EZEKIYEL 23
23
Gorse boyogina mba suu dalamba
1Boy Yawena mbay egen dan ana, 2«Goŋ sanna, boyogina ka mba, ni goryoŋ cara. 3Asi ay gawlaŋiina hu mbassa Egiptera. Asi gijaŋ dlara gawlaŋŋa ni u way tasiya. Asi hin gorzoŋiina lumuɗusi poosiya, gijaŋ zoŋga ay ni u gori tasiya. 4Gola, ni sem gorɓii asina, ta ŋgolla yaɗ ana Ohola, wayaɗta yaɗ ana Oholiba. Gorɓii asina jakŋi an ɗumusiya. Asi vuɗun gor njufiina u gorɓiina. Gola ni sem gor asina, Ohola tak ki ni Samari, Oholiba tak ki ni Yerusalem may. 5Na may Ohola hin dla mayra kak u an dewra tani, mbuɗ taɗ ki gawlaŋga. Ndaɗ li zoŋga u suu Asirina, suu miniɗ ɦayna, u suu Asgaarina. 6Suu cuk baraw ma tlawna, suu mulina, suu Perefegina u suuna halaŋ zoŋiina u suu ŋgolona. Suu ful kulumina may. 7Ndaɗ li zoŋga u suu ŋgolo suu Asirina halaŋ. Hu li ma ndaɗ li zoŋga u asina, ni ndaɗ mbuɗ taɗ ki njenjera u fuli masisina may. 8Ndaɗ hin zoŋ maɗta ndaɗ ha laɗ hu Egipte jewra ka kiɗi. Hu li ma asi lumuɗuɗ pooɗ may na hu li ma ndaɗ ay go tamara tuna, suu daŋŋa buu u ndaɗu, mbuɗuɗ ki cara dalamba. 9Kay ndaɗta an hiniɗ ha ki ko banayaɗ suu Asiri asina suu minisi ɦayna. 10Asi hiniɗ ki siiliya. Asi yowoɗ goryoɗ suu njufiina u gorɓiina kiyo. Taɗta asi caɗ ki u ŋgewna. Ndaɗ mbuɗ ni a cara tak ki maŋ boyogi suu daŋŋa halaŋga. Asi kaaɗ ɓakŋa kaɗu.
Yerusalem mbuɗ taɗ ki gawlaŋga
11«Wayaɗta Oholiba wi dla ndaɗta ki u ii taɗta lay. May ni ndaɗ hin mbuɗ ki ni co suuɗ na ɗow. Dla cooɗta mbuɗ ki ni co sura vi wayaɗtara. 12Ndaɗ li zoŋga u suu ŋgolo suu Asirina, mulina, perefegina, suu asgaarina, suu jaŋ kulumina, u gorzoŋi suu ganyamba halaŋ. 13An wiya ni ndaɗ mbuɗ taɗ ki njenjera. Asi jakŋi tli kosi ni voɗta dewra. 14Oholiba dlaaɗta hin kal ki co su na nde olo ni, fali taa dew ni ndaɗ wi suuna ɓii fotona kolo pay gulumunna, foto namma tak ki ni suu Babilonna. 15Gandina njuni hurusiya, jumba duuna kuluɓi kasi may. Asi gol ni ko ndal suu i duuna na. Ni foto suu ɗegee suu Babilonna suu ka laki vo hu mbas masira Kalde ta asi vuɗ hura. 16Hu li ma ndaɗ wasi fotoosi nana, ni ndaɗ cuk suu sunda kasi hu mbassa Babilonda. 17Suu Babilonna mba buu u ndaɗu, mbuɗuɗ ki njenjera u dlaasira cora. Hu li ma asi taɓ ki u ndaɗ nana ni asi mbuɗ ki iriɗ bisna. Ndaɗ ka minisi oloɗi. 18Ndaɗ fok baraw maɗ ma baari kaɗna kiyo, hin taɗ ki siiliya, li taɗ ki gawlaŋga. Ndaɗ mbuɗ ka irin jivi oloɗi, ko ndal wayaɗta li wandara na olo.
19«Ndaɗ su dla cora ki kaɗ saɓaki waɗi. Humuɗ gaɗ ni kay dla cooɗta ndaɗ laɗ ay u way taɗta, mbuɗ taɗ ay ki gawlaŋga hu mbassa Egiptera. 20Ndaɗ kal dla cora ki kaɗ cocoo. Mbuɗ taɗ ki ni ko ndal korra na. Tliwiɗ mbuɗ ki ni ko ndal kulumina ɦawa na.
