Lomu 6

Lagaemo Kalaisiʼeʼmo magokepi faliteta he tiʼnona kavafeʼmo huʼniya gemae

1 # Lo 3:5-8 Inagi lagaemo hemenimo na agufa gemo hugune. Gotiʼa magoʼe huno fikumo laha maeno lamisiyafeʼmo hosu kavaʼmo magoʼe huta huge huge huta maigune, huta hisupiye. 2#1 Pi 4:1Haʼao, alagi atalegeno hano hino. Lagaemo hosu kavatilefeʼmo ago faliʼnonaʼmofeʼmo haiya kava huta magoʼe huta hosu kavapiʼmo maigune. 3#Ga 3:27Kalaisi Yesupiʼmo muki vayaʼamo ago alino aniʼmo faleno lateʼniya vayaʼmogitamo agaeʼeʼmo faliʼnone, hutapa oʼafiʼnafiye. 4#Kl 2:12Muki yaʼmo Afoʼamoʼmo ha le konali yaʼaletiʼmo Kalaisiʼa faliʼniyatetiʼmo ago alino he tino ateʼniya kava huta he tita saufa kavaʼmo huta maisunafeʼmo Gotiʼa Kalaisipiʼmo aniʼmo faleno lateʼnigeta agaeʼeʼmo magokepi faliʼnonagenoʼaeʼmo agaeʼeʼmo magokepi kino lateʼniye. 5#Fl 3:10-11Na kava higetaene. Lagaemo Kalaisipiʼmo aniʼmo faleno lateʼnigeta faliʼniya kava huta agaeʼeʼmo faliʼnisunana alino he tino ateʼniya kava huno alino he tino lategaiyaʼmofeʼmae. 6#Ga 5:24Ago afiʼnonana lagufafi hosu kavatimo lokiyaʼamo hano hisigeno hosu kavaʼmoʼa yagaino lateʼnisigeta aliʼyaʼamo magoʼe huta oʼalisunafeʼmo Gotiʼa atafa vekatimo Kalaisiʼeʼmo malipu yosaleʼmo nili aiʼnigeno faliʼniye. 7#1 Pi 4:1Faliʼnaya vayaʼmo hosu kavatefeʼmo faliʼnayaʼmofeʼmae. 8Kalaisiʼeʼmo faliʼnisunana agaeʼeʼmo afaʼa maigune, huta lagesamo afita fatago nehune. 9Ago afiʼnonana Gotiʼa Kalaisiʼmo faliʼniyatetiʼmo ago alino he tino ateʼnigeno afaʼa maiʼniyanageno halate afaʼa ofaligiye. Fali kavaʼmoʼa magoʼe huno yagaino oʼategaiye. 10#Hi 9:26-28; 1 Pi 3:18Na kava higenoʼaene. Faliʼniya afinaʼmo hosu kavatilefeʼmo muki afinatefeʼmo magoke afinaʼmo ago faliʼniyaʼmofeʼmae. Hemenimo afaʼa maiʼnenoʼaeʼmo Gotitefeʼmo afaʼa maiʼniye. 11#2 Ko 5:15; Ga 2:19; 1 Pi 2:24Lapakaemo hutapaeʼmo, hosu kavatefeʼmo faliʼnonaʼmonanafa Ala kava netimo Kalaisi Yesupiʼmo maiʼnetaeʼmo Gotitefeʼmo afaʼa maiʼnone, hutapa lapakesamo afiyo.

12 # Aep 4:7 Lapakaemo ani kava hutapa neʼmaiyaʼmofeʼmo hosu kavaʼmo afaʼa ateʼnigenoʼa nefaliya lapakufaleʼmo yagaino olapateno. Fikumo yanagetapa lapakufamoʼmo hauʼniya kavaʼmo hugae. 13#Lo 12:1; Ef 2:5; 5:14Lapakaemo lapakufafi alu ya alu yatapimoʼa hosu kavaʼmo hisayafeʼmo hosu kavaʼmo ayapiʼmo lapakufafi haneʼniya alu ya alu yatapimo oʼamiyo. Lapakaemo faliʼnayatetiʼmo ago he titapa afaʼa maiʼnayaʼmofeʼmo lapakufafi haneʼniya alu ya alu yatapiletiʼmo alagepa kavaʼmo hisayafeʼmo lapakufaʼaʼe muki lapakufafiʼmo haneʼniya yatapiʼeʼmo Gotikeʼmo amiyo. 14#1 Yo 3:6Na kava hinagetapaene. Lapakaemo keʼaepa gemo aiyafiʼmo oʼmaiʼnafa Gotiʼa fikumo lapa maeno nelapamiya kavaʼmo aiyafiʼmo neʼmaiyaʼmofeʼmo hosu kavaʼmoʼa yagaino olapategaiye.

