Mata 27
27
Kò' bə̀ àà Yéésùì Pilatu númú
(Markus 15.1; Luka 23.1-2; Yohana 18.28-32)
1Kə̀ limtə́ pít, láŋsə́ gààd gbàád bəd kə̀ Yahudu bəd dam bəd tá, wál ìì dúg gú' Yéésù lo'ǹmbìá. 2Bə̀ tabə̀ kə̀ kaasá, gùb bə̀ ààù, bít dá bə̀ piiù Roma bəd gààd gbà'á Pilatu nɛɛ̀n tɛ́mú.
Nɛɛ̀n aa Yudas lò' yíl oò rú roó
(Gbantumsə̀ bəd Tù' 1.18-19)
3Zɔ̀ŋ aa Yudas, màn aa lɛ́b Yéésù rə, bé' gám bə̀ və̀d nwɔŋ, fág boò lò' Yéésù kíìn yée gə́, tɛ́m sabə̀ yàá; bít kidbíd yaà pii láŋsə́ gààd bəd kə̀ dam bəd tá, ba' yáàm lɛ̀ɛ́ŋke laa nə́ŋ̀ zè kób də kúnú. 4Bàà bə̀: «Mə́ mà' invaksə́ yàá, kə̀ nɛ́ŋə̀ aa mà' bèd invaksə́ síndə ko'ǹ lɛ́bm̀bìá!»
Zá kè' bə̀ í'ù: «Níì wál bə́ sə̀n gú? Nwɔŋ ám bìá, ń gàb tə́ sùnú!»
5Yudas ɛ̀m dá lɛ́l dàà ba' rə láŋsə́ wúuú, zá' taà ɛ̀m kúnú; bít tab dá lò' yíl oò téé nyìírú, kə̀ kaasá.
6 Láŋsə́ gààd gbàád bəd yaà ìì pú' ba' rə gə́, bít ìì bàà: «Vɛnɛ́b indaŋ̀mbə̀ bə́n dàŋ kíìn ba' luùm aarə páànmbə̀ láŋsə́ wúl gbaŋə̀ rú; kàandə, nyɛ̀lə́m dùmá.»
7Bít gám ìì saŋ̀ ɔ̀d bə gə́, pà' bə̀ lɛ́b basaa rə kə̀ lɛ' lam in bə̀ wə'ǹ naú. Lɛ' rə, bə̀ dá sɛ̀ɛ́n bəd sàà zɔ̀ŋ zígàá. 8Kə̀ taàbìá, yaà wə́ə́ taà bə́ŋyée zé, bə̀ dɛ̀d taà lɛsaa rə: «Nyɛ̀lə́m lɛsá.» 9Kàanyée gə́, Vɛnɛ́b gám nwɔŋ kə̀ gbantumsə̀ oò aa bə̀ dɛ̀rə̀ Zeremiya rə gúsá, bàà: «Bə̀ pà' ba' lɛ̀ɛ́ŋə̀ laa nə́ŋ̀ zè kób (dùm aa nɛ́b Israila bə̀ bəd gám ìì və̀d, bənə́ dáánnə́ù piìn doó), 10bít dá bə̀ lɛ́b kə̀ lɛ' lam in bə̀ wə'ǹ naú, kìínmbə̀ nɛɛ̀n aa Báátììkpɛ̀ŋ Vɛnɛ́b bàà máà mà' rə kíin.»
Pilatu tə́ nwɔŋ dɛdǹ kiìn Yéésù naú
(Markus 15.2-5; Luka 23.3-5; Yohana 18.33-38)
11Gààd gbà'á Pilatu dɛ̀d àà Yéésù oò númú, bààù: «Ámda ń kùmsə̀n Yahudu bəd gààrì?»
Yéésù kè' í'ù: «Èè, kə̀ nɛɛ̀n aa ḿ bàà yérə kíin.»
12Bòórú zɔ̀ŋ aa láŋsə́ gààd gbàád bəd, kə̀ dam bəd tá, ìì pè'ù kə̀ gúsuúm nwɔŋ bəd yéení, kè' í' bə̀ nwɔŋ naà sé. 13Kàanyée gə́, Pilatu bíd bààù: «Ń kìì nwɔŋ zùúm bəraa bə̀ tə́ gáàm ám yílə́ yérə sínì?»
