EZEKIYEL 22
22
Dla cora vi suu Yerusalemma
1Boy Yawena mbay egen dan ana, 2«Hum haa, goŋ sanna, aŋ ka ndak a kaɓakŋaɗi su? Na daŋ may kaɓakŋa kay suu ci maɗna hu ɦoŋziisina, takasi dlaasira cora asi laɗta ki halaŋ. 3Aŋ dasi ana, Bu Suuna, Yawe, di ana, ni ɦoŋzi ma vo busuna ki cocona. Buu masina hin mbaa, asi suu min fulina ɦayna, ziisina ki mbuɗi njenjee. 4Busu ma aŋ voom ki cocona ɓakŋa vaŋ wa, u fuli suu aŋ minisina aŋ mbuɗ taŋ ki njenje wa. Kay ndaɗta aŋ dagaa buuruŋ ay ki dagan wa. Cemi aŋ tew fun basaɗaŋ ta daɓ daganda. Kay ndaɗta an mbuɗuŋ ki duk njaf suuna ni a va ma zolona cocona, a va ma sanda ii mbassa daŋga halaŋ. 5Suu day dayna u suu egeŋ tok tokŋa hin san uŋu, kay ana seŋ mbuɗ ki njenje ii suuna. Dlaaŋga dadamba zul ha fokŋi zuli na ɗow ɗow.
6«Huruŋ aŋ zi ma Yerusalemma ni muli suu Israelna ka ci maɗna cocoo. Gegelay ni ci ni u ndak mamba. 7Huruŋŋi sa ka hum vun bum u sum oloɗi. Asi las koyogi suu cuki dukusina cocoo. Huruŋŋi asi yow tlesuu vi gor suu kuyuna u boyogi suu doonora kiyo.#Kal. 20.12; 22.20-21; Gaɗ. 5.15; 24.17 8Aŋ ka golon tlegeyen suu teteɗna jiviɗi. Aŋ mbuɗ buu ma vi Lonna ki njenjera lay.#Lev. 19.30; 26.2 9Suu cuki huruŋŋa ka li ŋgeŋŋa kay tasi, ci suuna kiyo. Suu daŋŋa ka ti tlesuu li ɓivunna maŋ fulina kolo kay lii mbuyna. Suu daŋŋa li dlara zolona cocoo. 10Suu daŋŋa buu u boyogi suu vi somoyosina. Suu daŋŋa ɦeɓ boyogina buu u asi hu li ma tasi tasina.#Lev. 18.7-20 11Suu daŋŋŋa buu u boyogi suu vi ndaryasinana. Suu ɦiw ni buu u boyogi suu vi goryosina. Suu daŋŋa buu u gorsesi suu vi busi suu tamagina. 12Huruŋ olo ni suu daŋŋa vi warakŋa a tuɗ ci maɗna. Suu daŋŋa ka joɓ balna ko ndaryasina u mbona. Asi yow tlena ko ndarayasi suu vok zina u saɓkŋa. Asi ka ɦeɓesi kay a fi mbo ma bay umma. Humuŋ maa ki kan gaw may. Di ni Bu Suuna Yawe.#Kal. 22.24; 23.8; Lev. 25.36-37; Gaɗ. 16.19; 23.20
13«An maɗ kon ci suuna u tanda kay busu ma aŋ voom ki cocona, kay mbo ma aŋ vam ko suuna bay umma may. 14Hu li ma an a kaaŋ ɓakŋa kaŋŋa ni huruŋ hin li vii eŋ may su? Koŋ hin li saɓak na gak may su? An Yawe dlara an daɗta ni an hin laɗ kiyo.
15«An hin dikiŋ suu huruŋŋa ki duk njaf suu daŋŋa halaŋ halaŋ. Dla cora ka huruŋga an hin bulumuɗ kiyo. 16Aŋ mbuɗ taŋ ki lalassa ii suuna ni aŋ daŋ may. Aŋ hin wi ki ana anni Yawe.»
