Gbantumsə̀ bəd Tùsá 15
15
Nɛ́b yíl bə̀ bəraa nɛ́b bagké bəd tə́ŋə́ rə, bə̀ wál Urusalima bìlú
1Nɛ́b kam vúgà Yahudiya yɛ́b ba, bə̀ ɛ̀mà Antakiya bìlú. Yaà bə̀ wə́ə́ gə́, bə̀ sɔ̀d ɔ̀dkudvɛɛ̀l bəd nwɔŋ aa sáànmbìá, bə̀ bàà: «Dáà bə̀ ná' ii gàb kìínmbə̀ Musa indaŋ̀mbə̀ bàà rə kíin síngə́, íí bán súùnmbə̀ gá.» 2Pol kə̀ Barnabas tá, bə̀ məə nwɔŋ boò bée, bít bə̀ zá' álsɛ̀l nə́ŋ̀ vé'ke kə̀ boò ra, nwɔŋ aa bòórú. Kàanyée gə́, nɛ́b bagké bəd zíg Pol kə̀ Barnabas tá, bít kə̀ nɛ́b ɔ̀d Antakiya bìlú bə̀ bəd tá, na' boò dáá Urusalima bìlú, Yéésù gbantumsə̀ bəd sunú, kə̀ dam bəd sunú, nwɔŋ aarə gáàmbìá. 3Kə̀ aakíin, Eklisiya Antakiya bìlú bə̀ pii bə̀ sɛ̀ɛ́n zəəm, ɛɛ̀mbə̀ kə̀ sɛ̀ɛ́n kpaŋ̀á. Bə̀ bàg kpaŋ̀ boò ra, taà bə̀ dàà Finisiya yɛ́bá, kə̀ Samariya yɛ́bá. Bə̀ ùd nɛ́b bagké bəd nɛɛ̀n aa nɛ́b aa bə̀ bàg Vɛnɛ́b síndə, ìì bíl nɛ́b bagké Yéésù bə̀ roó. Nwɔŋ puu aarə, pii nɛ́b bagké bəd kóólé tɛ́m làmkèì gbàákù. 4Zɔ̀ŋ aa ɛ̀m yaà bə̀ wə́ə́ Urusalima bìlə́ gə́, Eklisiya bərá, Yéésù gbantumsə̀ bərá, kə̀ dam bəd tá, ìì kè' bə̀ yàá. Pol kə̀ Barnabas tá, bít kə̀ nɛ́b kambəd tá, ìì ùd in bəraa Vɛnɛ́b mà' kə̀ boò roó.
5Nɛ́ɛ̀m yée gə́, nɛ́b kam bəraa Farisa bəd gə̀bú, bə̀ bíl nɛ́b bagké Yéésù bə̀ bəd də, bə̀ zá' lɛgú, bə̀ bàà: «Boò ná' nɛ́b kun bəraa bə̀ bàg síndə gàbá, bít boò bàà bə̀ kə̀ kpɛŋsɛ́lá, boò ləə Musa indaŋ̀mbə̀ bərá.»
6 Yéésù gbantumsə̀ bəd kə̀ dam bəd tá, bə̀ wál nwɔŋ aarə ɛgǹmbìá. 7Bə̀ nyá' nwɔŋ sɛŋ bùúrá, bòórú gə́, Piyɛr zá' lɛgú, bít bàà: «Ɔ̀dkudvɛɛ̀l í'sɛ̀lbə̀ bərá, íí gàb yàá nyàam kpɔ̀ɔ̀m, Vɛnɛ́b sààvúŋ máà aí tə́ŋú, máà bàà nɛ́b aa bàgə̀ síndə Nwɔŋ Puu Sɔ̀ɔ̀nkèá, bɔ̀b boò kìì kúnú, bít boò bàg Báátììkpɛ̀ŋá. 8Vɛnɛ́b gàb nɛ́b bəd tɛ́m yàá kóólé, bít ì' bə̀ gə́, bəǹ kè' nɛ́b kun bəraa bə̀ bàg bəǹ síndə yàá, kə̀ boò bə̀ Nwul Gìdń piìnmbìá, kìínmbə̀ obə́n kɔ̀ pii bə́nnà rə kíin. 9Vɛnɛ́b páá bɛŋə̀ tə́ŋtəŋ obə́n kə̀ boò sé. Nyɛ́' tɛ́m boò bəd də, kàandə, ìì bàg yàá. 10Nɛ́ɛ̀m bə́ŋyée gə́, kə̀ níìbə̀ də́' íí tə́ taà Vɛnɛ́b ɛgǹ kə̀ inpi'kè pa'ǹ də'ǹmbə̀ nɛ́b bəraa bə̀ bàgə̀ síndə yílə́ gú? Inpi'kè aarə, kóó doo bə́n bərá, kóó obə́n da, pà' bə́n báàn sé. 11Ə́ùwə́, nɛɛ̀n aa báan bagǹ dú, bít báan súùn kə̀ Báá bə́n Tììkpɛ̀ŋ Yéésù pə̀dkè rə kíin, boò kɔ̀ ìì dá bɔbm̀ súùn tə́ kàani.»