14Zá Yéésù kè' í'ù nwɔŋ nə́ŋ̀má naà sé. In aarə, kò' gààd gbà'á yílì gbàákù.
Fág bə̀ və̀d nwɔŋ, boò lò' Yéésù kúnú
(Markus 15.6-15; Luka 23.13-25; Yohana 18.39–19.16)
15Sɛŋ aa bə̀ tə́ wálke sɛŋ aa Vɛnɛ́b vú' kə̀ nɛ́b Israila bə̀ bəd Misra yɛ́b bərə ma'ǹ də gə́ kóólé, gààd gbà'á vúŋ lɛ́' sáá bə̀ nɛ́d wúltígə́l bə̀ nə́ŋ̀, màn aa nɛ́b zùúm í' roó. 16Zá sɛŋ aarə bərə, nɛ́d wúltígə́l bə̀ rú bə̀ nə́ŋ̀, nɛ́b bəd kóólé bə̀ gàbə̀ yàá, nɛ́d invaksə́ bə̀ ma'ǹná, kùm wərà, nə́gə́l oò Yéésù Barabas. 17Pilatu dɛ̀d nɛ́b zùúm aa wál wərə̀ rə gə́, bít bàà bə̀: «Màn déè íí í' vúŋ máà lɛ́' ii taà gú' Yéésù Barabasì, sínkɔ̀ Yéésù aa bə̀ dɛ̀rə̀ Krístù reè?»
18Kə̀ aakíin də, Pilatu gàb yàá sɔ̀ɔ̀nkè, kò' bə̀ àà Yéésù obəǹ səǹ, kisɛ̀l nwɔŋ bòórú.
19Sɛŋ aa Pilatu kùm fágə́n wúu rə, kéèn oò tùm piiùwà nwɔŋ aa yóo: «Ǹ sàà in nə́ŋ̀má ma'ǹmbə̀ nɛ́ŋ váàndo aa gàb invaksə́ ma'ǹmbə̀ sín yée yílə́ sí. Kàandə, níin tígə́lə́ mə́ í' búúrì gbàákù kə̀ lədǹnú, nwɔŋ oò bòórú.»
20Zá láŋsə́ gààd gbàád bəd kə̀ dam bəd tá, wál bə̀ dúg gú', bə̀ pè' nɛ́b zùúm bəd boò nyɛ̀m Pilatu, vúŋ oò lɛ́' bənə́ Barabas da, bít boò lò' Yéésù ra. 21Gààd gbà'á kè' í' nwɔŋ, dɛ̀d nɛ́b zùúm bəd: «Íí í' vúŋ máà lɛ́' ìì màn déè nɛ́b aa iirə yée tə́ŋə́ gú?» Kè' bə̀ í', bə̀ bààù: «Barabas da.» 22Pilatu dɛ̀d bə̀, bàà: «Yéésù aa bə̀ dɛ̀rə̀ Krístù rə gə́, máà mà'ù leè gú?»
Boò kóólé, kè' bə̀ ííù: «Bág ǹ lò'ù téélɛŋké ba.» 23Pilatu dɛ̀d bə̀: «Níì invaksə́ Yéésù mà' taà gú?»
Zá boò kóólé, bə̀ pál kpə̀ə́ǹ kə̀ kpɛŋsɛ́lá, bə̀ bàà: «Bág ǹ lò'ù téélɛŋké ba!»
24Zɔ̀ŋ aa Pilatu bé' bəǹ bán in nə́ŋ̀má ma'ǹmbə̀ gá, bít nwɔŋ tóó tə́ dáàn númú ní yée gə́, pà' wəlá, sùg nɛɛ̀n oò bəd nɛ́b zùúm númú, bít bàà: «Nɛ́ŋ Váàndo aa yée, val oò gə́, mə́ pìì rú wərə̀ sé! Nwɔŋ aí bìá!»
25Nɛ́b zùúm bəd kè' bə̀ í', bə̀ bàà: «Fágə́n val bə̀ oòrə, oò pí' obə́ yílú, kə̀ yɛb bə́ bəd yílú!»
