EZEKIYEL 24
24
Ndal boyna u doy kawi ma co kina
1Hu basara dleeŋera hu til ma doogona buuna doogo, Boy Yawena mbay egen dan ana, 2«Goŋ sanna, buu ma karam namma aŋ ɓiirim koŋ jiviya kay buu namma ni buu ma mul ma Babilonna dug zi ma Yerusalemma.#2 Mul. 25.1; Jer. 52.4 3Aŋ di ndal boyna maŋ suu gonok suu dlasi cona. Aŋ dasi ana Bu Suuna, Yawe, di ana,
Tin doy kawina kay kura, vo yona hurum may.
4Man tliw ma jivina kuŋgu huwa,
gayna u bikira, oy doy kawina ki u sok ma jivina.
5Manni tliw timii ma manam ma jivi ɦayna,
cuk sokŋa ay u ga may,
zalasi ki jiviya u sokŋa lay, ɗuurum kiyo.
6Kay ndaɗta Bu Suuna, Yawe, di ana,
Hahawra ka kay ɦoŋzi ma vo busuna ki cocona.
Asi ni doy kawi ma coo kina.
Coo mamba ka daɓ kiɗi.
Yow tliwna kiyo, varam ay ki na dew dew halaŋ.
Hin maa ki na dewɗi.
7Kay busu ma ndaɗ vom ki cocona ka ni na gak gak.
Ndaɗ vo busuna ni kolo kay ɦinira,
voom ka ga duk ndaŋgaraɗi,
tosom ka ki ga duk ndaŋgaraɗi lay.
8A jok u yaanda ha fokka a sa sukulnara ni,
an hin busu namma ki kiɗik na, tosom yam ka kiɗi.
Busu ma ndaɗ voom ha kolo kay yam ɦinirana,
sa tosom yam ka kiɗi.
9Kay ndaɗta Bu Suuna, Yawe, di ana,
Hahawra ka kay ɦoŋzi ma vo busuna ki cocona.
An hin ŋgal ku mayra vi cocora varasiya.
10Njun guna.
Ŋgal kura.
Zal tliwna.
Hoŋ zalam olo.
Cuk tlesuu daf balara duku ta ta ŋgal sokŋa ki lay.
11Tin doy kawina kay kura bay va hurumu
kay a nam gi ki kura, a kawina yoo kiyo.
Hurum ma kurufuna mbuɗ ki zozoɗta.
Hurum ma coorina ŋgal may.
12Kura um coco lay ni coo mamba ka daɓ kiɗi, tuɗ ha ni fok na ɗow ɗow. 13Yerusalem, ndak mbuɗ tak ki njenjera u dlaakka cora. An hal a mbusuk lay ni ndak ka min mbus ki oloɗi. Na may ni ndak ka ndak a mbus ki oloɗi ta ta yaanda daɓ ki egek tuwa. 14An, Yawe, di dlara wa. Ni dla ndaɗta hin li ki mbee. An hin laɗ kiyo. An ka hin taa ki bay liɗi. An ka a wi hahaw saɗi, ka hoŋ vunun daganɗi lay. Asi hin kaak ɓakŋa kakŋi kay poy makka u dlaakka cora. Di ni Bu Suuna, Yawe.»
Caŋ Ezekiyel, sa ma jok vun Lonana, miɗa
15Boy Yawena mbay egen dan ana, 16«Goŋ sanna, an min ɓalakaŋ furi maŋga ki na zak. Aŋ ka li hahawɗi lay. Aŋ ka tiiɗi lay, ka cuk simina kiɗi lay.
17«Aŋ tii ni u huruŋ ɦawaa. Aŋ ka li dlara tok suuna a tii maɗnaɗi lay. Njun gaɗamul maŋga kaŋu. Ka fok tuɓuru maŋ ma seŋŋa kiɗi lay. Baa baraw ki kay njeɓereŋgi lay. Vi fu ma saaŋ ma vok zina ɦaŋŋa ay koŋŋaɗi lay.» 18An njaɗ boy namma maŋ suuna maɗii may, fiɗigira ni caanda miɗ gaw may. Vin maɗiira ni an li ni u dla mayra danda ka ndaɗta may. 19Suuna mba dan ana, «Aŋ ka vami u boy ma aŋ lam wannana na ndeɗi su?» 20An hin hoŋosi dira ana, «Boy Yawena mbay egen dan ana, 21Di suu Israelna ana, Bu Suuna, Yawe, di ana, an min ɓalak Ziinda kiyo, ŋga taagira kay saɓak maginara, furi magira agi laɗ wanda, hurugi ma tini kay iiri magirana. Goryogi suu njufiina u gorɓiina suu agi hinisi hu Yerusalem wanna ŋgewna hin casi kiyo. 22Agi hin li ni ko an li wanda na may, ka baa baraw ki kay njeɓeregiɗi. Agi ka min vi fu ma ndaryagi suu vok zina ɦagina aynaɗi lay. 23Gaɗamul magira njuni kagi lay, tuɓuru magina cuki segi lay. Agi ka li dlara a tii maɗnaɗi lay, ka lagi hahaw dagan a yoo tagiɗi lay. Agi gegelay ni u cora nam laɗta hin yoo tam u zamba kay wayamma.
24«Ezekiyel ni a sa ma takagi yalna ki fokŋa gaw. Dlara nam laɗta agi hin li ni na may. Hu li ma dla ndaɗta mba kagina, agi hin wi ki ana anni Bu Suuna, Yawe. 25Aŋ hum haa, goŋ sanna. Hu buu ma an tlasi saɓakasi kina ni, dlara asi miniɗta, tlegeyesi suu egesi mini mbuuna, furi masira asi furuyuɗ wandara, dlaasira jivira asi laɗta, goryosi suu njufiina u gorɓiina, 26hu buu namma ni sa ma suɗ ay iiri dewna hin mba daŋ boy namma ki ni namu. 27Hu buu namma vunuŋ hin ŋgoo ki ni na ɦoŋ hu li ma aŋ ka hum boy nammana. Aŋ hin ɓaka, aŋ ka li ndumu oloɗi. Kay aŋ ni sa ma takasi yal dlara hin li ndaɗta ay ki fok jewna. Asi hin wi ki ana anni Yawe.»
Currently Selected:
EZEKIYEL 24: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.