ACTS 7

Stephen ách'ą́ą́h yálti'

1Ákohgo aláahgo náá'iiłniihii Stephen ííłní, Ádaniłnínígíísh t'áá aaníí? 2Áko Stephen haadzíi'go ání:

Shik'isóó, shahastóí danohłíinii, dashíínółts'ą́ą́'. Nihizhé'é yę́ę Éíbraham, t'ah doo Héíranjį' iinééhgóó, Mesopotéímiyagi naaghá yę́ędą́ą́', Diyin God bits'ádi'nílíidii bich'į' yit'íní í'diilyaa, 3áádóó bich'į' haadzíi'go ání, Nikéyahdóó índa nik'éí bitahdóó haninééh, áádóó kéyah bii' ná'adideeshnihíjį' díínééł.#Gen. 12:1. 4Áko Kaldíya dine'é bikéyahdóó hajíínáago, Héírangi kénááhojit'į́į́ nít'éé'.#Gen. 11:31. Áádóó hazhé'é yę́ę daaztsą́ą́dóó bik'ijį', Diyin God bik'ehgo díí kéyah biyi' kéédahoht'ínígíí biih jííná,#Gen. 12:4. 5áádóó éí kéyahígíí bikáa'gi hóó' dooleełii doo ła' hainíláa da, hakee' bíighahgo bikáá' nizhdidool'is nidi dooda, azhą́ íídą́ą́' ha'áłchíní t'ah doo haleeh da nidi, hó áádóó ha'áłchíní náás ahoolchííłgóó daabíí' dadooleełgo haidiní'ą́.#Gen. 12:7; 13:15; 15:18; 17:8. 6Díígi át'éego Diyin God haadzíí', Na'áłchíní ahoolchíłígíí náánáła' kéyahdi dé'éyóní danilį́įgo kéédahat'į́į doo, áadi kéédahat'íinii naa'nil ádahodoolííł, áádóó atídahał'į́įgo dį́įdi neeznádiin nídoohah. 7Nidi ákwe'é dine'é naa'nil ádahoolaaígíí baa nídéesht'įįł, áko éí bik'ijį' índa áádę́ę́' ch'ídahizhdoonéełgo, díí kwe'é haz'ánígi shich'į' nidahojiłáa doo, níigo Diyin God haadzíí'.#Gen. 15:13,14. 8Diyin God ąąh náhineeshgizh bee Éíbraham yił ałha'deet'ą́.#Gen. 17:10-14. Áko Éíbraham éí Áízak há yizhchį́įgo#Gen. 21:2-4. áádóó tseebíí yiską́ągo yąąh néineeshgizh, áádóó Áízak éí Jéíkab há yizhchį́,#Gen. 25:26. ákohgo índa danihizhé'é yę́ę éí naakits'áadah dine'é yiląąjį' naazį́į́ nít'é'ígíí Jéíkab bá niheezhchį́.#Gen. 29:31—35:18.

9Áko alą́ąjį' danihizhé'é yę́ę Jóseph dayoołch'į́įdgo#Gen. 37:11. Ííjipgóó nidahwiisnii',#Gen. 37:28. nidi Diyin God hoł hólǫ́ǫ́ nít'éé',#Gen. 39:2,21. 10áko bik'ee ti'hwiizhdoonihii t'áá ałtso yits'ą́ąjį' yisdáhóółtį́, índa Ííjipgi aláahgo naat'áanii nilíinii Féro yolyéhígíí bił jílį́įgo índa bee hódzáanii hwee hólǫ́ǫgo áhoolaa, áko Féro éí Ííjip kéyahgi índa bighan haz'ą́ągi t'áá ałtsoní binanit'a'í jílį́įgo áhoolaa.#Gen. 41:39-41. 11Áádóó Ííjip índa Kéínan kéyahgi t'áá át'éé nít'éé' hodííchįįd, índa ayóó át'éego ti'dahojoonííh, áko danihizhé'é yę́ę, dayíłkįįd dooleełii t'áá bá bídin hóyéé' nít'éé'.#Gen. 42:1,2. 12Nidi Jéíkab éí Ííjipgi tł'oh naadą́ą́' hólǫ́ǫgo jíínii'go danihizhé'é yę́ę éí átsé ákóyaa dajííł'aad. 13Áádóó naakidi aleeh góne' ákóyaa náájíkaigo Jóseph bił hajííjéé' nilį́įgo hach'į' ádééhooszįįd,#Gen. 45:1. áko Féro éí Jóseph yił háájéé' yééhoosįįd.#Gen. 45:16. 14Áádóó Jóseph bizhé'é Jéíkab índa bik'éí danilíinii t'áá ałtso, tsosts'idiindóó ba'aan ashdla' yilt'éego,#Gen. 46:27. hágo yiłníigo yíká i'ííł'a',#Gen. 45:9,10,17,18. 15índa Ííjip góyaa Jéíkab ajíínáago#Gen. 46:1-7. t'áá áadi dadziztsą́.#Gen. 49:33. Danihizhé'é yę́ę ałdó' t'áá áadi daneezná, 16áko Shííkemgi nidaho'diishjaa'go, ákwe'é tséní'ootséél góne' yóó'ádaho'diilyaa, éí Éíbraham jílíinii Héímor biye'ké béeso baazhnínilgo tséní'ootséél baa nidziisnii' nít'éé'.#Gen. 23:3-16; 33:19; 50:7-13; Josh. 24:32.

