ACTS 8
8
1Áko Stephen daaztsánígíí Saul bił t'áá áko.
Saul éí Jesus dayoodláanii atííł'į́
Éí bijį́į́dóó Jerúsalemgi da'oodlání áłah nádleehii t'áá íiyisí atídabidil'į́įgo hodeeshzhiizh. T'áá ádzíłtso Judíya índa Samériya kéyahgóó tahodi'nooskaad, t'áá hazhó'ó daal'aadii éí t'áá dooda. 2Hastói dahodísinii ła' Stephen yóó'ádayiilaago t'áá íiyisí haa yínííł danilį́įgo atínídadindleeh. 3Nidi Saul t'áá daakinígi yah ahigháahgo, diné áádóó asdzání ch'íyiidzį́įsgo awáalyaa góne' yah ayiiníiłgo da'oodlání áłah nádleehii t'áá íiyisí atííł'į́įgo yaa naaghá.#Acts 22:4,5; 26:9-11.
Samériyadi hane' yá'át'éehii baa hóóne'
4Áko tahodi'nooskaadígíí saad baa dahojilne'go tádazhdookai. 5Philip, éí Samériyadi kin haal'áá léi' góyaa jiníyáago, ákwe'é Christ bee bił nahodzisne'. 6Áko diné t'óó ahayóí Philip áníinii deidiizts'ą́ą'go áádóó Diyin God bibee adziilii bee béédahózinii baa nijigháhígíí dayiiłtsą́ągo, bee hadziisdzíi'ii aheełt'éego nitsídaakeesgo há deidiizts'ą́ą́'. 7Diné lą'í níłch'i danchxǫ́'ígíí biyi' dahólónígíí bii'dę́ę́' hadahidilgháashgo hadahaazhjéé'; doo bitah nidahwii'nánígíí índa nida'niłhodígíí ałdó' hadaałt'é áńdaalyaa. 8Áko ákwe'é kin haal'áhígi diné t'áá íiyisí bił dahózhǫ́.
9Nidi díí bítséedi diné léi', Sáíman joolyéego, kin haal'áagi álíleego na'adlo' bee nahojiłáago ayóó át'éego ádá yájíłti'go Samériya dine'é t'óó bił adahayóigo ádzósin nít'éé' lá. 10Áko a'oh ádaat'éédóó aláahgo ádaat'éejį' t'áá ałtso dabíists'ą́ą'go ádaaní, Díí diné éí Diyin God bibee adziilii Ayóó'át'éii yolyéhígíí át'į́į́ lá. 11Áko dabíists'ą́ą́', háálá álíleego na'adlo' yee nahałáago diné t'óó bił adahayóí áyósingo nízaadgóó nihoolzhiizh. 12Nidi Philip, éí Diyin God bee bóhólníihgo bił haz'áanii áádóó Jesus Christ bízhi' baa hojilne'go t'óó ahayóí dayoosdląąd, áádóó diné índa asdzání tó bee dabi'doolzį́į́'. 13Sáíman t'áá bí ałdó' oosdląąd, áko tó bee bi'doolzį́į'go Philip yidiiyá. Áko álílee k'ehgo ádahooníiłii índa Diyin God bibee adziilii bee béédahózinii yaa naagháago yiníł'į́įgo, bik'ee t'óó bił ahóóyóí.
14Ákohgo Jerúsalemgi daal'aadii éí Samériya dine'é Diyin God bizaad yaa dadzoozlí'ígíí dayíínii'go, ákǫ́ǫ́ Peter áádóó John adeis'a'. 15Áadi ní'áazhgo Níłch'i Diyinii biih dahodooleeł biniyé bá sozdoolzin, 16háálá łá'í nidi doo ła' bee haleeh da lá, nidi Bóhólníihii Jesus bízhi' t'éí bee tó bee dabi'doolzį́į́' lá. 17Áko yik'i dah dahidilníihgo Níłch'i Diyinii biih dahwiizle'. 18Nít'éé' Sáíman, daal'aadii ak'i dah dahidilníhígíí binahjį' Níłch'i Diyinii aa hidit'aahgo yiyiiłtsą́ągo, béeso yee yooskango 19ííłní, Shí ałdó' éí bee óhólníihii shaa dinoh'aah, áko t'áá háiida bik'i dah dahidishníihgo Níłch'i Diyinii biih dahwiileeh doo. 20Nidi Peter áhodííniid, Nibéeso t'áá bił ánídįįh, háálá Diyin God eidiyii'aahii béeso bik'é nidííléełgo tsídíníkééz! 21Díí ádei'níłígíí t'áá bighąądígi nidi doo nídéét'i' da, háálá Diyin God nijéí yiníł'į́įgo doo bił ákwii át'ée da. 22Éí bąą nichǫ́'ógo tsídíníkézígíí łahgo át'éego bąąh tsíńdíkeesgo Diyin God néinikąąhgo, T'áá shiyi'ídi doo ákǫ́ǫ́ tsídíkéezii shá yóó'adí'aah, bidiní. 23Háálá ak'e'diniih bee nił niiłch'iihii nii' hééł lá, índa bąąhági át'éii ádíniistł'ǫ́ǫ́ lá. 24Áko Sáíman haadzíi'go ání, Bóhólníihii shá náohkąąh, áko eii bee haohdzí'ígíí doo shik'i hwiidooleeł da.