12Kàanyée gə́, nɛ́b aa wál lə kóólé, ìì kùm taà dìímsə̀ní, bít ìì zɛ̀ŋ taà Barnabas kə̀ Pol tá. Bàà bə̀ ì' taà inkɔrə bəd kə̀ in də́dǹ bə̀ tó'ǹ bəraa Vɛnɛ́b mà'à kə̀ nɛɛ̀n boò, nɛ́b kun bəraa bə̀ bàgə̀ síndə tə́ŋə́ kóólé roó. 13Zɔ̀ŋ aa gám bə̀ bɛ́' nwɔŋ gə́, Yakuba tò' gú', bàà: «Ɔ̀dkudvɛɛ̀l mə́ í'sɛ̀lbə̀ bərá, ìì zɛ̀ŋ mə́ bə́ŋ̀ gè! 14Simon bàà ì' bə́n nɛɛ̀n aa Vɛnɛ́b sɔ̀rà nɛ́b aa bə̀ bàgə̀ síndə ko'ǹ kudǹmbə̀ roó, bɔ̀b saàn vúŋ̀mbə̀ boò tə́ŋú, nɛ́b aa dá kuùm oò bə̀ roó. 15Bít Vɛnɛ́b gbantumsə̀ bəd kɔ̀, bə̀ saŋ̀ì kə̀ nwɔŋ aa roó; kàandə, bád bə̀ dàà tə́ Núúboòd Gìdńnú kə̀ aakíin' Báátììkpɛ̀ŋ Vɛnɛ́b bàà:
16‹Bòórú gə́, máà kíìn bídǹ yaanàá, bít yaà
má Dauda kun báá wàà ligə̀ aa láá rə wə'nàá. Má wɔbké oòrə
kíìn zá'nàá, bít wə' máù dí'ǹ lɛgú.
17Kàanyée gə́, nɛ́b kam bəraa nyɛ́d də kóólé, bə̀ dá taà Báátììkpɛ̀ŋ
saanàá. Èè, nɛ́b aa bàg Vɛnɛ́b sé, mə́ dɛ̀d bà kə̀ nə́gə́l mə́, yaà boò kùm
nɛ́b mə́ bəd doó.
18Aa yée nwɔŋ aa Báátììkpɛ̀ŋ bàà roó, mə́ mà' nɛ́b bəd bə̀
gàb in bəraa nyàamdoorú kpɔ̀ɔ̀m.›
19«Yakuba bàà zəg' Kə̀ taàbìá, máá gə́, mə́ sèl boò mà' nɛ́b aa bə̀ bàg Vɛnɛ́b sé, lìb ìì bí'à núù, ìì tə́ Vɛnɛ́b bagǹ də in gbò'kè bəd sí. 20Zá bád báà piìnmbə̀ núúboòrá, báà baànmbə̀ boò fù' gɔ̀g bəraa bə̀ mà'à kə̀ vɔɔm bəd láŋsə́ rə sí. Boò gú' yíl boò kə̀ labsə̀ ma'ǹmbìá, boò fù' ingalə̀ bəraa nìb ìì lòd kàaní rə gɔ̀g sí, sínkɔ̀ boò líí gɔ̀g nyɛ̀lə́m sí. 21Kə̀ aakíin də, sɔ̀d nyàamdoorú kpɔ̀ɔ̀m, kóó bìl déèrú kóólé, nɛ́b bəd tə́ Musa indaŋ̀mbə̀ nwɔŋ baanàá, bít bə̀ tə́ù kíìn gádǹ Yahudu bəd wúlwáàlbə̀ bərú, nyàm nyi'ǹmbə̀ ba, sɛŋ gə́ kóólé.»