17Nidi Diyin God éí Éíbraham yeidiní'áanii bohodoolníłígíí bich'į' hoolzhishgo, Ííjipgi Éíbraham bidine'é k'ee'ąą dínéest'ą́ągo t'óó ahayóí silį́į́'. 18Ákohgo índa Íijip dine'é aláahgo binanit'a'í, Jóseph doo yééhósinii naat'áanii náánásdlį́į́'.#Ex. 1:7,8. 19Éí nihidine'é yę́ę na'adlo' yee atídayííł'įįdgo#Ex. 1:10,11. danihizhé'é yę́ę bada'áłchíní yázhí dadínóonééł biniyé t'áákáajį' ch'ídahohjááh, deiłníigo.#Ex. 1:22. 20Ákwe'é hoolzhish yę́ędą́ą́' Mózes ho'dizhchį́įgo t'áá íiyisí jízhóní. Hazhé'é bighangi haa áháyą́ągo táá' nídeezid,#Ex. 2:2. 21áádóó t'áákáajį' ch'ího'deeltį́įgo, Féro bitsi' náhodiiłtį́įgo t'áá bí biyáázh jílį́ nahalingo honeesą́.#Ex. 2:3-10. 22Áko Mózes éí Ííjip dine'é bibee hódzáanii t'áá át'é bíhodi'yiil'ą́ą́', áádóó hazaad índa hanaanish bee ayóó ájít'é dzizlį́į́'.

23Dízdiin honááhaigo hak'isóó danilíinii éí Ízrel ba'áłchíní bitaa deeshaał jiniizį́į́'. 24Áko ła' atíbi'dil'į́įgo jiiłtsą́ągo bich'ą́ą́h ajííyáago Ííjip diné nilíinii bił niizhníłts'ingo k'éézhdiidlaa. 25Jó, dahak'isóó t'áá hó hanahjį' Diyin God yisdábidooniłígíí yaa ákodanízin hanii jiniizį́į́', nít'éé' doo yaa ákodanízin da lá. 26Biiskání ła' ałk'i náánéílwod léi' baazhníyá, áko k'é ná'ahididoo'niił biniyé kóbijiní, Shoo, hastóí, ałk'isyee' nohłį́, ha'át'íishą' biniyé atí'ahoł'į́? 27Nidi bik'is bąąhági ííł'į́ nít'é'ígíí nahjį' honíyilgo áháłní, Háishą' nihinanit'a'í nílį́įgo áádóó nihá nihoyí'aahgo ániilaa? 28Da' adą́ą́dą́ą́' Ííjip dine'é ła' síníłhį́ yę́ęgi át'éego shíísh ałdó' shidiyííłhééł? 29Áko díí bee ha'oodzí'ígíí biniinaa Mózes dashdiilwod, áádóó kéyah Mídiyan hoolyéedi dé'éyóní jílį́įgo#Ex. 2:11-15. áadi haye' naaki há yizhchį́.#Ex. 18:3,4.

