Lomu 7

Vele neʼmaiya kavafeʼmo aeno kalafefa gemo huʼniya gemae

1Konagaʼnimogitapae, huʼna, lapakaemo keʼaepa gemo ago afiʼnayaʼmofeʼmo hisuva gemo afaʼa afigae. Lapakaemo ago afiʼnayana keʼaepa gemoʼmo ofaliʼa afaʼa neʼmaiya afinaʼmo muki vayaʼaiteʼmo yagaino neʼapate. 2Ani kavatefeʼmo keʼaepa gemoʼa hunoʼaeʼmo, a kanomoʼa anauʼamoʼmo ofalino afaʼa maiʼniya afinaʼmo a kanoeʼmo hunoʼaeʼmo, anaukamoʼeʼmo magokepi alagepa hutana lokaetana maiʼao, huno nehiye. Nehiyaʼmonanafa anauʼamoʼmo falisigenoʼaeʼmo anauʼamoʼeʼmo magokepi lokaeno neʼmaiya keʼaepa gemo afeʼalumelagamo oʼmaigifa afaʼa maigiye. 3Maigiyaʼmofeʼmo mago a kanomoʼa anauʼamoʼmo afaʼa maiʼnisigenoʼaeʼmo ataleno uno alu veleʼmo maisiyana kumai ane, huʼa hugae. Hugayaʼmonanafa anauʼamoʼmo falitesigenoʼaeʼmo uno alu veleʼmo maisiyana anauʼamoʼeʼmo magokepi lokaeno neʼmaiya keʼaepa gemoʼa magoʼe huno yagaino oʼategaiyaʼmofeʼmo kumai ane, huʼa afa osugae. 4#Lo 6:2,11; Ga 2:19Konagaʼnimogitapae, huʼna, mani gemo lapakaefekeʼmo nehuve. Lapakaemo alu vekaleʼmo maisayafeʼmo Kalaisi agufaʼaletiʼmo keʼaepa geʼalefeʼmo ago faliʼnae. Kanolufatiʼmo ago alino he tino ateʼniya vekaleʼmo maiʼnetapa Gotitegamo alagamo aegekana hutapa alagepa kavaʼmo hisayafeʼmae. 5#Lo 6:21Atafa laipamoʼmo yagaino lateʼniya afinaʼmo keʼaepa gemoʼa hosu lahaʼye nehiya kavaʼmo alino afole aino ateʼnigeno lagufafiʼmo aliʼyaʼmo aliʼnigeta hosu alagamo aegekana huta maiʼnetaeʼmo falisuna agufa kavaʼmo huʼnone. 6#Lo 8:2; 6:4Huʼnonaʼmonanafa hemenimo keʼaepa gemoʼa nofi aeno lateʼniya gelefeʼmo faliʼnonagenoʼaeʼmo Gotiʼa ago hatu maeno lateʼniye. Hemenimo Goti geʼamo akame nehutaeʼmo magoʼe huta atafa gemo avoʼmo kae maleʼniya keʼaepa gemoʼa ma kavaʼmo hiyo ina kavaʼmo osiyo huno huʼniya kateʼmo noʼunaʼmonanafa saufa kaʼmo Goti Aunemeʼamoʼmo valino nelateya katekeʼmo neʼune.

Keʼaepa geʼe hosu kavaʼefeʼmo huʼniya gemae

7 # Hat 20:17; Loa 5:21 Ani kavaʼmo nehiyaʼmofeʼmo keʼaepa geʼaeʼmo hosu gemo haneʼniye, huta hisupiye. Haʼao, alagi atalegeno hano hino. Goti keʼaepa geʼamoʼa hosu kavaʼnimo alino nave oliʼniyesinana oʼageʼnovesine. Keʼaepa gemoʼa, lahapaʼye osino, huno osuʼniyesinana naipafiʼmo nahaʼye nehiya kavaʼnimo oʼageʼnovesine. 8#Lo 4:15Naipafi hosu kavaʼnimoʼa alu hosu kava alu hosu kavafeʼmo nahaʼye nehiya kavaʼnimo alino he tino atesiya kaʼmo ago ageʼniye. Agetenoʼaeʼmo keʼaepa geletiʼmo hosu nahaʼye nehiya kavaʼnimo alino afole aino ateʼniye. Keʼaepa gemo afole oʼaiʼnigenoʼaeʼmo hosu kavaʼnimoʼa faligekana huno haneʼniye. 9#Ye 1:15Keʼaepa gemo afole oʼaiʼnigeʼnaeʼmo, afaʼa alagepa huʼna maiʼnove, huʼna nagesamo afiʼnovaʼmonanafa keʼaepa gemo naipafiʼmo afole aiʼnigenoʼaeʼmo hosu kavaʼnimo naipafatiʼmo he tiʼnigeʼna faliʼnove. 10#Mon 18:5; Lo 10:5Gotiʼa ofaliʼa afaʼa maisayafeʼmo keʼaepa gemo hu maleʼniyaʼmonanafa keʼaepa gemoʼa namagiʼnigeʼna faliʼnove. 11#Aep 3:13; Hi 3:13Hosu kavaʼmoʼa kaʼmo agetenoʼaeʼmo keʼaepa geletiʼmo humi nateteno namagiʼnigeʼna faliʼnove. 12#1 Ti 1:8Inagi muki keʼaepa gemo aote gemo haneʼnigeno magoke magoke keʼaepa gemoʼa ma kavaʼmo hiyo ina kavaʼmo osiyo, huno huʼniya gemoʼa aote gemo hanege fatago gemo hanege alagepa gemo hanege huʼniye.