Lona kaɓakŋa kay goroŋ sura suu mba asina
21«Oholiba humuk gak wa kay dla co mayra ndak laɗ ay u way takka, hin suu Egiptena lumuɗuk pooku, tin kosi gu dikik ta tara. 22Kay ndaɗta ndak, Oholiba, hum haa, Bu Suuna, Yawe, di ana, an hin cukuk banayak suu ndak noyosi kina ay kaku. Asi hin mbay ni hu keŋ lina zeɗ zeɗ halaŋ, hin lasaku. 23Suu Babilonna u suu Kaldena, Pekod, Skoa u Koa u gor suu Asirina halaŋ lay. Gorzoŋii suu jivi ɦayna, muli suu ŋgolona u maliyaŋ mbassa, suu asgaarina u suu ful kulumina halaŋ. 24Asi hin mbay duu u ndaku, col ay ni mbayaw na ɗow. Suu duuna mbay cocoo u kulumi suu pupusna, u mbarina may u jum ŋgalla ki kuluɓi kasi may. Asi hin mba ŋguyuku. An hin takasi dlaakka ki fokosi halaŋ halaŋ. An ɦasi voɗta asi kaak ɓakŋa kak u yal masina. 25U hurun ma ki ɓeŋi egekŋa an hinisi asi kaak ɓakŋa, kakŋi u yara may. Asi hin kaak cinik u humuk kiyo. Asi hin cak suu maksina ki u ŋgewna. Asi hin yowok goryok suu njufiina u gorɓiina u tlesuu hin gin kokŋa hin ŋgalasi ki u kura. 26Asi hin ɦurumuk barawi maksina kiyo, hin yowok tlegeyek suu mini egek mbuuna ki lay. 27Ko ndaɗta na an hin doorok dlaakka co ndaɗta u dalam makka ndak laɗ ay hu Egipte nara kiyo. Ndak ka hin a gol irik kolo oloɗi. Humuk ka hin a gak kay dlara ndak laɗ ay Egiptera oloɗi lay. 28Kay Bu Suuna, Yawe, di ana, an hin ɦak ki ko suu babali maksina, ko suu may suu huruk ka minisi dlaasiraɗina. 29Asi lak dlara egek halaŋŋi ii gonokka. Asi hin yowok tlegeyek suu ndak fasina ki halaŋ. Asi hin hinik ki ni siiliya, ka u baraw egek oloɗi. Tak mayra li zoŋga hin hin ki kiɗik ii suuna. Ni dla co mayra ndak laɗta. 30Asi hin lakŋi ko ndaɗta na, kay ana ndak li zoŋga ki ni u njaf suuna halaŋ. Ndak mbuɗ tak ki njenjera u fuli masisina lay. 31Ndak tli ni dlaŋ wayakkara olo. Kay ndaɗta an ɦak ŋgal maɗna hu duk kok wa may.
32Bu Suuna, Yawe, di ana,
Va ma hu ŋgal ma vi wayakka ndak hin cam may.
Va namma um zuzulu. Hayam beɗi coco lay.
Nam hin kakŋi a dlara sanda u panna
kay ana hurum zul cocoo.
33Nam hin guruɗuk ki u lassa,
ŋgal ma vi wayakka Samarina,
ni ŋgal ma li tara ndaa cocona ma baaŋ kina.
34Na may ndak hin ci huwa,
hin daɓ va huna ki lay.
Ndak hin toom ki u siiku.
Kami ŋgal namma hin dagak gudikik u pook lay.
Di ni Bu Suuna, Yawe.
35Kay ndaɗta Bu Suuna, Yawe, di ana, ni kayra ana humuk maa ki kanu. Ndak zuɗun ki ŋgorok dagan ni ndak zii nek dla cookka ndak laɗta u dla zoŋ makka tu ɗaŋ.»
Lona kaɓakŋa kay Samari u Yerusalem
36Yawe dan ana, «Goŋ sanna, aŋ min a kaɓakŋa kay Ohola u Oholiba su? Dasi dlaasira cora ha kiyo. 37Kay asi li dlara zoŋga, huu duk kosi ki oyra u busuna. Asi li dlara zoŋga u fuli masisina ta ta asi ɦasi gor suu asi vuɗunsina manna ki lay. 38Asi lan dlara daŋga egen hu olo. Asi mbuɗun ziinda ki njenjera. Asi li buu ma vi Lonna ki lalassa may. 39Hu li ma asi ŋgaɗ goryosi ki maŋ fulinana ni asi hoŋ tuɗ kal hu Ziŋ Lonara olo a mbuɗuɗ ki njenjera. Gola ni dlara asi laɗ hu Ziinnara. 40Olo ni asi cuk sunda kay suu ha ki day dayna yasi aya. Suu asina hin mbay may. Ndak mbus tak kiyo, ndal tlena ki iriku, cuk walakka may. 41Ndak kak kay lay ma jivi ɦayna, tin taɓulla ki fokosiya, tinin mbitl manda his jivira ki fokosi u mbul man ma his jivina may. 42Suuna mbay varaɗ bolow cocoo. Asi li vunna cocoo ni. Suu ka saa dlaɗina. Suuna col irisi ay keŋ lina zeɗ zeɗ mbay cuk ha kasi hu olo. Asi cuk walakka ko boyogina tinisi jumba weleɗ jivi cocora kasi may. 43An di suu may suu li dlara zoŋga saɓaki ɦayna ana, cemi ni asi ɦal tasi ki wa kay dlara co ndaɗta. 44Suuna buu u asi ni ko ndal suuna buu u gawlaŋinara na. Ni eg gi Ohola u Oholiba, boyogi suu zolo ka irisiɗina. 45Na may suu ɗegeena hin kaasi ɓakŋa kasiya. Ni ɓak may ma vi boyogi suu li dlara zoŋga halaŋŋa u boyogi suu ci maɗna, kay asi ni suu li zoŋga lay, kay busuna ka hu duk kosiya.»
46Bu Suuna, Yawe, di ana, «Tokosi suuna ha kasiya. Asi mbay lasasiya, yowosi tlegeyesi ki may. 47Ko suu tokkina gikisi u gogoyra, casi ki u ŋgewina may, casi goryosi suu njufiina u gorɓiina kiyo, ŋgalasi ziisi ki may. 48U dla ndaɗta an hin daɓ dlara zolona hu zi nammara kiyo. Boyogi suu daŋŋa halaŋ wi kiyo, ka ca li dlara zolo ko boyogi suu asina li wanda na oloɗi. 49Agi suu mba agina dlaagira co ndaɗta hin do ni kagiya, suluk magi ma tokol fulina hin tokŋi kagiya. Agi hin zii nek vagina ni u tagira. Ni agi hin wi ki ana anni Bu Suuna Yawe.»
Currently Selected:
EZEKIYEL 23: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.