30Áadi dízdiin honááhaidóó bik'ijį', Dził Sáínai binaagóó honoojíigi, dówózhii biyi'dóó kǫ' dah nídíno'go biyi'dóó diyingo naal'a'í hach'į' ííshjání í'diilyaa. 31Áko Mózes éí bik'izhníghalgo bik'ee t'óó hoł ahóóyóí, áko áhánídóó jidínóoł'įįł biniyé bich'į' nizhníyá, nít'éé' Bóhólníihii haadzíi'go jidiizts'ą́ą'go ání, 32Shí danizhé'é yę́ę biDiyin God nishłį́, Éíbraham biDiyin God, áádóó Áízak biDiyin God, índa Jéíkab biDiyin God nishłį́. Áko Mózes hatah hoditłidgo jidídóo'įįłgi bíká jíítiid. 33Nít'éé' Bóhólníihii áháłní, Nikee' hadiidlé, háálá sínízínígi hodiyingo haz'ą́. 34Ííjipdi shidine'é ti'dahooníihgo t'áá aaníí yiiłtsą́, áádóó dadi'níigo diséts'ą́ą́', áko yisdádeeshnił biniyé hadááyá. Áko tį', k'ad Ííjipgóó nándeesh'aał.#Ex. 3:1-10.

35Díí Mózes, Háishą' nihinanit'a'í nílį́įgo áádóó nihá nihoyí'aahgo ániilaa?#Ex. 2:14. dahałníigo doo dahoniizį́į' daígíí, t'áá éí Diyin God naat'áanii índa yisdázhdooniłii jílį́įgo áhoolaa, dówózhii biyi'dóó diyingo naal'a'í hach'į' í'diilyaii binahjį' hóół'aad. 36Mózes éí Ííjipgi#Ex. 7:3. áádóó Tónteel Łichíí'#Ex. 14:21. yolyéego siyínígíí bik'ee t'óó ił ahayóigo ádahooníiłii índa Diyin God bibee adziilii bee béédahózinii ííł'į́įgo honí'eezh, índa honoojíidi dízdiin nááhaijį' nijildeehgo#Num. 14:33. ałdó' ákódzaa. 37Díí Mózes éí Ízrel dine'é áyidííniid, Bóhólníihii nihiDiyin God shííł'aadígi át'éego nihik'isóó bitahdę́ę́' bá halne'ii ła' nihich'į' yidooł'aał#Deut. 8:15,18. [éí dadidoohts'į́į́ł]. 38Díí lá Mózes, honoojíidi áłah azlį́į'gi danihizhé'é yę́ę bił diyingo naal'a'í Dził Sáínaidi hach'į' haadzíi'ii#Ex. 19:1—20:17; Deut. 5:1-33. ájít'į́ ni; éí saad hináanii nihá hwee hazlį́į'go nihaazhdiní'ą́. 39Danihizhé'é yę́ę doo hak'eh dahół'į́į́góó, nahjį' hódeizyilgo, nát'ą́ą́' Ííjip góyaa atsíńdaazkééz, 40áko Éran yich'į' hadaasdzíi'go ádadííniid, Diyin nihilą́ąjį' hoo'į́į dooleełígíí nihá ádadíílííł, háálá Mózes, Íijipdóó ch'ínihiní'eezhii, háájí shį́į́ dzizlį́į'go doo nihił béédahoozin da.#Ex. 32:1. 41Áko íídą́ą́' béégashii yáázh yida'iilaa, áko be'elyaii yich'į' nááda'iiłniih áádóó t'áá bí bíla' yee ádayiilaii yaa bił dahóózhǫǫd.#Ex. 32:2-6. 42Nidi Diyin God hats'ą́ąjį' ádzaago yá biyi'di hiníláii bich'į' nidahojiłáa doogo yaa hodiní'ą́, t'áá Diyin God yá dahalne'ii binaaltsoos yik'eda'ashchį́ yę́ęgi át'éego:

Jó, Ízrel dine'é nohłíinii, da' nihíísh honoojíidi dízdiin nááhaijį'

nidaaldlooshii nidaaztseedígíí áádóó náádahaniihii hanii shich'į' náádahołniih nít'éé'?

43Áádóó Mólak diyin bidi'níinii biníbaal nidaah'áá nít'éé',

áádóó Rémfan, diyin bidi'níinii bisǫ' nidaah'áá nít'éé';

éí be'elyaii bich'į' nidahohłáa doogo ádaahłaa,

áko shí t'éiyá Bábilan bilááhgóó anihidínéeshkał.#Amos 5:25-27.