Polo aipafiʼmo kame nehiya kavafeʼmo huʼniya gemae

13 # Lo 5:20 Alagepa gemoʼa nagaeteʼmo fali kavaʼmo alino afole aino ateʼnifiye. Haʼao, alagi atalegeno hano hino. Hosu kavaʼmoʼa hosu kavaʼnimo afole aisigeʼna ageʼna aeto hisuvafeʼmo alagepa geʼaletiʼmo naipafiʼmo fali kavaʼnimo alino he tino ateʼniye. Gotiʼa keʼaepa geʼaletiʼmo, hosu kavafeʼmo alagi hosu faipa kavaʼmo haneʼniye, huno alino nave lisiyafeʼmo ani kavaʼmo huʼniye. 14#Sam 51:5; Yo 3:6Ago afiʼnonana Goti Aunemeʼamo haiya agufa aipaʼe vekamo maiʼnifi huno ani kavaʼmo huno Goti keʼaepa geʼamo haneʼniye. Haneʼniyaʼmonanafa nagaemo atafa naipaʼe vekamo maiʼnove. Na kava higeʼnaene. Naipafiʼmo haneʼniya hosu kavaʼnimoʼmo kalavusi huno nateʼnigeʼna aliʼyaʼamo aliʼna maiʼnove. 15Nehuva kavafeʼmo oʼnahauʼniye. Nahauʼniya kavaʼmo nosufa alagi naini huʼnova kavaʼmo nehuve. 16Hosu kavaʼmo nehuʼnaeʼmo oʼnahauʼniyaʼmofeʼmo keʼaepa gemoʼe naipamoʼeʼmo magoke agufa gemo nehaʼae. 17Ani kavaʼmo nehuvaʼmofeʼmo nagaiʼnimo nosufa naipafiʼmo haneʼniya hosu kavaʼmoʼa nehiye. 18#Aep 6:5; 8:21Ago ageʼnovana mago alagepa yaʼmo naipafiʼmo ohaneʼniye. Atafa naipafifeʼmo nehuve. Muki afinaʼmo alagepa kavaʼmo hisuvafeʼmo nahauʼniyaʼmonanafa alagepa kavaʼmo hisuva kaʼmo ageʼnove. 19Alagepa kavaʼmo huguve, huʼna nehuvanafa nosuve. Hosu kavaʼmo osuguve, huʼna nehuvanafa afaʼageʼmo nehuve. 20Osuguve, huʼna nehisuvana nagaiʼnimo nosuvaʼmonanafa naipafiʼmo haneʼniya hosu kavaʼmoʼa nehiye. 21Nagaemo alagepa kavaʼmo huguve, huʼna nehugenoʼaeʼmo hosu kavaʼmoʼa nagaeʼeʼmo magokepi lokaeno maiʼneno naipafiʼmo lokiya aliʼyaʼmo neʼaligeʼna ageʼnove. 22Nagaemo saufa naipafatiʼmo Goti keʼaepa geʼaeʼmo nahauʼnigeʼna namogaga neʼauvaʼmonanafa 23#Ga 5:17; Ye 4:1; 1 Pi 2:11aeto agufa lokiya yaʼmoʼa nagufafiʼmo aliʼyaʼmo neʼaliye. Ani lokiya yaʼmo saufa naipafiʼmo haneʼniya lokiya yateʼmo kame huno neʼate. Kame huno ateteno kalavusi huno neʼnategenoʼaeʼmo hosu kavaʼmo lokiyaʼamoʼmo nagufafi alu ya alu yaʼnileʼmo lokiya vaino yagaino neʼnate. 24Vaehae, huʼna, lusi kana yaʼmo aliteʼna hosu kavaʼmo huʼna maiʼnove. Hosu kavaʼnimoʼmo nagufaleʼmo yagaino nateʼneno falisuvategamo navalelino visiyafeʼmo nehiyanageno ina laʼmo nagufaʼnimo alino katino nategaiye. 25#1 Ko 15:57Gotiʼa Ala kava netimo Yesu Kalaisitetiʼmo nagufaʼnimo afaʼa alino katino nategaiye. Agaefekeʼmo hao ke nehove. Ani kavaʼmo huʼna maiʼneʼnaeʼmo saufa naipafatiʼmo Goti keʼaepa geʼamo akame nehuvaʼmonanafa atafa naipafatiʼmo hosu kavaʼnimo lokiyaʼamo akame nehuve.

Currently Selected:

Lomu 7: kyg2013

Highlight

Copy