Gbantumsə̀ bəd Tùsá 16
16
Timote láŋ tə́ Pol aàn kə̀ Silas tá
1Pol ɛ̀m dáá númú, wə́ə́ Derbe bìlú, kə̀ Listra bìlú. Nɛ́d bagké nə́ŋ̀ wərà, nə́gə́l oò Timote. Nà'á oò nɛ́d kéèndo bagké Yéésù bìá, oòrə Yahudu. Zá báá oò gə́, Grɛg. 2Nɛ́b bagké bəraa Listra bìlú, kə̀ Ikonium bìlə́ rə tá, bə̀ gám nwɔŋ sɔ̀ɔ̀n oò yílú. 3Nɛ́ɛ̀m Pol í' Timote pa'ǹ ɛɛ̀mbə̀ kə̀ naà yée gə́, bə̀ ná'ù taà gàbá. Mà' kàandə, Yahudu bəraa yɛ́b bə wərə̀ rə kóólé, bə̀ gàb yàá, Timote báá oò Grɛg. 4Pol kə̀ nɛ́ŋə̀ aa ɛ̀m sɛ̀ɛ́n kpaŋ̀ kə̀ oò tə́ rə tá, bə̀ gəə̀l bìl kə̀ bìlá. Bə̀ bàà nɛ́b bagké bəd nwɔŋ aa Yéésù gbantumsə̀ bəd kə̀ dam bəraa Urusalima bìlə́ rə tá, gám bə̀ dúg doó. Bít bə̀ bàà nɛ́b bəd boò ləə nwɔŋ bəraa rə kúnú. 5Kə̀ aakíin də, nɛ́b bagké bəraa wərə̀ rə, tɛ́mbagké boò ɛ̀m taà númú, ká'sɛ́l boò ká' dáá taà kə̀ númú, sɛŋ gə́ kóólé.
Vɛnɛ́b kèd Pol núù Torowas bìlú
6Nwul Gìdń dàŋ bə̀ kíìn Vɛnɛ́b nwɔŋ baànmbə̀ Aziya yɛ́b ba. Kàanyée gə́, taà bə̀ dàà Frigiya yɛ́bá, kə̀ Galatiya yɛ́bá. 7Zɔ̀ŋ aa dá bə̀ wə́ə́ Misiya yɛ́b bɛŋə̀ bə gə́, bə̀ í' dáànmbə̀ Bitiniya yɛ́b ba. Zá Yéésù Nwul dàà bə̀ kpaŋ̀ sé. 8Kàanyée gə́, taà bə̀ dàà Misiya yɛ́bá, bít bə̀ ɛ̀m Torowas bìlú. 9Zɔ̀ŋ aa tígə́l mà' gə́, Vɛnɛ́b kèd Pol núùá, bít Pol bé' nɛ́ŋ váàndo nə́ŋ̀ Makedoniya yɛ́b bə bìá, dìì lɛgú, tə́ù nyɛmàá, bààù: «M̀ bàg Makedoniya yɛ́b ba, yaà ǹ láŋ bə́ ba!» 10Vɛnɛ́b kèrə̀ núù gə́, kə̀ nwɔŋ aa nuù yée kíinní, bə́ sàà dáànmbə̀ Makedoniya yɛ́b ba. Kàandə, bə́ gàb yàá vɛ́nà, Vɛnɛ́b dɛ̀d bə́, gəə̀l báà bàà nɛ́b bəd Nwɔŋ Puu Sɔ̀ɔ̀nkè yɛ́b aarə ba.
Lidia bíl nɛ́b bagkéì Filipiya bìlú
11Bə́ zá' kə̀ kə̀ə̀d gbà'á, Torowas bìlú, bə́ ɛ̀m bəní Samotrakiya bìlú, bít nwúndù oòrə bə́ ɛ̀m Neapoliya bìlú. 12Bə́ zá' wərə̀ gə́, bə́ ɛ̀m Filipiya bìlú. Filipiya rə, bìl gbà'á Distrik Makedoniya yɛ́b bə bìá. Filipiya bìlə́ rə, nɛ́b Roma bìlə́ bə̀ bəd yaà bə̀ ləə sə̀n wərà. Bə́ ləə bìl aarə rú sɛŋ zɔ̀gɔ̀. 13Nyàm nyi'ǹmbə̀ sɛŋú, bə́ vúg bìlú, bə́ ɛ̀m wəl nwuu nə́ŋ̀ kàd ba, bə́ sèl gə́, báà bá zɔ̀ŋ nə́ŋ̀ bɔbm̀ zɔ̀ŋ aa Yahudu bəd nyɛ̀m Vɛnɛ́b bəroó. Bə́ kùm yɛ́b ba, bə́ tə́ nwɔŋ gáàm kə̀ nɛ́b kɛ́ɛ̀m bəraa wál wərə̀ roó. 14Nɛ́ŋ kéèndo nə́ŋ̀ boò tə́ŋú, nə́gə́l oò Lidia, nɛ́d Tiyatira bìlú bìá. Lidia rə, tù' oò gɔ̀' yɛ̀ɛ́l gə́ə̀lǹmbìá. Oòrə, nɛ́ŋ kéèndo Vɛnɛ́b bə̀ káŋ̀á. Zɛ̀ŋ Vɛnɛ́b nwɔŋ aa bə́ tə́ baàn doó. Kàandə, Báátììkpɛ̀ŋ Vɛnɛ́b kèrə̀ tɛ́má, bɔbm̀ kuùmbə̀ dìímsə̀ní, kiìnmbə̀ nwɔŋ aa Pol tə́ baàn doó. 15Oòra kə̀ ligə̀ oò tá, bə̀ pii bə̀ baptisma yàá; bít bòórú gə́, dɛ̀d bə́ kə̀ aakíin: «Dáà ɛ̀g íí bé' mə́ yàá, vɛ́nà, mə́ nɛ́d Báátììkpɛ̀ŋ bə̀ bagǹ gə́, yaà ìì sím zɔ̀ŋə máá yiilú.» Bít pè' bə́ kə̀ kpɛŋsɛ́lá, báà sím obəǹ kàrú.