Núúboòraa bád ìì pii nɛ́b kun bəraa ìì bàg Vɛnɛ́b sé, yaà ìì bíl nɛ́b bagké bəd doó
22Kàanyée gə́, Yéésù gbantumsə̀ bərá, dam bərá, kə̀ Eklisiya bəd kə̀ zɔ̀ŋtá, gám ìì və̀d nwɔŋ, saàn vúŋ̀mbə̀ nɛ́b bəd zɔ̀gɔ̀ boò tə́ŋú, bít tuùm aànmbə̀ boò bə̀ Antakiya bìlú, kə̀ Pol tá, bít kə̀ Barnabas tá. Sàà ìì vúŋ Yuda aa bə̀ dɛ̀rə̀ Barsabas doó, kə̀ Silas tá; boò iirə kóólé, bə̀ nɛ́b yíl bə̀ bərá, ɔ̀dkudvɛɛ̀l bəd tə́ŋú. 23Bə̀ tùm bə̀ kə̀ núúboòraa yée naú:
«Bə́ kə̀ ɔ̀dkudvɛɛ̀l Yéésù gbantumsə̀ bəd tá, bít kə̀ dam bəd tá,
tùm bə́ tə́ ɔ̀dkudvɛɛ̀l bəraa ìì bàg Vɛnɛ́b sé,
ìì kùm Antakiya bìlú, Siriya yɛ́b ba, bít kə̀ Silikiya yɛ́b bərə, dɔ̀msɛ̀l bə́
piinàá.
24«Bə́ kìì gə́, nɛ́b bəd vúg zɔ̀ŋə obə́ kàrú, ɛ̀m dá bə̀ vɔ̀gə̀l ii gə́, bít bə̀ nyágə́l ii tɛ́m tə́ kə̀ nwɔŋ boò bərá. Bə́ pii bə̀ kpaŋ̀ nə́ŋ̀má nwɔŋ aarə bə̀ sé. 25Kə̀ taàbìá, wál bə́ və̀d taà nwɔŋ gú' nə́ŋ̀ní, saàn vúŋ̀mbə̀ nɛ́b yíl bə̀ bərá, bídǹ tuùmbə̀ boò bə̀ aí sunú. Àà bə̀ dá ɔ̀dzéd í'sɛ̀lbə̀ bəd zígàá. Ɔ̀dzéd í'sɛ̀lbə̀ bəd də, Barnabas kə̀ Pol la. 26Nyɛ́d zɔ̀gɔ̀ní, ìì bɔ̀' gɔ̀ŋsə́ boòì Báá bə́n Tììkpɛ̀ŋ Yéésù Krístù nə́gə́lú. 27Kàandə, bə́ tùm ii taà Yuda ra, kə̀ Silas da, bə̀ dá ii ráàn nwɔŋ luùm aarə ní baàn kə̀ yíl boò bìá, nwɔŋ aa bə́ bári zɔ̀ŋə dú roó. 28Kə̀ aakíin də, Nwul Gìdń kə̀ obə́ tə́ máá, gám bə́ və̀d gə́, pà' bə́ dəə ii inpi'kè nə́ŋ̀ ɔ̀d kàn in yíl bə̀ bəraa yée sɔ̀ŋ gá. 29Ìì fù' gɔ̀g bəraa bə̀ mà' kə̀ vɔɔm bəd láŋsə́ rə sí. Ìì líí gɔ̀g nyɛ̀lə́m sí. Ìì fù' ingalə̀ bəraa nìb ìì lòd bə̀ kàaní rə gɔ̀g sí. Ìì mà' labsə̀ sí. Nyɛ́g íí dàà in bəraaì gə́, ìì mà' insɔ̀ɔ̀nkèá. Ìì kùm sɔ̀ɔ̀ní!»