Alagepa kavaʼmo aliʼyaʼamo neʼalune, huno huʼniya gemae

15 # Lo 6:1 Inagi lagaemo na agufa kavaʼmo hugune. Keʼaepa gemo afeʼalumelaga oʼmaita Gotiʼa fikumo laha maeno nelamiya kavaʼmo afeʼalumelagamo neʼmaunaʼmofeʼmo hosu kavaʼmo hisupiye. Haʼao, alagi atalegeno hano hino. 16#Yo 8:34; 2 Pi 2:19Lapakaemo ago afiʼnayana mago vekaeʼmo hutapaeʼmo, aliʼyakamo aligune, hutapa huʼnisayana ani vekamo kalavusi aliʼyaʼamo neʼaliya vayaʼmo maiʼnae, hutapa afiʼnae. Lapakaemo hosu kavaʼmo kalavusi aliʼyaʼamo neʼaliya vayaʼmo maiʼnisayana faligae. Goti kalavusifiʼmo geʼamo akame hutapa kalavusi aliʼyaʼamo neʼaliya vayaʼmo maiʼnisayana lapaipafatiʼmo fatago kavaʼmo afole aigiye. 17Hogoteno hosu kavaʼmoʼa yagaino lapateʼnigetapa kalavusi aliʼyaʼamo neʼaliya vayaʼmo maiʼnayaʼmonanafa Gotiʼa lapavalelino eno geʼamo aiyafiʼmo lapateʼnigetapa lapaipafatiʼmo geʼamo akame nehayaʼmofeʼmo Gotifeʼmo hao ke hegetao. 18#Yo 8:32Gotiʼa hosu kavategatiʼmo ago hatu maeno lapateʼnigetapa alagepa kavaʼamo aliʼyaʼamo neʼaliya vayaʼmo hamaleʼnae. 19Alagepa hutapa oʼafisaya agufa vayaʼmo maiʼnayaʼmofeʼmo ma mopafi kavafeʼmo aeʼna kalafefa gemo nehuve. Lapakaemo hogotetapa lapakufafi haneʼniya alu ya alu yaʼatapimo hosu kavaʼmo ayapiʼmo maletetapa kalavusi aliʼyaʼamo neʼaliya vayaʼmo maiʼnetapaeʼmo hosu kavaʼmo huge Goti geʼamo amagitapa atalege hutapa maiʼnaya kava hutapa hemenimo lapakufafi haneʼniya alu ya alu yaʼatapimo alita Goti ayapiʼmo maletetapa fatago kavaʼmo hutapa kalavusi aliʼyaʼamo neʼaliya vayaʼmo maigenoʼao lapaote kavatapimo afole aino.

20Lapakaemo hosu kavaʼmo kalavusi aliʼyaʼamo neʼaliya vayaʼmo maiʼnetapaeʼmo alagepa kavatefeʼmo afa vayaʼmo maiʼnae. 21#Lo 7:5; 8:6,13Lapakaemo hogotetapa huʼnaya kavafeʼmo hemenimo lapavagage nehiya kavatetiʼmo akamelegaʼamo alagepa yaʼmo aliʼnafiye. Haʼao, ani agufa hosu kavatetiʼmo atupa afinaʼmo falisaya kavakeʼmo aligae. 22Aligayaʼmonanafa Gotiʼa hosu kavapatiʼmo ago hatu maeno lapateʼnigetapa Goti kalavusi aliʼyaʼamo neʼaliya vayaʼmo hamaleʼnayaʼmofeʼmo hemenimo lapaipafatiʼmo alagepa alagamo neʼaegetapaeʼmo lapaote vayaʼmo hamaleme hamaleme neʼvayanagetapa atupa afinaʼmo alagepa hutapa maige maige huta maigae. 23#Lo 5:12,15Na kavaʼmo nehagenoʼaene. Hosu kavaʼmo aliʼyaʼamo neʼaliya vayaʼai miyaʼapimo falisaya kavaʼmo haneʼniyaʼmonanafa Gotiʼa fikumo hapa maeno neʼapamiya kavaʼmo alagepa huʼa maige maige huʼa maisaya kavaʼmo haneʼniye. Agaemo Ala kava netimo Yesu Kalaisipiʼmo neʼmaiya vayaʼmo neʼapamiye.

Currently Selected:

Lomu 6: kyg2013

Highlight

Copy