25Áko ákwe'é Peter áádóó John oo'íinii k'ehgo haleebee nahasne', áádóó Bóhólníihii bizaad baa hojoolne'dóó bik'ijį' Jerúsalemgóó níjoot'ashgo, Samériya dine'é lą'í bikin dah naazhjaa'góó hane' yá'át'éehii baa hojoolne'.
Philip áádóó Iithiyópiyadę́ę́' yúnak nilíinii
26Bóhólníihii bidiyingo naal'a'í ła' Philip yich'į' haadzíi'go ání, Nídiidáahgo, shádi'áahjigo Jerúsalemdóó Géízagóó atiiníjį' dínááh. Éí honoojíígóó atiin. 27Áko nízhdii'na'go dashdiiyá. Nít'éé' diné léi', yúnak#Mt. 19:12. nilį́įgo t'áá íiyisí bóhólnííh, Iithiyópiyadóó asdzą́ą́ naat'ááh Kándasii yolyé, éí binaalye'é t'áá ałtso bá baa áhojilyą́, áko Jerúsalemdi Diyin God bich'į' nahozhdoołaał biniyé ákǫ́ǫ́ nijiyá, 28áko Diyin God yá halne'ii Aizéíyah binaaltsoos jółta'go hatsinaabąąs bijáád naakiígíí bii' dah dzizdáago níjoodááł. 29Níłch'i Diyinii éí Philip áyidííniid, Nílááh, tsinaabąąs bíighahgi ninínááh. 30T'áá áko Philip áadi yílwod, nít'éé' Diyin God yá halne'ii Aizéíyah binaaltsoos yółta' lágo jidiizts'ą́ą'go ábijiní, Yíníłta'ígíísh t'áá bik'idi'yiitįįh? 31Nít'éé' ání, Haash yit'éego bik'idi'deeshtį́į́ł? Ła'da yínashineestą́ą'go t'éiyá. Áko Philip ábizhdííniid, Wóshdę́ę́' hasí'néehgo shíighahgi dah nídaah. 32Kót'éego Diyin God bizaad bee ak'e'ashchínígíí yółta' lá:
Na'atseedjį' dibé yidlósígi át'éego,
dibé yázhí t'áadoo áníní tábididoogishii yidááhdóó sizínígi át'éego,
hazéé' t'áadoo ąą ájiilaa da.
33Áko a'ohgo ájít'éii áho'diilyaago doo ákót'éégóó haa hwiiníst'įįd.
Háishą' oochíiłii bii' jiinánígíí hazhó'ó yaa hodoolnih?
Háálá nahasdzáán bits'ą́ąjį' hwii' sizíinii nídiilyá.#Is. 53:7,8.
34Áko yúnak éí Philip ííłní, Nanídíshkid, Diyin God yá halne'iishą' háí yaa halne'? T'áásh bí ádaa halne', náánáła' daats'í yaa halne'? 35Áko Philip ayá'niiłti'go, díí Diyin God bizaad bee ak'e'ashchínígíí deezt'i'dóó Jesus baa hane' yá'át'éehii bee bił hojoolne'. 36Áádóó t'áá náás jookahgo tó hólǫ́ǫ́ léi'gi jíkai, áko yúnak ání, Jó, ákǫ́ǫ́ tó! Tó bee shidi'doolzįhígíishą' ha'át'íí yidínóołtł'ah? 37[Philip áháłní, Nijéí t'áá át'é bee iisínídląądgo lą́ą. Áko yúnak haadzíi'go ání, Jesus Christ éí Diyin God biYe' nilį́įgo wooshdlą́.]#8:37 Saad ła' áádóó saad naazhjaa' ła' kót'éego daasdzohígíí [ ] bita'gi dabiká'ígíí éí Diyin God bizaad t'áá ałk'idą́ą́' bee ak'eda'ashchínígíí doo t'áá ałtso dabikáa' da, nidi ła' t'éiyá dabikáá'. 38Oołbąsii, Łį́į́' ni'ánílééh, bizhdííniid, áko Philip éí yúnak bił taah jíí'áazhgo tó bee jíísį́į́'. 39Táyi'dę́ę́' háájísht'áazhgo, Bóhólníihii biNíłch'i Diyinii éí Philip néidiiłtį́, áádóó yúnak t'áadoo náhoołtsą́ą da, nidi bił hózhǫ́ǫgo nihináánádzá. 40Nidi Azótas hoolyéedi Philip ho'diiltsą́, áko kin hadaas'áágóó kintah ch'íjiigháahgo hane' yá'át'éehii baa nahojilne'go Sesaríyagi jiníyá.
Currently Selected:
ACTS 8: NVJOB
Highlight
Share
Copy
Want to have your highlights saved across all your devices? Sign up or sign in
Navajo Bible © 2000 American Bible Society. All rights reserved.
Bible text from the Navajo Bible is not to be reproduced in copies or otherwise by any means except as permitted in writing by American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org).