30Nɛ́b bagké bəraa Urusalima bìlə́ rə, àà bə̀ zíg bə̀ gə́, bít ìì ɛ̀m taà Antakiya bìlú. Ɛ̀m dá bə̀ wə́ə́ wərə̀ gə́, bə̀ wál nɛ́b bagké bəd kə̀ gə̀b boò tə́ kóólé, bít bə̀ pii bə̀ taà núúboòd doó. 31Bə̀ mà' taà gádke oò roó, bə̀ kìì nwɔŋ wàà oòrə gə́, bít boò kóólé bə̀ kìì tɛ́m làmkèì kə̀ nɛɛ̀n aa nwɔŋ də pii bə̀ váàndo rú roó. 32Yuda kə̀ Silas tá, kə̀ yíl boò máá, ìì kùmsə̀n nɛ́b aa bə̀ tə́ Vɛnɛ́b nwɔŋ baàn doó, ìì ùd nɛ́b bagké Yéésù bə̀ bəraa wərə̀ rə, Vɛnɛ́b nwɔŋ sɛŋ bùùd kíìn nyág, bə̀ gáŋ bə̀ tɛ́má; bít bə̀ páá nɛ́b bagké bəd kpɛŋsɛ́lá. 33Ləə bə̀ pà' sɛŋ kíìn zɔ̀ŋ də bə zɔ̀gɔ̀. Bít nɛ́b bagké bəd àà ìì zíg bə̀ boò ɛ̀m sɔ̀ɔ̀ní, kə̀ Vɛnɛ́b tɛbàá. Bít ìì dàà bə̀ kid ìì bíd kíìn nɛ́b aa tùm bà rə sunú. [ 34Zá Silas gə́, bàà bəǹ dáà kuùmmà wərə̀ ní.] 35Kàanyée gə́, Pol kə̀ Barnabas tá, boò kɔ̀ bə̀ kùmà Antakiya bìlú wərə̀ ní. Boò ra kə̀ nɛ́b kambəd tá, ìì sán nɛ́b bəd iná, bít ìì bàà nɛ́b bəd Nwɔŋ Puu Sɔ̀ɔ̀nkè Báátììkpɛ̀ŋ yílú.
Pol kə̀ Barnabas tá, ìì tə́ kíìn pɛràá
36Bòórú sɛŋ ká' zɔ̀gɔ̀ gə́, Pol bàà Barnabas: «Kidbíd dáá báà ɛgǹnà ɔ̀dkudvɛɛ̀l bə́n bəraa bə̀ kùm bìl bəraa bə́n baànnà Báátììkpɛ̀ŋ nwɔŋ dú rə kóólé. Ɛ̀m dá báà bé'ǹnà nɛɛ̀n aa ìì bàg Vɛnɛ́b dú roó.»
37Barnabas í' Yohana aa bə̀ dɛ̀rə̀ Markus də pa'ǹ ɛɛ̀mbə̀ kə̀ naú. 38Zá Pol sèl gə́, bənə́ pa'nə́ù naà sí. Zá' dàà bənáà Pamfiliya yɛ́b ba, bít láŋ mà' bənáà tù' bə sé. 39Ìì mà' álsɛ̀l vaksə́ boò dun bə gə́, bít ìì pɛd kúnú. Barnabas pà' Markus da, bít ìì pìì kə̀ə̀rú, ìì ɛ̀m yɛ́b aa wəl tə́ŋú, bə̀ dɛ̀d Kiprus də ba. 40Zá Pol kɔ̀ sàà pà' Silas da. Ɔ̀dkudvɛɛ̀l í'sɛ̀lbə̀ bəd pà' pɔ̀bsə́, bə̀ pii bə̀ Báátììkpɛ̀ŋ pə̀dkè gə́, zá' bə̀ ɛ̀m kúnú. 41Taà bə̀ dàà Siriya yɛ́bá, kə̀ Silikiya yɛ́bá, ìì kpɛ́ŋ Eklisiya bəd tɛ́má.
Nouveau Testament en Samba Leko © Alliance Biblique du Cameroun, 1998.