SOERA NEHEMIA FAZA 9.
FAZA 9.
I. Mangaloeloe ira chõ Lowalangi. II. Mangandrõ faʼahachõ dõdõ Lowalangi Nono Lewi. III. Lafoeli laʼaroʼõ wawoeʼoesa li andrõ.
1I. Ba ba zi doea woeloe a õfa ba mbaw̃a daʼõ, ba owoelo Ndraono Gizeraëli, mamoni ba gõ ira ba baroe gonigoni mbaroera, ba no lalaoe gawoegawoe ba hõgõra. (Jon. 3, 5). 2Ba laʼoniagõ ira ba niha bõʼõ fefoe ngaʼõtõ Ndraono Gizeraëli, ba so ira ba laʼombachaʼõ horõ, fabaja lalõ ndra toeara mege. 3Ba moezizio ira ba nahara andrõ, ba so zombaso soera goroisa Lowalangira Jehowa, matonga zi matonga loeo waʼara, ba matonga zi matonga loeo gõi waʼara wangombachaʼõra horõra, ba lafalõgoe tooe ira fõna Lowalangira Jehowa.
4II. Ba ba harehare andrõ iaʼagõ Ono Lewi, ira Jesoea, Bani, Kadimiëli, Sebania, Boeni, Serebia, Bani, Chenani, ba laʼangarõfi li Lowalangira Jehowa, laʼeboeaʼõ lira. 5Ba hoemede Nono Lewi andrõ, ira Jesoea, Bani, Kadimiëli, Hasabineja, Serebia, Hodia, Sebania, Fetaja, lamane: ”Mifaoso, misoeno Jehowa, Lowalangimi, gõtõgõtõ waʼara? Ba nisoeno dõimõ andrõ, seboea toeria, si no manaloeʼi fangandrõ saoha gõlõ fefoe, awõ wanoeno! 6Ha jaʼoegõ, Jehowa; no jaʼoegõ zamazõchi banoea si jaw̃a, banoea si jaw̃a iroegi ba wondrege, awõ ngahõnõ andrõ chõnia, ba tanõ, awõ nõsi goeli danõ fefoe, ba asi, awõ nosinia fefoe, ba oi jaʼoegõ zangorifi, ba no sangaloeloe chõoe ngahõnõ andrõ ba mbanoea si jaw̃a. (Moz. I. 1, 1. Moz. V. 10, 14. Sin. 146, 6). 7No jaʼoegõ, Jehowa, Lowalangi, sanoejoe mege Aberamo, sangeheta jaʼia ba Goeri ba danõ Galedaia, sameʼe tõinia Aberahamo andrõ. (Moz. I. 11, 31; 17, 5). 8Ba me no õʼila dõdõnia, wa no si tebai farõi chõoe, ba no õfaboeʼoe sibai chõnia, õbeʼe ba maʼoewoenia danõ Ndrawa Ganaʼana andrõ ba tanõ Ndraono Cheti ba tanõ Ndraono Gamori ba tanõ Ndraono Weresi ba tanõ Ndraono Jeboesi ba tanõ Ndraono Girigasi, ba no õtõrõ nifaboeʼoemõ, me no satoelõ ndraʼoegõ. (Moz. I. 15, 6; 12, 7). 9Ba me õʼila wamakao ndra toeama ba danõ Miseraji, ba fangarõngarõra ba mbewe nasi zoechoe, (Moz. II. 3, 7; 14, 10), 10ba õlaoe zahõlihõli dõdõ ba ilaʼila chõ Waraʼo ba ba genoninia fefoe ba ba mbanoea ba danõnia fefoe, me no õʼila, wa no lafakao ira [ndra toeama]; ba no õʼeboeaʼõ dõimõ, iroegi maʼõchṍ andre. 11Ba asi, ba õfabali fõnara, tobali latõrõ daloe, abeʼe lalara; ba solohi jaʼira, ba õtiboʼõ ba namõ, hoelõ gara, ba zabõlõ hooe. (Moz. II. 15, 10). 12Ba õfasao ira boto lawoeo na maʼṍchõ ba boto galitõ ba zi bongi, ba wohagaini lalara nitõrõra. 13Ba mõiʼõ tooe, ba hili Zinaʼi, hoemede ndraʼoegõ chõra, moroi ba zoroego, õbeʼe chõra hoekoe satoelõ ba oroisa si ndroehoe; amachoita ba oroisa si sõchi õbeʼe chõra. (Moz. II. 19, 20). 