ACTS 6
6
Hastóí tsosts'id yilt'éego nídii'nil
1Áko íídą́ą́' yoołkáłígíí biyi' ídahooł'aahii lą'í yileełgo, Jew dine'é danilíinii Gríik bizaad yee yádaałti'ii saad dahasłį́į'go Hííbrew dine'é yaa nídaast'įįd, háálá bitahdóó asdzání bąąh ádahasdįįdígíí t'áá ákwíí jį́ bitaa nída'a'nihii doo baa ádahayą́ą da hazlį́į́'. 2Ákohgo naakits'áadahígíí éí ídahooł'aahii t'áá át'é áłah ádayiilaago ádeidííniid, Ch'iyáán nidei'niih doo biniyé Diyin God bizaad nahjį' nidadidiit'áłígíí doo bohónéedzą́ą da. 3Éí bąą, nihik'isóó, hastóí tsosts'id yilt'éego yá'át'éehgo ch'ídabi'dit'áahii, áádóó Níłch'i Diyinii bii' hadadeezbinii índa t'áá íiyisí dahóyáanii nihitahdóó bits'ánóhníiłgo díí naanish bich'į' nidadii'nił. 4Nidi nihí t'éiyá t'áadoo hodiniitłóhí sodizin índa Diyin God bizaad bee nida'niitinígíí doo bik'i didiikah da. 5Éí ha'oodzí'ígíí diné áłah silį́'ígíí t'áá ałtso bił yá'ádaat'ééh, áko Stephen éí diné bi'oodlą' bidziilii índa Níłch'i Diyinii bii' hadeezbinii nídeidiiłtį́, áádóó Philip, áádóó Prákorus, áádóó Naikéínor, áádóó Táíman, áádóó Pármiinas nídeidiinil, índa Ántiyakdę́ę́' Nikoléíyas, Jew dine'é binahagha' yidiiyáá nít'é'ígíí ałdó' nídeidiiłtį́. 6Díí daal'aadii yidááhdóó yił nidaaskai, áko éí sodadilzingo yik'i dah dahideesnii'.
7Áko Diyin God bizaad k'ee'ąą dínéesą́, áádóó Jerúsalemgi ídahooł'aahii t'áá íiyisí k'ee'ąą deeshzhiizh índa nááda'iiłniihii t'óó ahayóí na'nitin woodláanii yik'eh dahół'íinii daazlį́į́'.
Stephen bi'diiltsood
8Áádóó Stephen, oodlą' bee aa hodzódlí índa adziil bee bik'ihodzisdli'go, bik'ee t'óó ił ahayóigo ádahooníiłii áádóó Diyin God bibee adziilii bee béédahózinii diné bitahgóó yaa naayá. 9Nidi diné Béédadeeshchidii#6:9 Diné Béédadeeshchidii, ha'níigo éí Jew dine'é naalte' danilį́į́ nít'ée'go ák'enináda'asdla' éí doodaii' t'óó béédahideeshchid. yolyéhígíí áłah nádleehdóó ła', áádóó Sairíinii hoolyéédę́ę́' dine'é índa Alezáandriya hoolyéédę́ę́' dine'é, Silíshiya índa Éízha hoolyéédę́ę́' dine'é ałdó' ła', nidahaaskaigo Stephen yił ałghada'dit'áahgo yaa nídiikai. 10Nidi bee hódzáanii áádóó Níłch'i Diyinii hahoyiisdzí'ígíí doo yik'eh dadódle' át'ée da. 11Áko t'áá nant'inee t'áá ádzaagóó diné hak'i dahodidoo'áałii ła' shódayoost'e', áádóó éí ádaaní, Saad doo adaaníinii éí Mózes índa Diyin God bee bik'ijį' hadziidziihgo dahosidiits'ą́ą́'. 12Diné áádóó diné yá aląąjį' naazíinii índa bee haz'áanii yínda'niłtinii yádahóółchįįdgo, hach'į' dah diijée'go dahasił, áádóó diné ándaha'áii bidááhdóó nidahazlóóz, 13áádóó t'áá ádzaagóó hak'i dahodidoo'áałii ákwii yił daaskai, éí ádaaní, Díí diné t'áadoo áhodiilzéhí díí hodiyingo haz'ą́ągi índa bee haz'áanii yik'ijį' yáłti', 14háálá, Díí Jesus Názarethdóóígíí éí díí hodiyingo haz'ánígíí íidoołdįįł, áádóó Ízrel dine'é bi'é'él'į', Mózes nihaidiní'áanii łahgo át'éego ánéídoodlííł, jiníigo dahosidiits'ą́ą́'. 15Áko diné ándaha'áii yił naháaztánígíí t'áá ałtso dahodiniilgęęzhgo, hanii'jį' diyingo naal'a'í binii' nahalin silį́į'go dayiiłtsą́.
Currently Selected:
ACTS 6: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
