Lomu 5

Gotiʼa hunoʼaeʼmo, naulagaleʼmo fatago vayaʼmo maiʼnae, huno laha paiʼnigeta alagepa huta maiʼnona gemae

1 # Lo 3:24,28; 4:24 Lagesamo afita fatago huʼnonagenoʼaeʼmo Gotiʼa, naulagaleʼmo fatago vayaʼmo maiʼnae, huno laha paiʼnigeta afitetaeʼmo, aipamo falu huno nelate, huta huteta maiʼnonagenoʼaeʼmo Ala kava netimo Yesu Kalaisitetiʼmo laipamoʼmo falu nehiye. 2#Ef 2:18; 3:12Agaetetiʼmo lagesamo afita fatago huʼnona kavatetiʼmo eta haiteta Gotiʼa fikumo laha maeno nelamiya kavaʼafiʼmo maiʼnetaeʼmo, Goti ha le konali hetamatimo aligune, huteta lavayagunagu huta agava neʼmaune. 3#Ye 1:2-3; 1 Pi 1:5-7Afole aisiya kavafekeʼmo lamogaga noʼaunaʼmonanafa hanageke yaʼeʼmo aliʼnetaeʼmo lamogaga neʼaune. Ani hanageke yatetiʼmo laha maesiyafeʼmo oʼataleta atafauta alagi huta maiʼnisunagenoʼaeʼmo lokiya vaino lategaiye, huta ago afiʼnonaʼmofeʼmo lamogaga neʼaune. 4Oʼataleta atafauta alagi huta maisunagenoʼaeʼmo amuse huno latesigeta lavayagunagu huta agava maigune. 5#Sam 22:5; 25:20; Hi 6:18-19Gotiʼa aote Aunemeʼamo lamiʼnigeno Aunemeʼamoʼmo Gotiʼa lagaefeʼmo hau ayamopafiʼmo hauʼniya kavaʼamo laipafiʼmo ago alino laki maleʼniye. Lakiʼnigeta ageʼnonaʼmofeʼmo lavayagunagu huta agava neʼmauna kavatefeʼmo laipamoʼmo kana hisigeno hosu laipamo okaligiye.

6Hauʼniya kavatefeʼmo lokiyatimo ohaneʼnigeta Gotifeʼmo mono osuta hosu kavaʼmo nehuna vayaʼmogitalefeʼmo Gotiʼa lekana pai maleʼniya afinaʼmo Kalaisiʼmo ago falino lateʼniye. 7Mago vayaʼmogimo keʼaepa gemo akame nehaya vayaʼmo hapa maesayafeʼmo faliʼa oʼapategayaʼmonanafa magoke magoke vayaʼmogimo alagepa huʼa hapa neʼmaya vayaʼmo hapa maesayafeʼmo koli osuʼa faliʼa apategae. 8#Yo 3:16; 1 Yo 4:10Faliʼa apategayaʼmonanafa hosu kavaʼmo nehuna vayaʼmo maiʼnonagenoʼaeʼmo Kalaisiʼa falino lateʼniya kavatetiʼmo Gotiʼa lagaefeʼmo hau ayamopafiʼmo hauʼniya kavaʼamo ago alino lave neliye. 9#Lo 1:18; 2:5,8Gotiʼa kolaʼamo aino lakino lateʼniya kavatetikeʼmo, naulagaleʼmo fatago vayaʼmo maiʼnae, huno laha paiʼniyaʼmofeʼmo Gotiʼa aipamo leno nelateya kayoʼmo lamisiya kavategatiʼmo magoʼe huno laha maeno lagufamo alino katino lategaiye. 10#Lo 8:7-8Goti kameʼamo maiʼnonagenoʼaeʼmo mafaʼneʼamo faliʼniya kavatetiʼmo alino ao yaʼmo hu maleʼniyaʼmofeʼmo ao vayaʼmo maiʼnonagenoʼaeʼmo mafaʼneʼamo he tino afaʼa maiʼniya himamuʼaletiʼmo magoʼe huno lagufamo alino katino lategaiye. 11Mani alagepa kavaʼageʼmo lagaetegamo afole oʼaigifa hemeniʼeʼmo Ala kava netimo Yesu Kalaisitetiʼmo Gotifeʼmo amuse huta ateteta lamogaga neʼaune. Gotiʼa agaetetiʼmo ago alino ao yaʼmo hu maleʼniyaʼmofeʼmae.