26Kàanyée gə́, Pilatu bìn lɛ́' bə̀ Barabas da, dàà bə̀ zìb Yéésù kúnú, bít pà' pii bə̀, bɔ̀b boò bágə̀ téélɛŋké ba.
Sóózè bəd lòò bə̀ bí' Yéésù kèérá
(Markus 15.16-20; Yohana 19.2-3)
27Pilatu sóózè bəd kò' bə̀ àà Yéésù gààd gbà'á táarú, bít sóózè bəd boò kóólé, láŋ yaà bə̀ páá Yéésù tə́ŋú. 28Bə̀ nyàd gɔ̀' oò bəd kúnú, pà' bə̀ pááù dàál yɛ̀ɛ́lá. 29Bə̀ yáá mə̀lə̀ ku' bə̀ bərá, bə̀ dɔ̀bə̀ yíləsú, bít pà' bə̀ zíg gbà' nə́ŋ̀ oò nɛɛ̀n váànú. Tə́ dáàn kə̀ númú gə́, yaà bə̀ kùm kə̀ dunlígə̀d oò númú, lòò bə̀ bí'ù kèérá, bə̀ bàà: «Bə́ dɔ̀m m nwɔŋá, Yahudu bəd gààd gbà'á!»
30Bə̀ tó'ù sudn ba, bít bə̀ kè' gbà'wà rə, bə̀ zìbə̀ kə̀ yíləsú. 31Zɔ̀ŋ aa lò' bə̀ bí'ù kèéd yée gə́, bə̀ nyàrə̀ dàál lə kúnú, bít bə̀ pááù gɔ̀' oò bərá. Bə̀ ààù bìl bòórú, oò bə̀ dáàn bágǹ lo'ǹmbə̀ téélɛŋké ba.
Nɛɛ̀n aa bág bə̀ lò' Yéésù téélɛŋké bəroó
(Markus 15.21-32; Luka 23.26-43; Yohana 19.17-27)
32Zɔ̀ŋ aa ìì tə́ vúgǹ bìl bòórú yée gə́, ɛ̀m dá bə̀ sáŋ kə̀ nɛ́ŋ váàndo nə́ŋ̀ Sirena bìlə́ bìá, nə́gə́l oò Simon. Sóózè bərì pè'ù, kè' oò pà' Yéésù téélɛŋkéá. 33Ɛ̀m dá bə̀ wə́ə́ zɔ̀ŋ aa bə̀ dɛ̀d Golgota rə ba, taà kùmsə̀n baànmbə̀, «yílə magə̀wà zɔ̀ŋá.» 34Bə̀ pii Yéésù oò nyəə badn aa bə̀ nyágə́l kə̀ wəl nyááke tə́ roó. Zɔ̀ŋ aa Yéésù bèd gə́, məə kíìn nyəə̀nmbìá.
35Bə̀ bágə̀ téélɛŋké bə gə́, bít pɛ̀d ìì gàb gɔ̀' oò bərá, kə̀ sáásá lɛ́'ǹmbìá. 36Bítsɔ̀ŋ, wál ìì kùm wərà, bə̀ nwánə̀ kúnú. 37Bə̀ bád oò yílú, téélɛŋké ba: «MÀN AA YÉE KÙMSӘ̀N YÉÉSÙ RA, YAHUDU BƏD GÀÀD GBÀ'Á!» 38Bə̀ bág lííro bəd iirə kə̀ oò tá, téélɛŋké bəd ba. Nə́ŋ̀ oò nɛɛ̀n váànú, nə́ŋ̀ ɔ̀d kɔ̀ oò nɛɛ̀n kéènú.
39Nɛ́b aa ìì tə́ taàn kpaŋ̀ bə wərə̀ rə, bə̀ wá' yíləsá, bít bə̀ dúl Yéésù kúnú. 40Bə̀ bààù: «Ámda ń kùmsə̀n màn aa bàà gə́, zìb bəǹ dá láŋsə́ wúl wɔbm̀, bít wə̀' bəǹ dáù dí'ǹ sɛŋ toorə rə géè? Ǹ súú yíl ń kə̀ yíl ń ní! Dáà ń tə́ Vɛnɛ́b Wàà gə́, ǹ símà kíìn téélɛŋké ba!»