Bə̀ páá Pol kə̀ Silas tá, wúltígə́l bə̀ Filipiya bìlú bə̀ rú
16Nyàm nə́ŋ̀ kàani, bə́ tə́ ɛɛ̀m zɔ̀ŋ aa nyɛ̀m bə̀ sáá Vɛnɛ́b bərə gə́, bə́ sáŋ kə̀ kɔ̀'kíìn nə́ŋ̀, kə̀ nwul vaksə́ sisú. Nwul vaksə́ aarə, bí' sááù nɛ́d núùbìá, bàà sáá nɛ́b bəd in aa dáà yaànà númú roó. Nɛ̀n oò bəd bɔ̀b ìì sáá ba' zùúm kə̀ tù' oò roó. 17Bàg bə́ bòórú, bə́ kə̀ Pol tá, kpàm nwɔŋ lɛgú, bàà: «Nɛ́b aa yée nɛ́b Vɛnɛ́b tù' bə̀ ma'ǹ bərá, Vɛnɛ́b gbà'á aa lɛgə́ paà roó. Bə̀ tə́ ii kpaŋ̀ aa dá ii aàn súúke rú rə baanàá!» 18Mà' sáá kə̀ aarə kíin sɛŋ zùúm. Dáráàn kə̀ númú gə́, díŋ Pol tɛ́mì gbàákù. Pol lìb bí' núù, bít bàà nwul vaksə́ rə: «Kə̀ kpɛŋsɛ́l Yéésù Krístù nə́gə́lú bìá, ǹ vúg kíìn nɛ́ŋ kéèndo aa sisú!» Kə̀ nwɔŋ aa nuù yée kíinní, nwul vaksə́ vúg dààù yàá.
19Zɔ̀ŋ aa kɔ̀'kíìn bóò tììkpɛ̀ŋ bəd sèlì bé' bənə́ bɔbnə́ ba' sɔ̀ŋ gá yée ní, sə̀ŋ ìì kò' Pol kə̀ Silas tá, bə̀ àà bə̀ gààd walú, nɛ́b gbàád bəd númú. 20Bə̀ àà bà Roma bəd nɛ́b gbàád númú, bít ìì bàà: «Nɛ́b aa yée bə̀ yɛ̀l bə́n bìl tə́ kúnú, bə̀ Yahudu bərá, 21bít bə̀ tə́ nɛ́b bəd láŋsə́ bəraa bàg obə́n bə̀ síndə sánàá. Obə́n bə́n Roma bəd gə́, indaŋ̀mbə̀ bə́n dàŋ bə́n kíìn láŋsə́ boò bagǹmbìá.»
22Nɛ́b zùúm wál boò yílú, bə̀ zìb bə̀ kúnú. Nɛ́b gbàád bəd kò' ìì sèl Pol gɔ̀' bəd kə̀ Silas bə̀ tá. Bə̀ bàà nɛ́b bəd boò zìb bə̀ kə̀ gbàsá. 23Bòórú nɛ́b bəd bə̀ zìb bə̀ kə̀ gba' nɛɛ̀n zùúm yée gə́, pà' ìì àà bə̀ wúltígə́l bə̀ rú. Ìì bàà nɛ́d wúltígə́l bə̀ nwáàn, oò nwán bə̀ kíìn sɔ̀ɔ̀nkè. 24Zɔ̀ŋ aa ìì piiù kpaŋ̀ kàangə́, àà bə̀ wúltígə́l bə̀ bàgə̀l tə́ŋtəŋú bə̀ rú, kò' ìì bágə́l bə̀ dun téé rú.
