Mata 28
28
Yéésù díímì valú
(Markus 16.1-10; Luka 24.1-12; Yohana 20.1-10)
1 Yahudu bəd nyàm nyi'ǹmbə̀ taà gə́, nwúndù oòrə, kozolə̀ nyàmú, kə̀ limtə́ pít, Mariyama Magdala bìlə́ bə̀ kə̀ Mariyama ɔ̀d də tá, bə̀ ɛ̀m sàà dáàn ɛgǹmbìá. 2Bít bòórú gə́, yɛ́b wáá kə̀ kpɛŋsɛ́lá. Kàandə, Báátììkpɛ̀ŋ malaika nə́ŋ̀ símà lɛgú, kìl yaà gbá' bəŋ aa bə̀ ke' sàà waàl kə̀ kùrú roó, bít na' kùm bəŋ də yílú. 3Si' oò nyɛd kìínmbə̀ yɛ́bsə̀ laa kíin, bít gɔ̀' oò bəd kɔ̀ bìd kìínmbə̀ kúmə́ kíin. 4Zɔ̀ŋ aa sóózè bəd bə̀ bé' malaika gə́, bə̀ nyìì kə̀ də́dǹná, nìŋ ìì dùg kàaní, bít ìì kùm kìínmbə̀ val bəd kíin. 5Zá malaika bàà nɛ́b kɛ́ɛ̀m bəd: «Ìì nùù də́dǹ sí. Mə́ gàb yàá, íí tə́ Yéésù saanàá, màn aa bə̀ bágə̀ téélɛŋké bəroó. 6Oò zɔ̀ŋə sàà rú sé, zá díímì valú, kìínmbə̀ bàà rə kíin. Ìì yaà kúnú, ìì ɛ̀g zɔ̀ŋ aa ləə bəroó. 7Bít ìì ɛ̀m kə̀ báŋ báŋ, dá ìì bàà nɛ́b sáànmbə̀ oò bəd: ‹Díímì valú, bə́ŋyée gə́, éèn dáráàn sə̀n wə́ə̀n kə̀ aí Galili yɛ́b ba. Íí dáù ráàn bé'ǹ wərà.› Aarə nwɔŋ aa mə́ yaà iiyà baànmbə̀ roó.»
8Bə̀ zá' sàà bə wərə̀ kə̀ báŋ báŋ, tɛ́m nyìì bə̀ kə̀ də́dǹná, bít kə̀ làmkè gbà'á. Bít nùù ɛ̀m dá ìì bàà nwɔŋ aarə Yéésù nɛ́b sáànmbə̀ bərá. 9Kə̀ nwɔŋ aa nuù yée kíinní, Yéésù ɛ̀m yaà sáŋ kə̀ boò ra, bít bàà bə̀: «Mə́ dɔ̀mi nwɔŋá!»
Ɛ̀m bə̀ gbarà oò sunú, yaà bə̀ pí' yɛ́b ba, bə̀ kò'ù duná, bít bə̀ káŋ̀ kúnú. 10Kàanyée gə́, Yéésù bàà bə̀: «Ìì nùù də́dǹ sí. Ɛ̀m dáá ìì bàà ɔ̀dkudvɛɛ̀l mə́ bəd boò dáá Galili yɛ́b ba. Ìì dá mə́ ráàn bé'ǹ wərà.»
Nwɔŋ bəraa sóózè bəd yaà bə̀ ùd doó
11Zɔ̀ŋ aa nɛ́b kɛ́ɛ̀m bəraa bə̀ tə́ ɛɛ̀m kpaŋə́ kàangə́, sóózè kam bəraa nwánà sàà rə, kid bə̀ bírà bìlú, bít yaà bə̀ ùd láŋsə́ gààd gbàád bəd in aa taà rə kóólé. 12Láŋsə́ gààd gbàád bərì wál kə̀ dam bəd tá. Wál gám ìì saŋ̀ bəd ɔ̀dbə gə́, bə̀ pii sóózè bəd ba' gbàákù, 13bít ìì bàà bə̀: «Dáá ìì bàà: ‹Nɛ́b sáànmbə̀ oò bəd bɔ̀n yaà bə̀ pà' val oòrə tígə́lú, bɔ̀b bə́ tə́ ləəm ləə̀n naú.› 14Bít gɔ̀mnà kìì nwɔŋ aa ìì gə́, bə́ gàb nɛɛ̀n aa báù tɛ́'ǹ dú, bɔ̀b íí dá súùn nwɔŋ gbò'kè luùm déè gə́ kóólé rú rə yàá.»
15Sóózè bərì kè' basá, bít ìì mà' kìínmbə̀ nɛɛ̀n aa bàà ìì ì' bà rú rə kíin. Kə̀ aarə kíin, nwɔŋ aarə sa' taà Yahudu bəd tə́ŋú, yaà wə́ə́ taà nyàm nyà'aa bə̀ aa yée zé.
Yéésù ì' yíl oò, nɛ́b sáànmbə̀ oò bəd númú
(Markus 16.14-18; Luka 24.36-49; Yohana 20.19-23; Gbantumsə̀ bəd Tù' 1.6-8)
16 Nɛ́b sáànmbə̀ bəraa kób zè nə́ŋ̀ də, bə̀ ɛ̀m Galili yɛ́b ba, kɔ̀l wàà aa Yéésù mɔ̀m bà rə ba. 17Zɔ̀ŋ aa bə̀ bé'ù kíinní, bə̀ káŋ̀ kúnú. Nɛ́b kam boò tə́ŋú, ìì zìb pìrə̀ boò tɛ́mú. 18Yéésù ɛ̀m gbarà boò sunú, bít bàà bə̀: «Kpɛŋsɛ́l gə́ kóólé, Vɛnɛ́b pii máà yàá, lɛgə́ poú, kə̀ yɛ́b bə tə́ kóólé. 19Kə̀ taàbìá, ìì ɛ̀m kíin nɛ́b bəd sunú, yɛ́b gə́ kóólé, dá ìì mà' bə̀, boò kùm nɛ́b sáànmbə̀ mə́ bərá. Ìì pii bə̀ baptisma Báá nə́gə́lú, Wàà nə́gə́lú, bít kə̀ Nwul Gìdń nə́gə́lú. 20Ìì sán nɛ́b sáànmbə̀ puu bəraa yée, boò ləə indaŋ̀mbə̀ bəraa mə́ pii iiyà yée kíìn kóólé, bít ìì gàb kúnú, máá kuùm kə̀ aí tá, nyàm gə́ kóólé, yɛ́b dá bɛ́dǹ zé.»
Currently Selected:
Mata 28: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