Atamuʼe Kalaisiʼefeʼmo huʼniya gemae

12 # Aep 2:17; 3:6,19; Lo 6:23 Inagi hosu kavaʼmo magoke vekafatiʼmo muki ma mopafi vayapiʼmo afole aiʼnigeno ani hosu kavaʼaletiʼmo nefaliya kavaʼmo afole aiʼniye. Nefaliya kavaʼmo ani katetikeʼmo afole aiteno muki vayaʼaitegamo aino atagu faeno uneno huʼniye. Muki vayaʼmo magoke vekamoʼmo hosu kavaʼmo huʼniya afinaʼmo Atamupiʼmo maiʼneʼapaeʼmo hosu kavaʼmo huʼnae. 13#Lo 4:15Vayaʼmogi hosu kavaʼmo hume hume neʼagenoʼaeʼmo Moseseʼa keʼaepa gemo alino apamiʼniye. Ani hogote afinaʼmo keʼaepa gemo haneʼniyaʼmofeʼmo Gotiʼa vaiʼmo apamiʼniye. 14#1 Ko 15:21-22; 15:45Nefaliya kavaʼmo Atamuʼa maiʼniya afinatetiʼmo muki vayaʼaiteʼmo yagaino apateme apateme neʼegenoʼaeʼmo Moseseʼa afole aiʼniye. Gotiʼa keʼaepa geʼamo Atamufeʼmo hunoʼaeʼmo, ina kavaʼmo osuvo, huno ha paiʼniya gemo ago amagino ataleʼniya kava huʼa ani agufa keʼaepa geʼamo amagiʼa oʼataleʼnayaʼmonanafa faliʼnae. Atamuʼmo afole aigiye, huʼa ava gemo huʼa avoʼmo kae maleʼnaya vekagana huno auneʼamo maiʼniye. 15Maiʼniyaʼmonanafa Gotiʼa magoke vekaletiʼmo fikumo hapa maeno neʼapamiya kavaʼe mago alu vekamoʼmo huʼniya hosu kavaʼamoʼeʼmo alu kava alu kavaʼmo haneʼniye. Magoke vekamo hosu kavaʼaletiʼmo muki asole vayaʼmo faliʼnayaʼmonanafa Gotiʼa magoke vekamo Yesu Kalaisitetiʼmo asole vayaʼmo fikumo hapa maeno neʼapamiya kavaʼamoʼmo magoʼe huno ago aeno agaseʼniye. 16Gotiʼa fikumo hapa maeno neʼapamiya kavatetiʼmo alino afole aino neʼateya kavaʼe magoke vekamoʼmo huʼniya kavatetiʼmo alino afole aino neʼateya kavaʼeʼmo alu kava alu kavaʼmo haneʼniye. Magoke hosu kavaʼmo akamelegaʼamo Gotiʼa hunoʼaeʼmo, hosu vayaʼmo maiʼnae, huno huteno agoti huno apateʼniyaʼmonanafa vayaʼmogi asole hosu kavaʼapimo akamelegaʼamo Gotiʼa fikumo hapa maeno apamitenoʼaeʼmo, naulagaleʼmo fatago vayaʼmo maiʼnae, huno nehiye. 17Magoke vekamo hosu kavaʼaletiʼmo nefaliya kavaʼmo afole aiteno kini vekagana huno yagaino neʼapateya kava huʼa Gotiʼa magoʼe huno fatago kavaʼamo fikumo hapa maeno apamiʼnisiya vayaʼmogimo magoke vekamo Yesu Kalaisitetiʼmo alagepa huʼa maige maige huʼa maiʼneʼa kini vayakana huʼa yagaigae. 18#1 Ko 15:22Gotiʼa magoke vekamoʼmo huʼniya hosu kavatetiʼmo muki vayaʼaifeʼmo hunoʼaeʼmo, hosu vayaʼmo maiʼnayanagetapa alagi faligae, huno huʼniya kava huno Gotiʼa magoke vekamoʼmo huʼniya fatago kavatetiʼmo muki vayaʼmo fikumo hapa maeno apamitenoʼaeʼmo, naulagaleʼmo fatago vayaʼmo maiʼnayanagetapa alagepa hutapa maige maige hutapa maigae, huno hapa paiʼniye. 19#Aiy 53:11Magoke vekamoʼmo Goti geʼamo amagino ataleʼniya kavatetiʼmo Gotiʼa asole vayaʼaifeʼmo hunoʼaeʼmo, hosu vayaʼmo maiʼnae, huno huʼniya kava huno magoke vekamoʼmo geʼamo akame huʼniya kavatetiʼmo asole vayaʼaifeʼmo hunoʼaeʼmo, naulagaleʼmo fatago vayaʼmo maiʼnae, huno hugiye. 20#Lo 4:15; Ga 3:19Magoʼe gemo haneʼniyana Gotiʼa hosu kavaʼmo magoʼe huno afole aisiyafeʼmo keʼaepa geʼamoʼa hosu kavaʼmo haopaleʼmo alino afole aino ateʼniye. Hosu kavaʼmo magoʼe huno afole aiʼniyaʼmonanafa Gotiʼa hosu kavaʼmo ago afole aitegenoʼaeʼmo fikumo hapa maeno apamiʼniya kavaʼamoʼmo magoʼe huno aeno agaseno havai teteno aino vali lamino asagauno aiʼniye. 21#Lo 6:23Hosu kavaʼmoʼa nefaliya kavaʼmo alino afole aino ateteno ani kavatetiʼmo yagaino neʼapateya kava huno fikumo hapa maeno neʼapamiya kavaʼmoʼa fatago kavaʼaletiʼmo yagaino neʼapatesigeʼa Ala kava netimo Yesu Kalaisitetiʼmo alagepa huʼa maige maige huʼa maisaya yaʼmo apamisiyafeʼmae.

Currently Selected:

Lomu 5: kyg2013

Highlight

Copy