14No õʼombachaʼõ chõra loeo sabato andrõ chõoe, niʼamoniʼõ, ba oroisa ba amachoita ba hoekoe õfaw̃aʼõgõ chõra chõ genonioe Moze. 15Ba no õbeʼe chõra koee moroi ba mbanoea si jaw̃a, ba waʼolofora, ba idanõ õfangoemboe ba gara, me owõchi dõdõra. Ba no õw̃aʼõ chõra weʼamõi ba danõ andre, ba wangochõgõ jaʼia, nifaboeʼoemõ chõra, õbeʼe chõra, me õʼoroʼõ dangaoe [ba wahõloesa]. (Moz. II. 16, 15; 17, 6). 16Ba ira toeama, ba fajaw̃a ba no abeʼe mbõrõ doeʼi, ba lõ laʼoʼõ goroisamõ andrõ. 17No techõra wamondrongo, ba lõ itõrõ tõdõra zahõlihõli dõdõ andrõ, nilaoemõ chõra mege, manandro ira ba latoejoe zolohe jaʼira, ba wangawoeli ba waʼasawoejoe ba danõ Miseraji. Ba no Lowalangi somasi mameʼe aefa horõ ndraʼoegõ, ba seboea tõdõ, ba sahachõ tõdõ ba sebolo tõdõ, ba si fahõna faʼasõchi dõdõ [ba niha] ba lõ niʼerogõoe jaʼira. (Moz. IV. 14, 4. Moz. II. 34, 6). 18Ba he me lafazõchi nono zaw̃i nifahele ba me lamane: Daʼõ Lowalangimi, sangeheta jaʼami ba danõ Miseraji mege, me laʼabõlõgõ wangoʼaja [jaʼoegõ], (Moz. II. 32), 19ba no lõ niʼerogõoe jaʼira ba danõ si mate, ba waʼahachõ dõdõoe andrõ, si no eboea: lõ saheta chõra mboto lawoeo andrõ ba zi maʼṍchõ, ba wamasao jaʼira ba lalara, ba he boto galitõ andrõ, ba zi bongi, ba wohagaini lalara, nitõrõra. 20Ba no õbeʼe chõra Gehehamõ andrõ, si sõchi ba wamahaõ jaʼira, ba lõ nibõdaoe ba mbawara ”mana” andrõ, ba no õbeʼe gõra idanõ, na owõchi dõdõra. (Moz. II. 11, 17). 21Ba no õrorogõ ira ba danõ si mate, õfa woeloe fache waʼara, tobali lõ ambõ chõra hadia ia; lõ sadoedoe noechara ba lõ sabao gahera. (Moz. V. 2, 7; 8, 4). 22Ba no õbeʼe chõra gamatõrõw̃a [niha bõʼõ] ba soi [bõʼõ]; ba no õfaosa daʼõ, õhonogõi nola, ba laʼochõgõ danõ Zihona andrõ, tanõ razo Hesibona, ba tanõ Ogi andrõ, razo Mbazana. (Moz. IV. 21, 21 b. t.). 23Ba no õʼojaʼõ ngaʼõtõra, no timba ndrõfi ba mbanoea si jaw̃a waʼoja õbeʼe, ba no õʼohe ba danõ andrõ nitoetoeroe tanõra, ba wangochõgõ jaʼia, dali nifaboeʼoemõ chõ ndra toeara. 24Ba iraonora zondroegi, ba laʼochõgõ danõ andrõ, ba õbeʼe barõ mbawara niha ba danõ, Dawa Ganaʼana andrõ, õbeʼe ba dangara ira, he razora, ba he niha sato ba danõ, enaʼõ balazi manõ ira, he lawisa chõra. 25Ba atoeʼa ira ba mbanoea saro, ba laʼochõgõ danõ, satabõ sinanõ, fabaja omo niha, ba zi no fahõna ngawalõ gamagama, ba he baʼa nichaoe ba kaboe nagoe ba kaboe zai ba eoe sowoea, waʼoja. Ba mangamanga ira, ba aboeso ba esolo, laʼomoesoiʼõ dõdõra ba waʼobõwõmõ andrõ. 26Ba manandro ira, ba lalaw̃a ndraʼoegõ, ba laʼerogõ goroisamõ andrõ; ba samaʼeleʼõ andrõ, sanenaw̃a jaʼira, ba wolohe mangawoeli jaʼira chõoe, ba laboeboenoe, ba laʼabõlõgõ wanandraw̃aisi [jaʼoegõ]. 