25Sibə̀wà kàà gə́, Pol kə̀ Silas tá, ìì nyɛ̀m Vɛnɛ́bá, nàà ìì káŋ Vɛnɛ́b kə̀ nábá. Nɛ́b wúltígə́l bə̀ rú bə̀ kambəd kɔ̀ ìì tə́ kiinàá. 26Kə̀ nwɔŋ aa nuù yée kíinní, yɛ́b wá' gbàákù, wúltígə́l bə̀ sɔ̀d wá'à bèélú, wúlwaàl bəd keèd kúnú, sɛ̀gsɛ́g bəraa nɛ́b wúltígə́l bə̀ rú bə̀ bəd nɛɛ̀nú rə, biìn píl yɛ́b ba. 27Nɛ́b wúltígə́l bə̀ nwáàn lɛ́ɛ́m yàá, zɔ̀ŋ aa bé' wúlwaàl bəd keèd kàangə́, sèl gə́, bàà nɛ́b wúltígə́l bə̀ rú bə̀ bəd nùù yàá. Kə̀ taàbìá, dìŋ bə̀' taà yɛ́rə̀ bùúrá, bəǹ dá yíl bəǹ lo'nàá. 28Zá Pol dɛ̀rə̀ nwɔŋ, bàà: «Sàb ǹ lò' yíl ń sí! Bə́ kóólé, bə́ tə́ zɔ̀ŋə ní!»
29Nɛ́b wúltígə́l bə̀ nwáàn bè'à laá, nùù pìì wúltígə́l bə̀ rú wərà. Yaà pí' Pol númú, kə̀ Silas númú kə̀ niŋ̀mbìá. 30Zɔ̀ŋ aa vúŋ bə̀ gə́, dɛ̀d bə̀: «Nɛ́b bərá, má leè ma'nì, bɔ̀b má taà súùn gú?»
31Kè' bə̀ í'ù: «Ḿ bàg Báátììkpɛ̀ŋ Yéésùì gə́, ń dákíìn súúnàá, ámda kə̀ ligə̀ ń tə́ kóólé.» 32Bít ìì bààù Báátììkpɛ̀ŋ nwɔŋá, oòra kə̀ nɛ́b oò yiìl bə̀ bəd tə́ kóólé. 33Sɛŋ də, nɛ́d wúltígə́l bə̀ nwáàn pà' dáá sùg bə̀ taà núgə́l boò bərá. Bòórú gə́, oòra kə̀ nɛ́b oò yiìl bə̀ bəd tə́ kóólé, bə̀ pii bə̀ baptisma. 34Pà' Pol kə̀ Silas tá, àà bə̀ oò yiilú, dáá pii bə̀ inlíìnmbìá. Oòra kə̀ nɛ́b oò yiìl bə̀ bəd tə́ kóólé, bə̀ kìì tɛ́m làmkè yàá, kə̀ Vɛnɛ́b bagǹmbìá.
35Zɔ̀ŋ aa nwúun nyɛd kə̀ limtə́ gə́, nɛ́b gbàád Roma bìlə́ bə̀ bəd tùm bə̀ àà sóózè bəd gààd, oò bàà nɛ́d wúltígə́l bə̀ nwáàn: «Bìn ǹ lɛ́' nɛ́b aa yérə kúnú.» 36Nɛ́d wúltígə́l bə̀ nwáàn yaà bàà Pol: «Nɛ́b gbàád bəd tùmà nwɔŋ, bə̀ bìn boò lɛ́' ii kúnú. Tə́ kàangə́, vúg ìì ɛ̀m kíìn kə̀ tɛbàá.»
37Zá Pol bàà bə̀: «Obə́ kɔ̀ bə́ nɛ́b Roma bìlú bə̀ bərá, zá kò' íí zìb bə́ nɛ́b bəd núùrú, fágə́n má íí mà' bə́ bə sé, bít kò' íí páál bə́ wúltígə́l bə̀ rú. Bə́ŋyée kɔ̀, bə̀ í' bə́ biìn lɛ́'ǹmbə̀ dìímsə̀ní wa? Ə́ùwə́, ma'míìn kàan sɔ̀ŋ gá! Zá nɛ́b gbàád Roma bìlú bə̀ bəd kə̀ yíl boò ra, bìn yaà boò lɛ́' bə́ sə̀ní.»
38Sóózè bəd yaà bə̀ bàà nɛ́b gbàád Roma bə̀ bəd nwɔŋ aa yóo. Boò kɔ̀ ìì kìì gə́, Pol kə̀ Silas tá, bə̀ nɛ́b Roma bìlú bə̀ bəd yée gə́, də́dǹ mà' bə̀ yàá. 39Ɛ̀m yaà bə̀ dɛ̀d bə̀ gə́, boò dàà nwɔŋ də kúnú, bít ìì vúŋ bə̀ wúltígə́l bə̀ rú, nyɛ̀m ìì tàŋ bə̀ nɛɛ̀ná, boò vúg kíìn bìlú wərà. 40Pol kə̀ Silas tá, ìì vúg wúltígə́l bə̀ rú, taà ìì ɛ̀m Lidia yiilú. Bòórú dá ìì bé' Ɔ̀dkudvɛɛ̀l í'sɛ̀lbə̀ bəd gə́, ìì ùd bə̀ nwɔŋá, ìì pii bə̀ váàndoá, bít taà ìì ɛ̀m taá.
Nouveau Testament en Samba Leko © Alliance Biblique du Cameroun, 1998.