44Danihizhé'é yę́ę honoojíidi níbaal bii' hodílzinii éí neeznáago bik'eh ó'oo'níiłii bee bééhániihii bii' sinilii bił hólǫ́, t'áá Diyin God éí Mózes t'áá jiiłtsánígíí bik'ehgo ádíílííł ho'doo'niid yę́ęgi át'éego ályaa.#Ex. 25:9,40. 45Jó, éí danihizhé'é yę́ę bitah hoolzhishgo náás deiní'ą́. Diyin God éí ał'ąą dine'é kéyah yikáá' kéédahat'į́ yę́ędóó nahjį' hainííłkaadgo danihizhé'é yę́ę bíí' daazlį́į́'. Áko Jáshowa hoo'ishgo níbaal bii' hodílzinii éí kéyah biih dadziz'ą́.#Josh. 3:14-17. David naat'áanii nilį́ yę́ęjį' ákwii si'ą́ą́ nít'éé'. 46David éí Diyin God bił jílį́į́ nít'ée'go Jéíkab biDiyin God hólǫ́ǫ dooleełgi áhozhdoolííł biniyé jííkeed.#2Sam. 7:1-16; 1Chr. 17:1-14. 47Nidi Sálamanda Diyin God yá kin áyiilaa.#1Kgs. 6:1-38; 2Chr. 3:1-17. 48Ákondi Aláahgo Ayóó'ájít'éii yílá bee kin ályaii doo bii' kééhojit'į́į da; Diyin God yá halne'ii ánínígi át'éego:

49Yádiłhił éí shibik'i dah asdáhí bikáá'dóó nahash'áii át'é,

áádóó nahasdzáán éí shibik'i dah adées'eezí át'é.

Kin hait'éé shį́įshą' shá ádadoohłííł? níigo Bóhólníihii haadzíí',

Éí doodago haa yit'éego haz'ą́ągishą' hanáshyį́įh doo?

50Da' doósh díidíígíí t'áá ałtso shíla' bee ádaashłaa da?#Is. 66:1,2.

51Ák'eha'į́ bee nihik'os daniłdzilii, nihijéí doo binídahaz'áii índa nihijaa' doo daalzį́į'ii nidahonohłinii, ts'ídá t'áá áłahjį' Níłch'i Diyinii bich'į' dooda bee nidasoołtee'. T'áá danihizhé'é ádaadzaa yę́ęgi át'éego ádaaht'į́.#Is. 63:10. 52Danihizhé'é yę́ęshą' Diyin God yá dahalne'ii háidíígíí t'áadoo atídayiilaa da? Jó, éí Ts'ídá T'áá Ákogi Át'éii doogáłígíí t'áá bilą́ąjį' baa dahojoolne'ii nidahodiztseed, áko doogááł hodoo'niid yę́ę ninádasidoo'ą́ągo dasoołhį́, 53jó, azhą́ diyingo nidaal'a'í bee haz'áanii nihaa deideez'ą́ą nidi t'áadoo bik'eh dahosooł'įįd da.#Gal. 3:19; Heb. 2:2.

Stephen bił nidzílne'

54Áko díidíígíí deidiizts'ą́ą'go, t'áá íiyisí yik'ee bádahazhchįįdgo háhgóó shį́į́ hach'į' biwoo' ahídeidiłk'ash. 55Nidi Stephen, Níłch'i Diyinii hwii' hadeezbingo, yá'ąąsh góde jidiniilgęęzhgo Diyin God bee bits'ádi'nílíidii, áádóó Jesus éí Diyin God binish'náájí sizį́įgo jiiłtsą́, 56áko ájíní, Jó'akon, yá'ąąsh ąą át'éego, Diné Silį́į'ii Diyin God binish'náájí sizį́įgo yish'į́. 57Nidi yéego hadadeeshghaazh áádóó bijeeyi' dáádadeeshchidgo t'áá łahjį' hach'į' dah diijée'go 58kintahdóó ch'ídahazdzį́į́z. Áadi hoł nidadzisne', áádóó hak'i dahodii'áanii dabi'éé' éí dinééh léi' Saul yolyéego yiyaajį' adayiiznil. 59Áádóó Stephen hoł nidzílne'go, Bóhólníihii józhíigo sozdilzingo ájíní, Bóhólníihii Jesus, shii' sizíinii nídiilé. 60Áko nitsizhdinígo'go yéego hadzoodzíi'go ájíní, Bóhólníihii, díí bąąhági ádashił'ínígíí doo bik'ijį' síníł'ą́ą da doo. Áádóó ákózhdííniidgo ájídin.

Currently Selected:

ACTS 7: NVJOB

Highlight

Copy

Want to have your highlights saved across all your devices? Sign up or sign in

Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).

Learn More About Navajo Bible