Ami dam ana ami ni suu gasina ami ka suu cekeɗɗi. 32Ami goryoŋ sa dewna na doogo yam mba', ma dewna kaɗi, ma toɓona ha vo eg bumi hu mbassa Kanaanda may. 33Sa ma a ŋgolla kay mbas ndaɗtana dami ana, an a wi ana agi ni suu gasinara ni hinigi wayagi maa ka egen tani dew, tuɗugi tina ha vo maŋ suu magi suu mayra casina, 34hin hoŋogi ay u wayagi ma toɓona egen tani. Ni an hin wi ki ana agi ni suu gasina ka suu cekeɗtaɗi. An hin ɦagi wayagi ma hiŋŋa may. Agi hin buɗ ki a poy kay mbassa ko agi minda na.»
35Hu li ma asi cuk wana ki huu mbumbuusina na ni, gegelay fi gursu mamma ay njuni fun mbumbuumma. Asi u busi Yakob lay wi gursu namma na ni, mbuɗ ki ndaana.
36Busi, Yakob, dasi ana, «Agi min daɓan ki ni goryon ɦawaa, Yosef kaɗi lay, Simeon kaɗi lay, agi min a vi Benjamin baam ha ki olo, dla ndaɗta halaŋ hin mba ni kanu.» 37Ruben di bum ana, «Lini an hoŋoŋ Benjamin ay kaɗi ni aŋ can goryon suu njufii suu mbana kiyo. Hininna dlam ha konu an hin hoŋoŋa aya.» 38Yakob di ana, «Goonna ka tuɗ ugiɗi. Kay wayamma ki miɗiya, nam hin dew ni namu, lini va lam ay ugi hu tuɗ magira wani, an miɗni u wihawra hu maa manda.»
Currently Selected:
URA TIN AYRA 42: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