41Kə̀ aakíin də, láŋsə́ gààd bərá, nɛ̀n indaŋ̀mbə̀ bəd kə̀ dam bəd tá, bə̀ mà' nɛɛ̀n aarə rú. Lòò bə̀ bí'ù kèérá, bít ìì bàà: 42«Súú nɛ́b kambəd yàá, zá oò gə́, bán yíl oò bə̀ súùnmbə̀ sé! Tə́ gààd gbà'á Israila bə̀ gə́, oò símà téélɛŋké ba, bít báannə̀ taà bagàá. 43Zíg tɛ́m oò bə̀ Vɛnɛ́b naú, bít bàà: ‹Máára mə́ kùmsə̀n Vɛnɛ́b Wàá!› Vɛnɛ́b í'ù tə́ kíìn súùnmbə̀ gə́, yaà oò súúù kíìn bə́ŋyóo!»
44Bít lííro bəraa ìì bág bə̀ téélɛŋké bə Yéésù kàrú rə, boò kɔ̀ ìì dúlə̀ nɛɛ̀n də rú.
Val kò' Yéésù yàá
(Markus 15.33-41; Luka 23.44-49; Yohana 19.28-30)
45Sɛŋ də, nyàm yíl tə́ŋú, tígə́l mà' taà yɛ́b aarə bə kóólé, bít tígə́l lə, náŋ yaà wə́ə́ ba'wà toorə nyàm yíl tə́ŋə́ bìá. 46Ba'wà toorə gə́, Yéésù páá kpə̀ə́ǹ lɛgú, kə̀ kpɛŋsɛ́lá, bàà: «Eli, Eli, lama sabaktani?» Taà kùmsə̀n baànmbə̀: «Vɛnɛ́b mə́ra, Vɛnɛ́b mə́ra, kə̀ níìbə̀ lɛ́' ń dàà mə́ taà gú?»
47Nɛ́b kam bəraa dìì wərə̀, bə̀ kìì nwɔŋ aa Yéésù gám yérə, ìì bàà: «Dɛ̀d Eliya ra.»
48Kə̀ nwɔŋ aa nuù yée kíinní, nɛ́ŋə̀ nə́ŋ̀ boò tə́ŋú, nùù dá pà'à sòsó, yaà mɛ́' kə̀ barəm gbà'kèá, tabə̀ dɛ̀gə́l gàŋə̀ ba, bít pii Yéésù oò nyəə kúnú. 49Zá nɛ́b kambəd bàà: «Ǹ dìì zé, báà ɛgǹ bə́ŋ̀ gè, Eliya yaà dáù kíìn súùn gə́ roó!»
50Yéésù páá kpə̀ə́ǹ gbà'á lɛgə́ sɔ̀ŋ gə́, gɔ̀ŋsə́ oò bɛ́d kúnú.
51Sɛŋ aarə, gɔ̀saa tab bə̀ və̀d kə̀ láŋsə́ wúl lə, sɔ̀rà seènmbə̀ lɛgú, yaà wə́ə́ dùù zè. Yɛ́b wáá yàá, bəŋ pel bəd pɛɛ̀l yàá, 52sàà bəd ked yàá, Vɛnɛ́b nɛ́b gìdń zùúm bəraa val kòd bə̀ rə, bə̀ díímà bəd kíìn valú, 53bə̀ vúgə́là kíìn sààrú. Bít zɔ̀ŋ aa bòórú Yéésù díím valə́ gə́, bə̀ pììà Urusalima bìl gìdńnú, nɛ́b zùúm bəd bé' bə̀ yàá.
54Roma bəd sóózè gààd gbà'á, kə̀ sóózè kam bəraa bə̀ nwán Yéésù kə̀ oò tə́ rə tá, bə̀ bé' yɛ́b wáá, bít ìì bé' in bəraa taà yée gə́, də́dǹ mà' bə̀ì gbàákù, bít ìì bàà: «Nɛ́ŋ Váàndo aa yée kùmsə̀n Vɛnɛ́b Wàà vɛ́nà!» 55Nɛ́b kɛ́ɛ̀m bəd zùúm, bə̀ sɔ̀rà Yéésù bagǹmbə̀ sɛŋ aa vúgà Galili yɛ́b bəroó, kə̀ oò bə̀ tù' ma'ǹmbìá. Nɛ́b kɛ́ɛ̀m bəraa rə, bə̀ dìì zɔ̀ŋ bùúd ba, ìì tə́ taà in aa tə́ taàn Yéésù yílə́ rə ɛgàá. 56Nɛ́b kɛ́ɛ̀m bəraa boò tə́ŋə́ rə, Mariyama nɛ́ŋə̀ Magdala bìlə́ bìá, Mariyama, Yakuba kə̀ Yusufu tá nà'á boò ra, kə̀ Zebede kéèná.