Lona yoo suu Israelna ki ko ndal suu caffa yoo kawina kira na
17Boy Yawena mbay egen dan ana, 18«Goŋ sanna, suu Israelna mbuɗ ki irinni ko soɗ caffa na. Asi ni ko doonora, walakka tlum ki u tusuna, kawi ma warna u silkina tlum tasi kira na. Asi mbuɗ ki ni ko soɗ caffa ha ki cuki hu zullara na. 19Kay ndaɗta Bu Suuna, Yawe, di ana, Agi cemi ni mbuɗ ki ni soɗ caffa ni, an min tokogi yagi ki hu Yerusalem. 20Tok yam tusuna, doonona, walakka, kawi ma warna, u silkina ki hu li ma zuzulla a asi yoo ki u kura ta ta lawasi kiyo. U hurun ma yara an hin tokogiya, yoorogi ki ko ndal kura yoo kawina kira na. 21An hin tokogi yagiya, foogi kuunda yara ay kagiya. An hin yoorogi ki ni hu ɦoŋzi ma Yerusalemma 22Ko ndal suuna yoo doonona ga fun zul caffara na. An hin yoorogi ki hu Yerusalemmi na may. Ni agi hin wi ki ana an Yawe gi yaanda ay kagi ni an daŋ may.»
Cora vi suu ŋgolo suu Israelna
23Boy Yawena mbay egen dan ana, 24«Goŋ sanna di mbassa Yerusalemba ana, hu li ma hurun ki ɓeŋina ni lo si ka huruɗɗi. Ndaɗ ki ni njenjee, buu ma yara. 25Suu ŋgolo maŋsina ni ko ndal dlo ma ci ŋgoɓpa kay tliw mam ma nam vamma na. Asi yow tlena ki vi suuna, yow begera vi suunara kiyo, ci njufiina ki hin boyogina ki donora coco hu ɦoŋzina. 26Muli masi suu li ɓivunna ɓalakan gaɗ manda kiyo. Asi mbuɗun tlegeyen suu teteɗna ki njenjera. Asi ka ɓorow ii tlesuu teteɗna ki u tlesuu ɦawanaɗi lay. Ka ɓorow teteɗta ki u njenjeraɗi. Asi dug irisi ki kay buu ma vi Lonna, mbuɗum ki dukusi lalassa.#Lev. 10.10 27Muli masisina dukusi ni ko ndal bosogona vi vabakginara na. Asi ni na tok a ci maɗna, min a ba suuna ki kay a yowosi tlegeyesira. 28Suu masi suu jok vun Lona dasi ana hoo ta gulumunna kiyo. Asi wi ni wira kaboyna ɦawaa, di dlara ha fokka ni ganyamba ɦawaa. Asi di ana Bu Suuna, Yawe, di na, doliɗi ni Yawe di ka naɗi. 29Suu hu ɦoŋzinna li dla cora, li dlara kulla lay. Asi yow tlesuu vi suu wihawra u suu hawra kiyo. Asi ɓaɗ tlesuu vi koyogi suu tuɗ kolona ki u saɓakŋa. 30Dukusi ni an hal ana fi sa ma jivi ma min gulumunna kolo su, fi sa ma hin a col fokon a vi kura kolo su, ni kay tlesuu ka hu mbassana. Kay ana ka an hin ɓalak tle asina kiɗi, na may ni an fi sa kaɗi. 31Kay ndaɗta an gi yaanda ay kasiya. An daɓasi ki u kuunda u hurun ma yara. An tinisi nek poy masira cora ni kelesiya. Di ni Bu Suuna, Yawe.»
Currently Selected:
EZEKIYEL 22: BMS
Highlight
Share
Copy
Want to have your highlights saved across all your devices? Sign up or sign in
Bible Moussey © Bible Society of Chad, 2002.