URA TIN AYRA 44
44
Yosef tuk gorsemma
1Yosef di saam ma sunda ana, «Oyosi wana hu mbumbuusina u nekesiya, cuk gursura vi gegelay fun mbumbuumma, mbumbuumma. 2Aŋ kalan kop doonora manna ci yona fun mbumbu ma vi wayasi ma toɓona u gursu mamma gus wana lay.» Sa ma li sunda vi Yosefna li ko nam damba na may. 3Maɗiira fo ki may ni asi tin suu asina u kor masira. 4Asi cuki doŋ kaana bay tuɗ day tu may ni, Yosef di saam ma sunda ana, «Liŋ u suu wanna aŋ fasi wa ni dasi ana, Lagi ay jivi may agi hin mbuɗ a hoŋ cora ni nanage? 5Agi tlagi kopma vi sa ŋgol manna ma nam ci yona u nam may joɓ u nam mayna ay ni nanage? Agi li dla ndaɗta ka jiviɗi.»
6Sa sunda tewesi tewni dasi boy namma. 7Asi hoŋom dira ana, «Sa ŋgolna aŋ ɓak na ni boy mege? Ami ndak ka a li dla ndaɗtaɗi. 8Gola ami li hoŋoŋ gursu ma maa ha faɗta kammina ay ki layɗi su? Ami hin li ni nana a kul doonora u lorra vi sa ŋgol maŋara ay ki ni nanage? 9Sa ma fam kopma kamma cam kiyo, ami tamira halaŋŋi hinni a mborɓii maŋsina.» 10Nam di ana, «Ni dla ndaɗta li ko boy ma agi damma na. Sa ma an fam kopma kamma ni mbaɓu manna, agi suu hiŋŋa boy ka kagiɗi.» 11Asi cuk mbumbuusina ki kaŋga zak gaw, gegelay buɗ vun mbumbuumma kiyo. 12Sa sunda gijaŋ hal huu mbumbuna tin um ay kay ma ŋgolna tuɗ daɓ ha ki kay ma toɓona. Nam tuɗ fi kopma ay hu mbumbu ma vi Benjaminna. 13Asi haa baraw ma tasina kiyo, gegelay ni njun kor mamba hoŋ ay dagan hu ɦoŋzina.
Yuda ɓak kay Benjamin
14Yuda u gorsemma tew hu ziŋ Yosefna ni nam ka vo tuwa. Asi mba goɓ kaŋga fokomu. 15Yosef dasi ana, «Agi li na ni dla mege? Agi ka wi ana sana ko an na ni wi dlara fokka naɗi su?» 16Yuda hoŋom dira ana, «Sa ŋgol mamina ami dini ana me ologe? Ami hin ɓakŋi ana mege? Ami hin mbuɗ tami ɗegee ni ana mege? Lona fi cora vi suu maŋsina wa, ami ni mborɓii maŋsina sa ŋgolna, ami halaŋ u sa ma fam kopma ay kamma lay.» 17Yosef di ana, «An ka ndak a li naɗi, sa ma an fam kopma ay kamma an hin vam ka a mbaɓuna ni nam dew. Agi suu hiŋŋa tuɗugi vo eg bugi jiviya.»
Yuda min varak balam Benjamin
18Yuda ɦuɗ tam eg Yosef dam ana, «Sa ŋgolna huruŋ ɓeŋ k saaŋ ma sunda min a daŋ boyna nde kay aŋŋi ko Faraw na. 19Aŋ joɓomi ana bugi ka su? Ɗowba wayagi ma daŋ ka su? 20Ami hoŋ dira ana bumi ma maana kaa, wayami ma toɓo ma nam vuɗum u maa tamma ka may. Gogoo namma wayam summa ki miɗiya, nam hin dew ni namu, bum minim cocoo. 21Aŋ dami ana mbaaram ay tani aŋ min wam u taŋga. 22Ami hoŋoŋ dira ana goo namma ka ndak a hin bum ha kiɗi, lini nam hinim ha ki wa ni nam ba tam kiyo. 23Aŋ hoŋomi dira ana, lini wayagina mba ka ugiɗi, ni agi ka mba fokon tani oloɗi.
24«Ami hoŋ ha vo eg bumi ni cuɗum boy ma aŋ damina hana. 25Bumi di ana, Hoŋogi tuɗ gusugi wana ay nde. 26Ami hoŋom dira ana, Ami ka hoŋ bay wayami ma toɓona umiɗi. Ami ka ndak a wi ii sa namma bay wayami ma toɓona umiɗi. 27Bumi, saaŋ ma sunda, hoŋomi dira ana, Agi wi ana caanda Rasel vuɗun gorra ni mba' daŋ. 28Maa dew tuɗ ha ki ni an wi li ma nam ba huna kaɗi, an saa ana vabak li komom ki ni komiya. An ka wam oloɗi. 29Lini agi tayan ma wanna ha ki olo va lam ha ki wa ni agi min kalan hu zulla u maa tanni u wihawra.
30«Lini an tew eg saaŋ ma sunda, bumi, bay goona umiya ni, iiri mamba njuni ni eg go namma, 31hu li ma nam wi goona kaɗi ni, nam ba tam kiyo. Ni ami kalami bumi, saaŋ ma sunda, kaŋga hu zulla u maa tammi u wihawra. 32An di bun ha ki ana lini an hoŋ ha ka egeŋ u goonaɗi ni an hinni saaŋ ma babalira a fafaɗta. 33Van vunun kay hinin an kak ka kay sem goona a mbaɓu maŋŋa, hin gogoona hoŋ vo u gorsemma. 34An ndak hoŋ vo bay goona unni lini nanage? Ҥawaa an ka wi hahawra vi bunda u irin oloɗi.»
Currently Selected:
URA TIN AYRA 44: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.