27Ba õbeʼe ira ba danga zamakao jaʼira; ba lafakao ira. Ba na no tosasa ira, ba laʼangarõfi li ndraʼoegõ, ba õfondrondrongo lira, moroi ba zoroego, ba õʼasogõ chõra zangorifi, ba waʼahachõ dõdõoe andrõ, si no eboea, enaʼõ daʼõ zangefaʼõ jaʼira ba danga zamakao jaʼira. (Sangoehoek. 2, 14). 28Ba ha siʼaikõ lõ hadia ia chõra saʼae, ba lafoeli lalaoe zi lõ sõchi fõnaoe, ba õfoeli õloeloe ira ba danga nemalira, enaʼõ daʼõ zalaw̃ara. Ba lafoeli laʼangarõfi li ndraʼoegõ, ba õfondrondrongo lira, moroi ba zoroego, ba õʼorifi ira, ba waʼahachõ dõdõoe andrõ si no eboea, ha me oega. 29Ba õfangelama ira, enaʼõ lafoeli laʼoʼõ goroisamõ; ba no si fajaw̃a ira, ba lõ lafondrondrongo goroisamõ, ba lasawõ nifachoimõ andrõ, nibeʼe fangorifi zoloʼõ enaʼõ. No abeʼe mbõrõ doeʼira, laʼerogõ ndraʼoegõ, manandro, lõ lafondrondrongo lioe. (Moz. III. 18, 5). 30Ba sebolo tõdõ ndraʼoegõ chõra, ha me oega fache, ba õfangelama ira Ehehamõ, nifaʼema zamaʼeleʼõ andrõ, ba lõʼõ zoei lafondrondrongo. Ba õbeʼe ira ba danga niha ba danõ, niha baero, (Raz. II. 17, 13. Ngaʼõt. II. 36, 15), 31ba ba waʼabõlõ waʼahachõ dõdõoe andrõ, ba lõ õhori ira, ba lõ õfaloea wangerogõ jaʼira, me no Lowalangi seboea tõdõ ba sahachõ tõdõ ndraʼoegõ.
32III. Ba ijaʼe, jaʼoegõ Lowalangima, Lowalangi seboea ba sabõlõ ba sataʼoe niha, si lõ mamõhõi fawoeʼoesa li, faʼeboea dõdõ andrõ, bõi bali ambõ faʼeboea wamakao andrõ fefoe, si no gõna ndraʼaga, he razoma, ba he satoeama, ba he ere, ba he samaʼeleʼõ andrõ chõma, ba he ira toeama ba banoeaoe andrõ fefoe, iʼotarai loeo razo Ndrawa Asiria andrõ, iroegi maʼõchṍ andre. 33Ba no dõrõdõrṍ satoelõ ndraʼoegõ, ba daʼõ fefoe, si no gõna ndraʼaga; me no si lõ farõi ndraʼoegõ, ba jaʼaga, ba no seboea horõ. (Moz. V. 32, 4. Dan. 9, 14). 34Ba razoma ba satoeama ba ere chõma ba ira toeama, ba no lõ niʼoʼõra oroisamõ, ba lõ nitõngõnira amachoitamõ ba famarooemõ tõdõra. 35Ba he w̃aʼae ba danõra so ira, nifaʼoeʼoe howoehowoe seboea andrõ, nibeʼeoe chõra, boealaoe, ba danõ sebolo andrõ, satabõ sinanõ, niteheoe chõra, ba lõʼõ zoei lafõndrondrongo limõ, ba lõ labõhõli mboeaboeara si lõ sõchi andrõ. 36Hiza, jaʼaga andre, ba no sawoejoe ijaʼe, ba tanõ andre, nibeʼeoe chõ ndra toeama, enaʼõ laʼā mboeania, awõ zi sõchi andrõ chõnia — ba danõ daʼõ no sawoejoe ndraʼaga. 37Boeania sabõlõ andrõ, ba no razo andrõ, nibeʼeoe barõ mbawa jaʼaga — bõrõ horõmā andrõ — zi manga; jaʼira zamatõrõ botoma ba oerifõma, ba zomasi ira, ba no tobali seboea famakao ndraʼaga.”
Currently Selected:
SOERA NEHEMIA FAZA 9.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.