Bə̀ lə̀ə̀ Yéésù yàá
(Markus 15.42-47; Luka 23.50-56; Yohana 19.38-42)
57Zɔ̀ŋ aa nyàm mà' gə́, nɛ́d gbaŋə̀ bə̀ nə́ŋ̀ Arimatiya bìlə́ bə̀ yaà wə́ə́ yàá. Nə́gə́l oò Yusufu, bít oò kɔ̀ kùm bèrì nɛ́d sánán Yéésù bìá. 58Nɛ́ŋ váàndo aarə, ɛ̀m Pilatu sunú, bít nyɛ̀mə̀ oò pii bəǹ Yéésù si' rə kúnú. Kàanyée gə́, Pilatu tùm bə̀, pà' boò pii Yusufu Yéésù si' rə kúnú. 59Yusufu pa'à val lə, bít dàbə̀ val gɔ̀' puu rú. 60Zɔ̀ŋ aa bə̀ dàbə̀ gə́, bít dá zíg val lə sàà puu aa bə̀ gbə̀' bəŋə́ rə rú. Bítsɔ̀ŋ, kìl bəŋ gbà'á nə́ŋ̀, ke' kə̀ sàà waàlá, bít zá' ɛ̀m kúnú. 61Mariyama Magdala bìlə́ bə̀ kə̀ Mariyama nə́ŋ̀ ɔ̀d də tá, bə̀ kùm wərà, kùm ìì bí' núù sàà ba.
Sóózè bəd zùúm, ìì tə́ Yéésù sàà nwánàá
62Nwúndù oòrə, taà kùmsə̀n baànmbə̀ nyàm aa bàg sɛŋ aa bə̀ kùd si' nwáànmbə̀ kə̀ nyàm nyi'ǹmbə̀ roó, láŋsə́ gààd bəd, kə̀ Farisa bəd gə̀b tá, wál ìì ɛ̀m ɔ̀dbə Pilatu kàrú, 63bít ìì bààù: «Gbàároá, sèl bə́ zá' nwɔŋ aa gúsuúm gààraa bàà, bɔ̀b sɛŋ aa tə́ kə̀ gɔ̀ŋsə́ roó. Bàà: ‹Sɛŋ toorə bə gə́, máá kíìn díìm valú.› 64Kə̀ taàbìá, bə́ tə́ən kíìn nyɛmàá, ǹ zíg sóózè bəd boò nwán sàà rə, yaà oò wə́ə́ sɛŋ toorə zé, bɔ̀b nɛ́b sáànmbə̀ oò bəd bɔ̀n yaà boò pà' si' oò, bídǹ baànmbə̀: ‹Yéésù díímì valú!› sí. Gúsuúm aa dùg kə̀ bòd yée, yɛɛ̀l dá sə̀n éèn də̀gə̀ də̀gə̀ bə̀ rə kanàá.»
65Pilatu bàà bə̀: «Mə́ pii ii sóózè bəraa yàá. Ìì ɛ̀m kúnú, dá ii nwán kúnú, kìínmbə̀ nɛɛ̀n aa íí dá báàn dú rə kíin.»
66Zá' ɛ̀m dá bə̀ mà' nɛɛ̀n aa bə̀ dá sàà nwáàn dú roó. Nìb bə̀ kùd bəŋ aa ke' sàà waàl loó, bít bə̀ zíg sóózè bəd, bɔ̀b boò nwán sàà rə kúnú.
Currently Selected:
Mata 27: SLNT98
Highlight
Share
Copy
Want to have your highlights saved across all your devices? Sign up or sign in
Nouveau Testament en Samba Leko © Alliance Biblique du Cameroun, 1998.
